Ja̰ 3
3
Jesu a na Nikodem
1Ɓər paa ndil ɓə Nikodem wo tɨ Parisyḛ-a daan. Yḭr tɨ Juyb-a na wa̰ay paa. 2Ər hina na siyɛl tɨ Jesu ndɔ ər ja gɨ ər: «Wo tɨ wa̰y ɓla, yini una ɓə yim tɨ wo tɨ wa̰y ɓla ne Ndɨla toon əm, kəysul mum ne ɓɔrji ne əm ka wo in lɛm kar lo jo Ndɨla gə̰y na ər lo.» 3Jesu duga gɨ ər: «Kuri, ən ja gɨ əm tɨ bayri, jo a toy wo ɓini lo gɨna, ər ɓə lɛm Ndɨla waan ləg na ər ji lo.» 4Nikodem ɓiri ər: «Ka waa ta a ɓə duga wo twila gorne ər tɨ hiini teni a? Ər ɓə duga wur tɨ ər na̰ hul lahul tɨ ndidi nɨ a ɓə ər twila cam a?» 5Jesu duga gɨ ər: «Kuri, ən ja gɨ əm tɨ bayri, jo a toy wo na ndu la Lal la lo gɨna, ər ɓə lɛm Ndɨla waan ləg na ər ji lo. 6Wa̰y ne a toy na ndula ya̰m tɨ ndula ya̰m la, wa̰y ne a toy na Ndɨla Lal tɨ Ndɨla Lal la. 7Ka jaa ne ən ja gɨ əm ɓə: “Ka a duga a toy əm lahul tɨ ndidi ka əm ji ɓɔr lo”. 8Saaw hor na un gun əm laa ər nig lɛ, əm una un ne ər o̰ tɨ nin lo la, un ne ər wo saal tɨ nin lo la. Wo ne a toy ər na Ndɨla Lal kaw ti kuna paa ne la.»
9Gɨna Nikodem duga ɓiri ər: «Wa̰y ne ɓə paa kar waa a?» 10Jesu duga gɨ ər: «Yim tɨ doktor ɗəng tɨ gɨ bi wa̰y ɓla tɨ Israhel lɛ əm una wa̰y kuna ne lo a? 11Ən ja gɨ əm tɨ bayri, yini ja wa̰y ne i una ɓari ja la, i ja jaa tuna wa̰y ne i ləg na i ji la. Lɛ yḭ ko i jaa tɨ ja hul lo. 12Gorne ən ja gɨ i jaa tuna mum tɨ nəgri sul le yḭ ko ən hul lo, ka waa ta yḭ ɓə ən hul kula gorne ən ja gɨ i jaa tuna mum tɨ ndɨlasul a? 13Wo ɓudu ne ɗɔl si tɨ ndɨlasul in teni, lɛ tɨ Yin Wo Ɓa̰ ɓudu ngoy jo ən o̰ tɨ ndɨlasul ən jir. 14Kuna Moys wur na kɔ tɨ tɨla mu tɨ tap hul, Wo Ɓa̰ kaw a ɓə ər ɗɨb tɨ tɨla sul kuna paa ne la. 15Nɨ ka wo tɨ lay ne so hul naa gɨ ər, ɓə tɨm jili na kwi tina. 16Kəysul, Ndɨla ka biɓari tɨ dunya̰ gun kum nari, nejo ər naa ər ɓa̰ ɓudu kam lag-lag nɨ ka wo ne so hul naa gɨ ər, ka haam lo, lɛ ər ten tɨm jili na kwi. 17Ndɨla toon ər ɓa̰ tɨ dunya̰ tɨ jaa tungni tɨ bi tɨ dunya̰ sul lo, lɛ tɨ a nina. 18Wo ne ko ər hul, jaa par ər sul lo, lɛ wo ne ɓini hul kula, jaa par ər sul teni. Kəysul ər ko Ndɨla na ɓa̰ ɓudu kam lag-lag hul lo. 19Jaa ne Ndɨla wo na jaa tungni tɨ bi sul jo le: Un ndeeri hina tɨ dunya̰, lɛ bi tɨ dunya̰ ka un ɗoyri jo kum ura un ndeeri, kəysul a mum tɨ kar tɨ ɓijim. 20Wo ne ka ɓijim koor un ndeeri la ər si ɓag na ər la. Kəysul ər mum ɓijim tɨ kar ɓə wag tɨ un ndeeri. 21Lɛ wo ne ka wa̰y tugla wag tɨ un ndeeri lɔ ka ər mum tɨ kar ɓla ndɔ tɨ bayri, kəysul ər ka mum ne Ndɨla hul taam.»
