Ja̰ 8
8
Ii ne a par ər na ɓər
1Jesu si tɨ nan tɨ olibe sul. 2Wag na gaan cɔg, ər duga ər si tɨ Ndɨla li hul cam. Bi gun hina tɨ ər ndɔ. Ər ti tɨ lɔr ər wo gɨ a wa̰y ɓla. 3Gɨna, bi tɨ wa̰y ɓla la Parisyḛ-a la a hina na ii ne a par ər na ɓər tɨ Jesu ndɔ. A kay ər tɨ bi gun kwi. 4A ja gɨ Jesu: «Wo tɨ wa̰y ɓla, yini par ii ne na ɓər. 5Moys naa gɨ i gṵ tɨ maktub hul tɨ aa kuna paa ne munɨng na kura humna teni, lɛ yim, kəy jaa jo əm ja tuna ii ne sul a?»
6A ja jaa ne tɨ ər sangni la tɨ jaa kay tɨ ər sul. Lɛ Jesu wur sul tɨ lɔr ər kya̰ wa̰y tɨ nəgri na ər daa. 7Gorne a ja gɨ ər jaa tɨ gor-gor gɨna, Jesu uma sul tɨ ndal la ər ja gɨ a ɓə: «Wo ne ka ɓijim lo bad tɨ i daan ɗo ər na kura toni.» 8Ər duga ər wur ər sul tɨ lɔr ər kya̰ wa̰y tɨ nəgri sul cam. 9Gorne a laa jaa ne gɨna, a o̰ a bra peer ɓudu na ɓudu. Ɗolɔ tɨ bi nii sul marway Jesu gə̰y na sul na ii ne ti tɨ a daan. 10Gɨna, Jesu uma sul tɨ ndal la ər ja gɨ ər: «Ii, bi ne hina na əm wo ɓay a? Wo ɓudu tɨ jaa kay tɨ əm sul teni a?» 11Ii duga gɨ ər: «Baali, wo teni.» Jesu ja gɨ ər: «Yin kaw, ən kay jaa tɨ əm sul lo. Əm si lɛ əm ka ɓijim kar cam lo.»
Jesu tɨ un ndeeri tɨ dunya̰
12Jesu duga ja gɨ bi jaa cam. Ər ja ɓə: «Yin tɨ un ndeeri tɨ dunya̰, wo ne so ul tɨ ən lɔ ɓə saal tɨ un ɗoyri cam lo lɛ, ər ɓə un ndeeri tina tɨ ər dunya̰.» 13Parisyḛ-a ja gɨ ər: «Yim mam ja jaa tuna əm ndɔ sul, əm jaa tɨ jaa kuri lo!» 14Jesu duga gɨ a: «Kuri, ən ja jaa tuna ən sul lɛ ən jaa tɨ jaa tɨ kuri kəysul, ən una un ne ən o̰ tɨ nin la, ən wo saal tɨ nin la. Lɛ yḭ, una un ne ən o̰ tɨ nin lo la, ne ən wo saal tɨ nin lo la. 15Yḭ, tung jaa tɨ bi sul kuna bi tɨ dunya̰, lɛ yin, tung jaa tɨ wo ɓudu in sul lo. 16La jo yin, ən wo jaa tungni gɨna, ən jaa tɨ tungni ɓə tɨm kuri kəysul ən tung jaa na ən sul lo lɛ ən Ba ne toon ən ti na ən ɓudu. 17A kya̰ tɨ i maktub hul ɓə jaa ne bi tɨ ndidi ja tɨ jaa kuri#8.17 Deu 17.6, 19.6. 18Yin, ən ja jaa tuna ən sul la, ən Ba ne toon ən ja jaa tuna ən sul la.» 19A ɓiri ər: «Əm ba wo ɓay a?» Jesu duga gɨ a: «Yḭ una ən lo la i una ən Ba lo la. Jo yḭ una ən a, yḭ ɓə ən Ba una.»
20Jesu ja gɨ a jaa ne tɨ li tɨ mum ɓaw hul na lula sul ne ər wo wa̰y ɓla tɨ Ndɨla li hul. Wo ɓudu in lɛm ər par lo kəysul ər lula sul ɗang lɛm lo.
Jesu na saal tɨ ər Ba ndɔ
21Jesu ja gɨ a cam: «Ən ɓə saal, yḭ ɓə ən taam, lɛ yḭ ɓə ulu tɨ i ɓijim tɨ kar hul. Yḭ lɛm saal tɨ un ne ən wo saal tɨ nin lo.» 22Tuna jaa ne sul, Juyb-a ja gɨ peer ɓə: «Pay may ɓə ər ndula humna a? Kəysul ər ja ɓə yḭ lɛm saal tɨ un ne ən wo saal tɨ nin lo.» 23Gɨna Jesu duga gɨ a: «Yḭ tɨ bi tɨ nəgri sul, lɛ yin tɨ wo tɨ ndɨlasul. Yḭ tɨ bi tɨ dunya̰ lɛ yin tɨ wo tɨ dunya̰ ne lo. 24Tɨ nejo ən ja gɨ i toni ɓə yḭ ɓə ulu tɨ i ɓijim hul. Kəysul jo yḭ ko hul ɓə Yin tɨ wo kuri lo gɨna, i ɓə ulu tɨ i ɓijim hul.» 25A ɓiri ər: «Yim tɨ ja a?» Jesu duga gɨ a: «Tɨ jaa ne ən mugla gɨ i jaa lo ɓagcagri tɨ mum lɔ ɗula. 26Jo tɨ jaa ne tuna i sul gɨna, ən jaa dɨbla tɨ ja tɨ i sul la, tɨ tungni tɨ i sul la. Lɛ wo ne toon ən tɨ wo tugla, la jaa ne ən laa tɨ ər mu, jo ən ja gɨ bi tɨ dunya̰ la.» 27A una ɓə ər wo gɨ a ja jaa tuna ər Ba sul lo. 28Gɨna Jesu ja gɨ a: «Gorne yḭ ɓə yin Wo Ɓa̰ kay tɨ mum sul gun gɨna, yḭ ɓə una ɓə “yin tɨ wo kuri”, la yḭ ɓə una ɓə ən ka wa̰y na ən sul lo, lɛ ən ja jaa ne ən Ba ɓla gɨ ən tɨ ja. 29Wo ne toon ən ti na ən. Ər nɨm ən na sul lo, kəysul ən ka wa̰y ne laar ər yɔd.» 30Gorne ər ja jaa kuna paa ne gɨna, bi dɨbla ko ər hul.
Jaa kuri o̰ tɨ Ndɨla ndɔ
31Gɨna Jesu ja gɨ Juyb-a ton ko ər hul ɓə: «Jo yḭ ka wa̰y ne ən hul taam gɨna, yḭ ɓə tɨm ən bi. 32Yḭ ɓə kuri una la, kuri ɓə i jul tɨ ha̰r hul la.» 33A duga gɨ ər: «Yini tɨ Abraham na kalɔ, la yini tɨ wo ɓudu in ha̰r lo la, ka waa ta əm ɓə ja ɓə: Yḭ ɓə i sul jul tɨ ha̰r hul a?» 34Jesu duga gɨ a: «Ən ja gɨ i tɨ bayri, wo ne ka ɓijim gɨna, ər tɨ ɓijim na ha̰r. 35Ha̰r ti tɨ nimni hul marway kuna ɓa̰ tɨ gə̰y lo lɛ ɓa̰ ti tɨ nimni hul na lula sul gun. 36Jo yin wo ɓa̰ ən jul i tɨ ha̰r hul gɨna, i ɓə tɨm bi kami kuri. 37Ən una ɓə yḭ tɨ Abraham na kalɔ, lɛ yḭ taam ən humna, kəysul ən jaa tɨ ja ka wa̰y tɨ i ndɔ lo. 38Yin, ən ja jaa tuna wa̰y ne ən Ba ɓla Ndɨla ja gɨ ən, lɛ yḭ ka wa̰y ne i bəgɨ ja gɨ i.» 39A duga gɨ ər: «Yini ba tɨ Abraham.» Jesu ja gɨ a: «Jo Abraham tɨ i ba gɨna, yḭ ka wa̰y ne Abraham ka. 40Yin ən ja gɨ i jaa kuri ne ən edɨ tɨ ən Ba ndɔ, Abraham ka kuna ne lo, lɛ ndogle, yḭ taam ul tɨ ən humna. 