Yambetta - 2016 CABTAL (NT) Non Drama

Yambetta - 2016 CABTAL (NT) Drama

Kɛ́yɛ́ɛ kɛáʼkolɔb mədúg máʼtáan na úmmuʼ agɛɛlɛ lɛ́ wɔɔ́n ó Páska wáyɛ́ɛlɛ. Yə́sus ayɛ́ɛ́n a nigúu nɛ́ Pɛʼtaníi, kɛnɔ kɛ́ Lasáal nyɔ́ ayóndɛ́gɛ ayɛ́ɛ alaa. Kɔ́gɔ́ɔg pááság komonánnaman. Mááʼtaʼ aa ayɛ́ɛ a ɔngab. Lasáal ayɛ́ɛ a ondáŋ ó pɔɔd pá páyɛ́ɛ agonɛ́ɛnɛ kɔ na Yə́sus. Malɛ́a yiísiə́d igəd kilúd, igəd ɛ́ lamɛ́ndaʼ ɛ mɔɔnɛ́. Páyɛ́ɛ́lɛ yɛ́lɛ́ na kisənduŋ kímmú pɔ́ɔdɔ́ŋɔn lɛ́ náal , əə́bə́ə́ kusumənən Yə́sus yɛ́lɛ́ a ambaan, əə́ŋiənə na tuyə́ən tuə́ŋ. Yoog ngim yiíyə́ə́g na kiluu kɛ́ lamɛ́ndaʼ yɛ́ɛy. Náa Siudáa Ɛsɛʼkalɛyóod, ongaaʼkan o Yə́sus nyummú, sɔ́g nyɔ́ ayɛ́ɛ amoólɛg, ɔnɔ́: «A igə aa pádɛʼkɛ́ɛ págolɛgɛɛ́ yɛ́lɛ́ a əʼtin á pisúg pɛ́ mɔɔnɛ́ puuniʼ páyɛɛ́ʼkɛn mɔɔnɛ́ móom na mɔsɔ́gasɔ́gá ə́?» Tɔgɛ́ɛ́ tóod tó Siudáa ayɛ́ɛ agosɔyɔ náan, kɛ́dɛʼkɛ́ɛ lɛ́ ayɛ́ɛ ɔʼtɛ́m na mɔsɔ́gasɔ́gá, ndóo. Kɛ́lɛ lɛ́ ayɛ́ɛ ungiíbən. Wɔnɔ́ ná nyɔ́lɛ́ aa ayɛ́ɛ agɛɛ́ngɛgan mɔɔnɛ́ mɔ́ɔ́bɔn, ná páagɛɛ́ʼkɛn, ə́yiib. Yə́sus yiísə́ə́ ɔnɔ́ na nyɔ́lɛ́: «Ímuudí nyɔ́lɛ́ yəə́b! Nkə kɛ́ amɛ́ɛ́lɛ kɛ́lɛ agoboŋɛn wɔɔ́s wáam uginni. Pugóódi pasɔ́gasɔ́gá a ɛbá yááŋan pɛnɛŋ piim Náa, mɛ ntɛndɛ́ɛ́ kɛɛn na pəŋi pɛnɛŋ piim.»

Yúdɛn ngíŋ ɛyóób lɛ́ Yə́sus aándɛ áay a Pɛʼtaníi, pááság kiimən kɔ, adɛ́njaŋ əgín lɛ́ pámoodála nyɔ́lɛ́, náa pə́yíímən tɛn agodála Lasáal nyɔ́ Yə́sus ayóndɛ́gɛ. Puʼkúm pó payaaganɛʼ pɛfɔny pááság kugumin lɛ́ páagoon tɛn Lasáal lɛ́ a oʼto wə́ə́ŋ áa pɔɔ́n pá Yúdɛn piíŋ páyɛ́ɛ aboodɛ́da agaag oʼto na Yə́sus.


