San Mateo 14
14
Juan benne rugadi indaha uchúkana bega ikie
(Mr. 6:14-29; Lc. 9:7-9)
1La'ania Herodes nu rinnabia lo yu ge Galilea‑ni binana ge nu ruin Jesús‑ni. 2Nianna tti rana ka nu riben sina geniha:
―Juan nu rugadi indaha‑ba nuná chi beyaka benna lagwi ge ka benne chi uttiha. De nuha‑ba nna raka geni ruinna ka milagru‑na.
3Aníha ra Herodes‑ni, kumu delo ni'a ge Herodías nu uka nuila ge betsini Felipe‑ni, de nuha‑ba nna udhelhana bedaxxukana Juan‑ni nna bexxigakane nna utixxakane lisiyya. 4Aníha benna kumu de bituxxuinna de ra Juan‑ni na: “Labí ga'anna edo lenlu nuila ge betsilu‑na.” 5Herodes‑ni benna uttina Juan‑ni, ttaka usibinna ge ka benne, kumu ráke: Juan‑ni anke profeta ge Tata Do Yebáha. 6Ttaka la sá tti uka laní ge Herodes‑ni tti gwadoinna idaha, la'ania beya'a xi'iniunná Herodías‑ni arlo iyába ka nu se'e len Herodes‑ni. Herodes‑ni nna yalhá uyu'u leni beya'a nuila kwitiha. 7Nianna tti bodha'an tsitsi tisa geni len nuilaha nna rana nuha:
―Bixaba innabalu, gutebaa na gelu.
8Nuilaha nna rana Herodes‑ni:
―Raka lasia ku'ulu lhe'e ttu ye'ena bega iki Juan nu rugadi indaha nna utelu na len neti.
Aníha ra nuilaha kumu de ixnániha‑ba ulu'u tisana na, kini unnabana bega iki Juan‑ni.
9Nianna Herodes‑ni chi bedú si'ina leni, ttaka kumu de chila bedha'an tsitsi tisa geni len nuilaha lhe anágaba de chila unnena nuha lo ka nu se'e niha, de nuha nna benna doelha kini ugwekana nuilaha nu rinnabanaha. 10Nianna tti udhelhana ki gwachúkana bega iki Juan‑ni lhe'e lisiyyaha. 11Ulu'ukana iki benneha lhe'e ttu ye'ena nna gwagwekana nuila kwitiha. Nuilaha nna gwagwena nan geniha nuha.
12Ka benne bedhetini Juan‑ni nna ugía ttebake gwaxíke benneha nna gwakatsike bie. Iki de nuha nna tti ugíake gwattixxi'akanie Jesús‑ni ge nu chi ukaha.
Jesús‑ni begobie gayu mili ka benne
(Mr. 6:30-44; Lc. 9:10-17; Jn. 6:1-14)
13Tti chi bina Jesús‑ni nu gwate Juan‑ni, nianna beru'una ttebe deyye sun labe deyye lo ttu barcu betee lo indatooha kini isine ata lanú benne se'e. Ttaka tti chi bina ka benne niha‑la chi die, nianna biria ttebake lhe'e ka yiesi gekeha nna ni'abake diake danalhake bie. 14Tti ugwadie lo barcuha nna bilánie ixe juisiru ka benne chi se'e niha. Nianna gwatua lebie ke nna beyonie ka benne rani gekeha. 15Ttaka de chi galá dia ralha nuha, nianna tti ubiga ka benne rudhetinieha nna ráke bie:
―Ata se'eri'i‑ni, yu bisiba nuní, labí bixa tee nii lhe gwea chiba dia ura nuní. Bedhelhala ka benne tupa‑ni eyyake lhe'e ka yiesi to‑na kini sayo'oke nu goke.
16Ttaka Jesús‑ni bekabie ree ke:
―Labí raka doelha eyya ka benne‑ni. Lebi'iba gwalugwe ke nu goke.
17Ka benneha nna bekabike, ráke:
―Labí bixa nuja ri'itu. Ne sunruba gayu yettaxtila nujatu nna a chupa ka belha nna.
