ESOTO 15
15
Ko te Pese a Mose
1 #
Faka 15.3
Fakamuli ifo, ne usu ei ne Mose mo tino Isalaelu te pese penei ki te Aliki:
“Ka pese atu au ki te Aliki me ne manumalo a ia;
Ko oti ne 'pei ne ia a solofanua mo tino kola e sopo i ei ki te tai.
2 #
Sala 118.14; Isa 12.2 Te Aliki toku puiga malosi;
Ko ia tela ne fakasao ne ia au.
A ia ko toku Atua, kae ka viki au ki a ia;
Ko ia foki ko te Atua o toku tamana, kae ka usu pese au ki a ia e uiga mo tena maluga.
3A te Aliki se sotia malosi;
Ko te Aliki tena igoa.
4“Ne 'pei ne ia a te kautau a Aikupito mo olotou kaliota ki te tai;
A ofisa 'lei foki o latou ne ma'lemu katoa i te tai kula.
5Ne ufi latou ne te moana 'poko,
Kae a'pulu latou ki lalo i te takele papa pela me ne fatu.
6“Te Aliki, a tou lima fakaatamai e fakamataku tena malosi;
E fatifati fakalikiliki eiloa ne ia ou fili.
7Mai tou manumalo fakatupu tela ne fakatakavale ei ne koe ou fili;
I tou kaitaua lasi, ne sunu fakapalele ei latou e pela me ne mouku.
8Ne manava atu koe ki te tai, ko fanake ei o sua malosi,
Ko tu ake ei pela me ne 'pui;
Ka ko koga 'poko eiloa o te tai ko masapakupaku fua.
9Ne fai aka a pati a te fili penei,
‘Ka afuli ne au latou ko te mea ke maua atu ne au;
Ka vaevae ne au olotou koloa kae puke ne au a mea e manako au ki ei;
Ka tata aka taku pelu, ko puke katoa ei ne au olotou koloa.’
10Te Aliki, e tasi eiloa tau 'pusiga ki tino Aikupito, ko te mea eiloa ko ma'lemu latou;
Ne 'goto latou pela me ne polo faka'mafa, i te tai fakamataku tena.
11“Te Aliki, e seai se Atua e pau mo koe, me fakaofoofogia tou malu;
E seai foki se Atua io me se tino e mafai o fai a mea fakaofoofogia pela mo koe.
12Ne 'fola atu tou lima fakaatamai, ko te mea eiloa ko folo omotou fili ne te laukele.
13Ne takitaki ne koe a tino kola ne fakasao ne koe, ona ko tou fakamaoni ki tau feagaiga;
Ne fakaaoga ne koe tou malosi o taki a latou ki tou fenua tapu.
14Ko oti ne logo a malo katoa, tela ko polepole latou i te ma'taku;
A tino Filisitia ko pukea ne te mataku.
15A takitaki o Etoma ko oko eiloa i te ma'taku;
A tino mafi o Moapi ko polepole fua;
A tino Kanana ko seai se loto toa ia latou.
16Ko ma'taku valevale latou.
Te Aliki, ko lavea ne latou tou malosi,
tela ko se mafai ei ne latou o fai se mea ona ko te mataku ko lasi.
Ke oko eiloa ki taimi ne fakasili ake ei ou tino i olotou tafa
Ko tino kona kola ne fakasao ne koe mai te nofo pologa.
17Ne aumai ne koe latou ki loto i Kanana, faka'nofo ei ne koe latou i tou mauga,
Te koga tela ko oti ne filifili ne koe mo fai tou koga nofo tumau;
Ko te Faletapu tena tela ne faite ne koe.
18Te Aliki, ka fai koe mo tupu ki te se gata mai eiloa.”
Ko te Pese a Miliama
19Ne sasale a tino Isalaelu i loto i te tai, i luga i te koga masa kae i te taimi ne tautali atu ei te kau Aikupito, mo olotou kaliota mo solofanua mo tino fakatele kaliota ki loto i te tai, ne toe fakasaua ne te Aliki te koga tela ne masapakupaku, tela ko malemu ei latou.
20Ne puke te samupelini a te pelofeta ko Miliama, tela ko te tuagane o Alona, kae ne tautali atu katoa i a ia a fafine o ta'ta a olotou samupelini kae 'saka. 21Ne usu te pese a Miliama ki a latou penei;
“Usu pese atu ki te Aliki me ko manumalo katoatoa a ia;
Ko oti ne 'pei ne ia a solofanua mo tino e 'sopo i ei ki te tai.”
Ko te Vai 'Kona
22Ne aumai ne Mose a tino Isalaelu mai i te Tai Kula ki te koga lavaki o Sula. E tolu aso ne sa'sale ei latou i loto i te koga lavaki, seai eiloa ne vai ne maua ne latou. 23Ne oko atu latou ki te koga e igoa ko Mala, ka ko te vai i ei e 'kona, e se maua o inu. Tena te mea e fakaigoa ei te koga tena ko Mala.#15.23: Mala: Te uiga o te igoa tenei faka-Epelu “'kona”. 24Ne 'tagi atu a tino ki a Mose kae fai atu ki a ia penei, “Ne a nei omotou mea ka inu?” 25Ne talo fakamalosi a Mose ki te Aliki, tela ne fakaasi atu ei ne te Aliki te lakau ki a Mose, tela ne pei ne ia ki loto i te vai ko te mea eiloa ko se 'kona.
I kona eiloa ne tuku mai ei ne te Aliki a tulafono ki a latou mo takitaki olotou olaga. I kona foki ne tofotofo ne ia latou. 26Muna te Aliki, “Kafai e faka'logo mai koutou ki a au mo te loto katoatoa, o fai a mea kola e lei ki taku fakatau, kae tausi ki aku fakatonuga, ka se fakasala koutou ne au ki ne masaki, pela mo masaki kola ne oko ki tino Aikupito. Au ko te Aliki, tela e fai ne ia otou ma'saki ke 'lei.”
27A te koga ne oko latou ki ei ko Elima, te koga tela e sefulu lua koga suasua kae fitusefulu a lakau ko pama. Ne ma'nava latou i kona, i tafa o te vai.
Избрани в момента:
ESOTO 15: Tusi Tapu
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tuvalu Revised Bible © Bible Society in the South Pacific