Genesis 2
2
1Ne zutun nepasad te Megbevayà is kedlimbaǥa te langit, te kelibutan, wey te langun he taǥù dutun. 2Ne zutun te ikepitu he andew, geina te nepasad en te Megbevayà haazà is langun he menge vaal zin, midhimeley sikandin he ebaal. 3Ne midtuvazan te Megbevayà is ikepitu he andew ne migkaǥi zin daan he segradu haazà su midhimeley sikandin dutun te kedlimbaǥa zin te langun. 4Iyan heini sikan is keguǥuza te kedlimbaǥa zengan te langit wey kelibutan.
Si Adan wey si Eva
Dengan hein midlimbag te Nengazen he Megbevayà is langit wey kelibutan, 5wazè pa pinemula kayi te kelibutan wey wazè pa zaan benì he nenuvù, su wazè din pa ipeuzan su wazà etew he ebpekaatur te tanà. 6Dutun he timpu zuen gapun he ebpuun te tanà ne pinaaǥi zutun egkahames is tivuuk he tanà.
7Ne zutun midlimbag te Nengazen he Megbevayà is etew, ne iyan inlimbag din dutun is eliyavuk he ebpuun dini te tanà. Ne inhiyup din dutun te izung duen te etew is kandin en he ǥehinawa he ebpekeuyag, ne zutun nehimu is etew he linimbag he ebpekeǥeǥehinawa.
8Ne zutun mibeelan te Nengazen he Megbevayà is pemuleey ziyà te Eden he ziyà te zapit te edsilaan, ne insavuk din dutun haazà is etew he midlimbag din. 9Ne zuen menge kayu he impetuvù dutun te Nengazen he Megbevayà. Utew meupiya he ed-ahaan haazà is menge kayu ne meupiya zaan he egkeenen is menge veǥas dan. Ne zutun te teliwazà duen te pemuleey impetuvù din daan is kayu he ebpekeveǥey te untung wey is kayu he ebpekeveǥey te kegketau te meupiya wey mezaat.
10Ne zuen wahig diyà te Eden he ziyà ebayà te pemuleey su wey mevinyaǥi is menge pinemula zutun. Ne zutun nehimu haazà is wahig he ebpuunan duen te heepat he menge wahig. 11Is ngazan te nehuna he wahig ne Pishon. Iyan haazà sikan is wahig he ziyà edtudà te tivuuk he tanà he Havila he zutun duen egkaahà he vulawan. 12Lunsey he vulawan is ebpuun dutun, ne zuen daan dutun sikan is mahalen he pehemut he bidilyum wey zuen daan dutun menge mahalen he vatu he uniks. 13Is ngazan dutun te ikezuwa he wahig ne Gihon. Diyà heini edtudà te tivuuk he tanà he Cush. 14Is ngazan dutun te iketelu he wahig ne Tigris. Diyà heini edtudà te edsilaan te Asiria. Ne is ikeepat he wahig iyan is Eufrates.
15Ne haazà is etew he midlimbag te Nengazen he Megbevayà, diyè din isavuk te pemuleey he Eden su wey zin maatur wey meventayi haazà is pemuleey. 16Ne haazà is etew, mibpeketelteleenan te Megbevayà he egkaǥi te, “Idtuǥut ku kenikew he megkaan ka te veǥas te menge kayu zini te pemuleey, 17iyan, sikan is beǥas te kayu he ebpekeveǥey te kegketau te meupiya wey mezaat, utew kinahanglan he kenè nu heeyan keena. Su zutun dà te kegkaan nu keniyan te veǥas din kenà duwazuwa he ebpatey ka.”
18Ne migkaǥi zutun is Nengazen he Megbevayà te, “Kenà meupiya zuen te etew emun sebsevaha zà sikandin. Umbe ebeelan ku sikandin te zuma zin he zait he ebpeketavang kandin.” 19Ne zutun, puun dutun te tanà, midlimbag te Nengazen he Megbevayà is langun he menge leew he menge langgam wey is langun he menge tagbis he ziyà ebpemenlayang te hewhewanan. Ne impeetuvang din haazà is langun dutun te etew su ed-ahaan din ke hengkey is menge igngazan kandan duen te etew. Ne sumalà is igngazan te etew te uman sevaha zutun te linimbag he egeǥehinawa ne iyan en ngazan din. 20Ne migngezanan dutun te etew is langun he menge ayam he langgam dutun, wey is menge tagbis he ziyà ebpemenlayang te hewhewanan wey is langun he menge leew he langgam. Ne minsan pa zutun wazè pa hustu he zuma zutun te etew he ebpeketavang kandin. 21Ne tenged dutun impelipezeng te Nengazen he Megbevayà haazà is etew ne hein utew en nehurep, migkuwa zin is sevaha zuen te menge ǥusuk kayi ne midlimeng din haazà is ebpuunan duen te ǥusuk. 22Ne puun dutun te ǥusuk he migkuwa zin puun dutun te maama, midhimu te Nengazen he Megbevayà is bahi. Ne impeehè din haazà is bahi zutun te maama. 23Ne zutun migkaǥi kes maama te,
“Duen ku en human duma! Is menge tulan din, ne zini ebpuun te tulan ku wey is sapù din daan, ne zini ebpuun te sapù ku. Egngezanan ku sikandin he ‘vahi’ su zini sikandin ebpuun te kedì te maama,” ke sikandin.
24Iyan heini hinungdan ke maan is ed-ewaan te maama is amey zin wey iney zin ne ebpengesawa te vahi, ne zutun egkehimu haazà is maama wey vahi he sevaha zà.
25Ne lelevas haazà is dezuwa, sikan is maama wey esawa zin, iyan, kenè dan haazà igkeeled.
Цяпер абрана:
Genesis 2: mbbOT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2013, Wycliffe Bible Translators, Inc. All rights reserved.