These Scriptures are a new translation into the Naskapi language spoken at Kawawachikamach, Quebec. We the Naskapi people have been eager to have our own translation of the Bible. For many decades we have had to make do with Scriptures that were translated for indigenous languages that are different from our own: most notably Bishop Horden's Moose Cree New Testament and prayer book, and Rev. W. G. Walton's prayer book. The Naskapi Development Corporation has been engaged with this work since the 1990s, facilitated by Wycliffe Bible Translators and the Canadian Bible Society. The Naskapi community grateful acknowledges the help of all who participated with us in producing these Scriptures. Our prayer is that these Words of God will be cherished by our people for generations to come.

ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ The Naskapi text is copyright © Naskapi Development Corporation Naskapi Development Corporation Kawawachikamach, Québec G0G 2Z0 Canada New Testament published by the Canadian Bible Society (CBS) © 2007 Canadian Bible Society 10 Carnforth Road, Toronto Ontario M4A 2S4 Canada

ᒋᓴᒪᓂᑐᐤ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ God's Word in Naskapi

ᐊᓱᑕᒡ ᑕᑐᐤ ᒋᓯᑲᐛ ᒋ ᐃᔅᐱᓯᓇᑯᓂᔪᐤ ᐎᒪᔅᑲᒐᐅ-ᒥᑯᓴᐅᓂᔪᐤ, ᒋᓴᔅ ᑲ ᑎᑯᓯᐧᒃ ᐊᓐᑕ ᐸᑕᓂᒡ ᐊᓐᑕ ᓚᓴᕋᓴ ᐎᒋᔨᒡ᙮ ᐊᑯᑕ ᐅᔭ ᑲ ᐅᓂᔅᑲᓇᑦ ᓂᐳᐅᓂᒡ ᐅᒡ᙮ ᒋ ᒥᑯᓴᐊᑭᓄᐤ ᒪᒃ ᒋᓴᔅ ᐊᓐᑕ, ᒪᕐᑕ ᒋ ᐎᒋᐃᐛᐤ ᐊ ᒪᑎᓄᐛᓄᐎᒡ, ᐊᑯ ᓚᓴᕋᔅ ᒂ ᐎᑎᐱᒪᑦ ᒋᓴᔅ ᐊᓐᑕ ᒥᒋᓱᐛᑭᓇᑎᑯᒡ᙮ ᒪᕆ ᒋ ᐅᒋ ᐅᑎᓂᒻ ᐳᑕᔪᐤ, ᐊ ᐱᒋᑎᓂᔨᒡ ᐊᓐᑕ ᑲ ᐎᒋᒪᑯᓯᔨᒡ ᑐᒥᓂᑭᓂᔪᐤ ᓇᔅᒡ ᐊ ᓱᓇᔭᐎᔨᒡ᙮ ᑲ ᑯᑎᐱᓂᒺᑦ ᐊᓐᑕ ᒋᓴᓴ ᐅᓯᑎᔨᒡ, ᐊᑯ ᒂ ᐸᒂᓯᑕᓇᑦ ᐅᐱᔎᐅᓇ ᐊ ᐊᐱᒋᑕᑦ᙮ ᒥᓯᐛ ᒪᒃ ᐊᓐᑕ ᐱᑎᑭᒥᒡ ᐊᓂᔭ ᒥᒋᐛᐱᔪᐤ ᒋ ᒥᔭᑯᓂᔪᐤ ᐊᓂᔭ ᑲ ᐎᒋᒪᑯᓂᔨᒡ᙮
