လ︀ုက︀ႃ 24
24
လ︀ွင︀်ႈꩡ︀ဝ်ႛယ︀ေꩬ︀ုꩫ︀ိပ︀်ပ︀ွက︀်ႉမ︀ႃး
(မ︀တ︀်တ︀ႄး 28.1-10; မ︀ႃက︀ု 16.1-8; ယ︀ေႃးꩭၢꩫ︀် 20.1-10)
1ဝꩫ︀်းတ︀ꩫ︀ီꩫ︀်းက︀ꩫ︀ွေ က︀ၢင︀်ႈလ︀ႂ်ꩡ︀ဝ်ႇꩰမ︀ႆ︀ႛ ၸ︀ူႛယ︀ိင︀်းဢ︀မ︀ႂ်းၵ︀ဝ် မ︀ꩫ︀်းꩭွမ︀်၊ ꩫ︀မ︀်ႇꩭွမ︀်ဢ︀ꩫ︀်ႈၵ︀ဝ်ꩭႅမ︀်းဝႆ︀ႇꩫ︀ႆ︀ႇၵ︀ဝ်ဢ︀ဝ်ႈꩬ︀ီ က︀ႃပ︀ႃꩡ︀ႃႇꩡ︀ဝ်ႛယ︀ေꩬ︀ုဢ︀ူ။ 2ထိုင︀်က︀ီး ꩭိꩫ︀်ဢ︀ꩫ︀်ႈထမ︀်ႛပ︀ႃꩡ︀ႃႇမ︀ႆ︀ႛဢ︀ူတ︀်ဝႆ︀ႇꩫ︀ႆ︀ႇ က︀ိင︀်ႛပ︀ုတ︀်ဝႆ︀ႇꩫ︀ႆ︀ႇမ︀ႆ︀ႛ ၵ︀ဝ်ꩭꩫ︀်ꩬ︀ီ 3က︀ꩫ︀်ႛꩫ︀ႂ်းထမ︀်ႛပ︀ႃꩡ︀ႃႇမ︀ႆ︀ႛ ၵ︀ဝ်ႛက︀ႃဢ︀ူ။ ꩫ︀ႆ︀ႇꩫ︀က︀ေႃႇ တ︀ူဝ်ႈꩡ︀ဝ်ႛယ︀ေꩬ︀ုမ︀ႆ︀ႛယ︀ႃႇ ၵ︀ဝ်ꩵ︀ႈꩭꩫ︀်။ 4ဢ︀မ︀ႂ်းမ︀ႆ︀ႛ ၵ︀ဝ်ꩬ︀ဝ်းꩬ︀ီဝၢင︀်က︀ꩫ︀်ႈက︀ီး က︀ꩫ︀်ႛꩫ︀ႃႛၵ︀ဝ်မ︀ႆ︀ႛ က︀ူꩫ︀်းဢ︀ꩫ︀်ႈၵ︀ိူင︀်ႈဢ︀ꩫ︀်ႈတ︀ွင︀်ꩭိမ︀်ႇꩰꩫ︀ုင︀်ႈ ꩬ︀ွင︀်က︀ူဝ်ႇက︀ꩡ︀ူးဢ︀ွက︀်မ︀ႃးꩬ︀ီ တ︀ႆ︀ၢႛၵ︀ဝ်မ︀ႆ︀ႛꩬ︀ဝ်းဢ︀ူ။ 5ၵ︀ဝ်ယ︀ႃႇက︀ူဝ်ႈꩬ︀ီ ပ︀ႅပ︀်ႉၵ︀ုပ︀်ႉက︀ီး ꩬ︀ွင︀်ၵ︀ႃယ︀ႃႇ “ꩬ︀ူ ꩭီတ︀်က︀ꩬ︀င︀်ꩫ︀ႆ︀ တ︀ီႈဢ︀ꩫ︀်ႈၸ︀ူႛတ︀ႆ︀ၢႈꩫ︀ႆ︀ႇၵ︀ဝ်ယ︀င︀်းမ︀ႆ︀ႛ မ︀ႃးၵ︀ႃက︀ူꩫ︀်းဢ︀ꩫ︀်ႈꩫ︀ိပ︀်ꩫ︀ႆ︀ႇ။ 6တ︀ီႈꩫ︀ႆ︀ႇမ︀ႆ︀ႛ မ︀ꩫ︀်းꩡ︀ဝ်ႛꩵ︀ႈယ︀င︀်း။ ꩫ︀ိပ︀်ပ︀ွက︀်ႉယ︀ဝ်ႇ။ ဢ︀ꩫ︀်ႈမ︀ꩫ︀်းꩡ︀ဝ်ႛ မ︀ိူဝ်ႈတ︀ိူင︀်းက︀ႃလ︀ိလ︀ႄးမ︀ႆ︀ႛ ꩬ︀ူမ︀ႆ︀ႛဝႃႈမ︀ႃးꩫ︀ႆ︀ႇမ︀ႆ︀ႛ ဢ︀ွက︀်ꩡ︀ႂ်ႈက︀ꩫ︀်ႈတ︀ႃႉ။ 7“လ︀ုက︀်ႉက︀ူꩫ︀်းမ︀ႆ︀ႛ လ︀ꩫ︀်ꩬ︀ူမ︀ꩫ︀်းꩡ︀ဝ်ႛၵ︀ဝ် ꩫ︀ႂ်းမ︀ိုဝ်း က︀ူꩫ︀်းဢ︀ꩫ︀်ႈဢ︀ပ︀ႅတ︀်ႉယ︀င︀်းꩫ︀ႆ︀ႇၵ︀ဝ်မ︀ႆ︀ႛ ဢ︀ၢပ︀်ႉꩬ︀ီ မ︀ꩫ︀်းꩡ︀ဝ်ႛမ︀ႆ︀ႛ ၵ︀ဝ်တ︀ီတ︀ွက︀်ꩬ︀ဝ်ဝႃးမ︀ိုဝ်းတ︀ႆ︀ၢႈꩫ︀မ︀်။ ꩫ︀ႆ︀ႇꩫ︀က︀ေႃႇ တ︀ၢင︀်ꩬ︀ၢမ︀်ဝꩫ︀်းမ︀ႆ︀ႛ မ︀ꩫ︀်းꩡ︀ဝ်ႛတ︀ီꩫ︀ိပ︀်ပ︀ွက︀်ႉမ︀ႃးꩫ︀မ︀်” ꩫ︀ꩬ︀ီမ︀ꩫ︀်းꩡ︀ဝ်ႛ ဝႃႈဝႆ︀ႇမ︀ႃးဢ︀ူ” ꩫ︀ဝꩫ︀်ႇ။ 8ꩫ︀ႆ︀ႇမ︀ႆ︀ႛ ၸ︀ူႛယ︀ိင︀်းဢ︀မ︀ႂ်းၵ︀ဝ် ၵ︀ၢမ︀်းမ︀ꩫ︀်းꩡ︀ဝ်ႛမ︀ႆ︀ႛ ဢ︀ွက︀်ꩡ︀ႂ်ႈမ︀ႃးꩬ︀ီ 9လ︀ုက︀်ႉပ︀ႃꩡ︀ႃႇမ︀ႆ︀ႛ ပ︀ွက︀်ႉက︀ႃင︀ႆ︀း တ︀မ︀ၢꩫ︀်ꩡ︀ဝ်ႛꩬ︀ိပ︀်ဢ︀ီတ︀်ပ︀ႃးင︀ႆ︀း တ︀ၢင︀်က︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛ လ︀ွင︀်ႈꩫ︀ႆ︀ႇၵ︀ဝ်တ︀င︀်းမ︀ိူင︀်း က︀ႃၵ︀ႆ︀ႈဢ︀ူ။ 10ၸ︀ူႛယ︀ိင︀်းဢ︀မ︀ႂ်းၵ︀ဝ်ယ︀ႃႇ မ︀ေရ︀ီက︀ူꩫ︀်းမ︀ၢꩫ︀်ႛမ︀ႃက︀တ︀လ︀၊ ယ︀ေႃꩭႃꩫ︀ႃ၊ မ︀ေရ︀ီၸ︀ူႛမ︀ေႈယ︀ႃက︀ုင︀ႆ︀း ၸ︀ူႛယ︀ိင︀်းတ︀ၢင︀်က︀ူဝ်ႇꩫ︀ႆ︀ႇၵ︀ဝ်ꩫ︀မ︀်။ 11ၵ︀ၢမ︀်းၵ︀ဝ်မ︀ႆ︀ႛ တ︀မ︀ၢꩫ︀်ꩡ︀ဝ်ႛၵ︀ဝ်ယ︀ႃႇ ၵ︀ꩫ︀်တ︀ႂ်း ဢ︀ꩫ︀်ႈတ︀ၢꩫ︀်ႛၸ︀ူꩫ︀်တ︀ၢꩫ︀်ႛလ︀ူမ︀်းꩬ︀ီ ꩵ︀ႈယ︀ုမ︀်။ 12ꩫ︀ႆ︀ႇꩫ︀က︀ေႃႇ ပ︀ေတ︀ရ︀ုယ︀ႃႇ ပ︀ႃꩡ︀ႃႇမ︀ႆ︀ႛလ︀ႅꩫ︀်ႈက︀ႃꩬ︀ီ က︀ူမ︀်ႛလ︀ႅမ︀်းဢ︀ူ။ မ︀ꩫ︀်ႛၸ︀ႃႛꩫ︀ႆ︀ႇၵ︀ဝ်မ︀ႆ︀ႛလ︀ိူဝ်ꩬ︀ီ တ︀ၢင︀်ဢ︀ꩫ︀်ႈက︀ꩬ︀င︀်မ︀ႆ︀ႛက︀ေႃႇ မ︀ဝ်ꩭꩫ︀်က︀ီး မ︀ꩫ︀်းဝၢင︀်ꩬ︀ီမ︀ိူဝ်းက︀ႃဢ︀ူ။
လ︀ွင︀်ႈတ︀ပ︀ေးꩡ︀ဝ်ႛꩬ︀ွင︀်ပ︀ႃးမ︀ႆ︀ႛ ပ︀ျႃးတ︀ူဝ်ႈ
(မ︀ႃက︀ု 16.12,13)
13ဝꩫ︀်းဢ︀မ︀ႂ်း တ︀ပ︀ေးꩡ︀ဝ်ႛꩬ︀ွင︀်က︀ူဝ်ႇ မ︀ၢꩫ︀်ႛဢ︀ေမ︀ွက︀် ဢ︀ꩫ︀်ႈတ︀င︀်းဝီင︀်းယ︀ေရ︀ုꩬ︀လ︀ိမ︀် ၵ︀ꩫ︀်ꩡ︀ီတ︀်မ︀ႅင︀်က︀ႆ︀ႈမ︀ႆ︀ႛက︀ႃဢ︀ူ။ 14ꩬ︀ွင︀်ၵ︀ႃယ︀ႃႇ လ︀ွင︀်ႈပ︀ီꩫ︀်ႈမ︀ႃးꩫ︀ႆ︀ႇၵ︀ဝ်တ︀င︀်းမ︀ိူင︀်း ၵ︀ႆ︀ႈက︀ꩫ︀်ႈꩬ︀ီက︀ႃဢ︀ူ။ 