Wúlúfè 4

Bóà e Wúlúfè sí le ka

1Lɛ̀ e kɛɛ, Bóà e ló pɛ́lɛɛ gàlà lé mɔ̀ e yà yi. Yé e kɛ nɔ́ kília, Ìlímílɛ̀ ɓɛ́ɛ ye mì lɛ́ a wɔ̃̀ gèea áà nù die, lɛ́ Bóà a súo kɛ, “Ì nu zèe m ɓɛ́ɛ í yà tã́ã̀,” Yelɛ́ gɔ̃́ɔ̃ e ló yi é yà tã́ã̀a. 2Bóà e pɛ́lɛɛ yí mìà dìè dìè vɔ̀ vũ̀doó súo kɛ nɔ́ kíli a gèe o lɛ̀ɛ, “Kà kpé, kà yà tã́ã̀.” Lɛ́ o yà tã́ã̀a. 3A gèe e ɓɛ́ɛ ye mìà lɛ̀ɛ kélɛ̀, “Nìómì aà nu e mɛ̀ĩ́ aà gó Móà sɛ̀lɛ̀ yí, lɛ́ɛ̀ a naa é kɔá ɓɛ́ɛ ye mì Ìlímílɛ̀ à luúa lɔ̀ɔ̀dɔ. 4Lɛ à mɔ̀ ḿ kɛ ɓá yí dɔ kíli, é kɛ̀a íì weè à mɔ̀ ɓá lɔ́ɔ, ì à lɔ́ gɔ̃ã dìè dìè vɔ̀, ɛ̃́ɛ̃́ míá o lɛ̀ɛ mɔ̀ɔ o nyìã. Kɛɛ é kɛ̀a ɓàá naa à káa à gèe, ɓii ɓi lɛ́ i mi bèĩ zɛ̀ ká à lɔ́ɔ̀ɔ wɛ̃́ĩ̀a. Aà gó i mɔ̀ɔ, ma lɛ.”

Gɔ̃́ɔ̃ a gèe, “Ḿm̀ ló à lɔ́ɔ̀.”

5Lɛ̀ e kɛ kília, Bóà a gèe à lɛ̀ɛ, “Kɛɛ lɛ mɔũ sɛ̀ yé ì lo luúa lɔ́ɔ̀ Nìómì kɛ̀lɛ̀ɛ, lɛ à mɔ̀ í Wúlúfè lɛ́ e Móà gã̀ã lè káa sí le ká nɔ́ kíli. Aà kɛ kília kɛ luúa aà tó mí é gaa à nɔ́ɔ̀ɓé wà pɛ ka.”

6Gɔ̃́ɔ̃ a zɛ nɔ, “Yé lɛ kília, ḿm̀ ló m kɔ̀ ɓoò luúa lɔ̀ é kɛ m̀ pɛ ká wɔ̃̀ yí. Ƃɔ̀-wáá-káa, à yí lɛ́ e kélɛ̀ luúa lɛ̀ɛ́ ló kɛɛ m̀ nɔ́ɔ̀ɓé wà pɛ ka. Ƃi yee ì à lɔ́. Maà m kɔ̀ ɓo à wɔ̃̀ yí.”

7À lúó e kília ká Éézɛ̀lɛ̀ sɛ̀lɛ̀ yía, mí ì pɛ lɔ́ɔ́ dɔ, ɛ̃́ɛ̃́ lɛ́ ì tò kɛ̀lɛɛ̀ pɛ̀ mɛ́ vɔ̀ɔ, íì i gã̀ mɔ̀ bàá doó ɓo i gã̀ mɔ̀ ɓa nɔ mí è lo lɛ̀ e kília lɔ́ɔ̀ɔ lɛ̀ɛ. Zí o kɛ wɔ̃́ sùua yí bɛ̀i pìà à káa lɛ́ ɓɛ.

8Lɛ̀ gɔ̃̀ɔ̃ a gèe Bóà lɛ̀ɛ, a lɔ́, lɛ́ e e gã̀ mɔ̀ bàá doó ɓo e gã̀ mɔ̀ a nɔ Bóà lɛ̀ɛ. 9Lɛ̀ e kɛ kília, Bóà a gèe mia dìè dìè vɔ̀ɔ wà mia séĩ́ lɛ́ o kɛ yía o lɛ̀ɛ, “Ka lɛ́ ka kélá vɔ̀ ká pɛ̃́nɛ̀ɛ kélɛ̀ maà luúa séĩ́ lɔ́ Nìómì kɛ̀lɛ̀ɛ. Lɛ̀ lɛ́ e kɛ Ìlímílɛ̀ wà e gbe nì pèèlɛ lɛ́ o Málɔ̀ũ wà Kílíɔ̃̀ wà lɛ káa ká. 10E daá Wúlúfè lɛ́ e Móà leenɛ̀ ká lɛ́ e Málɔ̀ũ a gã̀ã lè káa aà tó m na ká. Wɔ̃́ e kéa, lɛ́ɛ̀ ló tò kɛ̀lɛɛ pɔɔ̀ lɛ́ e mi aà gaa wà o ɓɛ́ĩ̀ ye mìà káa, lɛ́ɛ̀ ló too o tɔ́ líé teele o pà pɛ̀lɛ̀yi zèe. Ka lɛ́ ka kélá ká pɛ̃́nɛ̀ɛ zèea.”

