SAN MATEO 2
2
Lo'o ndyalaa ngu' tii
1La cui' tyempo lo'o ngula Jesús nde quichi̱ Belén, sca nu cusu' nu naa Herodes ngua loo ji'i̱ nasiyu̱ bi'. Ca loyuu su cuentya Judea, ca bi' ndi'i̱ quichi̱ Belén bi'. Lo'o li' ndyalaa xi ngu' tii nde Judea bi'; ngutu'u ngu' tii bi' xa' quichi̱ nde su ntyucua cuichaa, lo'o li' ndyalaa ngu' quichi̱ Jerusalén. Nchcui' ngu' tii bi' lo'o ngu' nu ndyacua tya'a lo'o ngu' tyucui̱i̱:
2―¿Macala ndi'i̱ cubi' nu ngula tsubi' ti bi'? ―nacui̱ ngu'―. Rey ji'i̱ cu'ma̱ ngu' judío laca cubi' bi' ―nacui̱ ngu'―. Cua na'a̱ ya cuii cucui nu ndacui cua̱ cuentya ji'i̱ cubi' bi', bi' cha' ndyalaa ya ca nde cha' cua'ni tlyu ya ji'i̱ cubi' bi' juani.
3Lo'o nu rey Herodes ni, ndyutsi̱i̱ tsa yu lo'o ndyuna yu cha' nu nchcui' ngu' tii bi', cha' cua'ni tlyu ngu' ji'i̱ chaca rey. Lo'o jua'a̱ lcaa ngu' quichi̱ Jerusalén ndyutsi̱i̱ tsa ngu' ñi'ya̱ cua'ni rey Herodes. 4Li' ngusi'ya rey Herodes bi' ji'i̱ lcaa sti jo'ó nu laca loo, lo'o jua'a̱ ji'i̱ mstru nu nclyu'u cha' jo'ó ne' laa cha' ca̱a̱ ngu' slo. Nchcuane nu rey bi' ji'i̱ ngu' li':
―¿Ha ná jlo ti' ma̱ macala nchcui' quityi cha' cala Cristo? ―nacui̱ rey ji'i̱ ngu'.
5―Cala bi' nde quichi̱ Belén loyuu su cuentya Judea re ―nacui̱ ngu' ji'i̱―. Ndi'ya̱ nacui̱ quityi ji'i̱ ycui' Ndyosi:
6Quichi̱ sube ti laca Belén nu ntsu'u loyuu su cuentya Judea, nacui̱ ycui' Ni.
Pana quichi̱ tyi sca ngu' tlyu tsa caca, masi quichi̱ sube laca juani, nacui̱ Ni.
Caca nu qui'yu tlyu bi' loo,
lo'o jua'a̱ ña'a̱si̱i̱ yu ji'i̱ ngu' Israel 'na.
Jua'a̱ nscua lo quityi bi'.
7Lo'o cua ndyuna rey Herodes cha' bi', li' cuaana ti ngusi'ya yu ji'i̱ nu ngu' tii bi', cha' ca̱a̱ ngu' slo cha' ta yu sca cha' lo'o ngu'. Li' nchcuane rey bi' ji'i̱ ngu' ni jacua' na'a̱ ngu' cha' ndyu'u tucua cuii cucui bi' nde cua̱. 8Lo'o ndacha' ngu' ji'i̱, li' nchcui' rey lo'o ngu' cha' tsaa ngu' nde quichi̱ Belén.
―Yaa clya ma̱ ―nacui̱ rey ji'i̱ ngu' tii bi'―, clyana ma̱ ma ntucua tyi cubi' bi' ―nacui̱―. Lo'o si quije ji'i̱ ma̱, li' xtyu̱u̱ ma̱ slo na' chaca quiya' cha' caca cuayá' ti' na' macala ntsiya cubi' bi'. Lo'o na' tsa'a̱ cua'ni tlyu na' ji'i̱ cubi' bi' nta̱'.
