Маркица бицараб Рохалил хабар 7
7
7 бетӏер
Аллагьасул амруялги умумузул гӏадаталги
1Гьале Гӏисахъе рачӏун, гьенир данделъана фарисеялги Иерусалималдаса цо чанго динияв гӏалимчиги. 2Гӏисал цо-цо муридал «хъубал» квераз, ай квералги чуричӏого, кваналел рихьана гьезда. (3Фарисеялги ва цогидал киналго жугьутӏалги, умумуздасанго бачӏараб динияб гӏадат цӏунун, цин кверал чуричӏого кваназе гӏодор чӏоларо. 4Базаралдаса руссараб мехалъги гьел кверал чуричӏого кваналаро. Цогиги гӏемер руго гьез цӏунарал гӏадатал. Масала, мухӏканго чурула суркӏа-щурун, парччи-гулгун, пахьул хьагал.) 5Гьединлъидал фарисеязги диниял гӏалимзабазги Гӏисада гьикъула:
– Умумузул динияб гӏадатги цӏуничӏого щай дур муридал чуричӏел квераз кваналел ругел?
6Гӏисаца жаваб кьуна:
– Нуж гӏадинал ххвелал гьаризе бокьулел чагӏазул хӏакъалъулъ цӏакъ битӏун абун бугебха Ишая аварагасул тӏехьалда:
«Гьел гӏадамазул кӏалалъ Дир цӏар гӏемер рехсола,
Амма ракӏални гьезул рикӏкӏад руго Дидаса.
7Гӏадада ккела гьезул Дие гьабураб тӏагӏат,
Гӏадамазул гӏадатал цӏунизе халкъ тӏамидал».
8Аллагьасул амруги рехун тун, гӏадамазул гӏадат цӏунула нужеца.
9Цоги гьес абуна:
– Нужерго гӏадат цӏунизе бокьун Аллагьасул амру нахъчӏвазени махщел щун буго нужее! 10Мусал къануналда гурищ абун бугеб: «Дурго инсулги эбелалъулги адаб-хъатир гьабе!» Хадубги: «Жиндирго инсул яги эбелалъул хӏакъалъулъ квешаб рагӏи абурав чи чӏвазе ккола». 11Амма нужеца малъулеб буго: масала, пуланав чиясул ихтияр бугила инсуда яги эбелалда абизе нужее дидасан кколеб напакъа дица Аллагьасе къурбан, ай назру гьабунилан. 12Гьелдалъун нужеца чӏезабулеб буго гьев чияс жиндирго инсуеги эбелалъеги кумек гьабичӏониги гӏолилан. 13Гьедин нужеца умумуздасан бачӏараб гӏадаталдалъун хвезабулеб буго Аллагьасул амру. Гьелда релълъаралги гӏезегӏан жал гьарулел руго нужеца.
Инсан сунца хъублъизавулев?
14Нахъеги халкъги аскӏобе ахӏун, Гӏисаца абуна:
– Дихъ гӏенекке нуж киналго: 15-16къватӏиса жанибе аралъ гуро инсан хъублъизавулев, гьев хъублъизавула гьесда жаниса къватӏибе бачӏаралъ. Гьеб бичӏчӏа нужеда!
17Гьеб халкъалда аскӏоса ун рокъоре щвараб мехалъ Гӏисада муридаз гьикъана доб кициялъул магӏна щибилан. 18Гӏисаца гьезда абуна:
– Гьедигӏанго жо бичӏчӏуларел чагӏийищха нужги? Къватӏиса жанибе аралъ инсан хъублъизавуларевлъи лъаларебищха нужеда? 19Кӏалдисан чорхолъе жанибе араб жо инсанасул рекӏелъе гуро унеб, чохьонибе уна, цинги гьенисан къватӏибеги уна. (Гьел рагӏабаздалъун Гӏисаца бичӏчӏизабуна инсанас кваналебщинаб квен бацӏцӏадаб, хӏалалаб букӏин.)
