الإنجيل زي ما كتبه مَتَّى 8

يسوع يشفي رجال أبرص

1و لما نزل يسوع من الجبل، لحقوه ناس واجد. 2و إلا رجال مريض عنده برص، قرب منه وسجد له و قال: "يا سيد، إدا بغيت، أنت تقدر إنك تطهرني!" 3ومد يسوع إيده ولمسه و قال له: "أمبى أطهرك، أطهر!" و على طول تطهر الرجال من برصه. 4و قال له يسوع: "أنتبه! لا تقول لأحد، لكن روح واعرض نفسك على الكاهن، وقدم القربان إلا أمر به موسى، و بيكون شهادة ليهم!"

إيمان قائد المية

5و لما دخل يسوع مدينة كفرناحوم، جاه عكسري - قائد المية يتوسل له 6و قال له: "يا سيد! خادمي مشلول وطريح الفراش في البيت، مو قادر من الآلم ." 7و قال له يسوع: "باروح أشفيه!" 8و رد عليه العكسري- قائد المية و قال له: "يا سيد، أنا ما أستاهل أنك تكون تحت سقف بيتي، بس بكلمة منك، بيتشافى خادمي. 9ترا أنا بعد رجال زيك تحت سلطة أعلى مني، وعندي بعد جنود تحت سلطتي و أمري، أقول للواحد مهم: روح! ويروح، واقول للثاني: تعال! ويجي، ولعبدي: سوي هالشي! ويسويه." 10يوم سمع يسوع كلامه،أستغرب و قال للي يتبعوه: "بأمانة أقول ليكم: ما عمري شفت أحد في إسرائيل عنده زي هالإيمان العظيم! 11وأقول ليكم: في ناس واجد بيجوا من الشرق والغرب وبيقعدوا على الطاولة وبياكلوا ويا إبراهيم وإسحاق ويعقوب في ملكوت السماوات. 12أما أولاد الملكوت، بينرموا برا في الظلمة، وهناك بتسمع الصياح و الندم المؤلم!" 13و بعدين قال يسوع للعسكري - قائد المية: "روح، إلا آمنت به بيصير. و في ديك الساعة أنشفى خادمه. "

يسوع يشفي ناس واجد

14و لما راح يسوع بيت بطرس، شاف حماة بطرس نايمة من المرض - جايتنها صخونة. 15و قام لمس إيدها، وراحت عنها الصخونة، وقامت من السرير تخدمه. 16وفي المغرب، جابوا له ناس واجد ساكنينهم شياطين. و كان يطرد منهم الشياطين بكلمة وحدة منه وشفى المرضى كلهم، 17وفي هاللحظة تحققت النبوة إلا أندكرت على لسان النبي إشعياء يوم قال: "هو أخد آلامنا، وحمل أمراضنا."

ثمن إتباع يسوع

18و لما شاف يسوع إن الناس تجمعوا حوله، أمر تلاميده إن يعبروا إلى الجهة الثانية. 19وجاه أحد الكتبة و قال: "يا معلم، أنا أمبى أتبعك وين ما تروح!" 20و رد عليه يسوع و قال: "للثعالب أوكار، ولطيور السما مأوى، لكن إبن الإنسان، حتى ما عنده مكان يسند فيه راسه." 21و قال له واحد ثاني من تلاميده: "عاد يا سيد أسمح ليي أول شي أروح أدفن أبويي!" 22و رد عليه يسوع و قال: "أتبعني الحين، وخل الميتين يدفنوا موتاهم!"

يسوع يْهَدي العاصفة

23و بعدين ركب السفينة، وتبعوه تلاميده. 24و إلا عاصفة قوية هبت على البحر، لدرجة أن الماي شوي و يغّرق السفينة. و كان هو نايم 25وراحوا له التلاميد بسرعة عشان يقعدوه و قالوا: "يا سيد، أنقدنا!" ترا بننهلك!" 26و قال ليهم يسوع: " إلاويه أنتون خايفين، يا ألا إيمانكم ضعيف ؟" وبعدين قام وقف و سكّت الريح، وعم الهدوء التام. 27وأستغربوا الرجال و قالوا: "وش هالشخص هدا؟ إلا حتى الريح والبحر يطيعوه؟."

رجالين تسكنهم الشياطين تشافوا

28و لما وصل إلى الجهة الثانية، في منطقة الْجَدَرِيِّينَ، قابلوه رجالين ساكنينهم شياطين، وكانوا هالرجالين طالعين من بين القبور، وكانوا حدّهم شرسين لدرجة إن ما أحد كان يقدر يمر على داك الطريق بسبتهم. 29وفجأة قاموا يصرخوا و قالوا: "وش دخلك فينا يا إبن الله؟ شجيت هني قبل الوقت الموعود عشان تعدبنا؟" 30و كان في قطيع كبير من الخنازير يرعى على مسافة بعيده منهم 31و توسلت الشياطين ليسوع و قالت : "إدا كنت بتطردنا، فخلينا نروح ندخل في قطيع الخنازير." 32و قال ليهم: "روحوا!"و طلعوا واتلبسوا الخنازير، و قام القطيع راح مسرع من على حافة الجبل إلى البحر، وماتوا الخنازير غرقانين. 33وهربوا رعاة الخنازير إلى المدينة، و قالوا للناس بكل إلا صار، وويش صار في الرجالين المسكونين. 34و إلا المدينة كلها طلعت تمبى تقابل يسوع. و لما التقوا فيه أهلها، ما بغوه هناك، وطلبوا منه أن يطلع من ديرتهم.

Цяпер абрана:

الإنجيل زي ما كتبه مَتَّى 8: QNAV

Пазнака

Падзяліцца

Капіяваць