Bisalu Bibilumbi 17

17
Paul na Silas bamawenda o Thessalonique
1Paul na Silas bamavioyila o Amphipolis na Apollonie na bamatola o Thessalonique agumaba Ndagu Yibenguna yibaJuif. 2Yimaba yilumbu yitsona kabogu Paul amakota o Ndagu Yibenguna nana yifu yiandi yimabila. Amamoganga na batu abamaba vana mu diambu diBisonu. Amadivaganga bilumbu bitsona birieru. 3Amabavindiyila Bisonu na amabalonsa nana Christ amalabila maguga na nana amarambuyila o dufu. Jandi rie: Guluanu, Jesus aji nyidujabisi la Christ eni. 4Bamosi bamatabula diambu ufubana na Paul na Silas, va julu vana baGrec bapuela bamayitsa Nsambi na bagetu basusu wandi.
5Tumba baJuif bamaba na diwavi na bamagukiga bango misosi uyenawenda nobangisa kimbu mbura na mbura. Bamavosanga yiari na yiari uyenabivisa mirima mibatu. Bamawenda o ndagu Jason. 6Banolaba yiri Paul na Silas bagatsi bamagaanga Jason jaʼ beni va mosi na baana bataji basusu na bamababega ombu bivunda. Bamabafunda rie: Babaala bebaba bepupisi batu mirima biari biotsu! Bamatola nesi o dimbu dietu 7na Jason agugu atsibadila. Guluanu besumuni migaga mikaga mu mbari bevosi yiri va kaga jisusu ajinengulungu Jesus.
8Banovosa mambu memana batu botsu nesi bivunda bamanyoga kabu jineni. 9Bivunda bamaruma rie: Jason na bambatsi bandi bafuti migaga. Banofuta bamabapalisa.
Paul na Silas bamawenda o Beree
10Vana mukolu baana bataji bamasindiga Paul na Silas o Beree. Ava bamatolila, bamakota o Ndagu Yibenguna yibaJuif. 11BaJuif beni bamabakelisa uviolila bisi Thessalonique. Bamagulungu malongi liyiyi; yilumbu na yilumbu bamakelulanga Bisonu ujaba yeri ama Paul amalonsa mamaba mangensa. 12BaJuif bapuela bamamavayila yitu na baGrec bapuela wandi. 13Tumba ava baJuif baThessalonique bamajabila yiri Paul elonsingi Mambu maNsambi o Beree bamawenda uyekungisa batu. 14Mbana baana baTaji bamasindiga Paul o yiari yimubu tumba Silas na Timothee bamasiala o Beree. 15Jogu abamayevetsiga Paul bamatola te no Athenes. Mbana bamagabuga o Beree na yilumbi ayi Paul amatinda ombu Silas na Timothee rie: Lensanu noruga.
Paul amalonsa o Athenes
16Ava Paul amavivilanga Silas na Timothee o Athenes amalaba murima utsira mu mbari musiengi uotsu umaba yika bakosi na bakosi. 17Kabogu amamoganga o Ndagu Yibenguna na baJuif na baGrec abamayitsanga Nsambi. Yilumbu na yilumbu amawendanga o dikasa uyemoga na batu abamavioganga. 18Bango diela bamosi: baEpicurie na baStocie bamamoganga nandi wandi. Bamosi bamawivulanga rie: Nduku eni dibandu yi? Basusu bamavosa rie: Yika nderi elonsi mambu mabansambi bangana. Bamavosila nana mu mbari Paul amalonsa mambu maJesus na durambugu duandi.
19Mbana bamamubega o mukongu uMars o mulebi agumanengulungu Areopage na bamamuwivula rie: Tsie turungula ujaba dilongi dieni digona adi guilonsi? 20Mainbu masusu ama guitutsinguli mavu magona kabogu tuirondi umatsiyisa.
21(Bisi Athenes botsu na benyi abamatsananga o Athenes bamaviosanga temu yika uvosanga nogulungu misamu.)
22Paul amamata mukongu uMars, anokota o mulebi ogu amavosa rie: Jenu bisi Athenes, nyilabi yiri duji dusigama mu muyitsa enu. 23Ava nsilingilanga o musiengi enu nsilaba mbura atsi duiyitsingi na nsilaba na yinyensulu yipagu ayivu yisonugu rie: Ombu Nsambi ajigejabunu! Kabogu aji jenu duiyitsi tsiri umujaba, nyudujabisa! 24Nsambi agumasunda bulongu na biotsu abivu muna avu Fumu julu na butamba na agetsani o mandagu maNsambi amamarungu na batu. 25Jandi agesalulu nderi ana nsala yima. Tsiri jandi agumavega monyu na muvumu na bima biotsu ombu batu botsu? 26Ubanda na mutu utega jandi amasunda batu botsu na amabatsanisa yiari na yiari. Vana kala jandi amakunsa temu na amakunsa mbura na mbura na jnandilu wandi. 27Amadivaga yiri bamurombi na ava bemurombili tanguji bomurasuna. Dingensa Nsambi agaa vala netu; 28Mutu amavosa rie:
Etuveyi monyu na etuwendisi;
mu diambu diandi tuvu.
Anana nsiensi tsienu tsimosi tsimavosila rie:
Jetu tuji baana bandi.
29Kabogu pa tuji baana bandi tuyatasa yiri Nsambi ebagunu na kosi jilora vo lora jivema vo jidimanyi ajimavagu na ajimasalu na bungela bumutu.
30Nsambi agemuerangimina buduka abu batu bamalevaganga tumba erondi yiri batu botsu bakaluli diela.
31Jandi amakunsa yilumbu ayi ofundisila batu botsu na dusungugu; bofundusu na mutu agu jandi amasola. Amadilasa ombu batu botsu ava amarambusila mutu eni o dufu!
32Banogulu yiri Paul elonsi mu diambu didurambugu o dufu bamosi bamamudesa na basusu bamavosa rie: Tuirondi yiri gumueruga temu jisusu utulonsa diambu diedidi.
33Kabogu Paul amabaganina. 34Tumba bamosi bamafubana mirima nandi na bamavayila mambu meni yitu: Denys, umosi va gari abamatabulanga bunsonsi o Areopage, mulebi ogu, na mugetu diina diandi Damaris na basusu wandi.

Цяпер абрана:

Bisalu Bibilumbi 17: PUU1992

Пазнака

Падзяліцца

Капіяваць

None

Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце