KENESE 19
19
Ko te Agasala i Sotoma
1I te okomaiga o te tokolua agelu kola ki Sotoma i te afiafi tena, ka ko Lota e sagasaga i te mataloa o te fa'kai. I te mateaga ne Lota te tokolua agelu kona, tele atu eiloa a ia o fakafetaui ki a laua. Ne punou ifo a ia i la mua 2kae fai atu penei, “Te lua 'malu, au ne vau o tali koulua. Fakamolemole, o'mai ki toku fale. Fulu lua vae kae nofo o moe i konei i te po nei. I te aso taeao, ko ala ake ei koulua koi tai malu o olo i te lua malaga.”
Kae ne tali atu laua penei, “Ikai, maua e nofo eiloa i te malae o te fa'kai i te po nei.”
3Ne finau atu eiloa a Lota ki te tokolua kola, te mea eiloa ko talia ne laua ke olo latou mo Lota ki tona fale. Ne fakatonu atu a Lota ki ana tavini ke tao ne falaoa kae fakatoka se kaiga gali ki malo konei. I te 'tokaga, te mea eiloa ko 'kai.
4Kae koi tuai o olo o moe a te toko lua konei, ne 'mai a tagata o Sotoma o fakatamilo te fale. A tagata katoa o te fa'kai, tino matua mo tino fo'niki, ne nofo katoa i kona. 5#Fama 19.22-24Ne kalaga atu ki a Lota penei, “Ko fea te tokolua kola ne 'mai o 'nofo mo koe i te po nei? Aumai ki tua!” A tino o Sotoma e manako o 'moe mo laua.
6Ne ulu atu a Lota ki tua, pono atu ei te mataloa i ona tua. 7Muna a ia ki te vaitino penei, “Oku taugasoa, au e fakamolemole atu ke mo a e fai se vaega mea masei penei! 8Kiloke, e isi ne aku tama fafine e tokolua, e seki iloa tagata. Ke avatu ne au ki tua, kae pule eiloa koutou ki te mea e fai ne koutou ki a laua. Kae mo a eiloa e fai ne koutou se mea se lei ki tagata tokolua konei; a laua ne malo i toku fale kae tau o puipui ne au.”
9Kae ne fai atu a tagata Sotoma ki a Lota penei, “A koe se tino fakaalofa, fakatafa keatea! Ko oi koe ke vau koe o fakatonu mai te mea e tau o fai ne matou? Keatea mai omotou mua, i a koe ma atili fakamasei atu ne matou i lo au malo kona.” Ne tule atu ne latou a Lota kae olo ake o ofa te mataloa. 10Ka ko te tokolua tagata kola i loto i te fale ne puke atu ki a Lota o futi ki loto i te fale kae pono te mataloa. 11#2Tupu 6.18Tena fakakivi ei ne laua a mata o tino katoa i tua ke se lavea ne latou te mataloa.
Ko Tiakina ne Lota a Sotoma
12Muna a te tokolua tagata kola ki a Lota penei, “Kafai e isi ne ou tino i konei, ne tama tagata io me ne tama fafine, io me ko avaga a au tama fafine io me ne nisi kaiga o koe, e nofo i te fa'kai, ke olo keatea katoa mo te fa'kai, 13me ka fakamasei ne maua a te fa'kai tenei. Ko oti ne lagona ne te Aliki a molimau ki te se 'lei o tino o Sotoma, tela la, ne uga mai ne ia maua ke fakamasei te fa'kai tenei.”
14Tela, ne fano ei a Lota ki tagata kola e fai o avaga mo ana tama fafine, kae fai atu ki ei penei, “Fakavave o olo keatea mo te fa'kai nei i te mea ka fakamalaia ne te Aliki.” Kae ne taofi aka laua pela i a Lota e fai fa'kata.
15I te vaveao, ne fakavavave ne te tokolua agelu a Lota, kae fai atu, “Ke vave, puke tau avaga mo au tama fafine e tokolua o tele keatea ke 'sao koutou mafai ko fakamasei te fa'kai tenei.” 16#2Pete 2.7Ne fakatalave a Lota, ka ko te Aliki ne alofa ki a ia, puke atu ei a te tokolua tagata ki a ia, mo tena avaga mo ana tama fafine e tokolua o taki atu keatea mo te fa'kai. 17Muna a te agelu e tokotasi, “Tele ke 'sao koutou! Sa 'kilo ki otou tua, sa 'tu foki i te vanu. Tele ki luga i mauga ke mo a e mate koutou.”
