Luka 10
10
Yeso ɔtʉmɔ ɓakpata ɓatɛkɛɓɛ mɛɗɨanɛka nɔ ɓapɨnɨ
(Mat 10:7-16)
1Ambise ɔ yaka ngɨyɛnɛnɨ, Makwɔɓɨɨ ɔ꞉chwa ɓata ɓakpata ngaɓɔmɔ ɓatɛkɛɓɛ mɛɗɨanɛka nɔ ɓepini, nɔ, ɔ꞉ɓʉtʉma ɓapɨnɨ ɓapɨnɨ apɛɨ angɔ, akɔ ɓagʉlʉ nɔ akɔ ɓamʉa ɓaɓomu aki ya꞉ɓio anɨtanɨa ɓɔ ɨyɔ makwɔngɔ ɨsa-ɛɛ. 2Ɔ꞉ɓusigio ɓɔ: «Masɔɔ maja ka tɨa mamɛ akɔ kʉbaa, yakamɛngana, ɓombi ɓɔ tɛa ɓa bele. Ɨteni gɔ atɨ makwɔ masɔɔ atʉma ɓombi ɓɔ tɛa akʉbaa ɔ masɔɔ ngɨangɔ. 3Seni! Ɨnadɔ, nanenu akɔtʉma ndʉ ɓamɛmɛ ati ɔ ɓakwei. 4Nátɨɓotenimʉ ɓagyɛgyɛ, pɔ itumo, pɔ matɨa lɨkpakʉ ɗepini, nɔ, angbinga ngɨa ná-ɔɔ anɨsa, nátɨmaakenimʉ anɔ ɨngbaa aɓokuo ɓombi.
5Akɔ ɨkáá iɓomu ngɨyɛ ná꞊kumonio-ɛɛ, sugeni-sɨ ɓɔ: ‹majɨɔ kiɓio amati ɔ ɨkáá ngɨyɛ.› 6Nɔ, yɔɓieni nɔ mombi ngɨa abaya majɨɔ amati ɔ ɨkáá ngɨyɛnɛnɨ, majɨɔ kawolo akʉʉ angɔ, dɔ sɔkɔmʉ ɓanɨ, ná꞊ngwa kʉ ɨhɔ nɔ majɨɔ ngʉkeno. 7Ɓieni ta amati ɔ ɨkáá ngɨyɛnɛnɨ, sɔkɔmʉ anɨsa alɨkáá kʉ gbaɨ. Dyeni nɔ nɨmwa ɨkyɛmʉ ngɨyɛ ɓa꞊ninjo, dɔ, mombi ɔ tɛa ɔsisekio nɔ mʉkaya wɔ tɛa ngɨangɔ.
8Amati ɔ gʉlʉ nga ino tanɨ ná꞊kumonio-ɛɛ, nɔ aki ɓa꞊nɨtɛtɛa-ɛɛ, dyeni ɨyɛ ɓanɨnapɨa. 9Heiseni ɓombi ɓɔ ɓakaɓu ngʉɓa ɓa꞊ɓio ananɨ, nɔ ɓusigieni ɓɔ: ‹Angbinga ɔ Ɓʉngama ngʉɓɔ Asɔɓɨɨ a tɨa tinene nenu.› 10Yakamɛngana, akɔ gʉlʉ muɓomu ngɨa ná꞊kumonio-ɛɛ, nɔ sɔkɔmʉ ɓɔnɨtɛtɨa, chwɛeni ta chwɛa, nɔ, nɔ́chana amɨgyɛndɔ ngɨyeɓo nɔ́ɓieni asugo ɓɔ: 11‹Tɔbɛndakɔ iɓungu yɔ ɨkʉmbʉ ngɨyɛ yeno, ɨyɛ yɔ꞉tiɗeto amɨtɨndɨ ngɨyeso, nenu akɔpananiso ɓɔ nɔ́kɨɔ ɓɨɓɨ. Yakamɛngana, ɨmbɨeni iɗo ɓɔ angbinga ɔ Ɓʉngama ngʉɓɔ Asɔɓɨɨ, ɛkɔ tɨa tinene nenu.› 12Na nenu aɓɨa ɓɔ sungo akɔ ɓisi ngʉɓɔnanɨ ɓɔ mʉkɔmbʉ, Asɔɓɨɨ a꞊kio sina mʉkɔmbʉ wɔ ɨkʉmbʉ ngɨyɛnɛnɨ ɓʉkaɨ nɔgbɛ, anagaaka ʉwɔ ɨkʉmbʉ yɔ Sɔdɔmʉ.»