ᒍᑎᔅ ᐃᔅᑲᕆᔭᑦ ᒪᒃ, ᐸᐃᒄ ᐊᓂᔭ ᒋᓴᔅ ᐅᒋᔅᒋᓄᐊᒧᐛᑭᓇ, ᐊᓂᔭ ᒐ ᐎᔭᓯᐱᔅᑎᓂᑯᑦ, ᒋ ᐃᔅᒋᔄᐤ, “ᓂᔅᑐ ᒥᑕᓯᒥᑎᓄᐤ ᒋᐸ ᐃᑎᒋᑕᑭᓄᐤ ᒋ ᐊᑕᐛᓄᑯᐱᓇ ᐊᓐ ᑲᐎᒋᒪᒂᒡ᙮ ᐊᑯ ᐊᓐ ᓱᓇᔭᐤ ᑲ ᒋᔅᑎᒪᑎᓯᒡ ᒋᐸ ᒥᔭᑭᓄᐎᐱᓐᒡ᙮” ᓇᒪᔭᔪᐤ ᐊ ᒋᔅᑎᒪᒐᔨᒪᑦ ᐊᓂᔭ ᑲ ᒋᔅᑎᒪᑎᓯᔨᒋ ᐊᓂᔭ ᐛᒋ ᐃᔅᒋᔄᑦ, ᐎᔾ ᒋ ᐎ ᐅᑎᓂᒪᓱᐤ ᐊᓂᔭ ᓱᓇᔭᔪᐤ ᐛᔅ ᐊᐅᑯᓐ ᑲᒋ ᐃᑎᑦ ᒪᓐ ᐊᑎ ᐎᔾ ᐊᒋ ᓂᓇᑭᑐᐛᔨᑕᐧᒃ ᐊᓂᔭ ᓱᓇᔭᔪᐤ ᑲᒋ ᒥᔭᑭᓄᔨᒋ ᒋᓴᓴ ᑭᔭ ᐅᒋᔅᒋᓄᐊᒧᐛᑭᓂᔪᐛ᙮
ᒥᒄ ᒪᒃ ᒍᑎᔅ ᒋ ᐃᑎᑯᐤ ᒋᓴᓴ, “ᐊᑲᐎᔾ ᐱᒪᐃᒻ, ᐛᔅ ᐊᓂᔭ ᑲ ᐃᑐᑕᐧᒃ ᒧᔭᒻ ᐊ ᐊᔭᔅᑯᐎᐧᑯᐅᑦ ᒐᒋ ᓇᐃᐧᑲᑯᐅᒡ ᐊᐅᑯᓐ ᐊ ᐃᓯᓇᑯᓂᔨᒡ᙮ ᒧᔅ ᒋᑭ ᑕᐅᒡ ᑲ ᒋᔅᑎᒪᑎᓯᒡ ᐅᑕ ᐊ ᑕᔭᒄ, ᓂᔾ ᒪᒃ ᓇᒪ ᒧᔅ ᓂᑭ ᐅᒋ ᑕᓐ ᐅᑕ ᐊ ᑕᔭᒄ᙮”

ᒥᒐᑦ ᒪᒃ ᐊᓐᒡ ᒍᐤ ᐃᔪᒡ ᒋ ᐸᑎᒧᒡ ᐊᓐᑕ ᐸᑕᓂᒡ ᐊᒋ ᑕᔨᒋ ᒋᓴᓴ, ᐊᑯ ᒂ ᐃᑐᑕᒡ ᐊᓐᑕ ᒐᒋ ᓂᑐᐛᐱᒪᒡ ᑭᔭ ᐊᓂᔭᔪᐛ ᓚᓴᕋᓴ ᒋ ᐎ ᐛᐱᒪᐅᒡ, ᐊᓂᔭᔪᐛ ᒋᓴᓴ ᑲ ᐅᓂᔅᑲᓇᔨᒋ ᓂᐳᐅᓂᒡ ᐅᒡ᙮ ᒋ ᐛᑕᔨᑎᒧᒡ ᒪᒃ ᐊᓐᒡ ᑲ ᓂᑲᓂᐱᒡ ᐊᔭᒥᐊᐅᒋᒪᐅᒡ ᑭᔭ ᐊᓂᔭᔪᐛ ᓚᓴᕋᓴ ᒐᒋ ᓂᐸᐊᒡ᙮ ᐛᔅ ᐊᓂᔭᔪᐛ ᓚᓴᕋᓴ ᐅᒋ ᐊᐅᒄ ᐛᒋ ᓂᑭᑎᑯᒡ ᒥᒐᑦ ᒍᐤ ᐃᔪᐛ ᑭᔭ ᒋᓴᓴ ᐊᔪᑯᓐ ᑲ ᑕᑈᔭᔨᒪᔨᒋ᙮


ᒥᓐ ᐎᔭᐱᓂᔨᒡ ᒥᒐᑦ ᐊᓐᒡ ᑲ ᑎᑯᓯᒡ ᐊᓐᑕ ᐊ ᒥᑯᓴᓄᐎᒡ ᒋ ᐸᑎᒧᒡ ᒋᓴᓴ ᒐ ᑎᑯᓯᓂᔨᒋ ᒋᕈᓯᓕᒥᒡ᙮ ᐊᑯ ᒂ ᓇᑥᓇᒡ ᓂᐱᓯᔭᑎᒂ ᑲ ᐊᑎ ᐎᐎᒡ ᐊᓐᑕ ᒋᕈᓯᓕᒥᒡ ᒐᒋ ᓂᒋᐊᒡ, ᐅᔭ ᐊ ᐃᔅᒋᔄᒡ ᐊ ᒋᔄᐛᒡ,
