Yɔanɨ 20
20
Yeso ɔjʉkanɔ akɔ ingwo
(Mat 28:1-8; Mlk 16:1-8; Luk 24:1-12)
1Akɔ ɓisi ɓɔ mʉkpanganɨa wɔ pɔsʉ, Malɨa ɔ Magadala ɛ꞉ka aɓʉnjaʉ nɔ igbandindi ɓɔ cha, umomo-sɨ ta kʉɔ. Ɛ꞉na ɓɔ ikopi ngɨyɛ ɓa꞉kuto nayɔ umongu wɔ ɓʉnjaʉ, ya tɨa ikelise anambamba. 2Kʉdɔ, ɔ꞉sa bangʉ agbʉka atɨ Simoni Pɛtɛlɔ, ɨɓɔ nɔ mʉkpata ngakɔmɔ ɨyakɛ, Yeso a꞉ɓimʉkʉnda nɔgbɛ. Ga ɨyɔ naɓɔ ɓɔ: «Ɓɔ꞉chwɛiso ndʉtʉ yɔ Makwɔɓɨɨ amati ɔ ɓʉnjaʉ chwɛisoni. Tangɔmʉ anɨmbɨa ɓɔ, ɓɔ꞉mʉnapɨɔ gbanɨ.»
3Atɨ Pɛtɛlɔ ɨhɔ nɔ mʉkpata ngɨananɨ wɔmɔ, ɓɔ꞉ngwɨa kyɛnda anɨsa inani aɓʉnjaʉ. 4Ɨɓɔ ɓaɓomu ɓapɨnɨ, ɓa꞉sa ta bangʉ. Yakamɛngana, ɨyɔ mʉkpata ngɨananɨ, ɔ꞉nagaaka Pɛtɛlɔ nɔ bangʉ, nɔ tɨa ɨyɔ ɔ꞉pʉnga ɓɔya inani aɓʉnjaʉ. 5Kʉdɔ, a꞉tʉkʉma anunono inani amati ɔ ɓʉnjaʉ, ɔ꞉tɛna ta magbaa kɔ lɨpʉkʉ kɔta matamata ngʉkɔnanɨ, magbuche anambamba ɓɔ. Yakamɛngana, sɔkɔmʉ ikumonio ɨyɔ, inani amati. 6Mbise ɔngɔ, Simoni Pɛtɛlɔ, ɔ꞉ɓɔya tɨa ɨyɔ, nɔ, ɔ꞉kumonio amati ɔ ɓʉnjaʉ ga ngbuu. Ɔ꞉tɛna ɓata ta magbaa kɔ lɨpʉkʉ ngʉkɔnanɨ magbuche anambamba ɓɔ kyɔ. 7Ɛ꞉na kʉ nɔ ɨpʉkʉ ngɨyɛ ɓa꞉sanga nayɔ mʉtʉ wɔ Yeso. Ʉgbaa wɔ ɨpʉkʉ ngʉwɔnanɨ, ɓa꞉ʉguɓɔkɔmʉ ɨhɔ nɔ ʉkakɔmɔ, yakamɛngana, ɓa꞉ʉnapɨa ɨwɔ ta di. 8Kʉdɔ, ɨyɔ mʉkpata ngɨa a꞉pʉnga anɨsa aɓʉnjaʉ, ɔ꞉tɔkumonio ɨyɔ tɨa kʉ kumonioni. Ɛ꞉na yaka ngɨyɛnɛnɨ ta nɔ mesu kangɔ, nɔ ɔ꞉baya ta baya. 9Gʉtʉ ta akɔ angbinga ngɨananɨ, ɨɓɔ ɓakpata ɓa꞉ɓio-sɨ ta bɔ ɓangɔpemisenimʉ, ɨsɨ yɔ yaka ngɨyɛ Mabii kɔ Asɔɓɨɨ ka꞉ngaka ɓɔ: «Yeso a꞊jʉkana sina akɔ ingwo jʉkananɨ.»#popoko Mmb 16:10 10Ambise ɔngɔ, ɨɓɔ ɓakpata ngʉɓɔnanɨ, ɓɔ꞉tɔa andaɓʉ.