Lɨkʉmbʉ ngɨlɛ lɔyaɔ báya
(Mat 11:20-24)
13Yeso a꞉sugo ɓɔ: «Ikoko akɔ ʉwɛ ɨkʉmbʉ yɔ Kɔlajini. Ikoko akɔ ʉwɛ ɨkʉmbʉ yɔ Betesaida, dɔ, yaka yɛta ɨmbangɛ ngɨyɛ ya꞉kɨanɨa ati eno, yɔ꞉kɨanɨeni jɛnɛ amati ɔ ɨkʉmbʉ yɔ Tilo nɔ Sɨdɔna, ambɔ ɓombi ɓɔngɔ ɓa꞉nataniso jɛnɛ mʉtɨma akɔpɛnɨa ikonio, nɔ, atono nɔ isupu. 14Akɔ ɓisi ngʉɓa ɓɔ mʉkɔmbʉ, Asɔɓɨɨ a꞊kio sinani mʉkɔmbʉ ngʉweno ɓʉkaɨ nɔgbɛ, anagaaka ʉwɔ ɨkʉmbʉ yɔ Tilo nɔ Sɨdɔna. 15Nɔ ʉwɛ, gʉlʉ ɔ Kapalanaumu, wa ndɨ ayɔngɔ ɓɔ ɓa꞊naɗetiso akɔɓɔya akʉʉ ɔ ɓisi? Pɔ bele, ɓa꞊nodiso suo akɔɓɔya ta akɔ ʉpɨa ngʉwa wa asɨ nɔgbɛ.»
16Yeso a꞉ɓusigio ɓakpata ngʉɓangɔ ɓɔ: «Mombi ngɨa anenu anʉka, anɛmɨ akɔnʉka ɨmɨ, mombi ngɨa anenu atata, anɛmɨ atata ɨmɨ, nɔ ɨya, anɛmɨ akɔtata ɨmɨ, akɔtata mombi ngɨa a꞉natʉma ɨmɨ.»
Tɔwa yɔ ɓakpata ɓatɛkɛɓɛ mɛɗɨanɛka nɔ ɓapɨnɨ
17Ɓakpata ngʉɓɔnanɨ ɓatɛkɛɓɛ mɛɗɨanɛka nɔ ɓapɨnɨ, ɓa꞉tɔa ɓɔhueni nɔ ɨgyagya, ɓɔ꞉pʉnga sugo ɓɔ: «Makweso, gʉtʉ ta mɨtɨma yɔ madu yanesu anʉka, akʉʉ ɔ nɨchwa ino ngɨyɛsɔɔ.»
18Yeso ɔ꞉ɓutosio ɓɔ: «Nɛ꞉nɔ Sɨtanɨ akɔɓwana anɨngwa akʉʉ ɓisi, ndʉ ɨyɛ ʉgbaa wangɛnana-ɔɔ. 19Ɨnadɔ, na꞉ninjo inu angu ayechoo ɓasɨɨ nɔ ɓanakwaagbanɨ, nɔ, anagaaka angu muɓomu ngɨyɔ mʉnamasa, nɔ, yaka pɔ mɛngana ya꞊ngɔnɨkɨamʉ. 20Yakamɛngana, nátɨkwamʉ ɨgyagya, dɔ mɨtɨma yɔ madu yanenu anʉka, kweni ɨgyagya, dɔ mano ngʉkeno, kamatɛndakɨɛ amati ɔ ɨtaɓʉ akʉʉ ɔ ɓisi.»
Yeso ɔkwɔ ɨgyagya
(Mat 11:25-27; 13:16-17)
21Akɔ angbinga ngɨananɨ, Yeso a꞉kwa ɨgyagya akɔ angu ɔ Mʉtɨma wɔta Tu, kʉdɔ, ɔ꞉sugo ɓɔ: «Aba, Makwɔɓɨɨ ɔ dɔdɔ nɔ ɓisi, nɔnatosio ʉbɨba, dɔ wa꞉naya yaka ngɨyɛ, akɔ ɓombi ɓɔ nɨmbɨmbɨanaka nɔ ɓapananakɨa. Wɔ꞉tɔɨpanjaka akɔ ɓombi ɓɔta ɓʉtʉʉ. Ii Aba, nɔnabibiso dɔ yanɛkataa ʉwɛ ta ɓanɨ.»