11Líé sí mìàa wà mia séĩ́ wa gèe, “Èè le, ko lɛ́ kɔáa kélá vɔ̀ káa. Gó Yàwɛ e lúà kpɔ́ ɓà léa mɔ̀ lɛ̀ Wélésɔ̀ wà Líà lɛ́ o nɛ́ gbàà là gbùò zɛ̀ ye Zékɔ̀ lɛ̀ɛ lɛ́ o ɓe. Wa gèe Bóà lɛ̀ɛ gó í kɛ pɛ mì kpã̀nazɛ̀ ká Ífélétà pɛlɛi, ɛ̃́ɛ̃́ í kɛ mi tɔ́ ɓɔɔ̀ɔ zɛ̀ ká Bɛ́féléhɛ̃́ɛ̃̀ pɛlɛi zèe. 12Gó nɔ́ɔ̀ɓé lɛ́ Yàwɛ è lo o nɔɔ̀ i lɛ̀ɛ lee nɛ̀ɛ kɔ̀ yía, ó kɛ kpã̀nazɛ̀ lɛ̀ Pɛ́wɛ̀lɛ̀ lɛ́ Támà a ye Zúdà lɛ̀ɛ, o sùu là lɛ́ ɓe.”

Bóà wà o sùu là mìà

13Lɛ̀ lɛ́ e kɛ kília, Bóà e Wúlúfè sí lee ka. Yàwɛ é lúà kpɔ́ lee nɛ̀ɛ mɔ̀, e e gí sí e gɔ̃ nɛ̀ ye. 14Loà vɔ̀ɔ wa gèe Nìómì lɛ̀ɛ, “Gó Yàwɛ tɔ́ é ɓɔ ɓii aà nɛ́ gɔ̃ zɛ̀ nɔ i lɛ̀ɛ pɛ̃́nɛ̀ɛ kɛ é e zò kɛ i píé. Gó nɛ́ ɓɛ é kɛ mi tɔ́ zɛ̀ ká Éézɛ̀lɛ̀ sɛ̀lɛ̀ yí zèe. 15I gbe naa a lɔ̀kɛ i ká gbùò é dieá bɛ̃̀ɛ̃ gɔ̃ã̀ nɔ̀ɔ̀ salápèèlɛ là. Ɛ̃́ɛ̃́ zéniía, aà nɛ́ gɔ̃ zɛ̀ nɔ i lɛ̀ɛ kɛ é nu kɛ̀ɓe dɛɛ ká i lɛ̀ɛ, kɛ é e zò kɛ i píé ì kòlò lɛ̀ zɛ̀ yi.” 16Nìómì e nɛ́fú dɛɛ kṹ a wɔ̀ e gã̀ là áà e zò kɛ̀ à píé.

17Loà lɛ́ o kɛ Nìómì ɓɛ́ĩ̀ nì káa o nɛ́fúa tɔ́ kpɔ́ Óbɛ̀. Wa gèe mia séĩ́ lɛ̀ɛ kélɛ̀, “Waà gɔ̃ nɛ̀ ye Nìómì lɛ̀ɛ.”

Óbɛ̀ é kília lɛ́ é kɛ́ Zɛsé dàa káa, lɛ́ Zɛsé bɛ̃̀ɛ̃ e kɛ Dèɓé dàa káa.

18Pɛ́wɛ̀lɛ̀ sùu là mìà lɛ́ o kéa: Pɛ́wɛ̀lɛ̀ e kɛ Hɛ́zɔ̀lɔ̀ũ̀ dàa ka, 19Hɛ́zɔ̀lɔ̀ũ̀ bɛ̃̀ɛ̃ e kɛ Wáláũ̀ dàa ka, lɛ Wáláũ̀ bɛ̃̀ɛ̃ e kɛ Àmínídà dàa káa, 20Àmínídà bɛ̃̀ɛ̃ e kɛ Násɔ̃̀ dàa ka, Násɔ̃̀ bɛ̃̀ɛ̃ e kɛ Sámà dàa ka, 21Sámà bɛ̃̀ɛ̃ e kɛ Bóà dàa ka, 22Yelɛ́ Óbɛ̀ e kɛ Zɛsé dàa ka, lɛ́ Zɛsé e kília e kɛ Dèɓé dàa káa.

Избрани в момента:

Wúlúfè 4: MHB

Маркирай стих

Споделяне

Копиране