A koany kaáyɛnɛ, pɔɔd pá pə́yíímən kɔ áay kiʼtúú kilúd a wɔɔ́n ó Páska páyóób lɛ́ Yə́sus əə́ndəgiim a Yolósalɛm. Pɛ́ɛ́sóma pɛlaa, pááság kiimən na pɛ́lɛ́ agɛɛn amooboŋ a ngə́. Páyɛ́ɛ əgiim páágan pɛʼkɛ́ʼkɛ́, pɔ́nɔ́: «Ɔɔ́ɔ óo! Osáána! Táán ágoyɛ́ɛlɛ kɔŋɛʼ, wɛ nyɔ́ olɛɛ́ əgiim a niiŋ nɛ́ Sə́dúk, wɛ nkúm yɛ Ɛ́sɛlayɛl!» Ná ayɛ́ɛ agɛɛn, yɛɛ́dála mɔɔ́n ó jáʼkáas, aáság kiim ábág a yɛ́lɛ́, əgín wɔnɔ́ ná kíyə́dílə́ə́ a kálaʼtaʼ ɛ Táán lɛ́:
«Podɛʼtámmána, pəŋi pá a Siyɔ́ɔŋ!
Taa nkúm yaaŋan aa yɛ́ɛy yəə́ndəgimií.
Abágɛ́dɛn a mɔɔ́n ó jáʼkáas a mɔɛn» Əgəə́bə́ə, paaʼkan pádɛʼkɛ́ɛ agoob pɛbán pɛ́ɛb. Náa, ná Táán yɛɛ́bágɛ́dɛ Yə́sus, amáamoyɛ́ʼkɛn kɛa kɛ́ nugəm, áay aa pə́yíím alɛŋ lɛ́ náan aa píídílə a kálaʼtaʼ ɛ Táán a niiŋ niə́ŋ. Pɔɔd páyɛ́moyɛ́ɛ́lɛ əgín wɔnɔ́ ná kíyə́dílə́ə́. Kɛnɛŋ kɛ́ Yə́sus ayóndɛ́gɛ Lasáal, ayɛ́modɔ́ŋɔn lɛ́ yíim álon a kəəniʼ, ɛ́fɔlɛ́ ɛ́ pɔɔd ɛ́yɛ́ɛ kɔ, páadɛ́ʼtɛg. Páyɛ́modɛ́lɛ́mɛn mbaasɔ́ a kɛbán kɛ́ɛg. A kiə́wúunəniʼ kɛ́ kɛbán kɛ́ɛg kɛ́ páyóób lɛ́ ayɛ́ɛ́lɛ aa, kiʼtúú kɛ́ pɔɔd kíyíímən kɛnɔ kɛ́ alɛɛ́. Pafalɛsɛyɛ́ɛŋ páyɛ́ɛ anɛ́ɛ́n agosɔyɔ kɔ pɔ́lɛ́ na pɔ́lɛ́ pɔ́nɔ́: «Poádála lɛ́ tɛdɛɔ́gɔ na ngə́ ɛgɛɛlɛ yoom na yoom. Ungim aándɛ a ngim yəəŋ!»

Pɔɔ́n pá Kɛlɛ́ɛg pə́mmú páyɛ́ɛ kɔ a ondáŋ wɔ́ɔ́bɔn. Pə́yíímən a Yolósalɛm əgiim agɛɛ́ʼkɛn nnyáádɛ́ na Táán a pɛɔ́sɔ́gɔ́lɔ́n a kɛnɛŋ kɛ́ wɔɔ́n. Páyɛ́ɛ́n aboan Filíib, mɔɔd nyummú nyɔ́ a Pɛdsáyída, a kɛsaa kɛ́ nsí kɛ́ Kalilə́ə, pɔ́nɔ́ na nyɔ́lɛ́: «Mɔɔ́n ó sɛ, tɛanyɔ́ŋɛn lɛ́ ná tɛádála Yə́sus.» Filíib aáság kɛɛn adɛ́anɛ na Əndələ́ə náan. Pááság kɛɛn pɔ́lɛ́ póob piim pábaan agɛɛn adɛ́anɛ na Yə́sus. Əyíbuyúlísíni ɔnɔ́: «Nɛ́gɔŋ, kɛnɛŋ kiə́ʼkiig kɛ́ɛnɛ lɛ́ Táán yɛ́ʼkɛn Mɔɔ́n o mɔɔd nugəm. A fɔ́lɔ́b, ndabodɛ́anɛ lɛ́ niis nɛ́ ongafón nɛ́ɔlɔb nɛ́lɛ́nɛ́əsíŋ ná níʼtə́əŋin a nsí, ná níʼkúin tɛn. Náa, níməʼkugu, niə́bíən əngis yə́mmú əngíŋ. Nyɔ́ alɛ́ɛ́ komaʼkanɛɛ́ ɔlaa wə́ə́ŋ, nyóon alɛ́ɛ́ koʼtaŋ wólɛ́. Kɔmɔɛ́d lɛ́ nyɔ́ alɛ́ɛ́ kuliogií ɔʼtɛ́m a ɔlaa wó a nsí, nyóon aa alɛ́ɛ́ kɛɛnɛɛ́ na ɔlaa ó pɛnɛŋ piim. Mɔɔd amaʼkɔnyɔ́ŋɛn lɛ́ əgiʼkudin, yíim yínjə́ən. Náan, kɛnɔ kɛ́ mɛ ndɛɛ́, kɔ tɛn aa nyɔ́lɛ́ alɛ́ɛ́ kɛɛnɛɛ́. Sɛ waam alɛ agonyáadɛ nyɔ́ alɛɛ́ əgiʼkudin.»