15ꩬ︀ွင︀်ၵ︀ႃင︀ႆ︀းꩬ︀ီၵ︀ႆ︀ႈက︀ꩫ︀်ႈꩫ︀ႆ︀ႇမ︀ႆ︀ႛ ꩡ︀ဝ်ႛယ︀ေꩬ︀ုပ︀ိူꩫ︀်ႈꩡ︀ဝ်ႛ လ︀ွေႛမ︀ႃးꩬ︀ီတ︀င︀်းၵ︀ဝ်ꩭူမ︀်ႈက︀ႃဢ︀ူ။ 16ꩫ︀ႆ︀ႇꩫ︀က︀ေႃႇ တ︀ႃႈၵ︀ဝ်မ︀ႆ︀ႛလ︀ၢပ︀်ႉဝႆ︀ႇꩫ︀ႆ︀ႇꩬ︀ီ မ︀ꩫ︀်းꩡ︀ဝ်ႛမ︀ႆ︀ႛꩬ︀ွင︀်ၵ︀ႃꩵ︀ႈမ︀တ︀်ႉ။ 17မ︀ꩫ︀်းꩡ︀ဝ်ႛယ︀ႃႇ “ꩬ︀ူ က︀ႃꩡ︀ႃႉပ︀ႆ︀ႈတ︀ၢင︀်းꩫ︀ႆ︀ႇ လ︀ွင︀်ႈက︀ꩬ︀င︀်ꩫ︀ႆ︀ဝႃႈက︀ꩫ︀်ႈꩫ︀ႆ︀ႇ” ꩫ︀က︀ီး ၵ︀ဝ်ယ︀ႃႇꩡ︀ႂ်ႈꩬ︀ဝ်ႛꩬ︀ီ ဢ︀မ︀ႂ်းမ︀ႆ︀ႛꩬ︀ဝ်းဢ︀ူဢ︀ူ။ 18ꩫ︀ႂ်းꩬ︀ွင︀်ၵ︀ႃမ︀ႆ︀ႛ က︀လ︀ေႃၸ︀ꩫ︀ꩫ︀ႆ︀ႇယ︀ႃႇ “မ︀ႂ်းက︀ူဝ်ႇလ︀ိူင︀်ႈꩫ︀ႆ︀ၢႈꩥ︀ႃ ယ︀ေရ︀ုꩬ︀လ︀ိမ︀်မ︀ႆ︀ႛထိုင︀်မ︀ႃးꩬ︀ီက︀ေႃႇ ဢ︀ꩫ︀်ႈဝူင︀်ႈꩫ︀ႆ︀ႇ ဝီင︀်းဢ︀မ︀ႂ်းမ︀ႆ︀ႛ ပ︀ီꩫ︀်ႈက︀ႃꩫ︀ႆ︀ႇၵ︀ဝ် မ︀ဝ်တ︀ွင︀်းꩫ︀ႆ︀ႇꩫ︀ေႃး” ꩫ︀ဝꩫ︀်ႇ။ 19မ︀ꩫ︀်းꩡ︀ဝ်ႛယ︀ႃႇ “လ︀ွင︀်ႈက︀ꩬ︀င︀်က︀ꩬ︀င︀်ꩫ︀ႆ︀” ꩫ︀က︀ီး ꩬ︀ွင︀်ၵ︀ႃက︀ေႃႇ “လ︀ွင︀်ႈꩡ︀ဝ်ႛယ︀ေꩬ︀ု က︀ူꩫ︀်းဝီင︀်းꩫ︀ႃꩡ︀ရ︀ႅတ︀်ꩫ︀မ︀်။ မ︀ꩫ︀်းꩡ︀ဝ်ႛယ︀ႃႇ ပ︀ရ︀ေႃးၸ︀ႅတ︀်ႉ ဢ︀ꩫ︀်ႈလ︀ွင︀်ႈတ︀ၢꩫ︀်ႛလ︀ွင︀်ႈꩭီတ︀်က︀ူႈလ︀ွင︀်ႈမ︀ႆ︀ႛ တ︀ꩫ︀်းၵ︀ူဝ်းယ︀ႂ်လ︀ူင︀်၊ ပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛ မ︀ႆ︀ႛတ︀မ︀ိူင︀်း ပ︀ၢင︀်ႈꩫ︀ႃႛက︀ူꩫ︀်းꩫ︀ႆ︀ႇၵ︀ဝ်မ︀ႆ︀ႛတ︀မ︀ိူင︀်း ꩫ︀ႆ︀ႛꩫ︀ႃႛလ︀ူင︀်ꩫ︀ႆ︀ႇꩫ︀မ︀်။ 20ꩫ︀ႆ︀ႇꩫ︀က︀ေႃႇ ယ︀ီတ︀်ႉပ︀ရ︀ေႃးꩭိက︀်ႉလ︀ူင︀်ꩭဝ်းꩫ︀ႆ︀ႇၵ︀ဝ်၊ ꩭူဝ်က︀ေꩭဝ်းꩫ︀ႆ︀ႇၵ︀ဝ်ယ︀ႃႇ ꩭႂ်ႛပ︀ူဝ်းမ︀ꩫ︀်းꩡ︀ဝ်ႛမ︀ႆ︀ႛ ပ︀ူင︀်ႈတ︀ၢမ︀်တ︀ႆ︀ၢႈꩬ︀ီ တ︀ွက︀်ꩬ︀ဝ်ဝႃးမ︀ိုဝ်းꩫ︀ႆ︀ႇ မ︀ိုဝ်းꩡ︀ဝ်ႛၵ︀ုꩫ︀်မ︀ႆ︀ႛ ဢ︀ၢပ︀်ႉမ︀ႃးဢ︀ူ။ 21တ︀ူႈယ︀ႃႇ ꩭႂ်ႛပ︀ူဝ်းမ︀ꩫ︀်းꩡ︀ဝ်ႛ ဢ︀ီတ︀်ꩬ︀ြေးမ︀ႆ︀ႛ က︀ေႛၵ︀ျွတ︀်ႉꩭႂ်ႛꩫ︀ႆ︀ႇ တ︀ႂ်းထႃႛဢ︀ူꩫ︀မ︀်။ င︀ႆ︀ႚလ︀ွင︀်ႈꩫ︀ႆ︀ႇပ︀ီꩫ︀်ႈမ︀ႃးꩫ︀ႆ︀ႇ ꩬ︀ၢမ︀်ဝꩫ︀်းထူꩫ︀်ႛယ︀ဝ်ႇ။ 22-23ပ︀ီႈꩫ︀ွင︀်ႇꩭဝ်း ၸ︀ူႛယ︀ိင︀်းက︀မ︀်ႈၸ︀ွင︀်း က︀ၢင︀်ႈလ︀ႂ်ꩡ︀ဝ်ႇꩰ ပ︀ႃꩡ︀ႃႇမ︀ꩫ︀်းꩡ︀ဝ်ႛမ︀ႆ︀ႛ က︀ႃမ︀ႃးꩫ︀က︀ေႃႇ တ︀ူဝ်ႈမ︀ꩫ︀်းꩡ︀ဝ်ႛမ︀ႆ︀ႛ ꩵ︀ႈꩭꩫ︀်မ︀ႃး။ ၵ︀ုꩫ︀်ꩬ︀ၢင︀်ꩫ︀ႆ︀ႇၵ︀ဝ်မ︀ႆ︀ႛꩬ︀ိုင︀် ꩭꩫ︀်ၿျႃတ︀ိက︀်ႉမ︀ႃးဢ︀ူဝꩫ︀်ႇ။ ၵ︀ုꩫ︀်ꩬ︀ၢင︀်ဢ︀မ︀ႂ်းၵ︀ဝ်ယ︀ႃႇ ꩡ︀ဝ်ႛယ︀ေꩬ︀ုဢ︀ꩬ︀ၢက︀်ႉꩫ︀ိပ︀်ဢ︀ူꩫ︀မ︀် ꩫ︀ꩬ︀ီဝႃႈမ︀ႃးꩫ︀ႆ︀ႇꩬ︀ီ တ︀ူႈဢ︀ၢမ︀်းꩰဝၢင︀်ꩰလ︀ူင︀်က︀ႃꩫ︀မ︀်။ 24င︀ႆ︀းꩫ︀ႆ︀ႇꩬ︀ီ လ︀ုက︀်ႉꩫ︀ႂ်းတ︀ူႈမ︀ႆ︀ႛ က︀မ︀်ႈၸ︀ွင︀်းယ︀ႃႇ ပ︀ႃꩡ︀ႃႇမ︀ႆ︀ႛ က︀ႃလ︀ႅမ︀်းက︀ီး ꩫ︀င︀်ၸ︀ူႛယ︀ိင︀်းꩫ︀ႆ︀ႇၵ︀ဝ်ဝႃႈꩫ︀က︀ꩫ︀်ႈ ပ︀ီꩫ︀်ႈတ︀ေႇတ︀ေႇဢ︀ူ။ မ︀ꩫ︀်းꩡ︀ဝ်ႛမ︀ႆ︀ႛယ︀ႃႇ ꩵ︀ႈꩭꩫ︀်မ︀ႃးဝꩫ︀်ႇ” ꩫ︀ဝꩫ︀်ႇ။ 25ꩫ︀ႆ︀ႇမ︀ႆ︀ႛꩡ︀ဝ်ႛယ︀ေꩬ︀ုယ︀ႃႇ “ꩬ︀ူယ︀ႃႇ မ︀ိူက︀်ႉလ︀ူင︀်၊ ၵ︀ၢမ︀်းပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်မ︀ႆ︀ႛ မ︀ဝ်ယ︀ုမ︀်ယ︀မ︀်ႈလ︀ူင︀်ꩥ︀ႃ။ 26ꩡ︀ဝ်ႛၵ︀ရ︀ီတ︀်ယ︀ႃႇ ၵ︀ၢမ︀်ဝေတ︀ꩫ︀ႃယ︀ဝ်ႇꩬ︀ိုင︀် ဝႃႈꩭၢပ︀်ႉမ︀ူꩫ︀်ႈၸ︀ုင︀်းꩫ︀မ︀်ꩫ︀ꩫ︀ႆ︀ႇ ꩬ︀ူမ︀ဝ်တ︀ွင︀်းက︀ျႃး” ꩫ︀ယ︀ဝ်ႇက︀ီး 27ꩬ︀ွင︀်ၵ︀ႃမ︀ႆ︀ႛ က︀ျမ︀်းလ︀ိက︀်ႉတ︀င︀်းလ︀ုင︀်မ︀ႆ︀ႛ လ︀ုက︀်ႉက︀ျမ︀်းꩬ︀ိꩫ︀်မ︀ေႃꩬ︀ေမ︀ႆ︀ႛက︀ူဝ်ꩬ︀ီ က︀ျမ︀်းပ︀ရ︀ေႃးၸ︀ႅတ︀်ႉတ︀င︀်းလ︀ုင︀်မ︀ႆ︀ႛ ဢ︀ꩫ︀်ႈလ︀ွင︀်ႈမ︀ꩫ︀်းꩡ︀ဝ်ႛတ︀ႅမ︀်ႛဝႆ︀ႇꩫ︀ႆ︀ႇၵ︀ဝ် ၵ︀ႆ︀ႈပ︀ျႃးꩭႂ်ႛဢ︀ူ။ 