Матфейица бицараб Рохалил хабар 19
19
19 бетӏер
Гӏисаца ригьнал хӏакъалъулъ бицуна
1Гьанже гьеб хабар бицун бахъиндал, Галилеялдаса нахъе ана Гӏиса ва Иордан гӏор бахун доб рахъалда ругел Ягьудиялъул бакӏазде щвана. 2Гӏемераб халкъ бачӏунеб букӏана Гӏисада хадуб, унтарал-щокъал сахлъизарулел рукӏана гьес.
3Рачӏун фарисеяз, Гӏисал хӏалбихьизе, цӏехана:
– Бокьараб гӏиллаялъе гӏоло росас чӏужу йиччан тезе бегьулейищ? – ан.
4Гӏисаца абуна:
– Нужеца цӏаличӏебищ: Гӏалам Бижарас тӏоцере «рижана бихьинчиги чӏужугӏаданги»? 5Цинги гьес абуна: «Гьединлъидал эбел-эменги рехун тун, бихьинчи чӏела жиндирго чӏужуялде вуссун, ва гьел кӏиялго цолъун, цого лъугьина» 6Гьелдаса хадур кӏиго рукӏунаро гьел, цого рукӏуна. Аллагьас цолъизабураб инсанас батӏалъизабизе бегьуларо.
7Фарисеяз абуна:
– Щайха Мусаца изну кьун бугеб цӏар тӏамиялъе нугӏлъи гьабулеб кагъат кодобе кьолеб бугони, чӏужу йиччан тезе?
8Гӏисаца абуна:
– Нужер чанкӏкӏи сабаблъун кьуна Мусаца нужее лъудби риччан тезе изну. Амма авалалдасанго гьедин букӏинчӏо. 9Дица нужеда абулеб буго: хъахӏбалъи хутӏун батӏияб гӏиллаялъе гӏоло чӏужуги йиччан тун, цогидай ячарав чи жиндирго йикӏарай чӏужуялда цеве мунагьалъукье ккола. Гьеб мунагьги зиналъун рикӏкӏуна.
10Муридаз Гӏисада абуна:
– Чӏужуялъул рахъалъ бихьинчиясул иш гьедин бугеб батани, чӏужуго ячинчӏого чӏани лъикӏ букӏина.
11Гьезда Гӏисаца абуна:
– Ригьин гьабичӏого тезе Аллагьас бажари кьураз гурони къабул гьаруларо гьел рагӏаби.
12Щаян абуни, цо-цо ругелъулха эбелалъул ургьирго ахтаяллъун#19:12 Ахта – чӏужу ячине бажаруларев, бихьинчилъиялъул къуват чорхолъ гьечӏев чи. рижарал; цогидалал ахтаяллъун гӏадамаз лъугьинарула; Зобалазул Парччахӏлъиялъе гӏоло лъудби рачинчӏого чӏаралги руго. Къабул гьабизе бажарулес къабул гьабе гьеб.
Гӏисаца лъималазе дугӏа гьабула
13Гӏисахъе лъимал рачун рачӏана, гьезда тӏад квер бахъеян ва дугӏа гьабеян гьарун. Муридаз гьел риччалел рукӏинчӏо.
14Гӏисаца абуна:
– Риччанте лъимал дихъе рачӏине, гьезие квекӏен гьабуге. Гьединазейин Зобалазул Парччахӏлъи щун бугеб!
15Цинги, гьел лъималазда тӏад кверги бахъун, Гӏиса гьениса ана.
Зобалазул Парччахӏлъиги инсанасул бечелъиги
16Гьале цо гӏолохъанчияс Гӏисада гьикъана:
– Я, Мугӏалим! Абадияб рукъалъул бутӏа щвеялъе щиб лъикӏлъи дица гьабизе кколеб?
17Гӏисаца гьесда абуна:
– Лъикӏлъиялъул хӏакъалъулъ щай дуца дида гьикъулеб? Лъикӏав вуго цохӏо Аллагь. Абадияб рукъалъул бутӏа щвезе бокьани, Аллагьасул амруял тӏуразаре.
18– Кинал? – абун гьикъана дос.
Гӏисаца абуна:
– «Чи чӏваге», «зина гьабуге», «цӏогьодуге», «гьересинугӏлъи гьабуге», 19«эбел-инсул адаб-хъатир гьабе». Цоги: «мунго гӏадин вокьа дуе дуда аскӏов вугевги».
20Гьев гӏолохъанчияс Гӏисада абуна:
– Гьел амруял дица гьанжелъагӏанги тӏуразаруна. Цоги щиб дие камун бугеб?
21Гӏисаца гьесда абуна:
– Тӏубанго камиллъизе бокьани, дурго бугеб кинабго боцӏи-рикъзи биче ва мискин-пакъирасе садакъаде кье. Гьелъухъ дуе насиблъила зобалазул хазина. Цинги дихъе вачӏа, дида цадахъ вилълъине.
22Гьеб рагӏидал, гӏолохъанчи къваридго нахъе ана. Гьев вукӏун вуго кутакалда бечедав чи.
23Жиндирго муридазда Гӏисаца абуна:
– Хӏакълъун абулеб буго дица нужеда: Зобалазул Парччахӏлъиялде ворчӏизе цӏакъ захӏмалъула бечедав чиясе. 24Гьале цоги нухалъ абулеб буго дица нужеда: рукӏкӏадул ролъиялъусан лъугьине вараниялъего бигьа букӏина Аллагьасул Парччахӏлъиялде ворчӏизе бечедав чиясеялдаса.
25Гьеб рагӏидал, гӏажаиблъун-хӏикмалъун хутӏарал муридаз гьикъана:
– Гьедин батани, хвасарлъизе кӏолев чигӏаги щивдайха?
26Гьезухъги валагьун, Гӏисаца абуна:
– Гӏадамазда гьеб кӏоларо, амма Аллагь сундуего хӏалкӏолев вуго.
27Гьебмехалъ Пётрица абуна:
– Гьале, кинабго рехун тун, ниж дуда цадахъ рилълъана. Щибха нижее гьелъухъ букӏинеб?
28Гӏисаца гьезда абуна:
– Хӏакълъун абулеб буго дица: гьедин дида хадур рачӏиндал нуж, цӏияб дуниялалда Гӏадамил Лъимер жиндирго къудраталъул тахида гӏодов чӏараб мехалъ, анцӏила кӏиябго тахида дида аскӏор гӏодор чӏезе руго. Исраилил анцӏила кӏиябго наслуялъе суд гьабизе. 29Дие гӏоло мина-рукъги, вацал-яцалги, эбел-эменги, лъимал-хъизанги, хур-ахги рехун таравщинав чиясе нусго нухалъ цӏикӏкӏун щвела ва абадияб гӏумру насиблъила. 30Цере рукӏарал чангиял тӏарамагъаде ккела, тӏарамагъада рукӏаразул чангиял цере ккела.
Избрани в момента:
Матфейица бицараб Рохалил хабар 19: AvrNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Библия таржама гьабиялъул институт Москва 2008