Chivkeeb 8
8
Dlej Nqeg
1Vaajtswv yeej ncuntsoov Nau-as hab txhua yaam tsaj kws nrug nwg nyob huv lub nkoj, Nwg txhaj ua kuas cua ntsawj, hab dlej txawm pib nqeg zujzug moog. 2Tej qhovdlej txhawv huv nplajteb txawm txhaws hab qhovrooj naag sau nruabntug txawm kaw. Naag cale tu, 3hab dlej pib nqeg zujzug tau 150 nub. 4Tes nub kaum-xyaa lub xyaa hli ntuj, lub nkoj txhaj lug txawb rua sau lub hauv roob Alalaj. 5Dlej pheej nqeg zujzug, tes nub xab ib, lub kaum hli ntuj, txhaj pum tej hauv roob tshwm tuaj.
6Tomqaab plaubcaug nub, Nau-as txhaj qheb qhovrais nkoj 7hab tso ib tug uab-laag yaa tawm moog. Tug uab-laag ntawd tsi yaa rovqaab lug, tabsis nwg pheej yuj moog yuj lug moog txug thaus dlej nqhuab taag. 8Tomqaab ntawd, Nau-as txhaj tso ib tug nquab yaa moog saib seb dlej nqeg taag lawm los tsi tau, 9tabsis vim dlej tseem nyaab puvnkaus huv nplajteb nuav, tug nquab nrhav tsi tau chaw tsaws, nwg txhaj yaa rov lug rua ntawm lub nkoj, tes Nau-as txhaj cev teg moog muab nwg lug rua huv lub nkoj. 10Nau-as tog xyaa nub ntxiv hab rov tso tug nquab yaa tawm moog saib dlua. 11Thaus yuav tsausntuj tug nquab txhaj kwv tau ib rev nplooj txiv ntoo-roj ntawm nwg tug kaug ncauj yaa rovqaab lug. Yogle ntawd, Nau-as txhaj paub tas dlej nqeg lawm. 12Nwg rov tog xyaa nub ntxiv hab tso tug nquab yaa moog saib dlua ib zag ntxiv, tabsis zagnua tug nquab tsi yaa rov lug lawm.
13Thaus Nau-as muaj noobnyoog 601 xyoos, lub ib hlis ntuj nub xab ib, nub ntawd dlej nqhuab taagnrho huv tuabsi lawm. Nau-as rhu tej vuag kws vuv lub nkoj, tsaa qhovmuag saib ibncig ntawd, hab pum tas aav tub pib qhuav lawm. 14Nubtim neegnkaum-xyaa, lub ob hlis ntuj, tes lub nplajteb nuav qhuav taagnrho.
15Vaajtswv has rua Nau-as has tas, 16“Cale coj koj tug quaspuj hab koj cov tub cov nyaab tawm huv lub nkoj moog. 17Coj taagnrho tej tsaj hab tej noog huv tuabsi nrug koj moog, sub puab txhaj yuav moog fuamvaam puv nplajteb.” 18Yogle ntawd, Nau-as txhaj nrug nwg quaspuj hab cov tub cov nyaab tawm huv lub nkoj moog. 19Taagnrho tej tsaj luj tsaj miv, hab tej noog kws yaa sau nruabntug, nyag ua nyag ib paab lawvle nyag yaam tsaj tawm huv lub nkoj lug rua saabnrau.
Nau-as Fij Khoom Rua Vaajtswv
20Nau-as txhaj tsim tau ib lub thaaj rua tug TSWV; nwg muab tej tsaj huv hab tej noog huv ib yaam ib tug coj lug tua hab muab hlawv taagnrho fij rua Vaajtswv sau lub thaaj. 21Tej paa khoom fij ntawd tswqaab ntxag ua rua tug TSWV txaussab heev, Nwg txhaj xaav huv sab tas, “Txawm yog Kuv paub tas tuabneeg lub sab yeej ibtxwm xaav phem thaus yau-yau lug le lawm, los Kuv yuav tsi foom phem rua lub nplajteb vim tej kws puab ua ntawd ib zag ntxiv le lawm. Kuv yuav tsi ua rua txhua yaam kws muaj sa kuas raug puamtsuaj le kws Kuv tau ua taag lug nuav lawm. 22Thaus twg kws lub nplajteb nuav tseem muaj nyob, tes yeej yuav muaj caij cog hab muaj caij sau. Yuav muaj caij ntuj kub hab ntuj no, muaj caij ntuj qhua hab ntuj naag, muaj nruabnub hab montuj taag moog le xwb.”
Избрани в момента:
Chivkeeb 8: HNJ2022
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2022 United Bible Societies. All rights reserved.