Zãa 6
6
Blɛkpaa bilawa
(Mat 14.13-21; Maa 6.30-44; Luk 9.10-17)
1Bee gbɛa Yesu bùa Galile isidawa (ɔ̃ wì mɛ lɔ Tibelia.) 2Bila ìɔ tɛaazi dasidasi, kɛ́ aa aà gyãeɔ gbãgbãa dabudabuɔ è yãi. 3Ɔ̃ Yesu dɛ̀dɛ zɔ̃̀lɛ sĩ̀sĩ musu ń a iwaɔ. 4Yudaɔ Gɛ̃amusu dikpɛ kà kãi.
5Kɛ́ Yesu wɛsɛ̀ musu, a è bila lɛ́ mɔ́ a kĩi dasidasi, ɔ̃ à Filipi là à mɛ̀: Makĩi wá blɛ e wà luu gbɛ̃́ɔ blei? 6À bee ò kɛ́ à Filipi lɛ à gwa yãiɛ, asa a dɔ̃ lá á kɛ. 7Ɔ̃ Filipi wèwà à mɛ̀: Ãnusu ɔaa do pɛ̃ɛ, baa tó wa lìli baadeɛ yɔɔyɔɔ, a pɛɛmáo. 8Aà iwaɔ do Ãndele, Simɔ Piɛɛ dãuna òɛ̀: 9Nɛgɔ̃ɛnae ku la a pɛ̃ɛ zɔzɔna vĩ mɛn sɔo ń kpɔ giinaeo mɛn pla. Bɔ́ bee a kɛ dasiɛ bee guui? 10Yesu mɛ̀: À to gbɛ̃́ɔ zɔ̃lɛ. Sɛ̃bɔlɔ di gupiuɛ, ɔ̃ aa zɔ̃̀lɛzɔ̃lɛ. Gɔ̃ɛɔ ntɛ̃ɛ aa kà gbɛ̃ɔn ɔaasɔsɔo lɛɛ sɔo (5 000). 11Yesu pɛ̃ɛpiɔ sɛ̀, à Lua saaukpà, ɔ̃ a kpaalɛ̀ gbɛ̃́ pɔ zɔ̃lɛ wepiɔnɛ. Màa à kpɔ kpàmá lɔ lá aa yeiwa. 12Kɛ́ aa kã̀, a ò a iwaɔnɛ: À a miɔna pɔ gɔ̃̀ɔ sɛlɛ pii, kɛ́ a kee su vũaao. 13Ɔ̃ aa pɛ̃ɛ mɛn sɔo pɔ wa sòpi miɔna pɔ gɔ̃̀ɔ sɛ̀lɛ gbi kuɛpla pai.
14Kɛ́ wà dabudabu pɔ Yesu kɛ̀pi è, wà mɛ̀: Gbɛ̃́piá ãnabi pɔ lɛ́ mɔ́ dũniauɛ sĩana. 15Yesu dɔ̃̀ kɛ́ wa ye mɔ wà a kpa kia ũ ń gbãaoɛ, ɔ̃ à gònɛ́ we à ɛ̀a dɛ̀dɛ sĩ̀sĩwa ado.
Yesu taa'oa isidaa
(Mat 14.22-27; Maa 6.45-52)
16Kɛ́ oosi kɛ̀, aà iwaɔ gɛ̀ isida gɔ̃sɔ̃lɛ. 17Ɔ̃ aa gɛ̃̀ go'ilɛna guu, aalɛ bua isidapi baale Kapɛnaũ oi. Gu sì kɔ mɛ́ Yesu i mɔ́ ń kĩi yãao. 18Zaa'ĩan gbãa kàka, ɔ̃ í lɛ́ fɛlɛ. 19Kɛ́ aà iwaɔ golì, aa kà lon sɔo ge soolo taawa, aa Yesu è, àlɛ taa'o ía, àlɛ sɔ̃ ń gózi, ɔ̃ vĩa ń kṹ. 20Ɔ̃ a ònɛ́: Mamɛ, ásu to vĩa á kṹo. 21Aa wèi aà gɛ̃ gó guu, ɔ̃ gó kà gu pɔ aalɛ gɛ́u gɔ̃̀ɔ.
22Kɛ́ gu dɔ̀ bila zɛa gɔ̃sɔ̃lɛ isida baale. Aa dɔ̃ kɛ́ go'ilɛna ku we yãa mɛndoɛ, mɛ́ Yesu i gɛ̃ gópiu ń a iwaɔo, aa tà ntɛ̃ɛɛ. 23Gbɛzã go'ilɛna pãleɔ bɔ̀ Tibelia aa mɔ̀. Gupi zã̀ ń gu pɔ wà pɛ̃ɛ sòu Dii saaukpaa gbɛaoo. 24Kɛ́ bilapi è aapi ge aà iwaɔ ku we lɔo, ɔ̃ aa gɛ̃̀ gópiɔ guu aa gɛ̀ aà wɛɛlɛi Kapɛnaũ.
Yesu mɛ́ blɛ pɔ ì ń ká aizãnawa ũ
25Kɛ́ aa aà è isida baa we, aa òɛ̀: Mɛtulu, n ka la bɔɛ ni? 26Yesu ònɛ́: Sĩana malɛ oɛ́, álɛ ma wɛɛlɛ pɛ̃ɛ pɔ á sò a kã yãiɛ, i kɛ dabudabu pɔ á èɔ yãi no. 27Ásuli zĩkɛ blɛ pɔ ì laa yãio, sema blɛ pɔ ì ń ká aizãnawa. Gbɛ̃nazĩn Nɛ mɛ́ a á gba blɛpi, asa aapi ɔ̃ Mae Lua a seela kɛ̀wà.#Zãa 1.32
28Ɔ̃ aa aà là aa mɛ̀: Kpelewa wá kɛ wà yã pɔ Lua ye wà kɛ kɛi? 29Yesu wèmá à mɛ̀: Yã pɔ Lua ye à kɛ mɛ́ gbɛ̃́ pɔ a zĩ naaikɛa ũ. 30Aa òɛ̀: Dabudabu kpele ńyɔ̃ kɛwɛ̃ɛ kɛ́ wà e wà n naaikɛi? Yã kpele ńyɔ̃ kɛi? 31Wá deziɔ mana blè gbáau#Bɔa 16.15 lá a kɛ̃a wà mɛ̀: À blɛ pɔ bɔ̀ musu kpàmá aa blè.#Soũ 78.24 32Ɔ̃ Yesu ònɛ́: Sĩana malɛ oɛ́, i kɛ Mɔizi mɛ́ blɛ pɔ bɔ̀ musu kpàwáo. Ma Mae mɛ́ ì blɛ sĩande pɔ bɔ̀ musu kpawá. 33Lua blɛpi mɛ́ gbɛ̃́ pɔ bɔ̀ musu ì wɛ̃nikpa dũniawa ũ. 34Aa òɛ̀: Mae, ǹyɔ̃ blɛ bee taa kpawá gɔɔpii.
35Ɔ̃ Yesu ònɛ́: Mamɛ#Bɔa 3.14 má blɛ pɔ ì ń ká wɛ̃niwa ũ. Nɔana a gbɛ̃́ pɔ mɔ̀ ma kĩi dɛ lɔo, imi a ma naaikɛna dɛ bauo. 36Ń beeo lá má òɛ́wa, baa kɛ́ a ma e, álɛ ma naaikɛo. 37Gbɛ̃́ pɔ ma Mae kpàa a mɔ ma kĩi, mɛ́ má gbɛ̃́ pɔ mɔ̀ ma kĩi yá bauo. 38I kɛ mazĩa pɔeãkɛa yãi ma bɔi musu ma mɔo, sema gbɛ̃́ pɔ ma zĩ pɔ. 39Gbɛ̃́ pɔ ma zĩpi pɔeãn kɛ: Masu to gbɛ̃́ pɔ a kpàaɔ kee vũaao. A ye mà ń bɔ gau gɔɔgbɛzãzĩ. 40Asa ma Mae pɔeãn kɛ: A ye gbɛ̃́ pɔ wɛsì aà Nɛlɛ mɛ́ àlɛ aà naaikɛ wɛ̃ni laasai eɛ. Mamɛ má aà bɔ gau gɔɔgbɛzãzĩ.
41Ɔ̃ Yuda gbãadeɔ zɔakàaazi, kɛ́ à mɛ̀ ámɛ á blɛ pɔ bɔ̀ musu ũ yãi. 42Aa mɛ̀: Gbɛ̃́piá Yosɛfu nɛ Yesuɛ. Wá aà de ń aà dao dɔ̃o le? Ɔ̃ àlɛ o a bɔ musuɛa? 43Yesu ònɛ́: Ásu zɔakao. 44Gbɛ̃e a fɔ̃ mɔ ma kĩio, sema ma Mae pɔ ma zĩ aà sìsi baasio, mí aà bɔ gau gɔɔgbɛzãzĩ. 45Wa kɛ̃̀ ãnabiɔ lá guu wà mɛ̀: Lua mɛ́ a yãda baadeɛ.#Isa 54.13 Gbɛ̃́ pɔ Mae Lua yãmà mɛ́ a dà, ade mɛ́ ì mɔ ma kĩi.
