Sélimɛ 7
7
Nɔwe 'jíin kɔ́rikpuʔɔ nī gè
1A Yewe 'ki juu Nɔwe mɛ́ nɛ́ jo: «Te jíin kɔ́rikpuʔɔ nī gè, muɔ nɛ́ muɔ saʔa wuulo ní bèle, nɛ́ ki cɛ́n muɔ nigbe mi 'nyaa siɛnsinwɛ mi yiʔɛ mɛ́ gè muɔ lɛ̀lɛ siɛnnɛ nī bèle. 2Nyàʔayɛrɛ nɛ́ yajuuro dáà dī cìilide mi yiʔɛ mɛ́ gè#7.2 dáà dī cìilide: Yewe yé fɔ̀li yawiire táà nɛ̄ pe- ti káa; nɛ̀ sí ki yaʔa tàa yé puu baa dàa nɛ̄ wiì yé fɔ̀li dèʔ. Wéli baa Lev 11., ma ti cò nàguɔ nɛ́ cɛliwɛ, ti siin siin tiɛyɛ kɔlisiin; nyàʔayɛrɛ nɛ́ yajuuro dáà ti 'núʔɔ mi yiʔɛ mɛ́ gè, ma ti cò nàguɔ nɛ́ cɛliwɛ; 3nɛ́ míɛni yafinide dáà ti fini naamɛ gè, ma ti cò nàguɔ nɛ́ cɛliwɛ, ti siin siin tiɛyɛ kɔlisiin, kire ga buu ti mìɛni feliye ti‑ kòri sìi nɛ̄ dàala nɛ̄ lè. 4Nɛ́ ki cɛ́n, cɛnyɛ kɔlisiin kàduʔumɛ, m'bé kàsaʔa cáan dàala nɛ̄ lè fúɔ bè taa cɛnyɛ togosiin, cɛnvugo nɛ́ pìlige. Bà m'bé siɛnnɛ nɛ́ yawiire ti mìɛni cúʔɔ bè yige dàala nī lè.» 5Gàa ki mìɛni Yewe cé juu nɛ̀ gbɛ̀ngɛ Nɔwe mɛ́ wè, a wi 'ki mìɛni kpíʔile bɛ̀.
6Nɔwe cé liɛ nɛ̀ yiʔɛlɛ sirataanri taa lɛ̀lɛ líì nī kàsakpiile ni 'tuu dàala nɛ̄ lè.
7A Nɔwe 'jíin kɔ́rikpuʔɔ nī gè, nɛ́ wi cuɔ, nɛ́ wi jaala, nɛ́ wi jaala pe cɛlilɛ ní bèle, bè suɔ kàsakpiile mɛ́ lè. 8Nyàʔayɛrɛ nɛ́ yajuuro dáà dī cìilide nɛ́ dìi ti 'núʔɔ Yewe yiʔɛ mɛ́ gè, nɛ́ yafinide ní dè, nɛ́ yafulolido ní dè, 9a tire ti mìɛni siin siin sɛ́nì jíin kɔ́rikpuʔɔ nī gè Nɔwe ní, nàguɔ nɛ́ cɛliwɛ, nɛ̀ yɛli nɛ́ ki ní gàa Kulocɛliɛ yé juu nɛ̀ gbɛ̀ngɛ Nɔwe mɛ́ wè.
10Cɛnyɛ kɔlisiin kàduʔumɛ gè, a kàsakpiile ni 'tuu nɛ̀ dàala tɔ́n lè. 11Nɔwe sìi yiʔɛlɛ sirataanriwoli nɛ̄ lè, ki yeziinwuʔu ki cɛnyɛ kiɛ nɛ́ kɔlisiinwuʔu nɛ̄ gè, kire cɛngɛ gè a dàala ni 'foli nɛ̀ jabari á lakpuʔɔ sícuugo lawiʔile ke mìɛni 'foli nɛ̀ múgulo, á nyìʔɛnɛ kàliile pe 'foli nɛ̀ múgulo. 12A kàsaala ni 'tuu dàala nɛ̄ lè fúɔ nɛ̀ taa cɛnyɛ togosiin, cɛnvugo nɛ́ pìlige.
13Kire cɛngɛ gáà Yewe 'jo wi‑ jíin kɔ́rikpuʔɔ nī gè, a Nɔwe 'jíin kɔ́rikpuʔɔ nī gè, wire nɛ́ wi cuɔ, nɛ́ wi jaala, Sɛmi nɛ́ Kami nɛ́ Jafɛti, nɛ́ pe cɛlilɛ ní bèle; 14nɛ́ nyàʔayɛrɛ ní dè nɛ̀ yɛli nɛ́ ti feliye ní yè, nɛ́ yajuuro ní dè nɛ̀ yɛli nɛ́ ti feliye ní yè, nɛ́ yafulolido ní dè nɛ̀ yɛli nɛ́ ti feliye ní yè, nɛ́ yafinide ní dè nɛ̀ yɛli nɛ́ ti feliye ní yè. 15Yawiire dáà ti mìɛni dī sìiyɛrɛ dè, a ti mìɛni pɛ́nì jíin Nɔwe kúrugu kɔ́rikpuʔɔ nī gè, siin siin. 16A yawiire ti mìɛni feliye 'jíin, nàguɔ nɛ́ cɛliwɛ, nɛ̀ yɛli nɛ́ dàa ní Kulocɛliɛ cé juu nɛ̀ gbɛ̀ngɛ Nɔwe mɛ́ wè. Kire kàduʔumɛ a Yewe kɔ́riwiile tɔ́n lè Nɔwe nɛ̄.
17A kàsakpiile ni 'tuu dàala nɛ̄ lè nɛ̀ taa cɛnyɛ togosiin. A luʔɔ ki 'nyì nɛ̀ kpàʔala, a kɔ́rikpuʔɔ ki 'yɛ̀ nɛ lali luʔɔ naamɛ gè. 18A luʔɔ ki 'nyì nɛ̀ dàala tɔ́n lè, a kɔ́rikpuʔɔ ki 'kò nɛ nyaari nɛ mári luʔɔ naamɛ gè. 19Luʔɔ ki 'puu nɛ nyìgí nɛ kpàʔalá nɛ waa fúɔ nɛ̀ sɛ́nì nyagurukpaʔaliyɛ yi mìɛni tɔ́n duniya nī wè. 20A luʔɔ ki 'nyì nɛ̀ taʔa nɛ̀ nyagurukpaʔaliyɛ yi mìɛni tɔ́n kabuunyiʔɛnɛ kiɛ nɛ́ kogunɔ. 21Yɛlɛ ó yɛlɛ ni 'puu sìi nɛ̄ níɛ fíigi wè, a ti mìɛni sìi wi 'kúɔʔ, kire 'jo: yafinide ti mìɛni yo, nyàʔayɛrɛ ti mìɛni yo, yajuuro ti mìɛni yo, yafulolido ti mìɛni yo, nɛ́ siɛnnɛ pe mìɛni ní. 22Yɛlɛ ó yɛlɛ ni 'puu nɛ ŋɔ́gi ni fínawiʔile nī gèle, a ti mìɛni 'kùu, kire 'jo dàa tiì yé puu luɔrɔ nī dèʔ#7.22 Eburu siɛnrɛ nī dè, ki 'jo náʔa gè: dàa ti 'puu tiɛwaaya nɛ̄ yè, nɛ̀ ki yaʔa nyaʔafolido nī dè, kiǐ gbɛ̀ juu kire feligeʔ, a we sí jo: dàa tiì yé puu luɔrɔ nī dèʔ..
23Bà ki 'kpíʔile sìiyɛrɛ dáà ti mìɛni ti 'puu dàala nɛ̄ lè, a ti mìɛni 'cúʔɔ nɛ̀ kúɔ péwu, kire 'jo: siɛnnɛ bèle, nɛ́ nyàʔayɛrɛ dè, nɛ́ yajuuro dè, nɛ́ yafulolido dè, nɛ́ yafinide dè, fúɔ Nɔwe wire wi yé kò sìi nɛ̄ nɛ́ siɛnnɛ bálì pe yé puu nɛ́ wi ní wè, nɛ́ yawiire ní dè.
24A luʔɔ ki 'nyì nɛ̀ dàala tɔ́n lè nɛ̀ mɔgɔ fúɔ cɛnyɛ tekɔlisiin nɛ́ kpɔrigɔ (150).
Избрани в момента:
Sélimɛ 7: sev
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© (Active), Wycliffe Bible Translators, Inc. All rights reserved.