Matiye 4
4
Sata̧n lélaw a Zezú ka lawkɔ́r
(Mrk 1:12-13; Luk 4:1-13)
1Dáy Têm Pukí ɓá Zezú sé ɓil lawkɔ́r, ɓay a Sata̧n ké lé nɛ́. 2A fal ka Zezú niŋ sêe bonɛŋ rá̧ sû̧ŋ bonɛŋ, táŋ sɔ̧́lâʼay, nzala í nɛ́. 3Sata̧n, Njuku léhɛ̧, gí gbɛ́ŋɛ́ a sa hí̧ nɛ́ ɓá: «Mɔ̌ mí ɓá Gun a Gáŋvbôn lé, mɔ́ sa hí̧ saw nɛ́, ké fere tɛ̧́ biré hí̧ mɔ́.» 4Dáy Zezú fere a sa hí̧ nɛ́ ɓá: «Kú ɗé ka̧n ɓil Mbété ɓá: “Njuku tí kaw ɓay tûl lâʼa mbêw yáŋ nyá dáy, a ŋgboro a ɓay too ka tɛ̧́ ka nzáʼa a Gáŋvbôn.”»
5A falké, Sata̧n ɓá nɛ́ sé Zerúzalɛ̂m, pû a táŋáké, a gé ɓá nɛ́ he sé kaw tûl vûn a Gáŋvbôn a sâa, 6a sa: «Mɔ̌ mí ɓá Gun a Gáŋvbôn lé, mɔ́ zɔ sé tísiri, ɓayhí̧lé Mbété sa ɓá:
“Gáŋvbôn e sa hí̧ aŋnze a mɛ̌ri̧
kú e tɔ́ mɔ́,
ɓay a bɔʼɔ, ké zi ná ɓɛ̧ saw a há̧na.”»
7Zezú fere a sa hí̧ nɛ́ ɓá: «Mbété sa kɔ́ ɓá: “Mɔ́ zi ná lé Gáŋmbây, Gáŋvbôn a mɔ̌.”»
8Sata̧n ɗa nɛ́ ɓáy, sé tûl kon, a gáŋ mambáy, ka tɔ́ʼɔ nɛ́ kɔ́rɔ́ tísiri too, rá̧ béla hɛ̧ a ɓilkéri too, 9a sa hí̧ nɛ́ ɓá: «Mi e hí̧ mɔ́ hɛ̧ nɛ́rí̧ too, ka mɔ̌ mí huku mbɛl ní, a hɔ̧́ mí.» 10Dáy, Zezú sa hí̧ nɛ́ ɓá: «Mɔ́ kála a gbaŋ ní gé sá̧ Sata̧n! Ɓayhí̧lé Mbété sa ɓá: “Mɔ́ hɔ̧́ Gáŋmbây, Gáŋvbôn a mɔ̌, a mɔ́ niŋ péna hí̧ ɓá mɛ̌ mbêw yáŋ.”» 11A goló, Sata̧n pɔŋ nɛ́, a kála dáy, aŋnzeri gí gbɛ́ŋɛ́ a gí hí̧ nɛ́ lâʼa.
Zezú tí péna a mɛ̌ a Galilê
(Mrk 1:14-15; Luk 4:14-15)
12Gelka Zezú lá ɓá kú ŋgbá Zâŋ Batís ka̧n vûn sɛl, ké kála sé tísiri a Galilê. 13Ké zi kaw Nazarɛ́t yá, ké kála sé ɓá Kapɛrnahûm, pû a gbaŋ fâ̧w, ka tísiri a Zabilɔŋ rá̧ Nɛftalí. 14Niŋ nǎŋnɔ́ rá̧ ɓayri ka porofɛ́t Ezayí sáy ké niŋ ɓá:
15«Tísiri a Zabilɔŋ, tísiri a Nɛftalí,
a ŋgboro a mbii lúkí a hélkála mbii a Jurdɛ́ŋ
rá̧ Galilê, ka njukuri ka zi tí ɓá Juyífri yáy nárú̧y.
16Njukuri ka kaw ɓil tirí̧ma,
e kó geltáŋa a hɔ̧́náké!
Rá̧ njukuri ka kaw ɓil tirí̧ma ka tísiri a hûl,
geltáŋa e tɛ̧́ hí̧ kuriri!»
17Tí a sêeké nɔ́, Zezú tí tɔ́ʼɔɓay hí̧ njukuri a sa: «I fere káwa a wǎyri, ɓayhí̧lé káwa Mbây a Pû a Gáŋvbôn gí ɗɛ́ŋ dá!»
Zezú ɗí titíla gunbɛʼɛri
(Mrk 1:16-20; Luk 5:1-11)
18Gelka Zezú kaw séséna a gbaŋ fâ̧w a Galilê, ké kó nyînrí̧ sére, Simɔŋ a kú ɗí ɓá Píyɛ́r rá̧ nyîn nɛ́ Anderé, a kaw vbú rii kɔ̧ mbii, ɓayhí̧lé, kú kaw ɓá njuku ŋgbá nzwîyri. 19Dáy Zezú sa hí̧ kuriri ɓá: «Í tɔ́ŋ mí, mi e ɓá wǎyri tɛ̧́ njuku mára̧ njukuri.» 20Núnmbɛ̧́nɛ́, kú pɔŋ rii a kuriri kɔ̧, a tɔ́ŋ Zezú. 21Ké tá sé mbɛl ɓáy, a gé ziŋ nyînrí̧ sére, ɓá Ják rá̧ Zâŋ gun a Zebedéri. Kú e a ɓil kumbôn kuu bâa a kuriri a kaw mɔny rii, dáy ké ɗí kuriri 22Núnmbɛ̧́nɛ́, kú pɔŋ bâa a kuriri rá̧ kumbôn, dáy a tɔ́ŋ nɛ́.
Zezú tɔ́ʼɔɓay, a ŋgɛ́rɛ njukuri
23Zezú há̧ra̧ tísiri a Galilê too, a tɔ́ʼɔɓay, a ɓil vûn mára̧ a Juyífri. Ké tɔ́ʼɔ Bélaɓay, ɓay a káwa Mbây a Pû a Gáŋvbôn, a ŋgɛ́rɛ njuku záŋmári̧ ɓórí ɓórí too, rá̧ njuku kpɛrɛri ka e a bazeŋ a njukuri. 24Njukuri saɓay a mɛ̌ ma tísiri a Sírí too, nǎŋnɔ́, kú fa̧ njukuri too, ka záŋmá ɓórí ɓórí niŋ kuriri, gí gé lé, ɓá báŋa: Njuku záŋmá têm ɓékéri, njuku záŋmá kúkúri, njuku záŋmá mûn a hûlkéri, dáy Zezú gí ŋgɛ́rɛ kuriri too. 25Nǎŋnɔ́, njukuri ɓá ŋgɛ̧́náké tɔ́ŋ nɛ́. Kú gí ka tísiri a Galilê, tísiri dekapôl,#4:25 Dekapôl: Zi ɓay sa ɓá tísiri ka gáŋ pûri erú bôo. tísiri a Zerúzalɛ̂m, tísiri a Judé rá̧ ɓil kaw a helkála mbii a Jurdɛ́ŋ too.
Цяпер абрана:
Matiye 4: pnz
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2023 CABTAL