Ja̰ 21
21
Jesu ɓla ndɔ tɨ ɗaglə ɗəng mu
Mat 28.16; Luk 5.1-11
1Lɔ tɨ pla, Jesu ɓla ər ndula cam gɨ ər bi tɨ ɗaglə ɗəng tɨ Tiberiyad mu. Ər wag tɨ a sul kuna ne: 2Simo̰ Piyɛr la, Tomas ne a soon ər ɓə ho̰ni la, Natanayel wo tɨ kana tɨ Galile la, Jebede na ɓimi la, ər bi tɨ ndidi peer la, a ti gun tɨ un ɗay. 3Simo̰ Piyɛr ja gɨ a: «Ən wo saal ka taam.» A ja gɨ ər: «Yini kaw, i wo na əm saal la.» A ɗɔl tɨ kwa̰r hul a si lɛ na siyɛl ɗay, a par ka ɓudu lo bad. 4Na gaan gɨna, Jesu hina ti tɨ larɨm mu, lɛ ər bi una ɓə tɨ yḭr lo. 5Jesu ja gɨ a: «Ɓimi, pay yḭ par kaa ɓa̰ ndḛni lo a?» A duga gɨ ər: «M-m.» 6Ər ja gɨ a: «Yḭ ɗo man tɨ kwa̰r taal tɨ lɨma sul la yḭ ɓə kaa tina.» A ɗo man la a lɛm na wag lo, kəysul kaa tɨ dɨbla tɨ man hul. 7Gɨna wo ne Jesu ka ər kum nari ja gɨ Piyɛr: «Tɨ i Baali!» Gorne Simo̰ Piyɛr laa ɓə tɨ Baali gɨna, ər so sər ər ɓəw tɨ ər lɔ, kəysul ər ti ər lɔ kura, la ər o̰ ər jir tɨ ndu daan la. 8Jesu na bi tɨ wa̰y edɨ tapeer ne lor tɨ a taal ndɔg lɛm kil dɔkɔmɛ kar sap hina na kwa̰r, a kṵra man na ka sir hul. 9Gorne a jir tɨ ko̰rmu gɨna, a ləg laa na ka ɓudu tɨ sul la mapa la. 10Jesu ja gɨ a: «Yḭ hina na ka ne yḭ par.» 11Simo̰ Piyɛr duga ɗɔl tɨ kwa̰r hul la ər kṵra man sir na ka nii aru na dugmi kar mɨta lɛ man dḛr lo. 12Jesu ja gɨ a: «Yḭ hina i twi wa̰y.» Ər wo ɓudu ne lɛm ər ɓiri pay yḭr tɨ ja a in teni, kəysul ya̰ una ər ɓə ər tɨ Baali. 13Jesu kori so mapa la kaa la naa gɨ a. 14Tɨ lahul tɨ tedi mani jo Jesu ɓla gɨ ər bi ndula, gorne ər wag tɨ bi tɨ ulu daan.
Jesu a na Piyɛr
15Gorne a tong wa̰y tudi gɨna, Jesu ɓiri Simo̰ Piyɛr: «Simo̰, Ja̰ na ɓa̰, pay əm ka ən kum ura bi ne a?» Simo̰ duga gɨ ər: «M, əm una ɓari ɓə, ən ka əm kum.» Jesu ja gɨ ər: «Ɓaw ən həm ɓḭ.» 16La ər ɓiri ər lahul tɨ ndidi mani: «Simo̰, Ja̰ na ɓa̰, pay əm ka ən kum a?» Simo̰ duga gɨ ər: «M, Baali, əm una ɓə ən ka əm kum.» Jesu ja gɨ ər: «Ɓaw ən həm.» 17La ər ɓiri ər lahul tɨ tedi mani ɓə: «Simo̰, Ja̰ na ɓa̰, pay əm ka ən kum a?» Piyɛr ndula laar ər lo, kəysul Jesu ɓiri ər lahul tɨ tedi «Pay əm ka ən kum a?» La ər ja gɨ Jesu: «Baali, əm una mum gun, əm una ɓə ən ka əm kum!» Jesu ja gɨ ər: «Ɓaw ən həm. 18Ən ja gɨ əm tɨ bayri, gorne ɗang əm tɨ wo kɔr, mam ɓəw əm sər la əm si tɨ un ne əm hul taam la. Lɛ gorne əm ɓə tɨm hiini gɨna, əm ɓə əm daa nay la, wo jo ɓə gɨ əm sər ɓəwlu la ɓə na əm saal tɨ un ne əm hul taam lo la.» 19Na jaa ne Jesu ɓla ɓə Piyɛr na ulu ɓə duga tɨm wa̰y tɨ taan wur tɨ Ndɨla sul. Gorne Jesu ja jaa ne, ər ja gɨ Piyɛr: «Hina tɨ ən lɔ!»
20Piyɛr ləg un tɨ bəgri la ər ləg Jesu na wo ne ər ka kum nari wo hina. Tɨ yḭr jo ər ɗɛgɨ ər ndɔ na Jesu tɨ wa̰y tudi mu ər ja gɨ ər ɓə: «Baali ja jo ɓə əm sul sula a?» 21Gorne Piyɛr ləg ər gɨna ər ja gɨ Jesu: «Baali, yḭr, kəyjo ɓə ər kar a?» 22Jesu ja gɨ ər: «Jo ən taam ɓə ər ti jili marway ən ɓə duga hina kaw, tɨ əm jaa lo. Yim, əm hina tɨ ən lɔ!» 23Tɨ jaa ne wag tɨ Jesu mu le jo, ər ɓungɨ ja ɓə ər wo tɨ wa̰y edɨ ne ɓə ulu lo. Lɛ ne kuri gɨna, Jesu wala ja ɓə ər ɓə tɨm jili marway lo. Lɛ ər ja ɓə jo ər ɓə tɨm jili marway kaw us əm lo.
24Tɨ yin Jesu na wo tɨ tomni jo ən ja jaa tuna mum ne ən ləg la, ən kya̰ la. Yini una ɓə ər jaa tɨ jaa kuri.
25Jesu ka mum lɔ dɨbla. Jo a kya̰ gun tɨ maktub hul gɨna, ən ilgɨ ɓə, un tɨ dunya̰ kaw ɓə lɛm ər jaa ne i kya̰ sula lo.
Цяпер абрана:
Ja̰ 21: nie
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2023, ATALTRAB