“ᒪᒥᒋᒪᑕᐤ ᒋᓴᒪᓂᑐᐤ, ᓱᐛᔨᑕᑯᓱᐤ ᐊᓐ ᒋᓴᒪᓂᑐᐛ ᑲ ᐸᒋ ᐃᑎᓴᐅᑯᑦ, ᐃᔅᕋᐃᓪ ᐃᔪᒡ ᐅᒋᓴᐅᒋᒪᒧᐛᐛ᙮”
ᒋᓴᔅ ᒪᒃ ᒋ ᑕᑎᐳᐤ ᐅᐧᑲᓇ ᒧᔭᒻ ᐊ ᐊᐱᓯᓯᔨᒋ ᑲᐸᐃᑭᔎᐛ ᑲ ᐃᓯᓇᑯᓯᔨᒋ, ᐊᒋ ᒥᔅᑯᐛᑯᐱᓇ᙮ ᐊᐅᒄ ᐅᔭ ᑲ ᐃᑎᑦ ᒧᔭᒻ ᑕᓐ ᑲ ᐃᑎᔅᑕᔨᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᒐ ᐃᑎᑯᐱᓇ᙮ ᒋ ᐃᑎᔅᑕᔪᐤ,
ᐊᑲᐎᔾ ᑯᔅᑕᒋᒄ ᒋᔨᐛᐤ ᓴᐃᔭᓐ ᑲ ᐅᒋᔭᒄ ᐛᔅ ᒋᒋᓴᐅᒋᒪᒧᐛᐤ ᑎᑯᓯᓄᐤ ᐊ ᑕᑎᐱᑦ ᐅᐧᑲᓂᓴ ᒧᔭᒻ ᐊ ᐊᐱᓯᓯᔨᒋ ᑲᐸᐃᑭᔎᐛ ᑲ ᐃᓯᓇᑯᓯᔨᒋ᙮
ᐊᓐᑕ ᒪᒃ ᐊᓂᔭ ᒪᒂᒡ ᓇᒪ ᐅᒋ ᓂᔅᑐᑎᒥᔪᐛ ᐅᒋᔅᒋᓄᐊᒧᐛᑭᓇ ᐊᓂᔭ ᑕᓐ ᑲ ᐃᔅᐱᔨᒡ ᓴᔅ ᐊᓐᑕ ᓂᑲᓐ ᐊᒋ ᐎᑕᑭᓄᐎᑯᐱᓇ ᒐ ᑎᐱᐱᔨᒡ ᐅᔭ᙮ ᐸᑎᒪ ᒪᒃ ᐃᔅᐱ ᑲ ᐅᓂᔅᑲᓇᑭᓄᔨᒋ ᓂᐳᐅᓂᒡ ᐅᒡ ᑭᔭ ᒋᒋᒋᓯᑯᒡ ᑲ ᐃᓯ ᐅᑎᓇᑭᓄᔨᒋ ᐊᑯ ᒂ ᒋᔅᒋᓯᒡ ᑕᓐ ᑲ ᐃᓯ ᓂᑲᓐ ᐊᔨᒧᒪᑭᓄᐎᒋ ᐊᓐᑕ ᒋᓴᒪᓂᑐᐤ ᐅᑦ ᐃᔨᒧᐅᓂᒡ ᒐ ᐃᔅᐱᔨᑯᐱᓇ᙮
ᐊᓐᒡ ᒪᒃ ᐊᐛᓐᒋ ᑲ ᑕᒡ ᐊᓐᑕ ᒋᓴᔅ ᑲ ᑕᑈᑕᔨᒋ ᓚᓴᕋᓴ ᒐᒋ ᐸᒋ ᐎᐎᔨᒋ ᐊᓐᑕ ᐅᒋ ᑲ ᐱᒥᓯᒪᑭᓄᔨᒋ ᑭᔭ ᑲ ᐅᓂᔅᑲᔨᒋ ᓂᐳᐅᓂᒡ ᐅᒡ, ᒋ ᐎᑎᒧᒡ ᐊᓐᑕ ᒋᕈᓯᓕᒥᒡ ᑕᓐ ᑲ ᐃᓯ ᐛᐸᑕᒡ ᐊ ᐃᔅᐱᔨᒡ᙮ ᐊᐅᒄ ᒪᒃ ᐊᓂᔭ ᐛᒋ ᓂᒋᐊᒡ ᒋᓴᓴ ᒥᒐᑦ ᐊᐛᓐᒋ ᐃᔅᐱ ᑕᑯᓯᓂᔨᒋ ᐊᓐᑕ ᒋᕈᓯᓕᒥᒡ, ᐊᓂᔭ ᐊᒋ ᐸᑕᒡ ᑕᓐ ᑲ ᐃᓯ ᒪᒥᔅᑲᒡ ᑎᔨᒋ᙮ ᐊᑯ ᐊᓐᒡ ᐸᕆᓯᔨᒡ ᑲ ᐃᔅᒋᔄᒡ, “ᓇᒪ ᔅᒋ ᐃᑐᑐᐛᓄᐤ ᒐ ᐊᑲ ᒋ ᓇᓴᐅᑯᑦ ᐊᐛᔪᐛ, ᑭᓄᐛᐱᒪᒄ ᒪ, ᒥᓯᐛ ᐊᐛᔪᐛ ᐎᔾ ᓇᓴᐅᑯᐤ᙮”