41Yḭ ka wa̰y kuna i ba ka toni.» A duga gɨ ər: «Yini tɨ ɓimi hərɨm lo. Yini na ba ɓudu ngoy ne tɨ Ndɨla.» 42Jesu ja gɨ a: «Jo Ndɨla tɨ i ba gɨna, yḭ ɓə ən kumkar, kəysul ən o̰ tɨ Ndɨla ndɔ jo ən hina. Yin man hina na ən hul laar lo. Tɨ yḭr jo ər toon ən. 43Kəyja yḭ laa ən jaa ne ən ja gɨ i lo a? Kəysul yḭ lɛm jaa laa tɨ ən mu lo. 44I ba tɨ Sidan na lal, la yḭ taam wa̰y ne ər hul taam jo kar. Yḭr tɨ wo tɨ bi humna toni tɨ mum na lɔ ɗula. Ər ja jaa kuri ɗa̰y ɓudu lo, kəysul jaa kuri teni tɨ ər ndɔ. Ɓura ngoy tɨ ər jaa tɨ ja, kəysul yḭr tɨ ɓura la, ɓura na ba la. 45Lɛ yin, ən ja jaa kuri. Nejo yḭ ko ən hul lo. 46Ja jo tɨ i daan ja ɓə ən ka ɓijim a? Jo ən ja jaa kuri, kəyja yḭ ɓini ən hul kula a? 47Wo ne tɨ Ndɨla maan kay tulɔ tɨ Ndɨla jaa lɔ. Yḭ ɓini Ndɨla jaa laa kəysul yḭ tɨ Ndɨla maan lo.»
Jesu la Abraham la
48Juyb-a duga gɨ Jesu ɓə: «Yini na ul tɨ gɨ əm ja ɓə yim tɨ wo tɨ Samaritḛ la yim na lal ɓijim tɨ əm ndɔ la.» 49Jesu duga gɨ a: «Yin na lal ɓijim lo, lɛ ən ka wa̰y ne ən Ba hul taam, lɛ yḭ ka gɨ ən hormo̰ lo. 50Ən taam taan tɨ ən kəw ya̰m lo, lɛ wo ne taam wo nin la, ər tɨ wo tɨ jaa tungni. 51Kuri, ən ja gɨ i tɨ bayri, Wo ne ka wa̰y ne ɓaw ən jaa ɓə ulu lo bad.» 52Juyb-a duga gɨ ər: «Ndogle, yini una ɓari, yim na lal ɓijim tɨ əm ndɔ! Abraham uy la, nebi-a kaw a uy gun la, lɛ yim əm ja ɓə: “Jo wo ɓaw ən jaa ɓə ulu lo bad.” 53Yini ba tɨ Abraham uy teni, pay əm ilgɨ ɓə əm tɨ ɗəng əm ura ər a? Nebi-a kaw a uy teni. Yim ilgɨ ɓə əm tɨ kəy wo a?» 54Jesu duga gɨ a: «Jo yin man teen ən ndɔ gɨna, ən taan ji ɓə teni. Tɨ ən Ba jo teen ən, yḭr ne yḭ ja ɓə: “Tɨ ī Ndɨla!” 55Yḭ una ər lo, lɛ yin una ər. Jo ən ja ɓə ən una ər lo gɨna, ən ɓə tɨm ɓura kuna i no̰. Lɛ ən una ər la ən ɓaw ər jaa la. 56I ba tɨ Abraham ka ndula laar kəysul ər taam ɗa̰y ne ən ɓə hina ləg. Ər ləg la ər ndula laar ər la.» 57Juyb-a ja gɨ ər: «Yim na an duk mi lo ɗang la əm ləg Abraham a?» 58Jesu duga gɨ a: «Ən ja gɨ i tɨ bayri, toni barita a toy Abraham, yin wo nin teni.» 59Gɨna a so kura tɨ ər humna, lɛ Jesu waal ər ndɔ la ər wag tɨ Ndɨla li hul teni.
Цяпер абрана:
Ja̰ 8: nie
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2023, ATALTRAB