28င︀ႆ︀းꩬ︀ီ ၵ︀ဝ်ꩡ︀ဝ်ႛ တ︀ႆ︀ၢႛမ︀ၢꩫ︀်ႛဢ︀ꩫ︀်ႈၵ︀ဝ်က︀ႃမ︀ႆ︀ႛ ထိုင︀်မ︀ႃးက︀ီး မ︀ꩫ︀်းꩡ︀ဝ်ႛယ︀ႃႇ ꩭႅꩫ︀်းက︀ၢပ︀်က︀ႃဢ︀ိက︀်ဢ︀ူ။ 29ꩫ︀ႆ︀ႇမ︀ႆ︀ႛ ꩬ︀ွင︀်ၵ︀ႃယ︀ႃႇ “ၸ︀ႃႇတ︀ီၵ︀မ︀်ႈယ︀ဝ်ႇ။ တ︀င︀်းꩭၢင︀်းၵ︀ိူဝ်ꩭူမ︀်ႈꩬ︀ဝ်းမ︀ႃးတ︀ႃႉ” ꩫ︀ꩬ︀ီ ꩭွင︀်ႇꩭႅပ︀်ႉက︀ီး မ︀ꩫ︀်းꩡ︀ဝ်ႛက︀ေႃႇ တ︀င︀်းꩬ︀ွင︀်ၵ︀ႃ က︀ႃꩬ︀ဝ်းဢ︀ူ။ 30ၵ︀ဝ်ꩡ︀ဝ်ႛၸ︀ိူꩫ︀်မ︀ႆ︀ႛ ꩭူမ︀်ႈꩫ︀င︀်ႈꩬ︀ီ ꩭႅမ︀်းဢ︀ꩫ︀်ႈက︀ိꩫ︀်ႈက︀ီး ꩡ︀ဝ်ႛယ︀ေꩬ︀ုယ︀ႃႇ ၵ︀ဝ်ႛမ︀ုꩫ︀်းဢ︀ဝ်ႈင︀ႆ︀းမ︀ိꩫ︀်ႛꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ူဝ်းယ︀ွင︀်ႛယ︀ဝ်ႇက︀ီး ꩬ︀ွင︀်ၵ︀ႃမ︀ႆ︀ႛပ︀ꩫ︀်ႈꩭႂ်ႛဢ︀ူ။ 31ꩫ︀ႆ︀ႇမ︀ႆ︀ႛ ဢ︀ꩫ︀်ႈတ︀ႃႈꩬ︀ွင︀်ၵ︀ႃမ︀ႆ︀ႛ လ︀ၢပ︀်ႉဝႆ︀ႇꩫ︀ႆ︀ႇပ︀ုတ︀်မ︀ႃးꩬ︀ီ မ︀ꩫ︀်းꩡ︀ဝ်ႛမ︀ႆ︀ႛ ꩡ︀ဝ်ႛၵ︀ဝ်ꩫ︀မ︀်ꩫ︀ꩫ︀ႆ︀ႇ တ︀ွင︀်းက︀ႃဢ︀ူ။ မ︀ိူဝ်ႈဢ︀မ︀ႂ်း မ︀ꩫ︀်းꩡ︀ဝ်ႛက︀ေႃႇ လ︀ုက︀်ႉပ︀ၢင︀်ႈꩫ︀ႃႛꩬ︀ွင︀်ၵ︀ႃမ︀ႆ︀ႛ က︀ꩡ︀ူးꩭႆ︀ၢက︀ႃဢ︀ူ။ 32ꩬ︀ွင︀်ၵ︀ႃယ︀ႃႇ “မ︀ိူဝ်ႈၵ︀ူꩫ︀်တ︀ၢင︀်းမ︀ႆ︀ႛ မ︀ꩫ︀်းꩡ︀ဝ်ႛတ︀ၢꩫ︀်ႛၵ︀ၢမ︀်းꩫ︀ႆ︀ႇလ︀ိူင︀်ႈ မ︀ိူဝ်ႈပ︀ုတ︀်တ︀ီႈပ︀ွင︀်က︀ျမ︀်းလ︀ိက︀်ႉꩫ︀ႆ︀ႇလ︀ိူင︀်ႈ ꩭူဝ်ꩡ︀ႂ်ႈꩭဝ်းမ︀ႆ︀ႛ ၸ︀ႆ︀းမ︀ႆ︀ႛꩫ︀က︀ꩫ︀်ႈ ပ︀ီꩫ︀်ႈမ︀ႃးမ︀ဝ်ꩡ︀ႂ်ႈ” ꩫ︀ꩬ︀ီက︀ူဝ်ႇလ︀ိူင︀်ႈꩫ︀ႆ︀ႇက︀ူဝ်ႇလ︀ိူင︀်ႈ ဝႃႈက︀ꩫ︀်ႈယ︀ဝ်ႇက︀ီး 33ၵ︀တ︀်ႉၵ︀ႅင︀်းလ︀ုက︀်ႉꩬ︀ီ ပ︀ွက︀်ႉက︀ႃဝီင︀်းယ︀ေရ︀ုꩬ︀လ︀ိမ︀်ဢ︀ူ။ ဢ︀မ︀ႂ်းမ︀ႆ︀ႛ တ︀မ︀ၢꩫ︀်ꩡ︀ဝ်ႛꩬ︀ိပ︀်ဢ︀ီတ︀်ပ︀ႃးင︀ႆ︀း တ︀ပ︀ေးꩡ︀ဝ်ႛꩫ︀ႆ︀ႇၵ︀ဝ် တ︀ုမ︀်ႈက︀ꩫ︀်ႈꩫ︀ႆ︀ႇမ︀ႆ︀ႛ ꩬ︀ွင︀်ၵ︀ႃꩭꩫ︀်ဢ︀ူ။ 34ၵ︀ဝ်တ︀င︀်းမ︀ိူင︀်းယ︀ႃႇ “ꩡ︀ဝ်ႛꩭဝ်း ꩫ︀ိပ︀်ပ︀ွက︀်ႉတ︀ေႇတ︀ေႇꩬ︀ီ ꩬ︀ႅင︀်မ︀ုꩫ︀်မ︀ႆ︀ႛ ပ︀ျႃးတ︀ူဝ်ႈမ︀ႃးယ︀ဝ်ႇ” ꩫ︀ꩬ︀ီဝႃႈက︀ꩫ︀်ႈဢ︀ူ။ 35င︀ႆ︀းက︀ီး ꩬ︀ွင︀်ၵ︀ႃက︀ေႃႇ ဢ︀ꩫ︀်ႈၵ︀ူꩫ︀်တ︀ၢင︀်းမ︀ႆ︀ႛ ပ︀ီꩫ︀်ႈမ︀ႃးꩫ︀ႆ︀ႇၵ︀ဝ်င︀ႆ︀း မ︀ိူဝ်ႈမ︀ိꩫ︀်ႛၵ︀ဝ်ႛမ︀ုꩫ︀်းꩫ︀ႆ︀ႇꩬ︀ိုင︀် ꩡ︀ဝ်ႛꩫ︀မ︀်ꩫ︀ꩫ︀ႆ︀ႇမ︀ႆ︀ႛတ︀ွင︀်းမ︀ႃးꩫ︀မ︀်ꩫ︀ꩫ︀ႆ︀ႇ ၵ︀ႆ︀ႈပ︀ျႃးꩭႂ်ႛဢ︀ူ။
လ︀ွင︀်ႈတ︀ပ︀ေးꩡ︀ဝ်ႛၵ︀ဝ်မ︀ႆ︀ႛ ပ︀ျႃးတ︀ူဝ်ႈ
(မ︀တ︀်တ︀ႄး 28.16-20; မ︀ႃက︀ု 16.14-18; ယ︀ေႃးꩭၢꩫ︀် 20.19-23; ထဝ်ꩡ︀တ︀်ႉ 1.6-8)
36မ︀ိူဝ်ႈင︀ႆ︀းၵ︀ဝ် လ︀ွင︀်ႈꩫ︀ႆ︀ႇၵ︀ဝ်ၵ︀ႆ︀ႈက︀ꩫ︀်ႈꩫ︀ႆ︀ႇ ꩡ︀ဝ်ႛယ︀ေꩬ︀ုၵ︀ိူင︀်းက︀ၢင︀်ႈၵ︀ဝ်မ︀ႆ︀ႛꩬ︀ဝ်းင︀ႆ︀း “ꩬ︀ူ ꩭႂ်ႛက︀တ︀်ယ︀ီꩫ︀်ႈက︀တ︀ႃႉ” ꩫ︀ဝꩫ︀်ႇ။ 37ၵ︀ဝ်ယ︀ႃႇ ၵ︀ꩫ︀်တ︀ႂ်းၸ︀ိုဝ်ႇꩬ︀ိုဝ်ꩬ︀ီ က︀ူဝ်ႈတ︀ႆ︀ၢႈꩰက︀ꩫ︀်ႈဢ︀ူ။ 38ꩡ︀ဝ်ႛယ︀ေꩬ︀ုယ︀ႃႇ “ꩭီတ︀်က︀ꩬ︀င︀်ꩫ︀ႆ︀ ꩬ︀ူက︀ူဝ်ႈက︀ꩫ︀်ႈꩫ︀ႆ︀ႇ။ ꩭီတ︀်က︀ꩬ︀င︀်ꩫ︀ႆ︀ ဢ︀ꩡ︀င︀်က︀ꩫ︀်ႈꩫ︀ႆ︀ႇ။ 39ပ︀လ︀ေႃး မ︀ိုဝ်းက︀ဝ်ႈ၊ တ︀ိꩫ︀်ႈက︀ဝ်ႈမ︀ႆ︀ႛ လ︀ႅမ︀်းလ︀ႃး။ ꩫ︀ႆ︀ႇက︀ဝ်ႈၸ︀ူႛꩡ︀ဝ်ႛꩬ︀ႃး။ က︀ဝ်ႈမ︀ႆ︀ႛ က︀မ︀်းလ︀ႅမ︀်းက︀ꩫ︀်ႈလ︀ႃး။ ၸ︀ိုဝ်ႇꩬ︀ိုဝ်မ︀ႆ︀ႛယ︀ႃႇ ꩫ︀ိူဝ်ႇꩫ︀ုက︀်ꩵ︀ႈယ︀င︀်း။ က︀ဝ်ႈမ︀ႆ︀ႛယ︀ႃႇ ꩫ︀င︀်ꩬ︀ူꩭꩫ︀်ꩫ︀က︀ꩫ︀်ႈ ꩫ︀ိူဝ်ႇꩫ︀ုက︀်ယ︀င︀်းဢ︀ူ” ꩫ︀ယ︀ဝ်ႇက︀ီး 40ၵ︀ဝ်မ︀ႆ︀ႛ တ︀ိꩫ︀်ႈမ︀ိုဝ်းမ︀ꩫ︀်းꩡ︀ဝ်ႛꩫ︀ႆ︀ႇၵ︀ဝ် ပ︀ျႃးꩭႂ်ႛဢ︀ူ။ 41ၵ︀ဝ်ယ︀ႃႇ ꩡ︀ူမ︀်းၸ︀ႅဝ်ꩬ︀ီ မ︀ဝ်ပ︀ႆ︀ယ︀ုမ︀်ꩫ︀ီႈꩫ︀ီႈင︀ႆ︀း ဢ︀ၢမ︀်းက︀ꩫ︀်ႈက︀ီး မ︀ꩫ︀်းꩡ︀ဝ်ႛယ︀ႃႇ “ꩬ︀ူမ︀ႆ︀ႛဢ︀ꩫ︀်ႈက︀ိꩫ︀်ႈယ︀င︀်းဢ︀ေႃး” ꩫ︀ဝꩫ︀်ႇ။ 42ꩫ︀ႆ︀ႇမ︀ႆ︀ႛၵ︀ဝ်ယ︀ႃႇ ပ︀ႃႈယ︀ၢင︀်ႛတ︀ွꩫ︀်ႈလ︀ိူင︀်ႈꩭႂ်ႛက︀ီး 43မ︀ꩫ︀်းꩡ︀ဝ်ႛဢ︀ဝ်ႈꩬ︀ီ ပ︀ၢင︀်ႈꩫ︀ႃႛၵ︀ဝ်မ︀ႆ︀ႛ က︀ိꩫ︀်ႈပ︀ျႃးဢ︀ူ။ 44ယ︀ဝ်ႇက︀ီးမ︀ꩫ︀်းꩡ︀ဝ်ႛ ၵ︀ဝ်မ︀ႆ︀ႛ “လ︀ွင︀်ႈက︀ဝ်ႈဢ︀ꩫ︀်ႈက︀ျမ︀်းꩬ︀ိꩫ︀်မ︀ေႃꩬ︀ေ၊ က︀ျမ︀်းပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်င︀ႆ︀း က︀ျမ︀်းꩬ︀ႃလ︀ၢမ︀်မ︀ႆ︀ႛ ဝႃႈဝႆ︀ႇꩫ︀ႆ︀ႇၵ︀ဝ်တ︀င︀်းမ︀ိူင︀်း ဝႃႈတ︀ီမ︀်ႈက︀ုမ︀်မ︀ႃးဢ︀ူꩫ︀ꩬ︀ီ မ︀ိူဝ်ႈတ︀င︀်းꩬ︀ူဢ︀ူမ︀ႃးꩫ︀ႆ︀ႇ က︀ဝ်ႈဝႃႈမ︀ႃးယ︀ဝ်ႇ။ ဢ︀မ︀ႂ်းၵ︀ဝ် င︀ႆ︀ႚပ︀ီꩫ︀်ႈဢ︀ူꩫ︀မ︀်” ꩫ︀ဝꩫ︀်ႇ။ 45ယ︀ဝ်ႇက︀ီး ၵ︀ဝ်မ︀ႆ︀ႛ ꩭႂ်ႛပ︀ူဝ်းက︀ျမ︀်းလ︀ိက︀်ႉမ︀ႆ︀ႛ ပ︀ွင︀်ꩡ︀ႂ်ႈꩫ︀ႆ︀ႇ ꩡ︀ႂ်ႈၵ︀ဝ်မ︀ႆ︀ႛ ပ︀ုတ︀်ꩭႂ်ႛင︀ႆ︀းꩬ︀ီ 46“က︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇꩫ︀ႆ︀ႇယ︀ႃႇ ꩡ︀ဝ်ႛၵ︀ရ︀ီတ︀်ꩫ︀ႆ︀ႛၵ︀ၢမ︀်တ︀ႆ︀ၢႈꩬ︀ီ တ︀ၢင︀်ꩬ︀ၢမ︀်ဝꩫ︀်းမ︀ႆ︀ႛ တ︀ီꩫ︀ိပ︀်ပ︀ွက︀်ႉမ︀ႃးꩫ︀မ︀်။ 47ယ︀ဝ်ႇက︀ီး ၵ︀ၢဝ်ႈၵ︀ၢမ︀်းဢ︀မ︀ႂ်း တ︀ꩫ︀်းၵ︀ူဝ်းꩡ︀ိုဝ်ႈမ︀ꩫ︀်းꩡ︀ဝ်ႛမ︀ႆ︀ႛ ပ︀ိုင︀်ႈဢ︀ိင︀်ႈꩬ︀ီ လ︀ုက︀်ႉဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛက︀ူဝ်ꩬ︀ီ က︀ူꩫ︀်းက︀ူႈၵ︀ိူဝ်းက︀ူႈၸ︀ꩫ︀်းမ︀ႆ︀ႛ တ︀ီတ︀ႅဝ်ꩫ︀မ︀်။ က︀ူဝ်ႇဢ︀ꩫ︀်ႈꩫ︀ႆ︀ႛꩥ︀ိꩫ︀်းၵ︀ၢဝ်ႈၵ︀ၢမ︀်းꩫ︀ီႈꩬ︀ီ ꩬ︀ၢင︀်ဝွေမ︀ႃးꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ ဢ︀ပ︀ႅတ︀်ႉတ︀ီပ︀ွႆ︀လ︀ွတ︀်ႉꩭႂ်ႛꩫ︀မ︀်။ 48ꩬ︀ူယ︀ႃႇ လ︀ွင︀်ႈꩫ︀ႆ︀ႇၵ︀ဝ်တ︀င︀်းမ︀ိူင︀်းမ︀ႆ︀ႛ ꩬ︀ၢက︀်ႉꩬ︀ေက︀ဝ်ႈꩫ︀မ︀်။ 49ꩬ︀ူမ︀ႆ︀ႛက︀ဝ်ႈ ꩫ︀င︀်ပ︀ူဝ်က︀ဝ်ႈ က︀တ︀ိꩭႂ်ႛဝႆ︀ႇꩫ︀က︀ꩫ︀်ႈ ၵ︀ွꩫ︀်ၸ︀ြႃးပ︀ီꩫ︀်ႈꩡ︀ဝ်ႛ တ︀ီပ︀ွႆ︀ꩡ︀ႂ်ႇမ︀ႃးꩫ︀မ︀်။ ꩫ︀ႆ︀ႇꩫ︀က︀ေႃႇ မ︀ꩫ︀်းꩡ︀ဝ်ႛထိုင︀်မ︀ႃးꩬ︀ီ ꩬ︀ူမ︀ႆ︀ႛ တ︀ꩫ︀်းၵ︀ူဝ်းက︀ၢင︀်ႈꩭၢဝ် က︀ႃႈမ︀ဝ်ထႅမ︀်ꩭႂ်ႛယ︀ႃႇ ဝီင︀်းꩫ︀ႆ︀ႇမ︀ႆ︀ႛ ထႃႛဢ︀ူတ︀ႃႉ” ꩫ︀ဝꩫ︀်ႇ။
လ︀ွင︀်ႈꩡ︀ဝ်ႛယ︀ေꩬ︀ုမ︀ႆ︀ႛ ဢ︀ဝ်ႈၵ︀ိုꩫ︀်ႛက︀ႃက︀ၢင︀်ႈꩭၢဝ်
(မ︀ႃက︀ု 16.19,20; ထဝ်ꩡ︀တ︀်ႉ 1.9-11)
50ꩡ︀ဝ်ႛယ︀ေꩬ︀ု ၵ︀ဝ်မ︀ႆ︀ႛ ဢ︀ဝ်ႈထိုင︀်တ︀ႆ︀ၢႛဝီင︀်းၿေတ︀ꩫ︀ိဢ︀ွꩫ︀်ႈက︀ႃꩬ︀ီ က︀ꩫ︀်ႛꩫ︀ိူဝ်ၵ︀ဝ်မ︀ႆ︀ႛ မ︀ိုဝ်းင︀မ︀်းင︀ႆ︀း ဢ︀က︀ိဝ်းပ︀ူင︀်ႈꩭႂ်ႛဢ︀ူ။ 51မ︀ိူဝ်ႈမ︀ꩫ︀်းꩡ︀ဝ်ႛ ဢ︀က︀ိဝ်းပ︀ူင︀်ႈꩭႂ်ႛꩬ︀ီဢ︀ူꩫ︀ႆ︀ႇ မ︀ꩫ︀်းꩡ︀ဝ်ႛမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ ဢ︀ဝ်ႈၵ︀ိုꩫ︀်ႛက︀ႃက︀ၢင︀်ႈꩭၢဝ်ဢ︀ူ။ 52မ︀ꩫ︀်ꩡ︀ဝ်ႛမ︀ႆ︀ႛ ၵ︀ဝ် ပ︀ႆ︀ၢႛဝႆ︀ႈယ︀ဝ်ႇက︀ီး ၵ︀ဝ်က︀ေႃႇꩭုမ︀်ꩰꩡ︀ူမ︀်းꩬ︀ီ ပ︀ွက︀်ႉက︀ႃဝီင︀်းယ︀ေရ︀ုꩬ︀လ︀ိမ︀်ဢ︀ူ။ 53င︀ႆ︀းꩬ︀ီ ၵ︀ဝ်က︀ူႈမ︀ိုဝ်ႇက︀ူႈဝꩫ︀်း ꩡ︀ွင︀်းၿိက︀်ႉမ︀ၢꩫ︀်မ︀ႆ︀ႛ ယ︀ူဝ်းယ︀ွင︀်ႛၸ︀ြႃးပ︀ီꩫ︀်ႈꩡ︀ဝ်ႛꩬ︀ီဢ︀ူဢ︀ူ။
Цяпер абрана:
လ︀ုက︀ႃ 24: kht
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2023 (Active), Wycliffe Bible Translators, Inc. All rights reserved.