Ngambai Bible

Ngambay - 1994 Nouvelle Version (NT) Drama

Ngambai Bible © Alliance Biblique du Tchad 1989, 2015.

Jeju tuga loo aw dɔ mbal gə́ ria lə Koiyoje. Nɛ teḛ gə ndɔ rad lé yeḛ tel aw mee kəi-Ala’g ndá boo-dəwje mbo̰ na̰ kəmlə-kəmlə ree rəa’g. Yeḛ təd loo si naŋg un kudu ndoo dee ta. Yen ɓa njéndaji-maktubje gə Parisiḛje ndɔr dené kára bèe gə́ deḛ gə diŋgam to gə na̰ lé ree səa rəa’g. D’aree ḭ tar dan koso-dəwje’g neelé ndá d’ula Jeju pana: Mbai, dené gə́ aar neelé to dené gə́ d’wa dee gə diŋgam dɔ na̰’g. Moyis lé un godndu ar sí gə mba kar sí n’tila denéje gə́ togə́bè lé gə kɔri-ər mbugu-mbugu. Nɛ see i yḛ̀ a pa kaḭ ban dɔ’g wa.
Deḛ pata neelé togə́bè gə mba kaḭ ne mée, ɓó gə mba kiŋga ne ta gə́ d’a kaskəm səgee ne ya. Nɛ Jeju lé ula dəa naŋg si tḭja naŋg gə ŋgaw jia bèe-bèe. Loo gə́ deḛ dəjee ta togə́bè kəgəgə-kəgəgə ɓəi ndá yeḛ ɔr dəa gə́ tar ɓad ɔs dee ne bawn pana: Dəw gə́ rara ɓa mbuna sí’g nee gə́ lal ra kaiya ndá maji karee un kɔri-ər unda ilá ne ar sí j’oo nà.
Tɔɓəi yeḛ tel ula dəa naŋg to tḭja naŋg ləa gogo. Loo gə́ d’oo ta ləa gə́ pa togə́bè lé ndá ta gə́ meḛ dee’g ɓa ila ta dɔ dee’g, ar dee d’ḭ yuna̰ rɔ dee yɔroŋ-yɔroŋ d’igi kág, njé gə́ tɔg ya d’ḭ kédé ɓa njé gə́ raŋg d’ḭ goo dee’g ɓəi. Ndá Jeju nja gə karee ba deḛ gə dené nai ta na̰’d ɓəgə mbuna koso-dəwje’g neelé. Yen ŋga Jeju ḭta oo to gə́ dené aar gə karee ba ndá dəjee pana: Dené see njésəgije lé d’əd ra kág wa. See dəw kára kara ɔr ta rad wai ne el nja saar wa.
Dené lé tel ilá keneŋ pana: Mbai, m’oo dəw kára el.
Jeju tel ulá pana: Ma nja kara m’ɔr ta m’wai ne el tɔ. Ɔd aw loo ləi, ŋga kaiya ŋgá ɓó gə tibi mbɔree el ŋga.

Jeju un ta gə́ raŋg ula dee pana: Ma m’to lookàr lə njé gə́ naŋg nee. Yeḛ gə́ un rəw goom’g ndá a njaa loondul’g el nɛ yeḛ a nai dan lookàr’g gə́ ka̰ si ne gə kəmə lé.
Yen ŋga Parisiḛje d’ilá keneŋ pana: I nja ɔr ta ləa maji gə dɔrɔi. Bèe ndá ta kɔr ləi lé kəm taa el.
Jeju tel ila dee’g pana: Lé ma nja m’ɔr goo ta ləm gə dɔrɔm ndá ta ləm tɔ kəm taa ya, mbata ma m’gər loo gə́ m’ḭ keneŋ ləm, gə loo gə́ m’a gə kaw keneŋ ləm tɔ. Nɛ seḭ lé seḭ gərje loo-kim el ləm, gə loo-kabm el ləm tɔ. Seḭ gaŋgje rəwta wɔjije ne dɔ darɔ nɛ ma lé m’gaŋg rəwta dɔ dəw gə́ kára kara el. Ɓó lé ma m’gaŋg rəwta ndá kara ta ləm a to gə dɔ najee ya mbata ma m’isi gə karm el, nɛ Bɔ-dəwje gə́ njekulam lé si səm na̰’d ya. To gə́ deḛ ndaŋg ta mee maktub godndu’g lə sí lé pana: Goo takɔr lə dəwje joo gə́ aw na̰’d lé ndá to kəm taa ya. Ma nja m’ɔr goo ta ləm gə dɔrɔm ləm, Bɔ-dəwje gə́ njekulam lé kara ɔr goo ta ləm tɔgəbè ya ləm tɔ.
Deḛ dəjee pana: Bɔbije lé see si ra ɓəi wa.
Jeju tel ila dee keneŋ pana: Seḭ gərmje ma el ləm, Bɔm lé kara seḭ gəreeje el ləm tɔ. Ɓó lé seḭ gərmje ndá seḭ a gərje Bɔm lé nja tɔ.
Jeju pata neelé ndoo dee ne mee kəi-Ala’g gə́ deḛ ɓaree kəi-ŋgəm-lar lé, nɛ dəw kára kara wá gə jia peb el mbata kàree ləa teḛ el ɓəi.

