Matius 26
26
Nimiri, “Yesus obukap,” aro saekag lebeka
(Markus 14:1-2; Lukas 22:1-2; Yohanes 11:45-53)
1Yesusti yubu ni aneko ambatsiogti, eldi yubu ka'ero neleptop nimi tanekoag ambarelamsiogti, 2“A'un el uro wamlom nena, ik phende wamebea nubu sum Paskah sum eneko talul. Ane sembe nimiri na mog so'oag nimi tahinge salero nimi saeag nembaneik andarina, na kalag sipto omnukang,” aro ambatsiog.
3Nik sum eneko memnang Allah sembe palirop nang sikini yaboap, Yahudi nimi wenelamsiek nangap winil dalamekti, memne Allah sembe paliropne sikini nubunge si Kayafasti nubu aeag winip taek. 4Winip taekti wenelamsiekti, “Yesus pan khero saelbaberi obukap,” aro yubu nikne lebek. 5Ot sin wenero lelamekti, “Nu sani yoro telamebe ko'oag agha saelbaukap kom. Sum eneko agha el salero obebe tanena, nimi asag poloro winilamik nimiri yanghang alamsiikag,” aro wene seek.
Kel nhondi Yesusag song wali mag ikto pelaghaogha
(Markus 14:3-9; Yohanes 12:1-8)
6Yesus samenag as Betania piogti, ae nhonag wamog. Ae ngainge poneko samenag kon tena pololamogne agha wali taogne si Simon ponekori aeag Yesus pina wamog. 7Yesus ae anekoag pina wamogti, kwaneng tero pukamogpa, kel nhon nongag pelagtop mag song walinge poamog kel nhon Yesusag yaog. Nongag pelagtop mag song walinge nenekona, kirik hogtoba lom nhonag ikto tobongkibekpa, kamna alikinag kapto tobogti payaog. Yesus pukamogti, kwaneng telamoghag aneko payaogti, “Kipnun,” aro eldi usoghag ikog.
8Ikogpa Yesusti yubu ka'ero neleptop nimi wamekne tanekori ibekti, wana yo sembaek. Wana yo senenne agha yubu lelamekti, “Sa'a sembe loba nenero iklopla? 9Song wali mag ene kel eneri nimiag kamna alikinag uro kapto topsori, nimi saeagha orog nimiag tatsiso aghana iklopla,” alamek.
10Wene aro lelamekne Yesus el taogti, yubu lelamogti, “Sa'a sembe kel eneag waro neplamlom? Eldi nanag ualne nene wali sirikne agha ual. 11Nimi saeagha orog nimi a'unap sop-sop ua ulamukang aghana, na sop-sop a'unap wamnun kom. 12Kel eneri na nongag song wali mag iknelne neneag agha na tebaneba, amik so'oag siknukangne sembe wero ual. 13Yubu sikne agha ambarelamsin nena, nimiri mog so'o tala-tala Allahri yubu walinge ene ambarel palamsiikti, kel eneri nanag walia ualne sembe ekon tan koma ambarelamsukang,” seog.
Yudasti, “Yesus pan khebanun,” aro Yahudi nimi nubunangap saekag lebeka
(Markus 14:10-11; Lukas 22:3-6)
14Wene seogpa, Yesusti yubu ka'ero neleptop nimi aobare nang nhon, el sina Yudas Iskariotne neneko memnang Allah sembe palirop nang sikini yaboag piog. 15Piogti sinag hailamsiogti, “Nari Yesus pan khero a'un saeag nembane tanena, a'undi sa'a agha tatnululom?” aro haibahiog.
Wene aro haibahiogpa, sindina kamna kaptoba wanange alikinag uro toropne perak agha sunuropne teng nhon epto wilindi a'ilbaekti tarek. 16Undo tarek sum enekoa Yudasti, “Pa'asea etsum wamleba, pan khebanun,” aro weamogti, keme nelero seneraglamog.
Yesusap eldi yubu ka'ero neleptop nangapti kwanengap maghap teeka
(Markus 14:12-21; Lukas 22:7-14,21-23; Yohanes 13:21-30)
17Yahudi nimiri ik saekpare kwaneng roti walerop komne telamek ko'o alnirop sum, “Pham domba me oro yobaukap,” aro ulamek sum Paskah sum eneko taog. Sum eneko eldi yubu ka'ero neleptop nimi Yesusag yaekti hailamekti, “Tala siba menekaberi, pham domba me oro yoro tukap?” aro haibaek.
