मत्ती 10
10
भेजेड़ा बारा चेला
(मरकुस 3:13–19; लूका 6:12–16)
1ईसु आपका बारा चेलानै आपकै कनै बुलार बानै सूगली ओपरी बलायानै काडबा की अर रोगलानै निरोगो करबा अर कमजोरीनै दूर करबा को अधिकार दिओ। 2बा बारानै भेजेड़ा चेला खेर बुलायो जाका नाम अंय्यां ह: सऊँ पेल्या तो समोन जिनै पतरस बी खेवै ह बिको भाईड़ो अंदरिआस, जब्दि को बेटो याकूब अर बिको भाईड़ो यहून्ना, 3फलिपूस, बरतुल्मै, थोमा, चुंगी लेबाळो मत्ती, हलफई को बेटो याकूब अर तद्दे, 4देस भगत समोन, अर यहूदा इस्करोती ओ बोई ह जखो ईसुनै धोकाऊँ पकड़ायो हो।
चेलानै अधिकार देबो
(मरकुस 6:7–13; लूका 9:1–6)
5ईसु बा बारानै ओ अधिकार दिओ अर हुकम देर भेज्यो: “गैर-यहूदि मिनखा की नगरी म मना जायो अर नइ सामरी नगरी म जायो। 6पण इजरायल का मिनखा क कनैई जायो जखा गुमेड़ी लल्ड्या की जंय्यां ह। 7अर बाकन जाओ अर हेलो पाड़ो क ‘ईस्बर नगरी को राज सांकड़ै आगो ह’ 8अर रोगलानै निरोगा करो, मरेड़ानै जीवाओ, कोढ्या का कोढनै धोवो अर ओपरी बलायानै भगाओ। जंय्यां थानै सितमित म मिल्यो ह थे बी सितमित म द्यो। 9थे नइ तो सोनो-चाँदी ल्यो नइ तामा का सीक्का अर नइ बटूओ लिज्यो। 10#1 कुरन्थी 9:14; 1 तिमू 5:18अर नइ गेला ताँई झोळो नइ कुर्तो, नइ चपल नइ हात म लाठी लिज्यो, क्युं क ध्यानग्यानै रोट्या को तो हक होवैई ह। 11थे जद बी कोई नगरी नहिस गाँव म जाओ जणा पेल्या बेरो करज्यो क बठै गत को मिनख कूण ह। अर जद ताँई थे बठैऊँ नइ जाओ बाकै सागैई रेहज्यो। 12जि घर की थळी प पग धरो जणा बि घर का मिनखानै आसिरबाद दिज्यो। 13ज बि घर का मिनखा म एक जणो बी आसिरबाद क जोगो होसी जणा थारो आसिरबाद बिकै लागसी। नहिस तो थारो आसिरबाद ओज्यु थारै कनै आज्यासी। 14#काम 13:51अर ज कोई थारो मान कोनी करै अर नइ थारी बाता सुणै जणा थे बि घर अर बि नगरीऊँ बारनै आर थारी पगा की धूळ झाड़ दिज्यो। अंय्यां कर थे बानै आ चेता दिज्यो क परमेसर बानै सजा देसी क्युं क बे बिकी बात कोनी सुणी। 15#मत्त 11:24#लूक 10:4–12म थारूँ सची खेऊँ हूँ जद न्याय होसी, बि दिन बि नगरी की दसा सदोम अर अमोरा नगरीऊँ बी बेकार होसी।
भेजेड़ा चेलानै ईसु चेतायो
(मरकुस 13:9–13; लूका 21:12–17)
16 #
लूक 10:3
“सुणो म थानै ल्याळ्या क मांयनै लल्ड्या की जंय्यां भेजर्यो हूँ। इ ताँई थे साँप जंय्यां चलाक अर कबूतर की जंय्यां भोळा रेहज्यो। 17#मर 13:9–11; लूक 12:11,12; 21:12–15अर थे मिनखाऊँ हुस्यार रेहज्यो क्युं क बे थानै पकड़र पंचा क हाता सूप देसी अर बे थानै अरदास करबाळी झघा लेज्यार बेत पड़वासी। 18थे मेरै बारां म सीख द्यो हो इ बजेऊँ थानै राजा अर अधिकार्या क सामै लेज्यायो जासी, पण थानै बि टेम यहूदि अर गैर-यहूदि मिनखा म मनै साबित करबा को मोको मिलसी। 19जद बे थानै पकड़सी जणा थे आ चिंत्या मना करज्यो क थानै इब काँई खेणो ह क्युं क बि घड़ी पबितर आत्मा थानै बतासी काँई खेणो ह। 20क्युं क बोलबाळा थे कोनी पण थारा परम-पिता की पबितर आत्मा थारै मऊँ होर बोलसी। 21#मर 13:12; लूक 21:16सागे भाई-भाण भाई-भाणानै पकड़ा'र मरवासी, माँ-बाप टाबरानै मरवासी अर टाबर माँ-बापा क सामै होर बानै मरवा गेरसी। 22#मत्त 24:9; मर 13:13; लूक 21:17; मत्त 24:13; मर 13:13मेरा नाम की बजेऊँ लोग थारूँ नफरत करसी पण जखो मिनख आपकी अंतघड़ी ताँई सक्यु सेह्सी बोई बचायो ज्यासी। 23बे थानै थारी एक नगरी म सतावै जणा थे दुसरी नगरी म भागजाज्यो। अर म थारूँ सची खेऊँ हूँ इजरायल देस की सगळी नगर्या म थारै घूमबाऊँ पेलीई मिनख को बेटो आज्यासी। 24#लूक 6:40; यह 13:16; 15:20क्युं क चेलो गरूऊँ बडो कोनी होवै अर नइ दास आपका मालिकऊँ बडो होवै ह। 25#मत्त 9:34; 12:24; मर 3:22; लूक 11:15इ ताँई चेलानै गरूजी क बराबर होबा म अर दासनै मालिक क बराबर होबा मई सबर राखबो चाए। अर जद बे मिनख घर का मालिकनैई बालजबुल खेवै ह जणा बिका घर का मिनखा क सागै तो ओर बी बुरो सलुक करसी!
