Matiu 5
5
God Waribiya Muniviwa
1Iesu iyayapan undag yawamnewa, tui gambenwa dog aig yan wakene. Aigowawa me gumbe uwaya, 2sira amatog toyau munne, wane:
3 # Ais 57:15 “Guwowa danave pukpuk wagawag igiyawa, mu gumbo waribiya wakeigimpe,
kuiyawa kwimin toimuwawa me mumawa.
4 # Ais 61:2-3; Rev 7:17 Danadawai aueme igiyawa, mu gumbo waribiya wakeigimpe,
kuiyawa watmemeyam munigimpe.
5 # Sam 37:11 Memeyu igiyawa, mu gumbo waribiya wakeigimpe,
kuiyawa piyu kwan meumawa me mumawa.
6 # Ais 55:1-2 Oraivitwa oya iyagon ge meyowa toyaivi igiyawa, mu gumbo waribiya wakeigimpe,
kuiyawa mu gumbo matai noidauwape.
7Ano nunigimtanwa igiyawa, mu gumbo waribiya wakeigimpe,
kuiyawa mu gaibu ano nunigimpe.
8Nonowa esine igiyawa, mu gumbo waribiya wakeigimpe,
kuiyawa mu God yaupe.
9Yum tueme igiyawa, mu gumbo waribiya wakeigimpe,
kuiyawa munan wape God usitainawa.
10 # 1Pi 3:14 Oraivitwa oya edawai aueme igiyawa, mu gumbo waribiya wakeigimpe,
kuiyawa kwimin toimuwawa me mumawa.
11 # 1Pi 4:14 Nenan oya Iyayapan ye anokukam yempewa, edawai yempewa, sira uga gumbe dividivi gae kukaeba yempewa, ye guniyap waribiya wakeigimpe! 12#2Kr 36:16; Apa 7:52 Me kumive degadega ag tare wariya, kuiyawa kwimin danave garawa yeuma me kokavit: ebu desiroma gumbe mu propeta mu ye namuyap uwayawa meib edawai muniya.
Siuran Ge Dun
13Ye piyu siuraneba. Megara siuran demtawa me onanape ipewa, me aninin oma ape sira demta wape? Me dividivi gumbe oraimina onan, sira me aug piyu egave aorepe iyayapan amowo embaba tampe.
14 # Jon 8:12; 9:5 Ye piyu eyawa. At toimu me tui kuiyave wakenewa me oma den ane tobotpe. 15#Mak 4:21; Ruk 8:16; 11:33 Iyayapan dun oketpe me kabum ankwatave den baraupe. Mu dun yokeiviwa egave yudatpe. Meve me iyayapan undag eyawa mumpe gwe danave. 16#Epe 5:8-9; 1Pi 2:12 Ebu desirom gumbe, dun yeuma iyayapan namuwo esipe. Meve mu ye anoano yeuma oraiwa yaupe. Mamewa kwiminau wakenewa me watdega wampe.
Gwangwan Natawa Matattanwa
17 # Rom 3:31 Den anoya ne uwanawa gwangwan ge propeta gaiyawa wag muintan oya, ne uwanawa me natawa matattan oya. 18#Ruk 16:17; 21:33 Ne natawa diruitna. Kwimin ge piyu den onanapewa, gigirum kusikaren da ge komakom meuma gwangwan danave wakeyawa den di onanape. Dividivi undag natawa veniyape. 19#Jms 2:10 Bira da me gwangwan mame danave gwangwan kusikaren da desirom togomiyape, iyayapan upeba epin desiroma toyau mumpewa, mu wape God toimuwawa danave me kusikarenwa. Megara bira da me gwangwan mame amave aigimpe, epin desiroma toyau mumpewa, mu wape God toimuwawa danave me kokawa. 20Kuiyawa ne diruina. Parisi igiyawa ge Gwangwan toewanewan igiyawa oraiwa mumawa me koka sira oraiwa yeuma kokavit onanwa, ye oma den ane God toimuwawa unigiya.
Bo Gaiyawa
21 # Eks 20:13; Deu 5:17 Ye anoyana me watavit iyayapan gumbo wane, Den toa boipe, bira da me topewa me pui aupe.” 22#1Jn 3:15 Megara ne diruitna. Bira da me danapiri tatawa gumbe apewa me pui aupe. Sira bira da me tatawa gumbe warago wapewa, me Daiboru Painauvitwa nanuwo baraupe. Sira bira da Kuiyagwa kukaine wapewa, me at kukaeba geena#(5:22) Me at kukaeba ampa anotumat onan igiyawa matai unikpe. iyam meuma igiviwa danave aorepe.
