Burqesun 4
4
K'ayin q'a Avel
1Adamen iz çuux Yevaxun ı̌šaluğebi, Yeval bǐhi baki sa ğare eçeri. Yevan me əylin s'iya K'ayin laxi pine: «Mone, əyel eçeri sa amdar běšez baki zu, Buxačuğone bi mot'o». #4:1 K'ayin - əbrani muzin "k'ayin" əyit "q'azayinşbsun, běš baksun" k'inək'e c'eysa. 2K'ayinaxun oşa Yevan şot'aynak' sa viçiyal eneçeri, iz s'iyal Avele laxi. Avel eğel běğale baki, K'ayinen isə oç̌ali loxole əşpsay.
3Sa heq'ədər vədə hari c'ovaneki, K'ayinenal Q'ončuğoynak' izi becərişi oç̌alen tadi baraxun paye eçeri. 4Avelen isə iz sürünə bakala heyvanxoy süft'in baloğoxun, şot'oğoxun c'eri c'əyinəx ganxone pay eçeri. Şot'ay biq'i me əş Q'ončuğoy ük'el basek'i, Q'ončuğonal Aveli eçeri me paya q'abulebi. #4:4 Əbr. 11:4 5K'ayini eçeri paya isə Q'ončuğon tene q'abulbi, K'ayinenal əcuğon biq'i iz k'odoğo śinepi. 6Q'ončuğon K'ayina pine: «Vi əcuğon het'u görəne biq'e? Het'aynak'en vi k'odoğo śipe hun? 7Əgər haq' galan vi k'odoğo śipesa, vi ç̌oya tez axšumdon ki Zu? Ama metər bi vi boş ǰalenst'asa, vi ük'e xal baft'ene upsune. Günaxen va iz kiyel bast'une çuresa, ama hun şot'oxun zorba bakalanu ki, va ı̌ša bites nu bakane».
8Sa ğiyal K'ayinen iz viçi Avela "eki çöle tağen" pi haq'i çölene taśi. T'iya p'ap'iyal Aveli loxol taśi şot'o besebi. #4:8 Mat'. 23:35; Luk'. 11:51; 1 İoan. 3:12 9T'e vədə Q'ončuğon K'ayinaxun xavare haq'i: «Vi viçi Avel maya?» Şot'inal qaybaki "k'əz ava, viçey q'aroola zap'k'alzu zu?" pine. 10Q'ončuğon pine: «K'ən bi hun? Vi viçey p'iyan śipi, isəəl t'e p'iyen muz qaypi Zane k'ale, "bezi həyifə haq'a" nexe. #4:10 Əbr. 12:24 11Mone, q'arğişi q'ončuxen baki hun, vi kiin śipi viçey p'iya q'uc'p'i oç̌alenal va irapedi. 12Meyin oşa hun oç̌ala becərişalbayin şot'in va hik'k'al tene tadal. Vi k'ojaxun-mesaxun bakalnu hun, ömüri axıral śirik' dədərgün bakalnu».
13K'ayinen Q'ončuğo pine: «Me caza bezi zapes bakalt'uxun bı̌hine baki. 14Za həysə şəp'ensa me oç̌alaxun, zuval Vi piin běšt'an aç̌oz, bezi k'ojaxun-mesaxun baki dədərgün bakoz. Ama memiin c'eysun q'a za şinesa biq'i bespsun sa bakale». 15Q'ončuğon isə qaybaki metəre pi: «Ketər tene, va besp'alt'uxun Bez əcuğo vǔğ q'at haq'oz!» Metər piyal Q'ončuğon K'ayini loxol nišane laxi ki, şot'ay loxol kul alabi iz elmoğo haq'al maq'an baki. 16Metərluğen, K'ayin Q'ončuğoy piin běšt'an aneç̌i, Eden ganuxun běğc'eğalaç taśiyal Nod #4:16 Nod - əbrani muzin "nod" əyit "dədərgün" upsune. uk'ala ganune yəşəyinşbsa burqi.
K'ayinaxun bakiyorox
17K'ayinen iz çuğoxun ı̌šaluğebi, çuuxal bǐhi baki Xanok'ane eçeri. T'e vədə K'ayinen sa şəhəre biq'say, eçeriyal me şəhəri s'iya iz ğare s'iyaxune laxi, yəni Xanok'. 18Xanok'axun İrade baki. İradaxun Mehuyael uk'ala ğare baki. Mehuyaelaxun Met'uşaele baki. Met'uşaelaxunal izi ğar Lemek'e baki.
19Lemek'en p'ə̌ çuuxe haq'i: sunt'ay s'i Ada, t'e sunt'ay s'i Śillaney. 20Adan ğare eçeri, iz s'i Yaval. Eğel q'a beli běği iz sürüğoynak' şaat' otarişala ga bə̌ğə̌bit'uxun oşa iz çadıral hat'e gala laxi yəşəyinşalo süft'ə hame Yavale baki. 21Yavali sa viçiyal buney, iz s'i Yuval. Me Yuval isə ən süft'ə arfa q'a t'üt't'əy farpiyone bake. 22Lemek'i Śillaxun baki ğare s'i isə T'uval-K'ayiney. Şo dəmir t'ap'k'aley. Dəmirə q'a tunca xebit'uxun oşa şot'oğo t'api hər cür ət't'əc düzbiyo süft'ə hame T'uval-K'ayine bake. Şot'ay sa xunçiyal buney, iz s'i Naama.
23Sa ği Lemek'en iz çupuxxo k'alpi pine:
«Ay Ada q'a Śilla, ǔmǔxlaxanan!
Ay Lemek'i çupuxxo, ibakanan k'əz nex!
Bez loxol kul alabsun çureğalt'ay elmoğoz haq'on zu,
Za duğsun çureğala cəyilə besezbon!
24K'ayina görə vǔğ q'at əcuğ haq'eğalesa,
Lemek'a görə yetmiş vǔğ q'at haq'eğale».
Şet' q'a Enoş
25Adamen p'urum iz çuğoxun ı̌šaluğebi, iz çuux Yevanal sa ğar eçeri iz s'iya Şet'e #4:25 Şet' - əbrani muzin "şet'" əyit "paynu koft'iyo" upsune. laxi. Şot'in metəre pi: «K'ayinen besp'i Aveli gala Buxačuğon za me ğarane pay tadi». 26Şet'e izi ğar bakat'an isə şot'ay s'iya Enoşe laxi. Amdarxon Q'ončuğoy s'iya duği afırıpsunal hame vədəmoğone burqeśi.
Избрани в момента:
Burqesun 4: udi
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Translation Services International Ltd.