Génesis 3
3
Yantaquero shirampari aisati tsinane caari cameetsatatsi
1Yora maranque ionirotasanotatsiri catsini, yanaacojeitaqueri maaroni itsipapee poshiniripee jeri coquiyetatsiri yora yovetsicajeitaqueri Tasorentsi. Isampitaquero tsinane, icantiro:
—¿Queariompa icantajeitaquempi Tasorentsi: ‘Eiro poajeitarotsi chochoquipee, oca panquirentsimashiquiniri’?
2-3Acanaqueri iroori:
—Ocameetsati noajeitearo maaroni chochoquipee. Irointiquea ora nianquinirira, irotaque icantajeitanari: ‘Eiro poarotsi aisati eiro pantirotsi, ariorica poajeitaquearo, ari pincamajeitaque.’
4Iro cantaincha icantanaquero:
—Itseeyashita, eiro picamajeititsi. 5Ioti iriori ariorica poajeitaquearo, pioyetanaquero cameetsayetatsiri aisati caari cameetsayetatsi, pinquempetanaqueari iriori.
6Ari amenanaquero chochoqui, oneacameetsataquero. Oneveshireanacaro ocoanaque oyearo aisati ocoanaque ioyetanaquero cameetsayetatsiri aisati caari cameetsayetatsi. Irosati ojireantacaro oacaro aisati opaqueri iriori ojime, yoacaro. 7Yoajeitantacarori, intsipaite iquenqueshireanaca. Yamenavacaanaca caaratsempequijeitaque ini, ipashiventajeitanaca. Irosati yantanaca oshi inchato icanteetiri iyera, ipashicatsaquijeitacari.
Ineaqueri Tasorentsi atiri yantaquero caari cameetsatatsi
8Ari ishaavijiiteanaji catsirincaiteri, omoncaratapinita otampeajencatantari. Ari ipocaque Tasorentsi ivanquiremashiqui. Iquemantajeitavacariri ipocaque, ishiajeitanaca panquirentsimashiqui, imanapitsajeitapaacari. 9Iro cantaincha icajemapaaqueri. Icantiri:
—¿Jaocampi?
10Yacanaqueri iriori:
—Jeraacana. Noquemavetavaquempi pipocaque. Iro cantaincha notsaroacaaquempi, caaratsempequiveetaquena; irotaque nomanapitsatantaquempiri.
11Irosati isampitantacari:
—¿Jaanicampa camantaquempiri piotantacari picaaratsempequitaque? ¿Poacarompa chochoqui nocantavetaquempiri: ‘Eiro poarotsi’?
12Yacanaqueri:
—Jee, noacaro. Opaquenaro oca tsinane pipaquenari nontsipateari.
13Irosati isampitantacaro iroori:
—¿Paitaquea poantacarori?
Acanaqueri:
—Yamatavitaquena maranque, irotaque noantacarori.
14Irosati icantantacari iriori maranque:
—Oca caari cameetsatatsi pantaqueri, irotaque noashinoncaasanotantempiri pincarajeiteri maaroni poshiniripee novetsicajeitaqueri. Meeca pinoshicanaquea pinejiqui aisati poanaquearo quipatsi. 15Nomatacayempi pinquisanaquero tsinane aisati onquisanaquempi iroori. Aisati pinquempeteri oshanincatajeari iroori, pinquisanaqueri iriori, aisati inquisanaquempi avirori. Yora oshanincatajeari coajica iraatiquempi piitoqui aisati avirori pantsiqueri iititsonoitiqui.
16Ari icantiro iroori tsinane:
—Meeca avirori, ariorica pintimeri pitomi oshequi ompomerentsitimotempi, pinquemaatsicatearo iatsica. Aisati pincoasanotanaque incavintsayempi pijime aisati impincatsariventempi.
17Impoiji icantiri iriori shirampari:
—Piquemisantaquero pijina poantacarori avirori chochoqui nocantavetaquempiri: ‘Eiro poarotsi.’ Avirotaque cantacaacarori, meeca oca quipatsi eiro ocameetsatasanotanajitsi. Irosatiquera panei, pincanteani pimpomerentsiventearo pantaveete ontimanteari poyeari. 18Oshiocanaque oshequi tojari aisati quitotseequipee. Ontimatiye poyearo chochoquipee inchatomashiquiniri. 19Pincanteani pimasavitimentero poajeiteari, irosati pincamanteari. Ariorica pincamaque, pimpeanajea quipatsi; tempa avirotaque quipatsi novetsicaqueri.
Irotaque icantaqueriri.
20Ari ipajitaquero Adán ijina Eva. Irotaque intanacarori otimayetaqueri otomipee, irosati ishequiajeitantanaca atiripee. 21Ari yovetsicaqueneri Tasorentsi imeshina virantsi iquitsaajeitacari. 22Impoiji icanti: “Meeca iquempejeitaquee arori atiri, iojeitanaquero jaoca ocantari cameetsayetatsiri aisati caari cameetsayetatsi. Te oncameetsateji meeca iroyearo aisati oitsoqui inchato oaneantatsiri. Yaneasanoticari incantaitatiyempani.”
23Irosati yoimisoquijajeitantajari ivanquiremashiqui, impomerentsiventantearori shirampari irantaveete quipatsiqui. 24Yoimisoquijantacariri atiri, yoaque inampirepee iquenapainta catsirincaiteri, shenteroneri ivanquiremashi, aisati saviri shiarori paamari parashetatsiri. Irotaque oshoncapinitaquero ticaacoventaquerori ivanquire, eiro imatantajatsi atiri iraajero oitsoqui inchato oaneantatsiri.
Цяпер абрана:
Génesis 3: cni
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2008, 2015, Wycliffe Bible Translators, Inc. All rights reserved.