Yeso ɔchwɛanɨɔ Malɨa ɔ Magadala
(Mat 28:9-10; Mlk 16:9-11)
11Ɨnadɔ, Malɨa a꞉ɓio jɛnɛ yangɔ ɓɛmaɛ ta aɓei, anambamba ɔ ɓʉnjaʉ, ɨyɔ amati ɔ ndɨa. Ta amati ɔ ndɨa ɓanɨ, ɔ꞉tʉkʉma anunono amati ɔ ɓʉnjaʉ. 12Ɔ꞉tɛna tɨa ɓamalaika ɓapɨnɨ, ɓɔ꞉pɛnɨeni lɨpʉkʉ lɛta tu tu tu. Ɓa꞉ɓio ɓaweleke aɨda ngɨyɛ ɓa꞉kwaiso-ɔɔ ndʉtʉ yɔ Yeso, mʉngana nɔ ʉgbaa amʉtʉ, nɔ ɨyakɔmɔ nɔ ʉgbaa amɨtɨndɨ. 13Ga ɨɓɔ nayɔ ɓɔ: «Ha moi! Wakɔndɨa ɨmanɨ?» Ɔ꞉ɓutosio ɓɔ: «Nandɨa dɔ ɓɔ꞉nguso pɛngɛ ndʉtʉ yɔ Makwasɛmɨ, nɔ nangɔmʉ anɨmbɨa ɓɔ ɓɔ꞉mʉnapɨɔ gbanɨ?»
14Ɨyɛ ndʉ a꞉pipo ngaka yaka ngɨyɛnɛnɨ, ɔ꞉natana mesu ambise, nɔ ɔ꞉tɛna tɨa Yeso ɨyananɨ aɓɛmaɛ ga gba. Yakamɛngana, sɔkɔmʉ ɨ꞉mɨmbɨa ɓɔ ɨyɔ, Yeso ɨyananɨ. 15Yeso ɔ꞉muɓokuo ɓɔ: «Ha ɨna-e, wandɨa ɨmanɨ? Nɔ wahata anɨ?» Ɨyɔ Malɨa, a꞉ɓio ayongo ɓɔ ya mombi ɔ tɛa ɔ ɨda ngɨyɛnɛnɨ. Kʉdɔ, ga ɨyɔ nayɔ ɓɔ: «Ha makwasɛmɨ, yɔɓieni ɓɔ ʉwɛ akɛ wɔnguso ndʉtʉ ngɨangɔ, anapana ɓɔ wɔɨnapɨɔ gbanɨ, ambɔ nɨsa nayɔ asɨka.»
16Ga Yeso nayɔ ɓɔ: «Ha Malɨa!» Kʉdɔ, ɨyɔ Malɨa ɔ꞉natana mesu aki a꞉ɓio-ɛɛ ga pɛɨ, ga ɨyɔ nɔ Yeso nɔ Ɛbɛlɛnɨa ɓɔ: «Raboni», ɨsɨ yɔngɔ ɓɔ «Mʉpananakɨa».
17Ga Yeso nayɔ ɓɔ: «Watɨnaɓotomʉ, dɔ, nangɔtɔamʉ atɨ Aba. Yakamɛngana, sa angakɨa ɓanduku ɓɔsɛmɨ ɓɔ, nɔmanɔ ɨmɨ atɨ Aba ngɨasɛmɨ, ɨyakɛ akʉ atɔ eno. Ɨyɔ, a Asɔɓɨɨ ngɨasɛmɨ, nɔ kʉ Asɔɓɨɨ ngɨyeno.»
18Kʉɓanɨ, ɨyɔ Malɨa ɔ Magadala, ɔ꞉sa angakɨa ɓakpata ɨsaʉ ɓɔ, ɔ꞉mɨnɔ Makwɔɓɨɨ ta nɔ mesu, nɔ, ɔ꞉mʉngakɨɔ yaka ngɨyɛnɛnɨ iɓomu.
Yeso ɔchwɛanɨɔ ɓakpata
(Mat 28:16-20; Mlk 16:14-18; Luk 24:36-49)
19Nɔ ɨpasɨ yɔ ɓisi ngʉɓɔnanɨ ɓɔ mʉkpanganɨa wɔ pɔsʉ, ɓakpata ɓa꞉mɔmanɨa ɨda mɛngana amati ɔ ɨkáá, nɔ ɓɔ꞉dɨkpaka mamongu ta maɓomu, dɔ, ɓa꞉ɓio akumo Ɓayuda. Yeso ɔ꞉chwɛanɨa ga wɛɛ, ananɨ ati eɓo. Ga ɨyɔ naɓɔ ɓɔ: «Majɨɔ kiɓio ɨhɔ nenu!» 20Ɨyɛ Yeso a꞉ɓusigio ɓanɨ, mbise ɔngɔ, ɔ꞉ɓʉpana lɨkɔndɔ ngɨlangɔ nɔ ʉbanja ngʉwangɔ. Kʉdɔ, ɓakpata ɓa꞉kwa ɨgyagya anɨna Makwɔɓɨɨ. 21Yeso ɔ꞉ɓusigio ɓata ɓɔ: «Majɨɔ kiɓio ɨhɔ nenu! Ngbanga ndʉ Aba a꞉natʉma ɨmɨ, ɨmɨ, nanenu atʉma inu kʉɓanɨ.» 22Ndʉ a꞉pipo naɓɔ angakɨa yaka ngɨyɛnɛnɨ, ɔ꞉ɓuhuo nɔ ʉhʉ ga fu, ga ɨyɔ naɓɔ ɓɔ: «Ɨnɨanɨeni nɔ Mʉtɨma wɔta Tu. 23Mombi muɓomu ngɨa ná꞊mɨpaakɨa ɓʉɓɨɓɨ, ɛnɨanɨa nɔ nɨpaanakɨa. Nɔ, mombi muɓomu ngɨa nángɔmɨpaakɨamʉ, angɛnɨanɨamʉ nɔ nɨpaanakɨa!»