Jesu a na Ja̰ Batis
22Tɨ mum ne bəgri, Jesu a na ər bi tɨ wa̰y edɨ a si tɨ lɔr nəgri tɨ Jude. Ər ti ɗay na a la ər ka gɨ bi batɛm la. 23Ja̰ kaw ka gɨ bi batɛm tɨ Eno̰, ne tɨ ndog na Salim, kəysul ndu tɨ dɨbla tɨ un ɗay. Bi hina tɨ ər ndɔ la ər ka gɨ a batɛm la. 24Na lula sul ne ɗang a ɗo Ja̰ tɨ dangay lo.
25Gɨna paa gaglə tɨba tɨ Ja̰ a na bi tɨ wa̰y edɨ la Juyb paa a daan tuna ndula ugu ndeeri tɨ Ndɨla kwi. 26Gɨna a si a ten Ja̰ a ja gɨ ər: «Wo tɨ wa̰y ɓla, pay əm ho̰ni jani tɨ wo ne ti na əm tɨ Jurdḛ tapaa a? Wo ne əm ja jaa tuna ər sul. Əm ləg, yḭr kaw ər wo bi batɛm kar la. Bi dɨbla si tɨ ər ndɔ la!» 27Ja̰ duga gɨ a: «Jo Ndɨla naa gɨ wo wa̰y lo gɨna, ər ɓə lɛm wa̰y tina lo. 28Yḭ may tɨ ən timo̰ na jaa ne ən ja gɨ i toni ɓə: “Yin tɨ Mesi lo lɛ yin tɨ wo tɨ tomni ne ən hina tɨ ər kwi.” 29Yḭ una ɓari ɓə wo tɨ ii kula ii tɨ ər maan, lɛ ər paa kɔr ti ndog na ər tɨ ər jaa laa la. Ər ndula laar ər kəysul ər laa wo tɨ ii kula jaa. Ndula laar ne le tɨ yin maan la. Ndogle, ən ndula laar nari. 30Ka ər toni le ka yin ɗigri.»
Wo ne o̰ tɨ ndɨlasul
31«Wo ne o̰ tɨ ndɨlasul ti tɨ mum gun sul. Wo ne o̰ tɨ nəgri sul le tɨ nəgri sul maan la, ər ja jaa tuna mum tɨ nəgri sul la. Wo ne o̰ tɨ ndɨlasul ti tɨ mum gun sul. 32Ər ja jaa tuna mum ne ər ləg na ər ji la, ər laa na ər tulɔ la, lɛ wo in taam ər jaa tɨ ja lo. 33Wo ne ko ər jaa tɨ ja, ko mu ɓə Ndɨla na jaa tɨ ja tɨ kuri. 34Kəysul wo ne Ndɨla toon ja Ndɨla na jaa, kəysul Ndɨla sir ər na ər Lal. 35Ba ka ər ɓa̰ kum la ər naa gɨ ər mum gun tɨ ər daa la. 36Wo ne ko ɓa̰ hul na tɨm jili ne na kwi, wo ne ɓini ɓa̰ hul kula ɓə tɨm jili tina na kwi lo, lɛ Ndɨla na hul laa gə̰y tɨ ər sul.»
Цяпер абрана:
Ja̰ 3: nie
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2023, ATALTRAB