22Ɔ꞉tɔɓusigio ɓata kʉ ɓɔ: «Aba a꞉nenjo ɨmɨ ɓayaka ɓaɓomu, nɔ mombi angɔmʉ ɨya, anɨmbɨa ɓɔ mwana a anɨ, yɔɓienimʉ ta Aba. Nɔ mombi angɔmʉ ɨya, anɨmbɨa ɓɔ Aba a anɨ, yɔɓienimʉ ta Mwana. Nɔ mombi ngɨa Mwana akʉnda nayɔ anɨmbiiso andɔngɔ.»
23Ɔ꞉natana mesu aki ɓakpata ɓa꞉ɓio-ɛɛ, nɔ, ɔ꞉ɓusigio ta ɨɓɔ ɓɔ: «Ɨgyagya akɔ ɓombi ngʉɓa ɓanɨna yaka ngɨyɛ inu nánɨna! 24Dɔ, nanenu aɓɨa ɓɔ magbɛ maja, nɔ ɓangama ɓɔta ɓakpɔkpɔ, ɓa꞉tatanɨa anɨna yaka ngɨyɛ inu nánɨna, sɔkɔmʉ ɓɔ꞉ɨna, nɔ nʉka yaka ngɨyɛ inu nánʉka, nɔ, sɔkɔmʉ ɓɔ꞉ɨkɔ.»
Isisenio yɔ Mʉsamalɨa ata muɗo
(Mat 22:34-40; Mlk 12:28-31)
25Mʉpananakɨa wɔ mapanʉ mʉngana ɔ꞉ngwa ɨkʉʉ, akanio Yeso, ga ɨyɔ nayɔ ɓɔ: «Mʉpananakɨa, nɔsisekio kɨa tanɨ anɨnɨanɨa nɔ uɓei wɔ mago nɔ mago?»
26Yeso ɔ꞉mutosio ɓɔ: «Yatɛndanakɨa tanɨ amati ɔ ɨtaɓʉ yɔ mapanʉ? Wakyɔpemiso ɨmanɨ amati ɔngɔ?»
27Ɔ꞉tosio ɓɔ: «Kʉnda Makwɔɓɨɨ Asɔɓɨɨ ngɨasɔɔ, nɔ mʉtɨma ngʉwɔsɔɔ uɓomu, nɔ uɓei ngʉwɔsɔɔ uɓomu, nɔ angu ngɨasɔɔ muɓomu, nɔ itungwio ngɨyɛsɔɔ iɓomu, nɔ, kʉnda mangɛ kʉndʉ wakʉndana ʉwɛ makwɔngɔ.»
28Yeso ɔ꞉musigio ɓɔ: «Wɔ꞉tosio iɗo, wɔkɨeni ɓanɨ, wɛ꞊nɨanɨa nɔ uɓei ngʉwɔ mago nɔ mago.»
29Mʉpananakɨa wɔ mapanʉ ngɨananɨ a꞉ɓio akʉnda pananiso ɓɔ anɔ ɓungbingbii, kʉdɔ, a꞉muɓokuo Yeso ɓɔ: «Mangɛ a tɨa anɨ?»
