Luk 19
19
Zase
1Ɔ̃ Yesu gɛ̃̀ Yeliko, àlɛ pãa. 2Gbɛ̃e ku we aà tɔ́n Zase. Ɔsinaɔ gbɛ̃zɔ̃ɔɛ, mɛ́ ɔdeɛ. 3Àlɛ wɛɛlɛ à Yesu e, ãma i aà èo dasi yãi, asa gbɛ̃́ gesenaɛ. 4Ɔ̃ à baalɛ̀ dɔ̀aa à gɛ̀ dɛ̀dɛ sĩmfofowa kɛ́ à Yesu e yãi, asa a gɛ̃ weɛ. 5Kɛ́ Yesu kà wekĩi, ɔ̃ à wɛsɛ̀ musu a òɛ̀: Zase, pila kpakpa. À kũ̀ mà i n bɛ gbãɛ. 6Ɔ̃ Zase pìla kpakpa, à aà dìlɛ ń pɔnao. 7Kɛ́ wa è màa, gbɛ̃pii lɛ́ yãkũtɛ̃ka aalɛ mɛ: À gɛ̀ pilai duunkɛna bɛ. 8Ɔ̃ Zase fɛ̀lɛ zɛ̀ a ò Diiɛ: Dii, má a aizɛɛ guo kpa taasideɔwaɛ. Tó ma gbɛ̃e taiinkɛ̀ɛ̀ sɔ̃, má ɛa mà a gɛ̃ɛ kpawà lɛɛ siiɔ̃ɛ. 9Ɔ̃ Yesu òɛ̀: Lua uaɛ beedeɔ misì gbã. Asa gbɛ̃́ɛ beeá Ablahaũ buiɛ lɔ. 10Gbɛ̃nazĩn Nɛ mɔ̀ gbɛ̃́ pɔ sã̀sã wɛɛlɛi à aà suabaɛ.
Ɔdakɛa zĩkɛnaɔnɛ
(Mat 25.14-30)
11Gɔɔ pɔ wàlɛ aà yãpi ma, lá à kãikũ̀ ń Yelusalɛũo, wàlɛ e kia pɔ Lua kpà a bɔ gupuau gɔ̃̀ɔɛ, ɔ̃ à ɛ̀a yãlɛ̀ɛũnɛ́ lɔ 12à mɛ̀: Kia buie mɛ́ lɛ́ gɛ́ busu zã̀zãu wà báadaɛ, i ɛa su. 13Ɔ̃ à a zĩkɛnaɔ sìsi gbɛ̃ɔn kwi, à ãnusu ɔwatɛ̃ kpà an baadewa mɛn basɔobasɔo, a ònɛ́: Àɔ laataò e màɔ su.
14Aà busudeɔ sɔ̃ aa zàaaguɛ, ɔ̃ aa gbɛ̃́ɔ zĩ̀ aà kpɛ aa mɛ̀: Wá we gbɛ̃́pi ikokɛwáo. 15Aà sua ń báadaaɛo gbɛa lé, à mɛ̀ wà zĩkɛna pɔ a ɔ̃a kpàmápiɔ sisiɛ, kɛ́ à dɔ̃ lá aa ai'è. 16Gbɛ̃́ sɛ̃ia mɔ̀ à mɛ̀: Dii, n ɔ̃api aikɛ̀mɛɛ lɛɛ kwi. 17Ɔ̃ a òɛ̀: Nasaa, zĩkɛn maa. Lá ń naai vĩ ń a yɔɔnao, ńyɔ̃ɔ iko vĩ wɛ̃lɛ mɛn kwiɔwaɛ. 18Gbɛ̃ɔn plaade mɔ̀ à mɛ̀: Dii, n ɔ̃api nɛ'ì lɛɛ sɔo. 19Ɔ̃ a òɛ̀: Mpi sɔ̃ ńyɔ̃ɔ iko vĩ wɛ̃lɛ mɛn sɔoɔwa. 20Ɔ̃ gbɛ̃pãle mɔ̀ à mɛ̀: Dii, n ɔ̃an kɛ. Má ùlɛ kooa zwãnkasauɛ.
21Má n vĩa vĩ, asa n yãɔ ĩa. Ni pɔ pɔ ni dilɛo sɛ́, ni pɔ pɔ ni tɔ̃o kɛkɛ. 22Ɔ̃ a òɛ̀: Zĩkɛn vãi, n lɛ́ mɛ́ n kalikɛ̃̀. Ń dɔ̃ kɛ́ ma yãɔ ĩa, mi pɔ pɔ mi dilɛo sɛ́, mi pɔ pɔ mi tɔ̃o kɛkɛ. 23Kɛ́ ń dɔ̃ màa, bɔyãi ni dakɛònɛ́, tó ma su, mà a pɔ sí ń a íoo ni? 24Ɔ̃ a ò gbɛ̃́ pɔ ku weɔnɛ: À ãnusu ɔwatɛ̃ basɔopi siwà, ikpa gbɛ̃́ pɔ ai'è lɛɛ kwiwa. 25Ɔ̃ wa òɛ̀: Dii, a ài lɛɛ kwi kũa kɔ̀. 26Ɔ̃ a wèmá à mɛ̀: Malɛ oɛ́, Lua a pɔ kãfĩ gbɛ̃́ pɔ pɔ vĩɛ. Gbɛ̃́ pɔ vĩo sɔ̃, baa pɔ pɔ a vĩ, Lua a siwàɛ.#Luk 8.18 27Ma ibɛɛ pɔ aa ye màɔ dɛ ń kia ũoɔ sɔ̃, à mɔńnɔ ma aɛ la, í ń dɛdɛ.