18Ne tali atu a Lota penei, “Ikai, fakamolemole, sa faigina matou ke fai te mea tena. 19Ko oti ne fakasao ne koulua toku ola. A mauga ko to mao; e iku au o puketu ne te fakalavelave, ko mate ei au seki oko ki te koga tena e 'tau o tele ki ei. 20E matea ne koe te fa'kai foniki tela? Tuku mai au ke fano ki ei me e pili mai. E matea ne koe me se fa'kai foniki, kae e sao foki au i ei.”
21Ne tali atu te agelu ki a ia penei, “Ko lei, ko talia ne au. Ka se fakamalaia ne au te fa'kai foniki tena. 22Fakavave! Tele! E seai se mea e mafai o fai ne au vagana ke oko koulua ki te fa'kai foniki tena.”
Ne fakaigoa te fa'kai tena ko Soala, me ne taku sale ne Lota ko te fa'kai foniki.#19.22: Soala: A te uiga o te igoa tenei faka Epelu “foliki”. 23A te la ko kamata o fanake i te okoga o Lota ki Soala. 24#Mata 10.15; 11.23,24; Luka 10.12; 17.29; 2Pete 2.6; Iuta 7Ne fakato ifo ne te Aliki te afi ki luga i fa'kai o Sotoma mo Komolo, 25tena, masei valevale eiloa a fa'kai kona, mo te vanu katoa fakatasi mo tino katoa i kona mo mea katoa e ola i te laukele. 26#Luka 17.32Ka ko te avaga a Lota ne kilo ki ona tua, te mea eiloa ko liu pou masina.
27I te tafataeao o te sua aso, ne fanatu Apelaamo ki te koga tela ne faipati ei laua mo te Aliki. 28Ne kilo ifo ona mata ki Sotoma mo Komolo mo vanu katoa, lavea ei ne ia a te au e fanake mai te laukele, e pela me se au e fanake mai se afi lasi eiloa. 29I te fakamaseiga ne te Atua a fa'kai i te vanu, te koga ne nofo ei a Lota, ne masaua ne ia a Apelaamo, tena talia ei ne ia a Lota ke sola mo te saogalemu.
Ko te Mafuaga o Tino Moapi mo Tino Amoni
30Ne mataku a Lota ma nofo i Soala, tela ne olo ei a ia mo ana tama fafine e tokolua o nofo i ana i luga i mauga. 31Ne fai atu te tamaliki fafine matua ki tena taina penei, “A te tamana o taua ko gasolo o matua, kae e seai eiloa ne tagata i te lalolagi katoa#19.31: te lalolagi katoa; io me te fenua tenei. ke avaga mo taua ke maua ne tamaliki ma taua. 32Vau ke fainu ne taua ta tamana ke kona, ke moe mo taua ke maua ne ta tamaliki i a ia.” 33I te po tena, ne tuku atu ne laua a uaina ke inu ki ei a Lota, tela ne fanatu ei te tama fafine matua o moe mo ia. E seiloa eiloa ne Lota te mea ne tupu me i a ia ko to kona.
34I te sua aso, ne fai atu te tama fafine matua ki tena taina, “A maua ne moe i te po anafi. Ka toe fainu nei ne taua ma po nei, ko moe ei mo koe. Tena, a maua ei ne ta tamaliki i ta tamana.” 35Tena, i te po tena, ne fainu ne laua te la tamana, moe ei mo te tama fafine foniki. E seki iloa foki ne Lota te mea ne tupu me i a ia ko tō kona. 36I te faiga tena, ne faitama ei a te tokolua tamafine kona i te la tamana eiloa. 37Ne fanau mai te tama a te tamaliki fafine matua, se tagata, fakaigoa ei ne ia ko Moapi. A ia ko te tupuga o tino Moapi.#19.37: Moapi: Te uiga o te igoa tenei faka Epelu “mai i toku tamana.” 38Ne fanau foki a te tamaliki a te tama fafine foniki, se tagata foki, fakaigoa ei ne ia ko Penani.#19.38: Penani.Te uiga o te igoa tenei faka Epelu “te tama tagata a toku kaiga” kae taku faka Epelu pela “tino Amoni.” A ia ko te tupuga o tino Amoni i aso nei.
Избрани в момента:
KENESE 19: Tusi Tapu
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tuvalu Revised Bible © Bible Society in the South Pacific