Kɨrara gɨ daa (Exode) 15
15
Diri dɨnə Moyis duwa
1Mwom da, Moyis day gɨ nə nare nə Israyel tu diri dɨ idɨ bwaw Aba dama gɨ dɨrəw bɨr̰ɨn̰ sɨwə ba da:
«Nə ùr ba nə tu diri bow Aba dama gɨ dɨrəw bɨr̰ɨn̰ di sɨwə,
dara an̰ji àla abnani dɨ geche.
An̰ji bwaa leme me woni ajilagɨ me kurayyə.
2Aba dama gɨ dɨrəw bɨr̰ɨn̰ da, i dwana ni me,
i gun gɨ nə ha tow diri bwaw sɨwə me,
dara an̰ji kɨdən daa.
An̰ji i Mãr̰ĩ ni, nə ha bwaw sɨwə!
An̰ji i Mãr̰ĩ gɨnə aban duwa,
nə ha ꞌwagaw gɨ jilay dara gasɨnani duwa.
3Aba dama gɨ dɨrəw bɨr̰ɨn̰ di i aba jara say gaba dwana.
Sumɨw da, i Aba dama gɨ dɨrəw bɨr̰ɨn̰!
4An̰ji nwangr̰a pus dɨ idɨ jara say dɨnə dole gɨ Ejibtɨ duwa
me asɨngar duwa pad me bwagɨ kurayyə.
Woni jara say duwa woni dwana
marbɨ bam mana gɨ kuray gaba Dɨrwa dalawə.
5Ku gɨnə nimi day gobɨ dɨdəgɨ lə,
me cendi ɗondɨbɨ dodə nimi gɨndəgɨ lə ya kur̰a de.
6Ɨjɨm Gaba dama gɨ dɨrəm bɨr̰ɨn̰ di,
ɨsəm gɨ abe gɨlə dwana duwa.
Ɨsəm gɨ abe dɨlan̰a woni mar̰ande dɨma ꞌyágɨ bam.
7Ɨjɨm da, mə i gun gɨ geche ꞌyang,
mə ɓugdə woni mar̰ande dɨma bam.
Dusi dɨma dɨ swaa di uləgɨ bam
ya dùwa ba dɨ ul nɨm gɨ chemde ta de.
8Mə koo gale gɨ geche da,
nimi dayara daa mana mɨn me,
ku day da, dayara hwaa daa wunə ya gər ta de.
Ku di ilə gwaba lə,
nimi nə kuray don duwa lə di gemsara daa.
9Woni mar̰ande nin waya ba da:
“ꞌYwarnandɨ gandagɨ le taragɨ lə,
də hárang ꞌywagɨ le.
Də hárang chaba mani day nə ꞌywaa bam ɨsə sɨdəndɨ lə.
Də hárang ꞌyágɨ bam gɨ sugɨnəne ɨnda nə sore me ca.”
10Me ɨjɨm Gaba dama gɨ dɨrəm bɨr̰ɨn̰ di,
mə koo gale dɨma gɨ geche mana gɨ kurayyə,
me kuray di laygɨ me,
cendi ɗondɨbɨ dodə nimi nə ɗungeyə ya biri de.
11I mãr̰ĩ gɨ we me wunɨm ɨjɨm Gaba dama gɨ dɨrəm bɨr̰ɨn̰ di mo?
I wi me ladɨ wun mɨnaw jiga ya ɨjɨm de me,
gɨ ha bwaw nɨm gɨ jilay mo?
Gasɨnani dɨma da, àl lán̰a nan̰e me,
mə àl mani nə dan̰a me ca.
12Mə ꞌwoo ɨsəm gɨ abe daa da,
sɨn̰a mugdɨ woni mar̰ande nin dodə.
13Gɨ dusi dɨma dɨ lade di,
mə ɨndara nare dɨma nə mə kɨdəgɨ daa di dɨrəgɨ lə,
dwana dɨma wolgɨ ha gandagɨ mana gɨ lade
gɨ wun mɨnaw jiga gɨ mə dam lə di.
14Mana gɨ nare nə sɨn̰a dɨ ɗangə ba gɨ doy gwale gɨ ta di da,
lán̰a àlgɨ, sɨdəgɨ sadɨgɨ tag tag.
Nare nə Pilisi, lán̰a ɓugdɨgɨ dodə.
15Dolgə nənə nare nə Edom day, lán̰a àlgɨ̀ le me,
woni dwana nənə nare nə Mowab day kaw, lán̰a àlgɨ̀ nan̰e me,
nare nə Kanan sɨdəgɨ wagɨ nan̰e me ca.
16I ɨjɨm Gaba dama gɨ dɨrəm bɨr̰ɨn̰ di me,
mə àl mani nə dan̰a gɨ ɨsəm gaba dwana me,
lán̰a ɓugdɨgɨ nɨm dodə.
Cendi kɨdɨ nare nə mɨm nem àla mani mɨn bədə,
bɨraa nare dɨma ha cilangɨ bam bá do,
nare nə mə kɨdəgɨ daa di ha gɨndəgɨ saw nɨm bam bá do.
