Bassa Bible © Bible Society Liberia, 2002.

Jɛ́nɛ́sì-cèè-ɖɛ̀ɔ̀ jè kɔ̃in-zaìn-zaìn
Jɛ́nɛ́sì-nyɛ̀nɛ̀ɔ̀ xwíníín mɔ̀ ɖɛ-gbɔ-dè-dè. Céè-ɖɛ̀ nìà kɛ cɛ̃ à kà Gèɖèpɔ́ɔ̀ nyu ma dyɔɔ̀ kè ɓóɖó-kpàà mɛɛ kɛɛ jè gbo. Ɔ cɛ̃ à Gèɖèpɔ́ɔ̀ hwòɖǒ-kpàìn-ɖɛ̀ ɓɛ́ ɔ sɔ́ dyí ɓá nyɔ́nɔ́ dyi kpɔ̃ jè dyíɛɛ gbo (Jɛ́nɛ́sì 1:1–2:25).
Céè-ɖɛ̀ nìà kɛ mú, ɖéɛ̀ à wɔ̃́ Nɔɔ́-nàmàǔn mɔ̀à nyɔǔn-dyùɛ̀ mú-nyɛ́-nyɔ̀ɛɛ jè kĩ́ín. Nàmàǔn ɓɛ́ ɔ dyàà gǎ kɛɛ dè ma gbɔ dyììn ɖé gàa kĩ́ín-kĩ́ínɔ̀ kè màa kĩ́ín-kĩ́ínɔ̀ wuɖuún-jaɖa-jaɖa mú. Ɖɛ nìà kɛ mɔ̀ nyɔ dyàà wìì kè gĩɔ nyɔǔn-dyù kɔ̃ɛ̀. Céè-ɖɛ̀ nìà kɛ cɛ̃ nyɔǔn-dyùɛ̀ kɔ̃in-ɓáìn-ɖɛ̀ kĩ́ín-kĩ́ín nì ma kɛɛ jè (3:1–4:26).
Céè-ɖɛ̀ nìà kɛ cɛ̃ à gàa ɖò kɔ̃̀ nyɛ́nɛ́ mɔ̀ Ínɔ̀, ɓɛ́ ɔ se ma gĩɔ wɔ̃ dɔ̃̌, kɛɛ Gèɖèpɔ́ɔ̀ kpa ma ɔ dyɔún wɛ̃ɛ jè. Gàa nìà kɛ xwɛ̃́ìn ma Gèɖèpɔ́ɔ̀ bũ̌in mìɔ (5:21-24).
Céè-ɖɛ̀ɔ̀ 6:1–8:19 cɛ̃ à Nóà kè ní-tòɔ̀ jè gbo. Ké ɔ cɛ̃ɛ à gbo kà ɖɛ kĩ́ín-kĩ́ín ɓɛ́ Nóà nyu ma ti ɓɛ́ ɔ sɔ̀ ma ɖé méèɔ̀ múɛɛ mɔ̀, ɔ nyu ma sáa-zàìn-ɖɛ̀ ɓó Gèɖèpɔ́ɔ̀ bììɛ. Púɛɛ, Gèɖèpɔ́ɔ̀ kè nyɔǔn-dyù dè ma wuɖu kà ɔ se nyɔǔn-dyù mú gbɔɔ̌ mu ɖe dyììn ɖé ní-tò múɛ. Dèè-wùɖùɔ̀ dyí-tɛ̀mɛ̀ìn-ɖɛ̀ mɔ̀ ní-mɛ̀nɛ̀ (8:20–9:17).
Céè-ɖɛ̀ɔ̀ wuɖu-kpà 11:1-9 cɛ̃ɛ à gbo kà ɖɛ dyàà nyɔǔn-dyùɛ̀ wuɖu-gbo-zaìn-zaìn nyɛɛ mɔ̀ mìɔùn dyí-ɓúáìn-ɓúáìn.