ᒋ ᐎᒐᒐᐅᒡ ᒪᒃ ᑯᕆᒃ ᐃᔪᒡ ᐊ ᐃᑐᑕᓄᐎᒡ ᐊᓐᑕ ᒋᕈᓯᓕᒥᒡ ᐊ ᐊᔭᒥᐊᔅᑐᐛᑭᓄᔨᒋ ᒋᓴᒪᓂᑐᐛ ᒪᒂᒡ ᐊᓂᔭ ᑲᒋ ᐊᔭᒥᐊᐤ ᒥᑯᓴᓄᐎᒡ᙮ ᐊᐅᑯᓐᒡ ᒪᒃ ᐅᒡ ᑲ ᐸᒋ ᓂᑐᐛᐱᒪᒡ ᐱᓕᐸ, ᐊᓂᔭ ᐊᓐᑕ ᐸᑦᓴᐃᑕ ᑲ ᐃᓯᓂᐧᑲᑕᔨᒡ ᐅᑕᓇᔪᐤ ᑲ ᐅᒋᔨᒋ ᐊᓐᑕ ᑲᓕᓕ ᐊᔅᒋᒡ ᑲ ᑎᑯᓂᔨᒡ, ᐊᑯ ᒂ ᐃᑕᒡ, “ᓂ ᐎ ᐛᐱᒪᓇᓐ ᒋᓴᔅ᙮”
ᐱᓕᑉ ᒪᒃ ᒋ ᐎᑎᒧᐛᐤ ᐊᓐᑎᕈᐛ ᐊᑯ ᑕᐱᔅᑯᓐ ᑲ ᐎᑎᒧᐛᒡ ᒋᓴᓴ ᐊ ᐎ ᐛᐱᒥᑯᔨᒋ ᐊᓂᔭᔪᐛ ᑯᕆᒃ ᐃᔪᐛ᙮
ᐊᑯ ᒋᓴᔅ ᒂ ᐃᑕᑦ, “ᓴᔅ ᐅᑎᒋᐱᔪᐤ ᒋᓴᒪᓂᑐᐤ ᒐᒋ ᐛᐸᑎᔨᐛᑦ ᐊ ᒋᔅᑕᔨᑕᑯᓯᔨᒋ ᐃᔪᐤ ᐅᑯᓯᓴᓇ᙮ ᑯᐃᔅᒄ ᒋ ᐎᑎᒪᑎᓇᐛᐤ ᒧᔭᒻ ᐊᑲ ᐊᓐᑕ ᐊᔅᒋᒡ ᐊᔅᑕᑭᓄᒐ ᐸᐃᑯᒥᓐ ᓂᑕᐅᒋᑕᑭᓐ ᓇᒪ ᒋᑭ ᐅᒋ ᓂᑕᐅᒋᓐ ᒥᒄ ᒪᒃ ᐊᔅᑕᑭᓄᒐ ᐊᓐᑕ ᐊᔅᒋᒡ ᐊᑎ ᓂᐱᒥᑲᒐ ᒪᒃ ᐊᑯᑕ ᒐ ᐅᒋ ᓂᑕᐅᒋᒋ ᒥᒐᑦ ᓂᑕᐅᒋᑕᑭᓇ᙮ ᐊᓐ ᐊᐛᓐ ᑲ ᓴᒋᑕᑦ ᐅᐱᒪᑎᓯᐅᓐ ᒋᑭ ᐅᓂᑕᐤ᙮ ᐊᓐ ᐊᐛᓐ ᑲ ᐛᐧᑲᑕᐧᒃ ᐅᐱᒪᑎᓯᐅᓐ ᐅᑕ ᐊᔅᒋᒡ ᑲᒋᒡ ᐱᒪᑎᓯᐅᓂᔪᐤ ᒋᑭ ᐊᔭᐤ᙮ ᐊᓐ ᒪᒃ ᐊᐛᓐ ᓂᔾ ᑲ ᐊᑐᔅᑯᐅᑦ ᓂᑭ ᐸᒋ ᓇᓴᐅᒄ᙮ ᐊᑯ ᒪᒃ ᒐ ᑕᑦ ᓂᑦ ᐊᐱᒋᐊᑭᓐ ᐊᓐᑕ ᒐ ᐊᑎ ᐃᑕᐅᒡ᙮ ᒋᑭ ᒋᔅᑕᔨᒥᑯᐤ ᓄᑕᐎᔭ ᐊᓐ ᐊᐛᓐ ᒐ ᐊᑐᔅᑯᐅᒂ᙮”