Jeju ula dee tɔɓəi pana: M’a gə kɔd kaw ndá seḭ a saŋgmje nɛ seḭ a kwəije dan kaiya’g lə sí ya. Loo gə́ m’isi m’aw gə́ keneŋ lé seḭ a kasjekəm kilaje gɔl sí keneŋ el.
Yen ŋga Jibje pa pana: See yeḛ nja a gə tɔl rəa wa. Mbata yeḛ pana: Jeḛ j’askəm kila gɔl sí loo gə́ n’isi n’aw gə́ keneŋ lé el. Ndá yeḛ ila dee keneŋ pana: Seḭje lé seḭ toje dəwje gə́ naŋg nee, nɛ ma lé m’to gə́ tar. Seḭ toje dəwje gə́ ka̰ naŋg nee, nɛ ma lé m’to gə́ dɔ naŋg nee el. Gelee gə́ nee ɓa ma m’ula sí ne m’pana: Seḭ a kwəije dan kaiyaje’g lə sí. Mbata ɓó lé seḭ ɔmje meḛ sí dɔm’g to gə́ ma lé m’to gə́ dəw gə́ bèe lé el ndá seḭ a kwəije dan kaiyaje’g lə sí ya.
Yen ŋga deḛ dəjee pana: See i to gə́ nawa.
Jeju tel ila dee keneŋ pana: Ma m’ula sí taree kédé par-par mba̰. M’aw gə ta néje yaa̰ gə mba kula sí ləm, gə mba kɔr kila dɔ sí’g ləm tɔ. Nɛ yeḛ gə́ njekulam lé to gə́ kankəm dəw ya tɔɓəi ta gə́ m’oo təa’g ɓa m’riba dəa m’ar njé gə́ dɔ naŋg neelé ya tɔ.
Ta gə́ yeḛ pa wɔji ne dɔ Bɔ-dəwje lé deḛ gər bèe el. Yen ɓa Jeju ula dee pana: Loo gə́ seḭ a kunje Ŋgon-dəw gə́ tar lé mba̰ ndá seḭ a gərmje gə́ dəw gə́ bèe lé gao ya ləm, a gərje to gə́ ma m’ra né kára kara gə dɔrɔm el ləm tɔ, nɛ ta gə́ Bɔm ndoom lé ɓa m’pa taree m’ar sí. Yeḛ gə́ njekulam lé yeḛ nai səm na̰’d ya ɓó yeḛ ya̰’m gə karm el, mbata ndɔm-ndɔm ma m’ra né gə́ taa kəmee rəgm ya.
To gə́ Jeju aar ula dee ta bèe lé ndá njé gə́ na̰je d’ɔm meḛ dee dəa’g.
Yeḛ ula Jibje gə́ d’ɔm meḛ dee dəa’g lé pana: Ɓó lé seḭ naije dan ta’g ləm lé ndá seḭ toje njékwakilamje gə́ gəd tɔgərɔ ya. Seḭ a gərje kankəmta ndá kankəmta lé a bɔr kúla dɔ sí’g mbɔji ya.
Jibje tel d’ilá keneŋ pana: Jeḛ lé n’toje gə́ ŋgaka Abrakam’g ɓó jeḛ n’ra ɓər lə dəw kára kara bèe el. Bèe ŋga see ban ɓa i pana: A bɔr kúla dɔ sí’g mbɔji wa.
Jeju tel ila dee keneŋ pana: Ma m’ula sí təsərə, nana ɓa gə́ ula rəa dan kaiya’g mbiriri ndá yeḛ to ɓər lə kaiya ya. Nɛ ɓər lé a si kəi saar-saar gə no̰ el, nɛ ŋgon gə́ njekəi lé dəa a kwa kəi gə no̰ ya. Bèe ndá ɓó lé Ŋgon lé ɓa bɔr kúla dɔ sí’g mbɔji ndá kúla a ɓar ri sí gogo el ŋga. Ma m’gər gao seḭ toje gə́ ŋgaka Abrakam ya, nɛ seḭ saŋgmje gə mba karm m’udu mbata ta ləm uru kəi meḛ sí’g el. Ma m’ula sí né gə́ m’oo ɓee lə Bɔm lé nɛ seḭ lé seḭ raje né gə́ seḭ ooje ta bɔ sí-seḭje’g ya tɔ.
Deḛ tel d’ilá’g pana: Bɔ síjeḛ lé to Abrakam ya.
Jeju tel ula dee pana: Ɓó lé seḭ toje ŋgaka Abrakam ndá néra sí a kwa bua ka̰ Abrakam tɔ. Ma m’ula sí kankəmta gə́ ma m’oo ta Ala’g lé nɛ seḭ saŋgmje ɓasinè gə mba karm m’udu. Abrakam lé ra né gə́ togə́bè el. Néra bɔ síje ɓa seḭ raje ya.