9Lo'o li' ndu'u ngu' ndyaa ngu' nu lo'o ndyuna ngu' cha' nu nchcui' rey lo'o ngu'. Chaca quiya' na'a̱ ngu' cuii bi' laja lo'o ndyaa ngu' tyucui̱i̱ cha' tsaa ngu' ca quichi̱ Belén, la cui' cuii cucui nu na'a̱ ngu' clyo ca su ntyucua cuichaa. Lo'o ngulu'u cuii ji'i̱ ngu' macala nscua ni'i̱ su ndi'i̱ cubi', ndyatu̱ cuii su ntucua ni'i̱ bi'. 10Tso'o tsa ntsu'u tyiquee ngu' ña'a̱ ngu' cuii bi' chaca quiya'. 11Li' ndyatí̱ ngu' ni'i̱ bi', na'a̱ ngu' ji'i̱ cubi' lo'o ji'i̱ María xtya'a̱ cubi'. Hora ti ndyatu̱ sti̱' ngu' tii bi' slo cubi' cha' cua'ni tlyu ngu' ji'i̱. Lo'o li' ngusati̱' ngu' yu'ba ji'i̱ ngu' cha' ta ngu' msta̱ ji'i̱ cubi' bi'; nda ngu' oro ji'i̱ cubi' bi', nda ngu' yana jo'ó nu quiña'a̱ tsa nga'a̱, lo'o jua'a̱ nda ngu' mirra ji'i̱ cubi' bi'. (Jua'a̱ naa sca taná yaca nu tyixi xtyi'i.) 12Nu lo'o ndyaa ngu' caja' ngu', li' nchcui' xcalá ngu'; nchcui' ycui' Ndyosi lo'o ngu' laja xcalá cha' nga'aa tsaa ngu' slo rey Herodes bi', cha' cuiñi tsa yu. Bi' cha' ngusñi ngu' xa' tyucui̱i̱ cha' xtyu̱u̱ ngu' tyaa ngu' quichi̱ tyi ngu' chaca quiya'.
Ngusna lo'o José ji'i̱ María nde Egipto
13Nu lo'o cua ndu'u ngu' tii ndyaa ngu' quichi̱ tyi ngu', li' nchcui' xcalá José. Ndyu'u tucua sca xca̱ ji'i̱ ycui' Ndyosi slo yu laja xcalá, nchcui' lo'o yu li':
―Que ti' nu'u̱ ―nacui̱ xca̱ ji'i̱ José―. Tyatu̱ nu'u̱, xna clya nu'u̱ ―nacui̱―, tsaa lo'o nu'u̱ ji'i̱ xtya'a̱ cubi' tyijyu' nde loyuu su cuentya Egipto. Tyi'i̱ ma̱ cajua ña'a̱ cuayá' nu cacha̱' hi̱ cha' tso'o tya̱a̱ ma̱ nde nasiyu̱ re chaca quiya'. Tyaala tsa rey Herodes bi'; cua ca̱a̱ ti yu quichi̱ re cha' clyana ji'i̱ cubi', cha' cujuii ji'i̱ cubi' nti' yu.
14Hora ti ngue ti' José, li' ndyaa lo'o ji'i̱ cubi' lo'o ji'i̱ xtya'a̱ cubi' masi tya talya; ndyaa ngu' nde Egipto li'. 15Lo'o li' ndyanu ngu' ca bi' ña'a̱ cuayá' nu cua ngujuii Herodes, rey nu tyaala bi'. La cui' cha' bi' nchcui' jyo'o cusu' nu ngua tu'ba ji'i̱ ycui' Ndyosi cua sa'ni la lo'o nchcui' ndi'ya̱: “Xi'ya na' ji'i̱ Sñi' na' cha' tyu'u ca loyuu su cuentya Egipto, cha' xtyu̱u̱ yu tya̱a̱ yu quichi̱ tyi yu”, nacui̱ ycui' Ndyosi nu Xu'na na. Bi' cha' jua'a̱ ngua ji'i̱ ngu' tya li', cha' ndyalaa ngu' nde Egipto.
