Matiye 12
12
Ci vun wa fəta pemâya
(Mak 2.23-28; Luk 6.1-5)
1Kəki rum kî, Zezu pâ vari du sine kə fəta pemây sôwâ Zuwif. Mê' ti sum ta zə rum, ɓay handay təŋ kə kəy alkamari ɓay cwa. 2Kəri məni kul sôwâ Zuwif mə ɗe kə Farisiyen we ndəna', handay la' ne kə Zezu: «A kar ri'i! Sum ta zə ru wə gi kwa məni dan dlay mba cu ne vari gi rum kə fəta pemây mi!» 3Zezu ɗam vun ndaya: «Hi cu in dan kwa məni David gi kəri məni mum kə sôwâ um kə mê' nə mə su#1Sa 21.1-7? 4Mum ze ta rawti so Ifray, ɓay mum kə sôwâ um ti kuni duwa' məni njay kor Ifraya. Ama dan dlay mba cu ne vari ne nday kədan handay ti duwa' rum mi, say sum po' fur tawa. 5Ko hi cu in dan məni wây' wə du ɗerwa dan dlay Moyizə məni in i kə fəta pemây sum po' fur məni wə gi sin rawti so po' fur sôwâ Zuwif cu ta zə dan dlay fəta pemây mi, ama handay cu kə dan wa nday mi nə su#Irs 28.9-10? 6Ama na in mi ne: Kwa mə toŋ məni pâ so po' fur sôwâ Zuwif kəta' wə tira! 7Hi la' mun zu dan mə du Ɗerwa Ifray mə ni nə si: Na cu kə mê' kwa po' fur mi, say we ca. Hi cu gak ge dan mə bro' wa sôwâ məni cu gi kwa mə bro' mi mi. 8Zə Vay sumra' nə Bârî fəta pemâya.»
Swə mə mar ɓa mara
(Mak 3.1-6; Luk 6.6-11)
9Zezu 'ya ar ri rum, ɓay mum ze ta rawti so Ifray sôwâ Zuwif. 10Swə məsin kəta' wə han, ɓa rum mə mara. Sôwâ məni gay' wə han wa' kədan handay tum sem Zezu wa kwa məni mum wə gi. Zə rum, handay ci vun rumu: «Dan dlay mba ne vari ne mba kədan mə car gaɓ kə fəta pemây su?» 11Zezu ɗam vun ndaya: «Swə ɗaw du ri la' kə cime ɗaw, ɓay cime rum nde ta zra kə fəta pemây si, bə rum cu də um tle mbə rəka mə su? 12Ɓay sumra' kə mbra' pâ cime! La' ndəna' si, dan dlay mba ne vari gi kwa mə ɓay hay' swə kə fəta pemâya.» 13Zə rum, Zezu la' ne kə swə na: «A tle ɓa ru.» Mum tle ɓa, ɓay ɓa rum faŋ ɓay ce' ndə mə ga' məsini. 14Kul sôwâ Zuwif mə ɗe kə Farisiyen 'ya ta ɓawa kədan handay keɓ vari ci Zezu.
Bə sin məni Ifray para
15Kəri məni Zezu mun dan rum, mum 'ya ar ri rum, ɓay sôwâ raw ta zə rumu. Mum car sum gaɓ daŋ'ŋ. 16Ama mum dlay nday kə gbəgboŋ kədan kuni in dan wa rum ne kə swə ɗaw mi. 17Mum gi ndəna' kədan nyen mbi dan məni bə ka' dan mə ɗe kə Esaya ini:
18«Bə sin man məni na par nə ni na.
Na bə num, ɓay na tuk kəɗam kə rumu.
Na də cin Simbeɗ man wa rum,
ɓay mum də ka' dan wa dan ɓok man ne kə sôwâ nya məsini.
19Mum cu də dle vun kə swə ɗaw mi,
ɓay mum cu də ka' dan mi.
Sôwâ cu də mun wor um wə vari mbok so mi.
20Mum cu də haɓ hom mə gəgan mi,
ɓay mum cu də ci ku baŋgay məni cu ɗeri njeŋ mi nə mi.
Mum də gi ndəna' hâ mum də gi njeŋ ke wə ri daŋ'ŋ.
21Ɓay sôwâ nya məsin daŋ' də njay vunduk nday wa semɗe rumu.»