“ᓇᔅᒡ ᒥᓯᒪᔨᑎᒻ ᓂᑦ ᐊᒐᐧᒄ, ᑕᓐ ᒪᒃ ᒐᒋ ᐃᑎᒃ ᓄᑕᐎᔾ᙮ ᓂᑭ ᐃᑕᐤ ᐊ, ᓄᑕ, ᐊᑲᐎᔾ ᐸᒋ ᐱᔅᑎᓂᒧᐎ ᒐᒋ ᓂᓇᐧᑲᑕᔨᒧᔭᓐ ? ᓇᒪ, ᓇᒪ ᓂᑭ ᐅᒋ ᐃᑕᐤ ᐅᔭ ᐛᔅ ᐊᐅᑯᓐ ᐛᒋ ᑎᑯᓯᓂᔭᓐ ᐅᑕ ᐊᔅᒋᒡ ᒐᒋ ᓂᓇᐧᑲᑕᔨᒧᔭᓐ᙮” ᐃᔭᐱᒡ ᓂᑭ ᐃᑕᐤ, “ᓄᑕ, ᒥᒄ ᐊᓐᑕ ᒐᒋ ᐅᒋ ᒋᔅᑕᔨᑕᑯᓯᔨᓐ, ᐊᐅᑯᓐ ᐛ ᐃᓯ ᐃᑐᑎᒪᓐ !”
ᐊᑯ ᒂ ᐅᒋ ᐸᑕᑯᓂᔨᒡ ᒋᓴᒪᓂᑐᐤ ᐅᐸᑕᑯᓱᐅᓐ ᐊᓐᑕ ᒋᒋᒋᓯᑯᒡ ᐅᒡ ᐊ ᐃᔅᒋᔄᑦ, “ᓴᔅ ᓂᒋ ᒋᔅᑕᔨᑕᑯᑕᓐ ᓂᑦ ᐃᓯᓂᐧᑲᓱᐅᓐ ᒥᓐ ᒪᒃ ᐃᔭᐱᒡ ᐊᐅᑯᓐ ᒐ ᐃᑐᑎᒪᓐ᙮”
ᐊᓐᒡ ᒪᒃ ᐊᐛᓐᒋ ᑲ ᓂᐳᐅᒡ ᐊᓐᑕ ᒋ ᐸᑎᒧᒡ ᐊᓂᔭ ᐸᑕᑯᓱᐅᓂᔪᐤ ᐊᑯ ᒂ ᐃᔅᒋᔄᒡ, “ᓂᒥᔅᒍᐅᒡ ᐸᑕᑯᓱᐅᒡ᙮” ᐊᑯ ᑯᑎᑭᒡ ᒂ ᐃᔅᒋᔄᒡ, “ᐊᓐᒋᓇ ᒋ ᐃᔨᒥᐃᑯᐤ᙮”
ᒋᓴᓴ ᒪᒃ ᒋ ᐃᑎᑯᐅᒡ, “ᒋᔨᐛᐤ ᐛᒋ ᐸᑕᒂᒡ ᐅ ᐸᑕᑯᓱᐅᓐ, ᓇᒪᐎᔾ ᓂᔾ᙮ ᐊᓄᒡ ᐅᑎᒋᐱᔪᐤ ᒐᒋ ᑎᐸᔅᑯᓇᑭᓄᐎᒡ ᐊᐛᓐᒋ ᐅᑕ ᐊᔅᒋᒡ ᑲ ᑕᒡ ᑭᔭ ᐊᓄᒡ ᐊᑯ ᐛᑎᒋᐱᔨᒡ ᒐᒋ ᐃᔅᐱᓯᐊᑭᓄᐅᑦ ᒥᒋᒥᓂᑐᐤ, ᐊᓐ ᑲ ᑎᐸᔨᒐᑦ ᐅᑕ ᐊᔅᒋᒡ᙮ ᐃᔅᐱ ᐅᐱᓂᑯᐅᔭᓇ ᐅᑕ ᐊᔅᒋᒡ ᐅᒋ, ᒥᓯᐛ ᐊᐛᓐ ᓂᑭ ᐃᑐᑐᐛᐤ ᒐᒋ ᐸᒋ ᓇᓯᑦ,” ᒋ ᐃᔅᒋᔄᐤ ᒋᓴᔅ᙮ ᐅᔭ ᒪᒃ ᑲ ᐃᔅᒋᔄᑦ ᒋ ᐎᑎᒻ ᑕᓐ ᒐ ᐃᓯ ᓂᐸᐊᑭᓄᐅᑦ ᒋᐱᔭᑎᑯᒡ ᒐ ᐅᐸᔎᐛᑭᓄᐅᑦ᙮
ᐊᑯ ᐊᓐᒡ ᐊᐛᓐᒋ ᑲ ᑕᒡ ᐊᓐᑕ ᒋ ᐃᓯ ᐎᑎᒧᐊᐅᒡ ᐊ ᐃᑕᒡ, “ᓂ ᐎᑎᒪᑯᐅᓇᓐ ᐊᓐᑕ ᓂᐎᓱᐛᐅᓇᒡ ᙭ ᑲᒋᒡ ᒐ ᐱᒪᑎᓯᑦ᙮ ᒐᒂᓐ ᒪᒃ ᐛᒋ ᐃᔅᒋᔄᔨᓐ, ᐃᔪᐤ ᐅᑯᓯᓴᓐ ᒐ ᓂᐸᐊᑭᓄᐅᑦ ? ᐊᐛᓐ ᐊᓐ ᐃᔪᐤ ᐅᑯᓯᓴᓐ ᑲ ᐃᓯᓂᐧᑲᑕᑭᓄᐅᑦ ?”