Ayɛ́ɛ́n na tɔgɛ́ɛ́ yuudi, ɔnɔ́: «Áanɛ nɛ́gɔŋ, ɔʼtɛ́m wáam ólɛ ɔmbɛ́ a las. Nkə aa nsəəlií ə́? Nsəə nyɔʼkɔ́: Əə́əy Paabá, ɛ́njaáŋɛ́n a ntɔ́b yɛ́ɛnɛ óm? Náa, a oʼto wóow áa njíím a nsí yɛ́ɛnɛ kɔmɔɛ́d. Ndəəsəə agá nyɔʼkɔ́: Paabá, kə́mídi niiŋ nɛáŋ!» Nɛŋo nɛáság kosɔyɛd kɔ́gɔ́ɔg a mbálámɔɛn, nɛɔ́nɔ́: «Mbə́ʼkugə́midi nɛ́lɛ́, ndəgiiʼkini kugə́midi tɛn kə́mmú.» Kiʼtúú kɛ́ pɔɔd kɛ́ kɛ́yɛ́ɛ kɔ áay kɛ́yóób nɛŋo nɛ́ɛn, pɔsɔ́g pə́mmú pááság kusəə pɔ́nɔ́: «Mbálámɔɛn áa yəə́lumid!» Pɔsɔ́g pə́mmú tɛn pɔ́nɔ́: «Uŋun ó maʼtom aa wɔ́ɔ́sɔyɛd na nyɔ́lɛ́!» Náa, Yə́sus ayɛ́bodɛánɛ ɔnɔ́ na pɔ́lɛ́: «Adɛ́njaŋ a mɛ áa nɛŋo nɛ́ɛn nɛɔ́sɔyɛd, a pəŋi. Kɛnɛŋ kɛ́ koyɔmɛ pɔɔd pá a nsí yɛ́ɛnɛ aa kɛ́ɛnɛ kiə́ʼkiigií. Kɛnɛŋ kɛ́ pándaŋɛ́ŋɛ́ɛ́ nkúm yɛ́ a nsí yɛ́ɛnɛ kiə́ʼkiig. A mɛ, ná pálɛ́ɛ́ kɛʼpágɛɛ́ a mɔɛn, ndɛ́ɛ́ kəə́súidin pɔɔd piim.» (A nisəə nɛ́ɛn, Yə́sus yiílóódi tuə́ áa pálɛ́ɛ́ kogoyónɛ́ɛ́.) Kiʼtúú kɛ́ pɔɔd kɛ́ɛg kíyímuyúlísíni kɛɔ́nɔ́: «Pəsi tɛyáʼkan a kálaʼtaʼ ɛ pɛcɛm lɛ́ Məsíi alɛ́ɛ́ kɛɛn a ɔlaa a pɛnɛŋ piim Tuə́ áa olɛɛ́ ugiiʼkini kusəə lɛ́ pálɛ́ɛ́ kodoŋ Mɔɔ́n o mɔɔd əə́? Mɔɔ́n o mɔɔd ogo nyóon alɛ ánɛ ə́?» Yə́sus əyíbuyúlísíni ɔnɔ́: «Kisəə kígə́ligi a kɛgaágadɛ kɛáŋan. Náa, kɛnɛŋ sɔɔŋ kídiə́giʼkini kɛɛn kɔ kə́mmú. Táŋánáan a kɛnɛŋ kɛ́ kisəə kígə́ligíí na pəŋi, ná mbin idiíbugúmin lɛ́ mɔɔd nyɔ́ alɛɛ́ agodáŋana a mbin adɛálɛŋ ə́lə́ə́ áa alɛɛ́ agɛɛn Ágáan oʼto na kisəə wɔnɔ́ ná kɛ́lɛ́ kígə́ligíí na pəŋi, ná póan pɔɔ́n pá a kɛmoámoáŋ.» Ná yɛɛ́mán kosɔyɔ náan aáság kolon, amɛ́ɛn laálá na pɔ́lɛ́.