30Yeso ɔ꞉mutosio nɔ isisenio ɓɔ: «Mombi mʉngana, a꞉ngwa agʉlʉ ɔ Yelusalɛma, anɨsa#10:30 anɨsa: pɔ ɓɔ anujo, dɔ Yelusalɛma a akɔ ɨkpangba anɔ Yeliko. Tɨa anɛngbaa, ɔ꞉tɔkwa alɨkɔndɔ lɔ ɓombi ɓɔ ndiɓo. Ɓɔ꞉muɗuo lɨpʉkʉ ngɨlɛ langɔ, ɓɔ꞉mutio nɔ ɓɛnda ɓɔ sɛkɛsɛkɛ, ɓɔ꞉mʉsɨa tɨta tinene nɔ ingwo, nɔ, ɓɔ꞉sa yeɓo. 31Akɔ ngasa, kumukumu mʉngana a꞉ɓio achana kʉ anɛngbaa ngɨyɛnɛnɨ, ɨyɛ a꞉mɨna, ɔmʉhɛngʉa ta hɛngʉa nɔ, ɔ꞉sa yangɔ. 32Mulawi mʉngana ɛ꞉ka ɓata achana kʉ ananɨ, ɔ꞉mʉkanga ɓɔ gbɔɔ, ɔ꞉mʉhɛngʉa, nɔ, ɔ꞉sa yangɔ. 33Yakamɛngana, mombi mʉngana ɔ ihoi yɔ Samalɨa, a꞉ɓio achana kʉ anɛngbaa ngɨyɛnɛnɨ. Ɨyɛ e꞉joo ananɨ, ɔ꞉mɨnɨa ikoko nɔgbɛ. 34Ɛ꞉sɨngana tinene nayɔ, ɔ꞉muchochoko lɨpɨ nɔ umbundo nɔ ʉkyɛpʉ,#10:34 nuto ʉkyɛpʉ akʉʉ ɔ ɨpɨ akponyo ɓasaba nɔ, ɔ꞉lɨnamanganaka nɔ magbaa kɔ lɨpʉkʉ. Mbise ɔ꞉muɗetiso akʉʉ ɔ punda ngɨangɔ, ɔ꞉sa nayɔ aɨkáá yɔ ɓabika, nɔ, ɔ꞉mʉtɔka. 35Nekuɓa yɔngɔ, ɔ꞉chweiso ɓagyɛgyɛ ɓapɨnɨ, e꞉njo makwɔ ɔ ɨkáá, nɔ, ɔ꞉musigio ɓɔ: ‹Ɓeyoko mombi ngɨa iɗo. Ɓagyɛgyɛ ngʉɓa wa꞊mʉtɔka naɓo ɓɔnagaakeni, na꞊natosio suo aka na꞊ɓio-ɔɔ atɔa.›»
36Yeso ɔ꞉muɓokuo ɓata ɓɔ: «Anɨ ati ɔ ɓombi ngʉɓɔnanɨ ɓaatʉ, anɔwɛ anɨnɨa ndʉ ɔpananiso mʉkyananakɨa wɔta uɗo, akʉʉ ɔ mangɛ ngɨa a꞉kwa alɨkɔndɔ lɔ ɓombi ɓɔ ndiɓo?»
37Mʉpananakɨa wɔ mapanʉ ɔ꞉tosio ɓɔ: «Ɨyakɛ a꞉mɨnɨa ikoko.»
Kʉdɔ, Yeso a꞉musigio ɓɔ: «Sa! Nɔ ʉwɛ, kɨa kʉɓanɨ.»
Yeso ɔsɔ atɨ Malata nɔ Malɨa
38Ɓisi mʉngana, Yeso ɨhɔ nɔ ɓakpata, ɓa꞉ɓio anɨsa kyɛnda. Kʉdɔ, ɔ꞉tɔkumonio aɨkʉmbʉ mɛngana, aki moi mʉngana ino ɓɔ Malata a꞉mʉtɛtɨa-ɛɛ, nɔ, ɔ꞉muwoliso andɔngɔ. 39A꞉ɓio nɔ manye ata moi ino ɓɔ Malɨa, ɨya, a꞉ɓio ɓawele apɛɨ ɔ Makwɔɓɨɨ, anʉka yaka ngɨyɛ a꞉ɓio anʉnga. 40Yakamɛngana, Malata ɔ꞉ɓio ayongono nɔ tɛa yɔ iwoi ɨja. Ɛ꞉ka anɔ ambamba ɔ Yeso, ga ɨyɔ ɓɔ: «Makwɔɓɨɨ, yambɨ ndɨ ɨkyɛmʉ andɔɔ, ayaa nɛmɨ asɨa nɔ tɛa nangana ɓɔ? Musigio ɓɔ, ɨka ɓaka-sɨ kʉɔ nɛmɨ akɔgbʉka.»
41Makwɔɓɨɨ ɔ꞉mutosio ɓɔ: «Ʉwɛ, Malata, Malata, wayongono nɔ bɔmbana akɔ yaka ɨja. 42Ɨkyɛmʉ yɛta ɨjanana ya ta mɛngana. Malɨa ɔ꞉sɨkɔ ɨkyɛmʉ ngɨyɛ yɛta iɗo nɔgbɛ, nɔ mombi angɔmʉ ɨya eneni amʉhɨnɨa.»
Цяпер абрана:
Luka 10: buuN
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2021, Wycliffe Bible Translators, Inc.