Ndyujuii Herodes ji'i̱ cubi' ji'i̱ ngu'
16Lo'o nu rey Herodes bi' ni, ñasi̱' tsa yu lo'o ngua tii yu cha' nga'aa ñaa nu ngu' tii bi' slo. Li' ngulo rey bi' cña ji'i̱ msu, cha' tsaa ngu' cujuii ngu' ji'i̱ lcaa cubi' qui'yu nu ntsu'u quichi̱ Belén, lcaa cubi' nu bilya tye sna yija̱ ji'i̱; lo'o jua'a̱ cujuii ngu' ji'i̱ lcaa cubi' qui'yu nu ntsu'u quichi̱ sube cacua ti. Cua jlo ti' rey cha' nu cubi' bi' bilya tye sna yija̱, cha' jua'a̱ nchcui' ngu' tii bi' xqui'ya cuii cucui nu cua na'a̱ ngu'. 17La cui' cha' bi' nchcui' jyo'o cusu' Jeremías nu ngua tu'ba ji'i̱ ycui' Ndyosi nu ngua sa'ni la. Ndi'ya̱ nacui̱:
18Lye tsa nda xtyi'i ñati̱ nde quichi̱ Ramá;
nxi'ya ngu', ndyunaa tsa ngu', cha' ngujuii sñi' Raquel.
Nxi'ya tsa nu cuna'a̱ bi', cha' cua ngujuii sñi'.
Ni sca ñati̱ ná ngua ji'i̱ xaala' tyiquee nu cuna'a̱ bi', cha' nga'aa lu'ú sñi'.
Jua'a̱ cha' nscua lo quityi, masi bilya caca cha' bi' lo'o tya lu'ú jyo'o cusu' nu nguscua cha' bi'. Bi' cha' jua'a̱ ngua ji'i̱ ngu' Belén, ngusi'ya tsa ngu' cha' ngujuii sñi' ngu'.
19Ca tiya' la li' ngujuii rey Herodes bi', lo'o li' ndu'u tucua sca xca̱ ji'i̱ ycui' Ndyosi slo José laja xcalá ti yu, cha' tya ndi'i̱ José ca loyuu su cuentya Egipto:
20―Que ti' nu'u̱ ―nacui̱ xca̱ ji'i̱ yu―, tyatu̱ clya nu'u̱, tyaa lo'o nu'u̱ ji'i̱ nu piti lo'o ji'i̱ xtya'a̱ yu nde nasiyu̱ Israel chaca quiya' ―nacui̱―, cha' cua ngujuii ngu' tyaala nu ngua ti' cujuii ji'i̱ cubi' cua tya tsubi' la.
21Lo'o li' ndyatu̱ José, ndyaa lo'o ji'i̱ nu piti lo'o ji'i̱ xtya'a̱ nu piti, ñaa ngu' nde nasiyu̱ Israel chaca quiya'. 22Lo'o li' ndyuna yu cha' sñi' jyo'o Herodes laca loo nde Judea, la cui' sñi' yu nu naa Arquelao laca bi'; ndyutsi̱i̱ xi José xqui'ya cha' bi'. Li' xa' nchcui' xcalá yu ñi'ya̱ cua'ni yu, bi' cha' ndyaa ngu' nde loyuu su naa Galilea li'. 23Ca bi' ndyalaa ngu' quichi̱ Nazaret cha' tyi'i̱ ngu'. La cui' cha' bi' nchcui' jyo'o cusu' nu ngua tu'ba ji'i̱ ycui' Ndyosi nu ngua sa'ni lo'o nchcui' ngu' ndi'ya̱: ngu' Nazaret cua'ni ngu' ji'i̱ nu bi'. Jua'a̱ nchcui' jyo'o cusu' bi' cua sa'ni, bi' cha' jua'a̱ ndu'ni ngu' ji'i̱ Jesús juani.
Цяпер абрана:
SAN MATEO 2: cta
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 1981, Wycliffe Bible Translators, Inc. All rights reserved.