18Wene aro haibaekpa, Yesusti sin abenekoag, “As soro kalurop as Yerusalem anekot pirumundi, kabuni nhon haiptarurom. Haiptarumunne ponekoag ambarelamtumundi, ‘Nuni nu yubu amohiropne ponekori yubu leplangena, “Nanag uro yabinepne peram wamlaba, nari yubu ka'ero neleptop nangap andi aeag agha ik nubu sum Paskah sum eneko tero uaukap,” sel,’ aro ambatturom,” seog.
19Wene aro ambatsiogha sunsunum uro Yesusti yubu ka'ero neleptop nimi abeneko pirekti, “Paskah sum sembe kwaneng nhon tukap,” aro togto meneklamdek.
20Imbaogpa Yesusap aobare nang tanekoap nikag pukekti, kwaneng nhon telamek. 21Kwaneng telamekpa, Yesusti sinag yubu ambarelamsiogti, “Yubu sikne agha ambatnuahin. A'un wamlom nimi nhondi na pan khebanelul,” seog.
22Wene seogne ka'ebaekti, wana ikin sirik tahiog. Wana ikin tahiogpa, sin a'ero-a'ero alniro Yesusag yubu lelamekti, “Nai, nu Saelba Ulamsilam. Andi leplamne nari uanep komne agha leplam,” alamek.
23Wene alamekpa, Yesusti sinag samoro yubu lelamogti, “Na pan khebanelul nimi enekona, nanap nikag telamnamdi, kal wana lolterop mag ingiroba nikneag el babe nikag kwaneng salero maghag werebongkia telamnam aghana, pan khebanelul. 24Na mog so'oag nimi tahingeag uro yabilul nena, samenag Allah Yubuag na sembe mome toro pibekne sunsunum uro tebanun. Ot el pan khebanele nimi sembe yaghe senero seklebalul. Na nimi mog so'oag nimi tahinge pan khebanele nimi enekoag Allahri tam ikin sirikne piplul. Ilindi el mangkaho komba, elag ikinne wamso komba, seklebaho kom. Aghana na pan khebanelul nimi sembe ikin sirikne elag pipleba seklebalul,” seog.
25Wene seogpa, Yudas Yesus pan khebanepne enekori, “Nai, an yubu amohinne nubunge wamlam. Andi leplamne nari uanep komne agha leplam,” seog.
Wene seogpa Yesusti, “An mori leplam aghana, sik uro yabilul,” seog.
Nu Saelba Uhiropneri, “Nanag seneragto kwanengap maghap telamlulom,” aro ambatsiogha
(Markus 14:22-26; Lukas 22:15-20; 1 Korintus 11:23-25)
26Kwaneng telamekag anekoa Yesusti kwaneng roti tobogti, “Nani, wali tatsilam,” aro Allah kibog. “Wali tatsilam,” aro yubu lebogti, kwaneng roti aneko saeri khepto-khepto eldi yubu ka'ero neleptop nangag tarelamsiogti, “Nari nong ane topsuri tehut,” seog.
27Tatsiogpa teekpa, mag anggur lolterop mag ma'i tobogti, “Nani, wali tatsilam,” aro Allah kibogti, mag tebatsiog. Mag tebarelamsiogti, “A'un tane wamlom nimi niri anggur lolterop mag ane tululom. 28Anggur lolterop mag ane nari eneng wamla. Nimi maiknori malia uropne tam wailag nembalulne sembe nari eneng lambanualne Allahap yubu nikne kaupnep eneng wamla. 29Nari ambarelamsinne ka'ebalulom. Wene anea Naniri nimi saelba uhiroba anam uro yabin komag, anggur lolterop mag ane nen tenun kom. Ot na Nairi mog so'oag nimi saelba uhiroba lag tale sum eneko og, weneogna a'unap nhon anggur lolterop mag wendogne tenun,” seog.
30Wene seogpa, Allah omektop sepna nhon sebekti, Zaitun yimag piek.
Yesusti Petrusag, “Andi na sembe, ‘Ekonne,’ sululam,” aro ambarogha
(Markus 14:27-31; Lukas 22:31-34; Yohanes 13:36-38)
31Yesusti sinag yubu lelamogti, “Samenag Allah Yubu mome toro pairop nena, ‘Nari pham domba yae ua uropne poneko omneba, winip tangtop pham domba taneko talup tangka tala-tala pukang,’ aro mome toro pairopne wamla.#Zakharia 13:7 Mome nene a'un sembe mome toro pibogpa, sumene ae inipna neneag agha nanag uro yabinepne sembe a'un ni tanekori nanag agha telektangka lia pululom. 32Aghana omneikpa, nen samoro kamag taneri, na sam mog so'o Galilea pineba, a'un amik yalulom,” seog.