ᒋᓴᔅ ᒂ ᐃᑕᑦ, “ᐛᐃᐱᔅᒋᔅ ᒥᓐ ᒋᑭ ᑎᑯᓐ ᐛᔅᑕᐅᓐ ᐅᑕ ᐊ ᑕᔭᒄ᙮ ᓱᒃ ᒪᒃ ᐱᒧᑕᒄ ᐊᔅᒄ ᐊ ᐊᔭᔭᒄ ᐛᔅᑕᐅᓐ ᑭᔭ ᓇᒪ ᐅᓂᑎᐱᔅᒋᓯᐅᓂᒡ ᒋᑭ ᐅᒋ ᑕᓇᐛᐤ᙮ ᐊᐛᓐ ᐊ ᐱᒧᑕᑦ ᐊᓐᑕ ᐅᓂᑎᐱᔅᒋᓯᐅᓂᒡ ᓇᒪ ᒋᔅᒐᔨᑎᒻ ᑕᓐᑕ ᐊ ᐃᑐᑕᑦ᙮ ᑕᑈᐅᒐᔨᒪᐧᒄ ᐊᓐ ᐊᐛᓐ ᑲ ᒥᔨᐛᑦ ᐛᔅᑕᐅᓂᔪᐤ ᐊᔅᒄ ᐊ ᑕᑦ ᐅᑕ ᐊ ᑕᔭᒄ, ᑭᔭ ᐊᓐᑕ ᐛᔅᑕᐅᓂᒡ ᒐ ᑕᔭᒄ᙮” ᐅᔭ ᒪᒃ ᑲ ᐃᔅᒋᔄᑦ ᒋᓴᔅ ᐊᑯ ᒂ ᓂᑭᑕᑦ, ᐊᓐᑕ ᒐ ᐊᑲ ᐅᒋ ᒥᔅᑲᑯᑦ ᐊᑯᑕ ᑲ ᑕᑦ᙮

ᐊᑎ ᒪᒃ ᒥᒐᑥᐤ ᓇᔅᒡ ᐊ ᒪᒥᔅᑲᑕᔨᑕᑯᓂᔨᒋ ᒐᒂᔪᐛ ᐊᒋ ᐃᑐᑕᐧᒃ ᐊᓐᑕ ᒍᐤ ᐊ ᑕᔨᒋ ᐃᔭᐱᒡ ᓇᒪ ᐅᒋ ᐎ ᑕᑈᔭᔨᒥᑯᐤ ᐎᔾ ᐊ ᐊᐎᑦ ᙭᙮ ᐊᐅᑯᓐ ᑕᑈ ᑲ ᐃᔅᐱᔨᒡ ᑕᓐ ᑲ ᐃᓯ ᓂᑲᓐ ᐎᑎᒧᑯᐱᓇ ᐊᓂᔭᐧᑲ ᐅᒋᔅᒋᐛᐃᒐᓱᐤ ᐊᐃᓴᔭ ᐊᒋ ᐃᔅᒋᔄᑯᐱᓇ,
ᐅᑎᐸᔨᒋᒐᐤ, ᐊᐛᓐ ᑎᔭᑈᑐᐎᔨᒥᑦ ᑕᓐ ᑲ ᐃᓯ ᐎᑎᒪᒡ ? ᐊᐛᔪᐛ ᑲ ᐛᐸᑎᔭᑦ ᐅᑎᐸᔨᒋᒐᐤ ᐅᓱᐧᑲᑎᓯᐅᓐ ?
ᐊᓂᔭ ᒪᒃ ᐊᐃᓴᔭ ᒋ ᓂᑲᓐ ᐎᑎᒧᑯᐱᓐ ᒐᒂᔪᐤ ᒐ ᐅᒋ ᐊᑲ ᑕᑈᑎᒥᔨᒋ ᐊᒋ ᐃᔅᒋᔄᑯᐱᓇ,
ᒋᓴᒪᓂᑐᐛ ᒋ ᐃᑐᑕᑯᐅᒡ ᒐ ᐊᑲ ᒋ ᐛᐸᑕᒡ ᑭᔭ ᒐ ᐊᑲ ᒋ ᓂᔅᑐᑕᒡ, ᑭᔭ ᓇᒪ ᐛᐸᑎᒧᒡ ᑭᔭ ᓇᒪ ᓂᔅᑐᑎᒧᒡ᙮
ᓇᒪ ᒪᒃ ᓂ ᐎ ᐸᒋ ᓂᑐᐛᐱᒥᑯᒡ ᒐᒋ ᒥᓏᒋᐃᒂᐤ, ᐃᑕᐤ ᒋᓴᒪᓂᑐᐤ᙮
ᐊᐃᓴᔭ ᒋ ᐃᑕᐤ ᐅᔭ ᐛᔅ ᒋ ᐛᐸᑎᒺᐤ ᒋᓴᓴ ᐅᒋᔅᑕᔨᑕᑯᓱᐅᓂᔪᐤ, ᑭᔭ ᑲ ᐊᔨᒧᒪᑦ᙮