46I kɛ gbɛ̃e Mae Lua è ń wɛ́o no. Gbɛ̃́ pɔ bɔ̀ aà kĩi mɛ́ aà è ado. 47Sĩana malɛ oɛ́, ma naaikɛna wɛ̃ni laasai vĩ. 48Mamɛ má blɛ pɔ ì ń ká wɛ̃niwa ũ. 49Á deziɔ mana blè gbáau, kási aa gàga. 50Blɛ pɔ ì bɔ musu pɔ malɛ opi, tó gbɛ̃́ blè, a gao. 51Mamɛ má blɛ wɛ̃nide pɔ bɔ̀ musu ũ. Tó gbɛ̃́ blɛpi blè, aɔ ku gɔɔpiiɛ. Blɛ pɔ má kpamá mɛ́ ma mɛbaasi ũ, kɛ́ dũnia e àɔ wɛ̃ni vĩ yãi.
52Ɔ̃ gbãadepiɔ lɛ́ lɛkpaakɛ kɔ̃tɛ̃ɛ aa mɛ̀: Gbɛ̃́pi a fɔ̃ à a mɛbaasi kpawá wà sóe? 53Ɔ̃ Yesu ònɛ́: Sĩana malɛ oɛ́, tó i Gbɛ̃nazĩn Nɛ mɛbaasi só a aà au mìo, áɔ wɛ̃ni vĩo. 54Gbɛ̃́ pɔ ì ma mɛbaasi só mɛ́ ì ma au mi, ade mɛ́ wɛ̃ni laasai vĩ. Mamɛ má aà bɔ gau gɔɔgbɛzãzĩ. 55Asa ma mɛbaasiá blɛ sĩandeɛ, mɛ́ ma auá imia sĩandeɛ. 56Gbɛ̃́ pɔ ì ma mɛbaasi só mɛ́ ì ma au mi ku ma guu, mɛ́ má ku aà guu. 57Lá Mae Lua bɛ̃́ɛ ma zĩ, mɛ́ miɔ ku aà sabai, màa gbɛ̃́ pɔ ì ma mɛ só, aɔ ku ma sabai. 58Blɛ pɔ bɔ̀ musun we. A dɛ lan mana pɔ á deziɔ blèwao. Ampiɔ gàga, ãma blɛɛ bee blena aɔ ku gɔɔpiiɛ.
59Yesu yãpiɔ ò gɔɔ pɔ àlɛ yãdanɛ́ Kapɛnaũ luasisikpɛuɛ.
Yesu iwaeɔ kpɛkpaa
60Kɛ́ aà iwaɔ yãpi mà, an daside mɛ̀: Yã gbãaɛ, demɛ a fɔ̃i? 61Yesu dɔ̃̀ a iwaɔwa kɛ́ aalɛ zɔaka yãpi musu, ɔ̃ a ònɛ́: Yãpi lɛ́ á fu yã? 62Tó asu á è Gbɛ̃nazĩn Nɛ fɛ̀lɛ, àlɛ tá gu pɔ a kuu yãa sɔ̃ bɛ? 63Lua Nisĩna mɛ́ ì wɛ̃nikpamá, mɛbaasi pɔe ũ weo. Yã pɔ má òɛ́ɔ mɛ́ Lua Nisĩna pɔ ì ń ká wɛ̃niwa yã ũ. 64Kási á gbɛ̃eɔ lɛ́ ma naaikɛo. Asa Yesu gbɛ̃́ pɔ aalɛ a naaikɛoɔ dɔ̃ za káau ń gbɛ̃́ pɔ asu a kpamáo. 65Ɔ̃ à mɛ̀ lɔ: Bee yãi má òɛ́, gbɛ̃e a e mɔ ma kĩio, sema Mae Lua aà gbà zɛ́ baasio.
66Za gɔɔ bee aà iwaɔ kpɛkpà dasidasi, aai tɛaazi lɔo. 67Ɔ̃ Yesu a iwa gbɛ̃ɔn kuɛplaɔ là à mɛ̀: Á ye ta sɔ̃ yã? 68Simɔ Piɛɛ wèwà à mɛ̀: Dii, dé kĩi wá gɛ́ui? Ń yãɔ mɛ́ ì ń ká wɛ̃ni laasaiwa. 69Wa n naaikɛ̀, ɔ̃ wá dɔ̃̀ kɛ́ Lua gbɛ̃́ pɔ a kua adoan n ũ. 70Yesu ònɛ́: Á gbɛ̃ɔn kuɛplaɛɔ, mamɛ ma á sɛ́o lo? Kási á gbɛ̃doá ibiisideɛ. 71Simɔ Isaliɔti nɛ Yudasi yã ɔ̃ àlɛ o. Aapi mɛ́ gbɛ̃ɔn kuɛplapiɔ gbɛ̃do pɔ a aà kpamá ũ.
Избрани в момента:
Zãa 6: Boo2024
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Boko Bible © SIM International, 2024.