33Wene seogpa, Petrusti samoro yubu lelamogti, “Anag uro yabinepne sembe nangkabo niri liloa pikinep aghana, nari ik nhon babe anag agha telektangka lia pikinun kom,” seog.
34Wene seogpa, Yesusti Petrusag, “Anag yubu sikne agha ambarelangken. Sumene ae inipna eneag anam winang ayamdi kau sen komag andi ik wilindi na sembe, ‘Ekonne,’ sunululam,” seog.
35Wene seogpa, Petrusti nen ambarelamogti, “Kom. Nana tapto anap ma'aro tebahenemea babe hae. Aghana nari an sembe, ‘Ekonne,’ senun kom,” seog. Wene seogpa, Yesusti yubu ka'ero neleptop nang ni wamek nimi tanekori babe nika uro lebek.
Yesus Getsemani so'oag piogti, Allahag molona molbaogha
(Markus 14:32-42; Lukas 22:39-46)
36Anekoa Yesus eldi yubu ka'ero neleptop nimiap palameka mog so'o Getsemani arop so'oag piek. Aneko piekti, eldi sinag ambarelamsiogti, “Na anet pineri, Allahag molona mololamneba, a'un ane pukamlulom,” seog. 37Wene seog aghana, Yesusti Petrusap Zebedeus elmabo phende abenekoap enero pabahiog. Pabalamsioghag aneko eldi wana alniro saplamogti, wana ikin taog. 38Wana ikin uro sinag ambarelamsiogti, “Na wana ikin sirik ulamnelba, tebanep saog uro wamna. Ane wapmundi, nanap nhon haing whi uro yae up tangkamukap,” seog.
39Wene seogti Yesus nen olog ko'oro piogti, wana ikin taogpa, so'oag u amupto malingkina Allahag molbaog. Molona mololamogti, “Naniong, andi nanag, ‘Seklero tebalulam,’ aro mag tebatneloa saog uro tatneomne neneko ikindi, kom nembanep tanena, kom nembalulam. Ot nari, ‘Undo yaboho,’ seneropne agha ualulam kom. Andi wanaag seneropne agha uro yabilul,” seog.
40Wene seogti, eldi yubu ka'ero neleptop nang wilindi wamekag aneko samoro yaogti, malameka kembahiog. Kembahiogti Petrusag yubu lelamogti, “A'un kabuni tane wamlomne ko'o nhonog babe nanap nhon yae wamnep kom, te? 41Nimiri wanaag agha, ‘Walia uahane,’ sembanep aghana, nong mikip komdi, walia uanep kom. Ane sembe haing whi uro yae wamsuri, Allahag mololamsu. Orabari a'un mipsileba, malia ulapmunagti, a'undi Allahag, ‘Nu yepsi,’ aro molona mololamlulom,” aro ambatsiog.
42Wene seogti, Yesus nen ik phendepne samoro piogti, Allahag molona mololamogti, “Naniong, andi nanag, ‘Seklero tebalulam,’ aro pogneomne kom tanep komdi, nanag uro yabinepneog wamla tanena, andi wanaag seneropne agha uro yabile,” seog.
43Wene aro molbaogti, nen samoro yaogti kemelamsiogpa, sin nen kwahingdi malameka ipsiog. 44Sin malameka kembahiogti, nen samoro sin laplobi agha ik wilindipne nika uro molona lel piog.
45Allahag molona molol piogti, nen yingkina kemelamsiogpa, eldi yubu ka'ero neleptop nang taneko anam malameka kembahiog. Kembahiogti, “A'un wene babe kwahing sau nonolamlom te? Kembalulom! Na pan khebanenep ko'o wene peram tal. Na mog so'oag nimi tahinge pan khebanuanelba, mali-malia urop nangdi saeag nembanukang. 46Wene puksuri palamukap! Na pan khebanelne yalamla,” seog.
