If you would like a copy of this version please contact info@davaraudiobibles.org

Wagri New Testament

वणअ दाड़ा मा यहुदिया परदेस ने हुनी जगा मा परसार करतो थकण बपतिसमा आलवा वालो यूहना विय आजो, नी वी परसार करवा लागो, “तमो आपड़े पाप हू मन बदलो, केमके हरग ने राज कनी आवी गियू हे।” यो यूहना विस हे जिने बारामा परमेसवर ने हाड़े हू बुलवा वाला यसाया केजू तु,
“हुनी जगा मा एक हादवा वाला ने आवाज़ आवी रेजी हे के,
‘परबू ने हारू वाट तयार करो,
नी विने वाट हिदी करो।’ ”
यूहना ने लबरअ ऊट ने वाल ने बणजअ थकण त नी विने केड़ मा खालड़ा ने पटो बादजो तो। टिड्डी नी मेद खातो तो, नी हुनी जगा मा रेतो तो। वणी वला यरूसलेम नी हेता यहुदिया परदेस ने नी यरदन नदी ने आहे पाहे ने मनका वणा कनी वगळअ थाजअ। नी वणय आपड़े आपड़े पाप मानी नी यरदन नदी मा यूहना हू पाणी हू बपतिसमा लिदू।
जेरे वणाय यू जुजू के, कईक फरीसी नी सदुकी वणा कनी पाणी हू बपतिसमा लिवा आवी रेजा ता, नी वी वणहू केतो तो, “हे हाप ने सुरे, तमय कणाय सकोर किदा हो के, परबू ने आवणा वाली री हू वसो? तमय अणी वातअ ने सबूत आलवू पड़हीं के, हासु तमारे मन बदलजू हे। नी तमो आपड़े मन मा यू नकी हुसो के, ‘अमअ अबराहम ने सन्तान ह।’ मुँ तमय हू कऊँ हूँ के, परमेसवर अणअ पाटा हू अबराहम ने हारू सन्तान पेदा करी हके हे। एवा कराड़ो रूकड़अ कापणा ने हारू थोक मा मेलजो हे, नी जी जी रूकडू हाऊ फल नीं आले, ते वु कापी दड़जू जाहीं नी आग मा दड़ी दिदू जाहीं। मुँ ते तमय तमारे मन बदलवा ने हारू पाणी हू बपतिसमा आलु हूँ, पण जी मय हू वदार तागतवर हे आवी रेजो हे मुँ विने खाहड़अ खुलवा ने लायक नीं हूँ। वी तमय आग नी पवितर आतमा हू बपतिसमा आलहीं। विने आत मा हुपडू हे नी वी आपड़े खलु सई तरह हू साफ करहीं, जणाहू गऊँ ते हुकला हू अलग करहीं नी आपड़े कुटी मा वगळा करहीं, नी हुकलू ते वणी आग मा दड़ी दिहीं जिए किरे नीं ओलाहीं।”


वणी वला ईसु गलील हू हिड़ीनी यरदन नदी ने हिड़े यूहना हू पाणी हू बपतिसमा लिवा आजो। पण यूहना ईसुई रोकवा लागो नी वणाहू केजू, “मय पोते तारे आत हू पवितर आतमा हू बपतिसमा लिवा ने जरूरत हे। ते पसे तु हय मय कनी आजो हे?”
ईसुई वणाहू केजू, “अबार ते अणीस तरह हू थावा दे। केमके परमेसवर ने दारमीकता अमय इमुस पुरू करवू हाऊ हे।” तेरे पसे यूहनाय विने वात मानी लिदी।
नी जेरे ईसु पाणी हू बपतिसमा लईनी तरत पाणी माहू बान्णे आजो ते, जुओ, आकास खुली गियू। वणाय परमेसवर ने आतमा कबुतर ने हरकी नीसे उतरती नी पोता माते आवती डिटी। तेरे आकास मा ये वाणी थाजी के, “यो मारे खास लाड़ळो सुरो हे। जणाहू मुँ कईक राजी हूँ।”

Слушайте मती 3