ᒥᒐᑦ ᒪᒃ ᐃᔭᐱᒡ ᐊᓐᒡ ᒍᐤ ᐃᔪᐛ ᑲ ᓂᑲᓂᔅᑯᐛᒡ ᒋ ᑕᑈᔭᔨᒪᐅᒡ ᒋᓴᓴ ᒥᒄ ᒪᒃ ᓇᒪ ᐅᒋ ᐊᔨᒧᑎᒧᒡ ᐊᓐᑕ ᐊ ᐸᑐᐛᑭᓄᐎᒡ ᐛᔅ ᒋ ᑯᔅᑕᐅᒡ ᐊᓂᔭ ᐸᕆᓯᐊ ᑭᔭ ᓇᒪ ᐅᒋ ᓂᑐᐛᔨᑎᒧᒡ ᒋᒋᐛ ᒐᒋ ᐎᐎᑎᓴᐛᑭᓄᐎᒡ ᐊᓐᑕ ᐅᑦ ᐊᔭᒥᐊᐅᒋᐛᐳᐛᒡ᙮ ᐛᔅ ᐃᐛᒃ ᒋ ᐃᑕᔨᒪᐅᒡ ᐃᔪᐛ ᒐᒋ ᓇᐊᔨᑎᒪᐊᒡ ᐃᔅᐱᔅ ᐎᔾ ᒋᓴᒪᓂᑐᐛ ᒐᒋ ᓇᐊᔨᑎᒪᐊᒡ᙮

ᒋᓴᔅ ᒪᒃ ᒋ ᐃᔅᒋᔄᐤ ᐊ ᒋᔄᐛᑦ, “ᐊᐛᓐ ᑎᔭᑈᔭᔨᒥᒂ ᓇᒪ ᒥᒄ ᓂᔾ ᓂ ᐸᒋ ᑕᑈᐅᔭᔨᒥᒄ ᑭᔭ ᑕᑈᔭᔨᒪᐤ ᐊᓂᔭᔪᐛ ᑲ ᐸᒋ ᐃᑎᓴᐅᔨᒋ᙮ ᐊᓐ ᐊᐛᓐ ᑲ ᐸᒋ ᐛᐱᒥᑦ, ᐛᐱᒪᐤ ᑭᔭ ᐊᓂᔭᔪᐛ ᑲ ᐸᒋ ᐃᑎᓴᐅᔨᒋ᙮ ᓂᒋ ᑎᑯᓯᓐ ᐅᑕ ᐊᔅᒋᒡ ᒐᒋ ᒥᔨᐛᔭᓐ ᐛᔅᑕᐅᓐ᙮ ᐊᑯ ᒪᒃ ᐊᓐ ᐊᐛᓐ ᒐ ᐸᒋ ᑕᑈᔭᔨᒥᒂ ᓇᒪ ᒋᑭ ᐅᒋ ᑕᐤ ᐊᓐᑕ ᐅᓂᑎᐱᔅᑲᐅᓂᒡ᙮”
“ᐊᓐ ᐊᐛᓐ ᐱᔭᑎᒧᒂ ᑕᓐ ᑲ ᐃᓯ ᐎᑎᒪᓐ ᐊᑲ ᒪᒃ ᓂᓇᐃᑎᒧᒂ, ᓇᒪ ᓂ ᑎᐸᔅᑯᓇᐤ᙮ ᓂᒋ ᑎᑯᓯᓐ ᐅᑕ ᐊᔅᒋᒡ ᓇᒪᔭᐤ ᒐᒋ ᑎᐸᔅᑯᓂᒐᔭᓐ ᒪᒃ ᓂᒋ ᑎᑯᓯᓐ ᒐᒋ ᐱᒪᒋᐃᐛᔭᓐ᙮ ᐊᓐ ᐊᐛᓐ ᔭᑐᐛᔨᒥᒂ, ᑭᔭ ᐊᑲ ᓂᓇᐃᑎᒧᒂ ᓂᒥᔽᒋᒧᐅᓂᔪᐤ, ᒋᑭ ᑎᐸᔅᑯᓇᑭᓄᐤ᙮ ᐊᓂᔭ ᐅᒋ ᑕᓐ ᑲ ᐃᔅᒋᔄᔭᓐ ᐊᔪᐅᒄ ᐊᓂᔭ ᒐ ᐅᒋ ᑎᐸᔅᑯᓇᑭᓄᐅᑦ ᒪᔅᑕᔾ ᒋᓯᑲᔨᒐ᙮ ᓇᒪ ᒥᒄ ᓂᔾ ᐊ ᐃᑕᔨᑎᒪᓐ ᓂ ᐅᒋ ᐃᓯ ᐃᔨᒥᓐ᙮ ᐊᓐ ᐅᑕᐎᒪᐤ ᑲ ᐸᒋ ᐃᑎᓴᐅᑦ ᐎᔾ ᓂᒋ ᐎᑎᒪᒄ ᑕᓐ ᒐ ᐃᔅᒋᔄᐅᒡ ᐊᐅᑯᓐ ᒪᒃ ᒥᒄ ᑲ ᐃᓯ ᐎᑎᒪᓐ᙮ ᓂ ᒋᔅᒐᔨᑎᒺᓐ ᒪᒃ ᐎᔾ ᐅᑦ ᐃᑎᓱᐛᐅᓐ ᒋᑭ ᐃᑐᑕᑯᐛᓇᐛᐤ ᒐᒋ ᐊᔭᔭᒄ ᑲᒋᒡ ᐱᒪᑎᓯᐅᓐ᙮ ᑕᓐ ᐊ ᐃᓯ ᒥᔨᑦ ᒐᒋ ᐃᑎᑎᑯᒡ ᐊᐅᑯᓐ ᐊ ᐃᓯ ᐎᑎᒪᓐ᙮”

Слушайте ᒠᓐ 12