20Хадубги гьес абуна:
– Амма инсан хъублъизавула гьесда жанисан бачӏун къватӏибе аралъ. 21-22Щаян абуни, инсанасда жанисан, гьесул рекӏелъан рачӏуна квешал къасдалги, хъахӏбалъиги, цӏогьги, чӏвай-хъвейги, зиначилъиги, хъантӏи-къарумлъиги, ццинги, хӏилла-макруги, пасалъиги, жахӏда-хӏусудги, бугьтанги, чӏухӏи-пахрулъиги, жагьиллъиги. 23Гьеле гьеб инсанасда жанисан къватӏибе бачӏунебщинаб квешлъиялъ хъублъизавула гьев.
Цогидаб халкъалъул гӏаданалъги Гӏисаде иман лъола
24Гьениса вахъун Гӏиса щвана Тир шагьаралъул ракьалде. Пуланав чиясул бакӏалда рещтӏарав гьесие бокьун букӏинчӏо жив вачӏун вукӏин гӏадамазда лъазе. Амма вахчун гьев хутӏичӏо. 25-26Цо чӏужугӏаданалда рагӏана гьев вачӏун вугилан. Гьелъул яс йикӏана жундуз ккун. (Гьей йикӏана мажусияй, Сириялъул ракьалдаса финикияй.) Гӏисахъе ячӏун, гьесул хӏатӏазда цее накабаздаги чӏун, гьелъ гьарана жиндир ясалъул чорхолъа шайтӏан бачахъейилан. 27Гьес гьелда абуна:
– Цин лъимал гӏорцӏизегӏан чӏа, лъималазул кӏалдиса бахъун чед гьабзазе базе бегьуларо.
28Гӏисае жавабалъе гьелъ абуна:
– Я, Бетӏерчӏахъад! Гьебни битӏараб буго. Амма лъималазухъа рортарал чадил кескал столалда гъоркь регун рукӏунел рукъалъул гьабзазеги щолагури.
29Цинги Гӏисаца гьелда абуна:
– Гьеб рагӏи дие рекӏее гӏуна, гьанже дурго рокъое а; дур ясалъул чорхолъа шайтӏан нахъе арабин.
30Рокъое щведал, гьелда жиндирго яс ятана, шайтӏанги чорхолъа ун, парахатго бусада егун.
Гӏисаца гӏинкъасда рагӏи рагӏизабула
31Тир улкаялдаса вахъун, Сидон шагьарги къотӏун, Анцӏшагьаралъул ракьалдасан нахъеги Галилеялъул ралъдал рагӏалде щвана Гӏиса. 32Гьесухъе вачун вачӏана хӏалица гурони кӏалъазе кӏоларев гӏинкъав чи, гьесда цо квер хъвайилан гьарун. 33Довегӏанги вачун, Гӏисаца гьев чиясул гӏинзунир килщал къазаруна, ту-тузеги ту-тун гьесул мацӏалдаги хъвана килищ. 34Цинги, зобалазде бералги тӏамун, угьун хӏухьелги биччан, гьес абуна:
– Этпатахӏ! (Гьелъул буго «Рагье!» абураб магӏна.)
35Гьебсагӏат гъов чиясул гӏундул рагьун рачӏана, ва мацӏалда букӏараб гарацӏги бичун ун, бацӏцӏадго кӏалъазе лъугьана. 36Гьелъул хӏакъалъулъ лъиданиги бицунгейилан лъазабуна Гӏисаца гьел гӏадамазда. Амма гьедин цӏикӏкӏун гьукъанагӏан, дагьабги цӏикӏкӏун тӏибитӏулеб букӏана халкъалда гьоркьоб Гӏисал хабар. 37Ва дагьабги цӏикӏкӏун гӏажаиблъун, хӏикмалъун хутӏарал гӏадамаз цоцазда абулаан:
– Сунда квер баниги, кинабго лъикӏ лъугьунеб буго гьесухъа. Гӏинкъаздаги рагӏи рагӏизабулеб буго, мацӏ лъаларелги кӏалъазарулел руго.
Избрани в момента:
Маркица бицараб Рохалил хабар 7: AvrNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Библия таржама гьабиялъул институт Москва 2008