मिनखाऊँ मना डरो पण परमेसरऊँ डरो
(लूका 12:2–7)
26 #
मर 4:22; लूक 8:17 “इ ताँई थे बा मिनखाऊँ मना डरो, क्युं क जोक्यु बी लुखेड़ो ह बिनै परमेसर चोड़ामै ल्यासी अर जखो बी ओला म ह बिनै सामै ल्यासी। 27इ ताँई म जोक्यु बी थानै अँधेरा म बोल्यो हूँ थे बिनै दिन का च्यानणा म जोरऊँ बोलो अर जखी बाता म थानै ओला म खेऊँ हूँ बाको थे कोठा प चढर हेलो पाड़ो।” 28“थे बा मिनखाऊँ मना डरो जखा थारी कायानै नास कर सकीं हीं पण थारी आत्मानै नास कोनी कर सकीं। पण परमेसरऊँ डरो जखो थारी आत्मा अर काया दोन्यानै नरक म गेर'र नास कर सकै ह। 29क्युं क एक डबली हाळा सीक्का की दो चिड़कल्या कोनी बिकै के? पण बामैऊँ एक बी धरती प मरै ह जणा बाकै बारां म थारा परम-पितानै बेरो होवै ह। 30अठै ताँई क परमेसर थारै सीर का एक-एक बाळ बी गिण राख्या ह। 31इ ताँई डरो मना क्युं क परमेसर की नजर्या म थारो मोल तो चिड़कल्याऊँ बी बोळो ह।
मिनखा क सामै ईसुनै मानबो
(लूका 12:8,9)
32“जखो बी मिनख लोगा क सामै मनै मान लेसी जणा म बी ईस्बर नगरी म रेह्बाळा परम-पिता क सामै बानै मानस्युं। 33#2 तिमू 2:12पण जखो बी मिनख मनै लोगा क सामै कोनी मानसी जणा म बी ईस्बर नगरी म रेह्बाळा परम-पिता क सामै बिनै कोनी मानस्युं।
ईसु क जोगो कूण
(लूका 12:51–53; 14:26,27)
34“थे अंय्यां मना सोचो क म धरती प मिनखा को सुळजेटो कराबा आयो हूँ पण म तो बानै लड़ाबा आया हूँ#10:34 म तो बानै लड़ाबा आया हूँ क्युंक मेरो बिस्वास करसी क्युंक कोनी करसी।। 35म ओ करबा आयो हूँ क बेटो बाप क खिलाप, बेटी माँ क खिलाप अर भू सासू क खिलाप होवै। 36मिनख का बेरी बिका घरकाई होसी।” 37“जखो बी मिनख मेरूँ बेत्ती आपका माँ-बापानै नहिस आपका बाळबच्चानै परेम करै बो मेरै जोगो कोनी।” 38#मत्त 16:24; मर 8:34; लूक 9:23अर जखो बी मेरै ताँई दुख दरद सेह्बा ताँई अर मरबानै त्यार कोनी बो मेरो चेलो होबा जोगो कोनी। 39#मत्त 16:25; मर 8:35; लूक 9:24; 17:33; यह 12:25“जखो बी आपका पिराण बचावै ह बो बिकी हानी उठावै ह, अर जखो बी मेरी बजेऊँ आपका पिराण देवै ह बो बिनै पासी।
फळ
(मरकुस 9:41)
40 #
लूक 10:16; यह 13:20;
मर 9:37; लूक 9:48 “जखो बी थारो मान करै ह, बो मेरो बी मान करै ह; अर जखो मेरो मान करै ह बो मनै अधिकार क सागै भेजबाळा परमेसर को बी मान करै ह। 41जखो बी परमेसर की खेबाळा को आ जा'णर मान करै ह की बो परमेसर की खेबाळो ह बिनै बोई फळ मिलसी जखो परमेसर की खेबाळानै मिलै ह। अर जखो बी धरमी मिनख को आ सोचर मान करै ह क बो धरमी मिनख ह जणा बिनै बी बोई फळ मिलसी जखो धरमी मिनखनै मिलणो चाए। 42अर म थानै सची खेऊँ हूँ ज कोई आ छोटा मऊँ एकनै बी मेरो चेलो जा'णर एक गिलास पाणी प्यावै, बिनै बिको फळ मिलसी।”
Избрани в момента:
मत्ती 10: एस डब्लु वी
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
(c) 2010-2017, New Life Computer Institute. All rights reserved