Céè-ɖɛ̀ nìà kɛ cɛ̃ɛ à gbo kà Gèɖèpɔ́ɔ̀ nyu ma Ééɓòɖòhɛ̃́ɛ̀ ɖáa sɔ̀ìn ɖé ɓóɖó-dù kà kò ɖò ɓɛ́ ɔ se Gèɖèpɔ́ɔ̀ dyí dyuòɛɛ hwìɛ̀, ké ɔ ɖáìn ma ɔ ɓóɖó ɖò nyɛ́nɛ́ín nyɛ. Gèɖèpɔ́ɔ̀ cɛ̃ɛ ma ɔ gbo kà ɓɛ́ ɓóɖó-dù séín nì ɓóɖó-kpàà kɔ̃ɛɛ mu jĩ́á-jè dyéìn dyììn ɖé ɔ múɛ. Céè-ɖɛ̀ nìà kɛ cɛ̃ Ééɓòɖòhɛ̃́ɛ̀ hwìɖǐǐ-taɓa-taɓaɔ̀ jè. Ɖɛ ɓɛ́ Gèɖèpɔ́ɔ̀ ɖáìn ma kà Ééɓòɖòhɛ̃́ɛ̀ nyɛ́nɛ́ín nyɛɛ dyɛ̀ìn ma Áázè kè Jékɔ̀ ɔ kè Jékɔ̀ nììn dyú-gàà ɓaɖa-bùè sè sɔ̃́ ɓě kɔ̃̀ mú ɓɛ́ Éézùɖùɛ̀-ɓòɖò-dù gànáɔ̀ sɔ̀à kɛ (12:1–36:43).
Ɖɛ kpa ɖɛ ɖò nì céè-ɖɛ̀ nìà kɛ mú, ɓɛ́ à ké dyéɖé gbo dè. Ɔ mɔ̀, Jòsé mɔ̀à ɔ ɓǎà ɖɛ̀ɓɛ̀-dyù ɓɛ́ ɔ ɖíí-gàà ɓěɔ̀ nyɛ́ ma kà mú, ɓɛ́ wa dyi ma kà ɔ peɖeɛɛ mɔ̀ ɖɛ ɓɛ́ Gèɖèpɔ́ɔ̀ sɔ́ ma ná dyí jɛ́ɛ́ kɛ. Ɔ nyuɛ ma náa, ɓɛ́ dyììn ɖéɛ múɛɛ, ɔ ké ma Jékɔ̀ kè ɔ gbǒ-xwíníín gànáɔ̀ ɔ kè nyɔ tɔ̀ɔ̀ ɓě póìn, ɓɛ́ mɔ́ ní kɔ̃̀ ɖà wa ɖáɓá (37:1–47:26).
Céè-ɖɛ̀ nìà kɛ wáká hwɛ̀ìn-gbɔɔ̀ cɛ̃ ɖɛ ɓě ɓɛ́ Jékɔ̀ cɛ̃ ma ɓá ɔ dyú-gàà ɓěɔ̀ dyí, ɓɛ́ wa mu kpáùn ɖé dyúa kɛɛ jè. Ké ɔ cɛ̃ kà Éézùɖùɛ̀-dyù ɓěɔ̀ ɖi ma wuɖu ɓá Jòséɛ̀ kpáɔ̀ ɖé nyɛ́nɛ́ín-ɖáìn-ɓòɖòɔ̀ kɔ̃ ɖe kpa jè dyíɛ.
Céè-ɖɛ̀ɔ̀ dà ɓě m̀ ɓɛ́ìn ɖɛ kò-kò ɓěɛ̀ dyéɛ kɛɛ kɛà kɛ̀
1. Dyɔɔ̀ kè ɓóɖó-kpàà ɔ kè nyɔǔn-dyù mɛ jè. 1:1–2:25
2. Nàmàǔn kè gǎ gbɔ-dè-dè. 3:1-24
3. Sɔ̀ìn Áɖɔ̀ùn gbo dyɛ̀ìn Nóà. 4:1–5:32
4. Nóà kè ní-tòɔ̀. 6:1–10:32
5. Béɓò-gbò tɔ̀mɔ̀ dyaɔ̀. 11:1-9
6. Sɔ̀ìn Cɛ̃́ìn gbo dyɛ̀ìn Éébànà. 11:10-32
7. Ɓǎ-ɓǎ sùà ɓě mɔ̀à Ééɓòɖòhɛ̃́ɛ̀ kè Áázè ɔ kè Jékɔ̀ kɛ. 12:1–35:29
8. Íìsɔ́ɔ̀ nììn xwíníín-dyù ɓě. 36:1-43
9. Jòsé kè ɔ ɖíí-gàà ɓěɔ̀. 37:1–45:28
10. Éézùɖùɛ̀-dyù ɓěɔ̀ nì ɖé Íjè-ɓòɖòɔ̀ kɔ̃. 46:1–50:26

Слушайте Jɛ́nɛ́sì Jɛ́nɛ́sì-cèè-ɖɛ̀ɔ̀ jè kɔ̃in-zaìn-zaìn