luka 20
20
tonʉ to iesu
(matai 21:23-27; maluko 11:27-33)
1moso conci hie. mo yonto seiten 'o iesu ho mo'ma'cohio to cou, epeaski to fukuin. mo uso ho baito to iesu 'o saisicoo, lema'cohio seiso, ho i'o coolo, 2tuocosi 'o iesu: <cuma na osko iftongi ci tonʉ ho osko hioa 'emo maica ci hi'hioa? siya namo mofi no tonʉsu? tekon'a eʉsvʉta a'mi!>
3isi yut'inga to iesu: <te'on'a auyu tuocosʉ tamo conci e'e, eʉsvʉta a'o. 4na tonʉ to yohane homo meelʉ toonono. nenusino mo i'mi to hamo hocieno o'te i'mi ta cou?>
5micu ahoi yupa eehcʉvho, yainca: <mateto av'a nate hia yut'ingi? hocito yainca <<mo i'mi to hamo>>, tasi yainca: <<mainci imueno o'te taa'uzva 'o yohane?>> 6honcito yainca <<mo i'mi ta cou>>, mate meua fatu 'e mo botngonʉ ho tokʉi a'to, maica ihe toehunga taa'uzva 'o yohane ho zou eyongensa.> 7ihecu yut'inga ho yainca: <o'a imza cohivi mio i'minenu.>
8isicu mi'usni to iesu ho yainca: <yaeza o'ate'o eʉsvʉta muu cuma na os'o iftongi ci tonʉ ho os'o hioa 'e hi'hioa eni.>
epo'usa no pak'i ci leyaezoi
(matai 21:33-46; maluko 12:1-12)
9acnguhu, isi mi'usni to iesu ho engha 'e epo'usa eni: <panto cihi ci cou mo mo'to'ʉ ho mooyai aamcuyu, isicu poa yuevahneni to leyaezoi, iachi covnʉ, aʉlʉ nona'o ne yafana. 10cu hotov'oha to amcuyu, isi skuna 'o soskuskunu ho uhto leyaezoi ho p'enia na ntesi tanua. at'inghi ihe ti'usna 'o soskuskunu, poa psasayae maine'e. 11mo ivaho smuhnu to mon'a cihi ci soskuskunu 'o tauke; 'o leyaezoi ihec'o yaica ho ti'usna, ho aokoe'iya, yaeza poa psasayae ho maine'e. 12cu i'toteuhu smuhnu to soskuskunu 'o tauke; ihec'o ivaha tilolonga, ho popeoyafa to ezoyʉ. 13yainca to tauke to aamcuyu: <<mate'o yainenu? mate'o skuna 'o os'o ngohia ci oko'u, 'atehe ahtao'te einva.>> 14at'inghi ne ihecu aiti to leyaezoi 'o oko to tauke, yupa mi'usnu ho mainca: <<'e cou eni tenala tiuski to tauke; mateto opcoza, 'atatocueno tanua 'e ezoezoyʉsi!>> 15ko'koeno, ihecu poyafa to aamcuyu 'o oko ho opcoza.
<homicu maica, tasieno yainenu to tauke na tasi hia mi'usni 'ela leyaezoi? 16'atasi ahtao'te usa ho potpapayo'a 'o leyaezoi, yoezuhneni no mocmo 'e aamcuyusi.>
ihe talʉi tamo botngonʉ 'e e'e eni, acʉhʉ mainca: <o'ate ahtu ʉmnʉ hoci yaa maica ci hi'hioa!>
17isi teochʉmi to iesu, tuocosi yainca: <yainca to seiso:
'o nia caciha ci fatu tola lemooyai emoo
isicu teyai atuhcu totnguca.
zou cuma na e'ausnasi tan'e? 18siya nate smolʉ ta fatu, 'atena ahtuo'te smoz'oz'o; 'o fatu ic'o te su'no feango no siya, tesi yaeza touz'oz'i na siya.>
e'usnu no mofi no tmuhnoa to kaisa
(matai 22:15-22; maluko 12:13-17)
19ihe cohivi to lema'cohio seiso ho ito saisicoo ho i'e iachi na isi pahtuhci ta epo'usasi, ihe 'ucia osnia tʉtpʉta 'o iesu; at'inghi mioeno smoyo tomo botngonʉ, 20moezʉ mooteo note 'oc'ocic'o ci hie. mo tohno to piyo ci cou, me'ʉ'ʉmnʉ ci koyu, ho mi'usnu to iesu ho tuucocosʉ, 'ucia tipunkua 'e e'esi, ko'ko peelʉi tʉtpʉta ho faeni to sootoku. 21mo mi'usnu to iesu 'o supai ho yainca: <sensei, imia cohivi 'e osko engha ho i'e hiasu mo'ma'cohio, mo acʉhʉ euseoseolʉ, yaeza cohivi o'a lako yumzi 'e sapci ta cou. conino meot'ʉt'ʉcʉ ho po'pa'cohivneni ta cou na e'e to hamo. 22tekon'a eʉsvʉta a'mi, hoci mofi no tmuhnoa to kaisa ci honte ne looma teenana pef'uhu to hoolicuto?>
23isi honga to iesu 'o hiahe moezʉezʉhʉ, isi mi'usni ho yainca: 24<mayo nomo coni ci peisu te'o aiti! zou hu'ongka ho ongko no siya 'emo yonta peisu?>
ihe yut'inga: <'a ongko to kaisa.>
25mi'usni to iesu ho yainca: <'ateeno faeni to kaisa na macucuma to kaisa, faeni to hamo na macucuma to hamo.>
26o'a ihe peelʉi yonto tuhcu to botngonʉ ho i'mi ta e'e ta iesu ho tipunkua; 'e hiasi yut'ingi to iesu ihe a'sʉftona yamceni, micu acʉhʉ uk'ana e'e.