23 # Mak 11:25 Meoya ge puyo geuma iyakaisi kem meuma apa te atanwa sira ge tatagwa me divi da ge gungap anokukam ane anowawa, 24puyo geuma iyakaisi kem meuma namive kweya. Namu a tatag gumbe baigan akape, meve onag puyo geuma barauwa. 25Ge anavi geuma me ge augem keptete arawa aisenewa, ge ebu taibe tatevit wag yum tuya. Megara ge me gaibu yum den tuiyawa, me augen keptete abnawa nanive baraugempe, sira me augen nog amaraiviwa nanive baraugempe, sira nog gumbe baraugempe. 26Ne ge natawa diruktna. Ge anmagawa kodorant#(5:26) 64 kodorant me 1 denari. 1 denari me apan desirom oiyat desirom nau atanwa garawa. desirom oieba garawa den barauwawa, me den dauwag aga.
Uinantaraki
27 # Eks 20:14; Deu 5:18 Ye yaug anoyana me wait aib wane, Uinantaraki den aya. 28Megara ne ge diruktna. Bira da vesin yaug ano kukaeba anoiviwa me nonewa wait gaibu vinne. 29#Mat 18:9; Mak 9:47 Ge yangagwa yutan ge gungap ano kukaeba apewa, me watukiyak epa aoreya. Kuiyawa ge kwapugwa da desirom waropiyawa me oraiwa, ge kwapugwa undag at kukaeba geena danave aorepetan. 30#Mat 18:8; Mak 9:43 Sira nanigwa yutan ge gungap kukaeba apewa, kwagomiyag epa aoreya. Kuiyawa ge kwapugwa da desirom waropiyawa me oraiwa, ge kwapugwa undag at kukaeba geena danave aikpetan.
Garakue
31 # Deu 24:1-4; Mak 10:4 Me wane, Bira da vesin meuma kwepe garakue apewa, garakue atan gigirumawa me yug wampe. 32#1Ko 7:10-11 Megara ne dirukna. Bira da biviwa uinantaraki den aivi go ui onan kwepewa me uinantaraki ape. Bira da vesin me wait yankwenewa me aupewa me uinantaraki.
Agi
33 # Rvt 19:12; Nam 30:2; Deu 23:21 Sira ye anoyana watavit iyayapan dirumwane, Agi geuma den togoma, Ayapan gumbe agi wanawa me a. 34#Ais 66:1; Mat 23:22; Jms 5:12 Megara ne diruktna. Agi den waigima, kwimin gumbe agi den waigima, kuiyawa me God wakeiviwa arawa, 35#Sam 48:2; Ais 66:1 piyu gumbe agi den waigima, kuiyawa me amawa emnewa, at Jerusarem gumbe agi den waigima, kuiyawa me kin gwetoimu meuma kokawa. 36Sira kuiyagap agi den waigima, kuiyawa ge oma den ane kuiyagumawa desirom wara pupuyu go pumpune ape. 37Maib ye waya, Natawa, me Natawa, sira Onan me Onan, gae da imugap sira wawa me kukaeba.
Yangawa Oya Me Yangawa
38 # Eks 21:24; Rvt 24:20; Deu 19:21 Ye anoyana me wane, Yangawa oya me yangawa, donawa oya me donawa. 39Megara ne diruitna, ano kukaeba abnawa den toa. Bira da ge kwauyegwa gambenwa yutan apa topewa, me sira menan biroriya gambenwa da tope. 40Sira bira da ge augem keptete arawa aisene wape geuma ankwatavewa autan anopewa, me kweya wape geuma egavewa gaibu aupe. 41Bira da ge gungap 1 mirion#(5:41) 1 mirion me 1,500 mitas mina. agetan wapewa, me gaibu 2 mirion aisiya. 42Bira da ge gungap nun wapewa me wana, sira bira da divi da gungap aug danam atan wapewa den gumbe topaiya.
Baigan Yeuma Anavi Yeuma Gumbo
43 # Rvt 19:18 Ye anoyana me wane, Baigan geuma evegwa gumbe sira anavi geuma wat topaya. 44#Eks 23:4-5; Ruk 23:34; Apa 7:60; Rom 12:14,20 Megara ne diruitna. Anavi yeuma baigan muniya, sira nun yeuma waya bira da edawai guniyap apewa. 45Meoya ye Mamewa, kwiminau wakenewa usitainawa mina aya. Me wape kum oraiwa ge kukaeba igiyawa gumbo dauwape ig esipe, sira uvin baraupe aig ompe oraiwa ge kukaeba igiyawa gumbo. 46Bira da ye baigan yeniviwa ye baigan niyayawa, garawa divi aumon? Takesi tameme igiyawa gaibu emewa di? 47Sira ye tateaiw mekut gaun yeuma muniya, me divi da oraimina? Iyayapan undagit emewa di. Ju onan igiyawa gaibu emewa di. 48#Rvt 19:2; Deu 18:13 Meoya oraivitwa aigimiya, kuiyawa Mamewa kwiminauwa me oraivitwa.
Цяпер абрана:
Matiu 5: mti
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2011, Wycliffe Bible Translators, Inc. All rights reserved.