Yesus saelbaekti, haing sae kaupto pabieka
(Markus 14:43-50; Lukas 22:47-53; Yohanes 18:3-12)
47Yesusti anam yubu ambarelamsiog abeneko kemelamekpa, aobare nang nhon Yudas neneko yan altoghog. Yudasap nhon yan altoghek nimina, nimi maikno sirik, “Yesus saelbaukap,” aro yaek. Sin Yudasap nhon yaek nimi tanekona, memnang Allah sembe palirop nang sikini yaboap, Yahudi nimi wenehirop nangap tanekori pogsiekpa, karoghap kameap saelba, “Yesus haing sae kaupto saelbaukap,” aro Yudasap nhon yaek. 48Sin anam yan komag, Yesus pan khebaogne Yudasti sinag, “Kekneba nhon uanun,” aro ambatsiog nena, “A'undi elamlom nimina, nari somoro togtogha kibil togne nimi ene. El agha saelbalulom,” aro ambatsiog.
49Wene aro ambatsiogti payahiogti, Yudas yingkina Yesusag yubu lelamogti, “Nai, an yubu amohinne nubunge kiplangken,” aro togtogha kibog. 50Togtogha kiplamogpa, Yesusti elag samoro, “Nangkae, nene sembe yalam te?” seog.
Wene seogpa, sin yaek nang taneko sekel ingkina Yesus salero haing sae kaubek. 51Salelamekpa Yesusap nhon wamek nimi nhondi karog kilbom agha lebogti, sin yaek nimi nhon memnang Allah sembe palirop nang sikini nubunge arukna wamogne ao pubom agha pelengkaog.
52Ao pubom agha pelengkaogpa, elkae karog saleropne ponekoag Yesusti, “Karog ane nen samoro karog liroba aeag libe. Nimi etneri, ‘Opsinun,’ aro karog salelamle tanena, nimi eneko babe karoghag agha tebalul. 53Nari Naniag molbahaneba, elemag Allah arukna imagnang yin salerop nang malaikat teng-tengne pogholahisoba yepneheng. Aghana andina, ‘Elag molbahoba, yepso kom,’ sembalam te? 54Ot undo molbahane tanena, Allah Yubuag, ‘Undo-undo uro yabilul,’ aro mome toro pairoba aneko welaro sunup tangto uro yabinep?” seog.
55Wene seogti, nimi maikno tanekoag Yesusti yubu lelamogti, “Sop-sop Allahri Mem Ae aramag puka ulamnori, a'un whingag Allah yubu ambarelamsino aghana, a'undina haing sae kaupto salelamneom kom. Na, ‘Mo sekukap,’ aro mal tarop nimi sikini wamsene tanena, a'undi nanag yalamlomne, ‘Nimi yonge ane oro saelbaukap,’ aro karoghap kameap payalamlomne sunsunum sembanep. Na, ‘Mo sekukap,’ aro mal taropne wamna te? A'undi nimi whingag yo kom uro na saelbanep aghana, 56samenag Allah yubu silimu tiptop nimiri mome toro pibekne sunup tangto yabilul. Ane sembe, wene yalomdi, undo salelamnelomne ni sindi mome toro pibekne sunsunum uro wene uro yabalamla,” seog. Wene seog abeneko, eldi yubu ka'ero neleptop nang ni el laploa tognop tang-tang merebaek.
Yahudi nimi sembe tam kareptop nang whingag Yesus pabieka
(Markus 14:53-65; Lukas 22:54-55,63-71; Yohanes 18:13-14,19-24)
57Yesus haing sae kaupto saelbaek nang tanekori poa lebekti, memnang Allah sembe palirop nang sikini nubunge Kayafasag piek. Kayafas wamoghag aneko Musari yubu amohirop nangap, Yahudi nimi wenehirop nangap poloro winil dalamekag poa piek. 58Yesus poa palamekpa, Petrusna amik nelepto weag uro tiro palamogha memnang Allah sembe palirop nang sikiniri ae aramag piog. Petrus Kayafas ponekori ae aramag wa'iogti, memnang Allah sembe palirop nang sikini nubunge yae ua urop nang anabiag pukamog. Pukamogti, “Yesusag ni uro yabalamlenge imnun,” aro pukamog. 59Pukamogpa memnang Allah sembe palirop nang sikini yaboap, yog nimi nubungeri Yahudi nimi sembe tam lelekto kemerop nang Mahkamah Agama wamek nang niap tanekori miniro lolbongkia, “Yesus ya'ag obukap,” aro elag tam palinne sembe elamek. 60Elag tam palinne elamekti, nimi maiknori Yesus sembe sin whingag minirop yubu ambatsiek. Undo ambatsiek aghana, Yesusag tam palinne nhon babe olog ibek kom.
Ibek komba, komoptobag nimi phende nimi whingag sekelarek. 61Sekelarekti yubu lelamdekti, “Nimi eneri lelamori, ‘Nanag mikipne wamlaba, Allahri Mem Ae tuplomneri, nari ik wilindi agha ae ene nen sobanun,’ seoba ka'ebanomo,” serek.