Ɔmbɔ́ ná Yə́sus ayɛ́ɛ́lɛ mangán miíŋ a əngis yɔ́ɔ́bɔn, pádɛʼkáagaag oʼto na nyɔ́lɛ́. Náan aa nkə kɛ́ Ɛsayíi, ɔndɔɛgɛʼ pɛbán o Táán yiísə́ə́ kɛ́yáás. Yiísə́ə́ lɛ́:
«Sə́dúk, ánɛ aa əyə́líʼtíníí nkə kɛ́ tɛyɛ́ɛ əgusəə əə́?
Na ánɛ aa wiílóódi toɛn toáŋ ə́?»
Əgín tɛn Ɛsayíi ogo aa yiísə́ə́ a igə aa pɔ́dɛɔ́gɔ págaágɛ́ɛ́ oʼto na Yə́sus. Yiísə́ə́ ɔnɔ́:
«Táán ayɛ́ɛ́lɛ lɛ́ əngis yɔ́ɔ́bɔn yɛ́ɛn na woog
ná pádɛʼtɛ́ʼtɛ́gánan,
ntɛ́m yɔɔbɔn yɛ́ɛn nnasáŋ
agɛɛlɛ lɛ́ pádɛnjóóbánan,
pádɛʼkásɛ ɔlaa wɔ́ɔ́bɔn
lɛ́ ndɛŋ koboyɔ́ɔyɛ»
Ɛsayíi yiísə́ə́ náan lɛ́ yɛɛ́dála nugəm nó Yə́sus, kɛbán tɛn kiə́ŋ áa ayɛ́ɛ əgusəə náan. Ɔmbɔ́ náan pɔɔd piíŋ a ondáŋ ó palaamɛʼ pá Yúdɛn páyáág oʼto na Yə́sus Náa, pádɛʼkɛ́ɛ agowɛ́ɛsɛ kusəə a udi ó pɔɔd. Páyɛ́ɛ agodammana Pafalɛsɛyɛ́ɛŋ lɛ́ páabosáŋɛnɛnɛ lɛ́ pə́diyíʼkíni kosɔd a yoog ɛ pɛɔ́sɔ́gɔ́lɔ́n. Kɛɔ́bɔn kɛ́yɛ́ɛ lɛ́ pɔɔd aa páboóganyɛɛ́, agaáyɛn lɛ́ Táán áboógany.
Yə́sus yɛɛ́sásɛd ɔnɔ́: «Nyɔ́ amáág oʼto na mɛ, adɛ́njaŋ əgín na mɛ áa amáág oʼto, ndóo, amáág tɛn oʼto na nyɔ́ əyíím yɛ́ʼtom. Nyɔ́ amɛ́ʼtála tɛn, aádála nyɔ́ əyíím yɛ́ʼtom. Mɛ, ndɛ kisəə a nsí agɛɛlɛ lɛ́ nyɔ́ amáág oʼto na mɛ, ədinjíʼkíni kɛɛn kə́mmú a mbin. Nyɔ́ amóób tɔgɛ́ɛ́ tóam, adiɛlɛ nkə kɛ́ mbə́səə, adɛ́njaŋ mɛ áa ndámoyɛ́ʼkɛn nsɔ́ɔ́ lɛ́ ntiimin a nsí yɛ́ɛnɛ lɛ́ njɔmɛ pɔɔd, ndóo. Mbíim lɛ́ ná nyɔ́ɔyɛ pɔɔd pá a nsí. Mɔɔd əməʼkiʼtəm, áasáŋɛnɛ tɛn koob mɛ tɔgɛ́ɛ́, alɛ́ɛ́ kɛɛn na nsɔ́ɔ́. Tɔgɛ́ɛ́ tó nyɛɛ́sɔ́yɔ aa tólɛ́ɛ́ komoóyɔmɛɛ́ a las ɛ wɔɔ́s. Kɛ́lɛ lɛ́ kɛbán na kɛbán kɛ́ njáyɛ́ɛ́ŋɛ́nɛ́ɛ́ mɛɛ́nyɔ́amɔɛ́d kusəə a oʼto wáam kɛ́dɛɔ́gɔ. Náa Paabá Nyɔ́ əyíím yɛ́ʼtom, ayɛ́ʼtɛánɛ nkə nyiígóodi lɛ́ nsɔ́yɔ. Mbálɛŋ lɛ́ nɔgɛ́ɛ́ nuə́ŋ áa nóagɛɛ́ʼkən mɔɔd ɔlaa ó pɛnɛŋ piim. Nkə anɛ́ɛ́n kɛ́ ndɛɛ́ əgusəə, ndɛ əgusəə kɛ́lɛ́ wɔnɔ́ ná Paabá amɛ́ʼtɛánɛ.»

Слушайте Sɛ́aŋ 12