Yeso ɔchwɛanɨɔ Tɔma
24Ɨnadɔ, Tɔma ngɨa ɓa꞉tɨmisoko ɓɔ «Ipiyo», nɔ kʉ mʉngana ɔ ɓakpata tɛkɛɓɛ nɔ ɓapɨnɨ, a꞉ɓiomʉ ɨyɔ, ɨhɔ nɔ ɓangɛ, angbinga ngɨa Yeso a꞉ɓʉchwɛanɨa-ɔɔ. 25Kʉdɔ, ɓangɛ ɓa꞉musigio ɨyɔ Tɔma ɓɔ: «Isu, tɛ꞉nɔ Makwɔɓɨɨ ta nɔ mesu.» Yakamɛngana, ga ɨyɔ naɓɔ ɓɔ: «Ɨmɨ, nɔkɛnenimʉ lipokoi lɔ musumani alɨkɔndɔ ngɨlangɔ ta nɔ mesu, nɔ, napɨa ɨkɔndɔ aipokoi yɔ ʉbanja ngʉwangɔ, nangɔbayamʉ pɔ bele.»
26Ambise ɔ makwaa ɓɛgɨna, ɓakpata ngʉɓɔ Yeso ɓɔ꞉mɔmanɨa ɓata ɨda mɛngana amati ɔ ɨkáá, mamongu madɨkpakɛ, ɨɓɔ, ɨhɔ tɨa nɔ atɨ Tɔma. Inani ɓa꞉ɓio-ɛɛ, Yeso ɔ꞉ɓʉchwɛanɨa ɓata, ga gba ananɨ ati eɓo. Ga ɨyɔ naɓɔ ɓɔ: «Majɨɔ kiɓio ɨhɔ nenu-ɛ.» 27Mbise ɔngɔ, ga ɨyɔ nɔ Tɔma ɓɔ: «Napɨa kpɛngbɛ ngɨasɔɔ aka, nɔ kanga tɨa lɨkɔndɔ ngɨlɛsɛmɨ. Nɔ ɓata ɨsɨnganiso ɨkɔndɔ ngɨyɛsɔɔ, nɔ wɔpoto ʉbaja ngʉwɔsɛmɨ. Sɨa pasi, nɔ báya nɔ ingono!»
28Kʉdɔ, ga Tɔma nayɔ ɓɔ: «Hii Makwasɛmɨ, nɔ Asɔɓɨɨ ngɨasɛmɨ!» 29Yeso ɔ꞉mutosio ɓɔ: «Wɔbayɔ ndɨ tɨa bayanɨ ɓɔ ya ingono, dɔ, wɔ꞉nɛnɔ? Ɨgyagya akɔ ɓiga ngʉɓa ɓakɔbayanakɨa, gʉtʉ ɓɔ꞉nenenimʉ jɛnɛ!»
Ɨsɨ yɔ tɛndakɨa Ɨtabʉ ngɨyɛ
30Yeso a꞉kɨa ɓata ɓakɔkɔ ɓɔta ɓambangɛ nga ɓɔmɔ ɓaja, akɔ mesu kɔ ɓakpata ngʉɓangɔ, ʉɓa ɓa꞉ɓʉtɛndakɨamʉ amati ɔ ɨtaɓʉ ngɨyɛ. 31Yakamɛngana, ɓakɔkɔ ngʉɓa ɓa꞉ɓʉtɛndakɨa aka, ya, ta dɔ bayeni ɓɔ Yeso a Masia, nɔ a Mwana ɔ Asɔɓɨɨ. Nɔ mombi ngɨa amʉbaya, ɛ꞊nɨanɨa nɔ ɓʉhɛa akɔ ino yangɔ.
Цяпер абрана:
Yɔanɨ 20: buuN
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2021, Wycliffe Bible Translators, Inc.