62Wene serekpa, memnang Allah sembe palirop nang sikini nubunge poneko sekogti, Yesusag yubu lelamogti, “Sindi anag tam pairopne leptangne sembe samoro yubu leplulam kom te?” aro haibaog.
63Wene aro haibaog aghana, Yesus yubu lemna koma wamog. Yubu lemna koma wamogpa, memnang Allah sembe palirop nang sikini nubungeri nen yubu lelamogti, “Andi Allah kamag wamlange poneko siag agha, ‘Sikne lemna,’ aro nunag yubu so'opto ambatsi. Anna Allah Elme mog so'oag nimi taluro saelba uhinepne Kristus wamlam tanena, nunag ambatsi,” aro ambarog.
64Wene aro haibaogpa Yesusti, “Andi wene leplamne pone wamna. Aghana wene nari a'unag yubu ambatnuahin! Amik kembanululom nena, na mog so'oag nimi tahinge Imagne mikipne poneko sae sirik sip pukamneri, toa imag wamlenge nusam toman nen samoro yalamnea tiboghanululom,” seog.
65Yesusti wene seogpa, memnang Allah sembe palirop nang sikini nubunge ponekori ka'ebaogti, yo lelem elenge ag wangkamogne taepto ebog. Taepto ebogti, yubu lelamogti, “Eldi Allah san tiliplamla! Ane sembe yog nimiri, ‘Undo-undo lero ulamoa ka'ebanori imno,’ aro lenne nen ka'ebaukap kom. Allahap nhon sansano nenep talne san tilipto leplange ka'ebalom. 66Wenena yubu ka'ebalomneag agha, ‘Huaukap,’ aro seneraglamlom?” aro haibahiog.
Wene aro haibahiogpa, nimi wamek nimi tanekori, “Ya'ag tebalulne agha sunsunum,” aro tam karebaek.
67Wene alamekti, Yesus whingag silumag suplamekti, saeri olamek. Nimi nhon-nhondi taeplolamekti, 68“Anna Allahri weptopne Kristus wamlam tanena, Allahri an wana heklangkelne agha nunag ambatsi. An etneri olangkelne si lepmen,” aro ol wa'alamek.
Petrusti Yesus sembe, “Na ekonne,” seogha
(Markus 14:66-72; Lukas 22:56-62; Yohanes 18:15-18,25-27)
69Petrus nimi nubunge ponekori ae aramag aneko pukamog. Pukamogpa awe yepto torop kel nhon Petrusag yaogti, yubu lelamogti, “An babe Yesus Galileange ponekoap nhon ua ulamdom,” seog.
70Wene seogpa, Petrusti sin ni whingag kom alamogti, “Andi hurop yubu agha lelamlam na ekon,” seog.
71Wene seogti, anekoa sekom agha leka ae aramag kanero solingkirop ina siramag sekel piog. Sekel piogpa, aneko yepto torop kel yog kel nhondi ibogti, nimi niag ambarelamsiogti, “Nimi ene babe Yesus Nazaretne ponekoap nhon ua ulamdang,” aro wene seog.
72Wene seogpa, Petrusti kom aro yubu so'opto salag lelamogti, “Na sik uro nimi ene sembe na ekon,” seog.
73Olog wameka sekamek nimi taneko Petrusag yaekti lelamekti, “Andi yubu lelamlamne agha keknep talba, eldi mog so'oag sip nimiri yubu leropne saog lelamlamba, ka'ebapti el taap. An babe sik uro elap nhon ua uropne wamlam,” seek.
74Wene seekpa, Petrusti alniro mikip uro yubu lelamogti, “A'undi lelamlom nimi ene si na otsik tapto ekonne agha lelamlom. Orolenange lelamna tanena, imagne ponekori hae omnelul,” aro yubu so'opto ambatsiog.
Wene alamog abeneko winang ayamdi kau seog.
75Winang ayamdi kau seog abeneko Yesusti samenag yubu lebogne sembe Petrus el taog. Yesusti samenag Petrusag yubu ambarelamogti, “Winang ayamdi kau sen komag andi ik wilindi na sembe, ‘Ekonne,’ sunululam,” seogne sembe Petrusti seneraghogti, sekom agha lambaogti, wana noro agha ngik-ngogha engelamog.
Цяпер абрана:
Matius 26: kklKOS
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2023 (Active), Wycliffe Bible Translators, Inc. All rights reserved.