18Jesús‑ni nna ree ke:
―Nii gwalute ka nu nujale‑na ganna.
19Nianna benie ki bese'e ka benneha lo ixxi binniha, nna tti bedaxxue gayu ka yettaxtilaha nna ixpa ka belhaha, nianna tti belhidha loe yebáha nna begwebie ixkixaru len Tata Do Yebáha. Nianna tti ulha'abie lhe'e ka benneha nna begwebie ka benne rudhetinieha. Ka benneha nna utidhike benneha begweke ka benne se'e lo ixxi binniha. 20Iyábake utoke nna axtaba beyielakanie. Ka benne rudhetinieha nna bottuparulake a tsi'inu (12) sumi ka ro'o salha'a bexxaha. Besá tí ka sumiha. 21Ttiba ttu gayu mili ka benne biyúha utoke, sunrula ka benne biyúha bibaba, bittula bibaba ka benne nuilaha lhe ka nutoha lhe.
Jesús‑ni diabie ridábie lo indatooha
(Mr. 6:45-56; Jn. 6:15-21)
22Iki de nuha nna ben Jesús‑ni kini beyapi ka benne rudhetinieha lo barcuha ki eneru gaake eyyake esinke daka attu ladu ro'o indatooha, laka lee nna richú tise ka benne se'e niha. 23Iki de chi uchú tise ka benneha, nianna tti die ugwapie iki i'iyaha. Ttúbe ulhapie tisa len Tata Do Yebáha nna ttúgabe due niha tti chi ulha sáha.
24Barcu ata deyya ka benneha nna aliba chi beru'una nuha lo indaha. Radha retinbana de ru'u indaha kwe'eni kumu de daka arlola barcuha retetsu'u beha. 25Tti chi deoba tsaniha nna dia Jesús‑ni ridee lo indaha, die isine ata dia ka benne rudhetinieha. 26Tti bilani ka benneha ridábie lo indaha, nianna usikanie ribesi'abake, ráke:
―¡Ne ttu nu du ela daa naa!
27Ttaka Jesús‑ni nna unne ttebe, ree ke:
―Tsitsi gwalikweki lele; bittu gasinle. Netiba nuní.
28Nianna ra Pedruha bie:
―Ganna lu nuná xa tata, ben kini dhaya lo inda‑ni kini isiaya ata dulu‑na.
29Lee nna rabie na:
―¡Utá ganna!
Pedruha nna ugwadi ttebana lo barcuha nna diana ridána lo indaha kini isinna ata du Jesús‑ni. 30Ttaka tti ute denna yalhá idí daa beha nna usi ttebinna nna kumu de chi diana rixudina lhe'e indaha nna ttikala nuha uresi'ana, rana:
―¡Bodiláttu neti xa tata!
31Jeru tteba gwadaxxu Jesús‑ni náni nna ree na:
―¡Aaluxa nu a ria tsitsi leni! ¿Beaka bedú chupana lelu?
32Tti chi beyapike lo barcuha nna ure tteba beha. 33Adí ka benne sia lo barcuha nna ubiga ttebake bedú xibike arlo Jesús‑ni nna ráke bie:
―Lúligaba gwalí ankalu Xi'in Tata Do Yebáha.
34Iki de chi beteke lo indatooha nna besinke lo yu ge Genesaret. 35Tti chi beyoinbia ka nu se'e daka Genesaret‑ni Jesús‑ni, nianna utixxi'a ttebakinna ka benne se'e itúba ka daka niha. Ka benneha nna cheke iyába ka benne rani ata dueha 36nna ka benne raniha nna unnaba ditibake lenie, ráke bie:
―Kwadiba ro'o lari nukulu‑na begwelha udaxxutu.
Nianna iyába ka benne rani, ka benne bedaxxuke ro'o xoeha gwa beyakabake.
Избрани в момента:
San Mateo 14: zae
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2014, Wycliffe Bible Translators, Inc. All rights reserved.