e'usnu no smoevovei
(matai 22:23-33; maluko 12:18-27)
27piyo cimo tmaakoknuyu no smoevovei ci cousatukai mo baito to iesu, 28tuocosi 'o iesu: <sensei. isi p'eac'eni to hoolicu to moose a'to: <<hoci mcoi 'emo cihi, nʉ'vi na vcongʉsi, at'inghi mo uk'a oko, 'o ohaesasi tesi ahtao'te pecngiha 'e ahngʉsi, ho seotaveineni 'o ohaevasi.>> 29mosola yaa pitu ci nanat'ot'ohaesa. mevcongʉ 'o ohaevahe. uk'a oko hocu mcoi. 30peuska to ohaesasi, 31atavei ohsi yaeza vcongʉ to acngihi ohaesa, ac'ʉhʉ tomo pitu moso acʉhʉ himhovcongʉ to mamespingi, maezo acʉhʉ uk'a oko, hocu mcoi. 32atavei cu maezo mcoi 'o mamespingi ic'o. 33tuocosina'a hotac'u hiesi no smoevovei, siya na tena atuhcu himhovcongʉ? maica mosola acʉhʉ himhovcongʉ ta mamespingi 'emo pitu ci nanat'ot'ohaesa.>
34isi yut'inga to iesu: <'e hahocngʉ ho mamespingi ta hpʉhpʉngʉ maitan'e. la yupa totovcongʉ; 35at'inghi i'ote 'aseolʉ i'mi no mcoi ho smoevovei ci cou, a'vinano yaa nsou tote ivaho cmʉ'ho ci hpʉhpʉngʉ, o'anate ivaho yupa totovcongʉ. 36te totiski to tensi o'ate mcoi. zou 'o'oko to hamo, maica mo i'mi no mcoi ho smoevovei. 37ohsicu 'akasi to moose ho pano smoevovei ci hi'hioa, to ohsi tposi ho mosola yunzou na cʉmʉ isi yainca: 'o nooe'oca zou <<hamo to 'avulahamu, hamo to 'isaku, hamo to yakovu.>> 38na e'ausnasi isi yainca, zou hamo tamo yaansou ci cou 'o hamo. o'as'a hamo no micu mcoi ci cou, maica 'e cou homo yono mcoo to hamo. mo acʉhʉ yaansoua.>
39piyo ci lema'cohio seiso mo mainca: <sensei, a'ʉmtʉs'a ʉmnʉ co e'esu!> 40ahoi tan'e, uk'a na cimo smeecʉ'ho ivaho tuucocosʉ to iesu.
e'usnu to kilisto
(matai 22:41-46; maluko 12:35-37)
41at'inghi isi mi'usni to iesu ho yainca: <maincis'a yainca ta cou zou mʉntʉ'ca to tavite 'o kilisto? 42to ohsi tposi to sihen to tavite ohsi iachia yainca:
isi mi'usni to nooe'oca 'o nooe'oca'u ho yainca:
teko yusuhngu ta vhona'u,
43totea ho ta'ucu poa peteozu ta t'angosu 'o hangʉsu.
44ho isieno yainca to tavite <<nooe'oca>>, maincite aac'o yainca zou mʉntʉ'ca to tavite 'o kilisto?>
koica to iesu 'o lema'cohio seiso
(matai 23:1-36; maluko 12:38-40)
45ne mon'a seolʉa no tmaayaezoyʉ 'omo botngonʉ, isi mi'usni to iesu 'o tesi ho yainca: 46<la etngoeva 'o lema'cohio seiso. la kaebʉ sʉ'eʉsʉ to yʉsʉ no tacvoh'i ho eucocoyʉ tocaefi, kaebʉ yonto la toehunga 'oyona ho noa mi'usni ho tuayokeoi ho p'ohkui, maezo kaebʉ yusuhngu tomo afnaso ci ca'hʉ to kaitoo. sutmoyaevonʉ tola eho'ʉ eabobonʉ. 47lahe eha'va 'o ezoezoyʉ tomo tuvcongʉ ci mamespingi, tac'u peihtothomʉ ho mo'engho tomo tacvoh'i ci 'inoli. 'e lahe hi'hioa 'atena ahtuo'te tiou no someoisa ci patvovei!>
Избрани в момента:
luka 20: bsnfe
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
The Bible Society in Taiwan © 台灣聖經公會版權所有 2014