17Ɨjɨm Gaba dama gɨ dɨrəm bɨr̰ɨn̰ di,
mə ha wàla nare dɨma hára gandagɨ chə́gɨ kur̰a dɨma dɨ sɨm dɨdə,
dara cendi ba damna lə.
I mana gɨ mə ɗangr̰ɨ dara ba mə dam lə,
ɨjɨm gɨ Aba ciri nin.
I mana gɨ ta lə di me mə chɨ́ kulu dɨma gɨ mə biyɨw kalɨw jiga di gɨndɨw lə me ca.
18 I sɨdɨ, Aba dama gɨ dɨrəw bɨr̰ɨn̰ di
ha lama dwãr̰ĩ i gɨ dɨrɨn̰ bɨr̰ɨn̰!»
Diri dɨnə Miriyam dɨra
19Mana gɨ leme nənə dole gɨ Ejibtɨ duwa me, pus duwa dɨ idɨ jara say me, nare duwa woni ajila gɨ leme me, ba gɨ bor ya kuray dalawə da, Aba dama gɨ dɨrəw bɨr̰ɨn̰ cwaa nimi nə kurayyə di dɨdəgɨ lə bi. Me nare nə Israyel day da, ha wayniyə cilangɨ gɨ kuray di.
20Ɨr̰ɨ Miriyam dɨ i idɨ cɨmə Mãr̰ĩ bɨw, tandi i Arõ chidɨw, u ban̰jil dɨra daa tu. Me namde nə Israyel pad lay ban̰jil day ɨsɨragɨ lə dɨmə pamdɨ gɨ n̰ar̰a tardɨ lə me ca. 21Miriyam ugɨ kwandagɨ diri ba da:
«Tunə diri bwanaw Aba dama gɨ dɨrəw bɨr̰ɨn̰ di sɨwə,
dara an̰ji àla abnani dɨ geche.
An̰ji bwaa leme me woni ajilagɨ me kurayyə.»
Nimi nə Mara
22Ɨr̰ɨ Moyis so gɨ nare nə Israyel di daa mana gɨ kuray gaba Dɨrwa di bɨwə me, ha gandagɨ ɨjɨ mana gɨ dɨn dwar̰ɨ dɨ gɨ ꞌwogɨdɨ Chur. Cendi àl wála subu hára lə dɨn dwar̰ɨ lə me, cendi ꞌyo nimi nə chàa bədə.
23Ɨr̰ɨ cendi gɨr mana mɨn gɨ gɨ ꞌwogɨw Mara. Mana gɨ Mara da, nimi ilə me cendi nem chàa gɨ nimi nə ta di bədə, dara nimi di ɗan̰e. I ta di me, gɨ ꞌwogɨ nɨm gɨ mana gɨ ta di «Mara» di, gɨndɨw dɨ biyə da, i «ɗan̰a». 24Mwom da, nare nə Israyel ɓɨr̰ɨn̰ hɨrajɨw Moyis ba da: «Ka da, də hárang chàa i na mo?» 25Ɨr̰ɨ Moyis soy ꞌwogɨ Aba dama gɨ dɨrəw bɨr̰ɨn̰ me, an̰ji gɨlɨw habda bɨw mwom da, Moyis u habda bɨw di àl nimi nə ta lə di me, nimi di cor gɨdɨ nə lade.
I mana gɨ ta lə di me Aba dama gɨ dɨrəw bɨr̰ɨn̰ ꞌyàgɨ́ nɨm gɨ nare nə Israyel bii gɨ ꞌwoo lə me, mani nə cendi ba àlnagɨ lə me ca. I mana gɨ ta lə di me, an̰ji gɨrsəgɨ dara yara gɨ dusɨrəgɨ dɨ cendi kaldɨ dɨwə di me ca. 26An̰ji waygɨ ba da: «Anə àlna ɨndi Gaba dama gɨ dɨrən bɨr̰ɨn̰ gɨ nə i Mãr̰ĩ dan di bɨn me, anə àlna mani nə tɨba dɨrənnə me, anə àlna bii ni gɨ ꞌwoo di gɨ bɨrmə duwa ladɨ me, anə àlna mani pad nə nə ɨrməng gandagɨ di gɨ bɨrmə day bá bá me da, mwom gɨ nə bwagɨ nare nə Ejibtɨ ta di, mɨn tenene kaw, nə ha àsang gandɨw bədə bɨr̰ɨn̰. Dara i ɨndi Gaba dama gɨ dɨrən bɨr̰ɨn̰ di me, nə i aba swang daa mwom dannə ɨndi.»
27Ɨr̰ɨ nare nə Israyel di yala mana mɨn gɨ gɨ ꞌwogɨw Elim. Mana gɨ ta lə di nimi gɨndəgɨ swaa lə jiga jiga nem mwaj dii sɨr me, tumbur gɨnɨn̰ wurgɨsubu me ilə. Cendi ɗangr̰ɨ kundi day mana gɨ ta lə di me, damdɨ nɨm lə nimi bɨdəgɨ lə ib ib.
Избрани в момента:
Kɨrara gɨ daa (Exode) 15: sor
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2024 Wycliffe Bible Translators, Inc. All rights reserved.