Deḛ d’ilá keneŋ pana: Jeḛ lé jeḛ n’to gə́ ŋgan bɔ korèje el, bɔ síjeḛ nja kára ba to gə́ Ala ya.
Jeju tel ila dee’g pana: Ɓó lé Ala to gə́ Bɔ síje ndá seḭ a kṵdamje dan kəm sí’g tɔ, mbata ma m’to Ŋgon mee Ala gə́ m’ḭ rəa’g ɓa m’ree. Ma lé m’ḭ m’ree gə dɔrɔm el, nɛ yeḛ nja ɓa ulam ya. Tapam gə́ m’pa m’ar sí lé see ban ɓa seḭ gərje el wa. Mbata seḭ ooje loo korèje mbi sí dɔ ta’g ləm ndəŋ el. Bausi-seḭje lé nja gə́ njekurai lé ndá né gə́ bɔ síje wɔji ɓa seḭ ndigi raje tɔlje bém. Yeḛ to njetɔ-kó-dəwje kédé gə́ dɔtar saar ɓó yeḛ wa ne bua gə kankəmta el mbata kankəmta gə́ tḛ́-tḛ́ bèe kara godo mée’g. Loo gə́ yeḛ pa taŋgɔm lé yeḛ pata gə́ wɔji dəa-yeḛ mbata taŋgɔm ɓa gə́ né gelee ya. Yeḛ to njepa taŋgɔm ləm, yeḛ to darɔ bɔ njéŋgɔmje lé ləm tɔ. Ma lé kankəmta gə́ m’ula sí ɓa seḭ ɔmje ne meḛ sí dɔm’g el gə mbəa. See na̰ lə sí ɓa a tura səm goo kaiya ram wa. Ɓó lé kankəmta ɓa ma m’pa ndá ŋga, see ban ɓa seḭ ɔmje meḛ sí dɔm’g el wa. Yeḛ gə́ to ka̰ Ala lé ndá a taa taje lə Ala ya. Nɛ seḭ taaje taje lə Ala el mbata seḭ toje ka̰ Ala el tɔ.
Jibje tel dəjee pana: See ta gə́ jeḛ m’pa kédé m’pana: I to gə́ dəw gə́ Samari gə́ ndil gə́ yèr to məəi’g lé see jeḛ m’pa rəbee’g el wa.
Jeju tel ila dee keneŋ pana: Ndil gə́ yèr godo məəm’g, ma lé m’ula rɔnduba dɔ Bɔm’g nɛ seḭ ɓa seḭ ulaje sul dɔm’g ya. Ma m’saŋg rɔnduba m’wɔji ne dɔ rɔm el, nɛ dəw kára si keneŋ gən ɓa saŋg rɔnduba wɔji ne dɔm, yeḛ nja ɓa gə́ njegaŋ-rəbee ya. Ma m’ula sí təsərə, nana ɓa gə́ aa dɔ ta ləm kər-kər ndá yoo a ɓar ria el.
Jibje d’ilá keneŋ pana: Ɓasinè jeḛ n’gər gao, ndil gə́ yèr ɓa to məəi’g ya. Abrakam lé wəi mba̰ ləm, njéteggintaje kara d’wəi mba̰ ləm tɔ. Nɛ i pana: Dəw gə́ rara ɓa lé a kaa dɔ ta ləi kər-kər ndá kara yoo a ɓar ria el. See i lé to dəw gə́ boo ur dɔ bɔ síje Abrakam gə́ wəi lé wa. Njéteggintaje kara d’wəi tɔ. See i oo rɔi gə́ dəw gə́ banwa.
Jeju tel ila dee keneŋ pana: Ɓó lé m’ula rɔnduba dɔ rɔm’g ndá ndubarɔ ləm lé to gə́ né el ya. Baumje gə́ seḭ pajena to gə́ Ala lə sí lé nja ɓa ula rɔnduba dɔm’g, nɛ seḭ lé seḭ gəreeje el. Ma lé ma m’gəree gao, ɓó lé ma m’pana: Ma m’gəree el ndá m’a to gə́ njeŋgɔm to gə́ seḭ bèe tɔ. Nɛ ma m’gəree gao ləm, m’aa dɔ ta ləa kər-kər ləm tɔ. Bɔ síje gə́ Abrakam lé yeḛ al rəa mbata a gə koo ndɔ ree ləm-ma, yeḛ oo mba̰ ar rəa lelee ne tɔ.
Jibje tel d’ilá keneŋ pana: Ləbi aḭ rɔ-mi el ɓəi lé nja see i oo Abrakam mba̰ wa.
Jeju tel ula dee pana: Ma m’ula sí təsərə, ma m’to gə́ kédé par-par ɓa Abrakam ɓəi.
Yen ŋga Jibje d’odo kɔri-ər gə mba tilá ne. Nɛ Jeju sa rəa ḭ mee kəi-Ala’g unda loo teḛ raga.

Слушайте Ja̰ 8