Gbãakpaa Yesuzi Yelusalɛũ
(Mat 21.1-17; Maa 11.1-19; Zãa 12.12-19)
28Kɛ́ Yesu yãpi ò a làa, ɔ̃ à dà zɛ́u, àlɛ gɛ́ Yelusalɛũ. 29Kɛ́ à kãikũ̀ ń Bɛfazeo ń Bɛtanio, sĩ̀sĩ pɔ wì mɛ Kukpɛ sĩsĩpɔlɛu, ɔ̃ à a iwa gbɛ̃ɔn plaɔ zĩ̀ 30à mɛ̀: À gɛ́ wɛ̃lɛ pɔ kalɛ wá aɛ kee guu. Tó a ka we, á zaa'ĩn nɛbɔlɔ e dɔa, gbɛ̃e i dikpɛ yãao. À polo à mɔò. 31Tó gbɛ̃e á lá, demɛ ò à poloi, í o adeɛ Dii mɛ́ ye a mɔaoi. 32Ɔ̃ zĩnaɔ gɛ̀ aa è lá a ònɛ́wa. 33Kɛ́ aalɛ zaa'ĩnapi polo, ɔ̃ a diiɔ ń lá aa mɛ̀: Demɛ ò à zaa'ĩnapi poloi? 34Aa òɛ̀: Dii mɛ́ ye a mɔaoi. 35Ɔ̃ aa gɛ̀òɛ̀. Aa ń pɔkasaɔ kpàlɛ zaa'ĩnapiwa, ɔ̃ aa Yesu dìkpɛ. 36Kɛ́ àlɛ gɛ́, gbɛ̃́ɔ lɛ́ ń pɔkasaɔ kpalɛ zɛ́ guu.
37Kɛ́ à kãikũ̀ ń gu pɔ zɛ́pi pìlau Kukpɛ sĩ̀sĩwao, ɔ̃ dasi pɔ tɛaazi nà Lua taasilɛawa gbãugbãu ń pɔnao, dabudabu pɔ aa èɔ yãmusu pii 38aa mɛ̀:
Baaade Kia pɔ lɛ́ mɔ́ ń Dii tɔ́o!#Soũ 118.26
Aafia ku luabɛ! Wà Musude tɔbɔ!
39Falisi pɔ aa ku zã guueɔ òɛ̀: Mɛtulu, gi n iwaɔnɛ. 40Ɔ̃ a wèmá à mɛ̀: Malɛ oɛ́, tó aa nìlɛ, gbɛɔ mɛ́ aa wiipi lɛ́.
41Kɛ́ à sɔ̃̀ Yelusalɛũzi, a gwà, ɔ̃ à ɔɔlɔ̀ɛ̀ 42à mɛ̀: Tó n yã pɔ a mɔnɛ ń aafiao dɔ̃̀ gbã yãa lé, kai! Tia kɛ́wa sɔ̃ a ulɛanɛɛ. 43A gɔɔ a mɔ kɛ́ n ibɛɛɔ gbà lɛsĩɔ da aa lianzi, aai n kaka, 44aai n duuzɔ̃ ń n gbɛ̃́ pɔ ku n guuɔ. Baa gbɛe aa to dinɛkɔ̃ao, kɛ́ ni gɔɔ pɔ Lua mɔ̀ n gwai dɔ̃o yãi.
45Kɛ́ Yesu gɛ̃̀ Lua ua, ɔ̃ à nà pɔyianaɔ yaawa. 46A ònɛ́: A kɛ̃a láu wà mɛ̀: Ma kpɛ́ aɔ dɛ luasisikpɛ ũɛ.#Isa 56.7 Apiɔ sɔ̃, á kɛ̀ gbɛ̃blenaɔ tòo ũ.#Zel 7.11
47Lagulɛdɔ Yesu ìɔ yãdanɛ́ Lua ua. Ɔ̃ sa'onkiaɔ ń Mɔizi ikoyãdanɛdeɔ ń gbɛ̃zɔ̃ɔɔ lɛ́ aà wɛ, 48ãma aai lá wa kɛ zɛ'eo, asa gbɛ̃pii lɛ́ lua aà yãiɛ.
Избрани в момента:
Luk 19: Boo2024
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Boko Bible © SIM International, 2024.