Zezu ɓay Belzebul
(Mak 3.22-30; Luk 11.14-23)
22Kəri rum, sôwâ mbə hay' Zezu kə swə məsini. Mum kə gam, mum dəŋâr ɓay ndum ta'a. Zezu car swə nə, ɓay mum dle kə ge dan ɓay weri. 23Kwa rum jin' wa ne kə raw sôwâ daŋ', ɓay handay ci vunu: «Mum cu Vay David mi su?» 24Ama kəri məni kul sôwâ Zuwif mə ɗe kə Farisiyen mun dan nday, handay ini: «Swə məni nə wə 'way gam wa sôwâ kə gbəgboŋ Belzebul, jwə gam kuna!» 25Ama Zezu we dan ɗik ndaya. Zə rum, mum la' ne ndaya: «Nya daŋ' məni jwə nya rum car zi mbok nji, nya rum də ɗənoko. So daŋ' ko cava daŋ' məni sum rum car zi mbok nji cu gak suk mi. 26Satan la' 'way Satan si, ka mum car wa kə tu rum, ɓay gbəgboŋ um gak suk mə ma su? 27Hi in i na wə 'way gam wa sôwâ kə gbəgboŋ Belzebul ne gbəgboŋ ne nan kədan na nday 'way, la' ndəna' si, sa nə ne gbəgboŋ ne kə sum ta zə ri kədan handay 'way gam wa sôwâ su? Sum ta zə ri kə tu nday ta' i hi vi' vari si!» 28Zawa, na wə 'way gam wa sôwâ kə Simbeɗ Ifray məni wə ta' i ri məni Ifray wə də suk jwə wa ri nə mbə day həre' kə ri si.
29Swə cu gak ze rawti so bə gbəgboŋ kədan mum kəy hura kwa so um mi, say ka mum kaw num ɓay baŋ num cop si. Ɓay kəri məni mum baŋ num, mum gak ra' kwa so um daŋ'ŋ. 30Swə məni cu kə rin mi, bə rum sî nan, ɓay swə məni cu kaw ɓa rin kə keɓ sôwâ mi, bə rum wə nday 'waya.
31«Zə rum, na in mi ne, Ifray də vrum kwa mə bro' daŋ' məni sôwâ wə gi kə dan mə bro' daŋ' məni handay wə ge, ama Ifray cu də vrum dan mə bro' məni swə wə ge wa Simbeɗ Ifray nə mi. 32Ifray də vrum dan mə bro' məni swə wə ge wa Vay sumra', ama Ifray cu də vrum dan mə bro' məni swə wə ge wa Simbeɗ um mə Kəleŋ nə mi, ko mgbaŋ ni nə, ko kə ri məni wə də mba.»
Gu kə vra' umu
(Luk 6.43-45)
33«Gu mə ɓay wə vra' vra' mə ɓay, ɓay gu mə bro' wə vra' vra' mə bro' ta'a. Zə sôwâ wə we gu zə vra' umu. 34Hi zep kay'i! Hi gak in dan mə ɓay kəri məni hi bro' mə ma su? Zə vun wə ge dan məni vunduk nyen peɗ kə ndi. 35Ndak mə ɓay wə pâ mbə ɓa wə vunduk swə. pâ mbə vunduk swə mə bro'o. Ndak mə bro' wə pâ mbə vunduk swə mə bro'o. 36Na in mi ne: Kə bəka dan ɓok, sôwâ də in zu dan mə uray daŋ' məni handay ini. 37Zə Ifray də ɓok dan wa ru zə dan ge vun ru. Ha də ke njeŋ zə dan ge vun ru, ko ha də ke kə dan wa ru zə dan ge vun ru.»
Sôwâ ci vun yewe
(Mat 16.1-4; Mak 8.11-12; Luk 11.29-32)
38Kəri rum, sôwâ məsin wə du sum pay zu dan dlay kə sôwâ məsin wə du kul sôwâ Zuwif mə ɗe kə Farisiyen la' ne kə Zezu: «Bə ta' kwa, namba wa' i a gi yew ne mba kədan namba kara.» 39Zezu ɗam vun nday kə dan mə ni na: «Sôwâ mə tam, məni bro' ɓay cu ne wəlok Ifray mi, handay ci vun yew, ama Ifray cu də gi yew nday ne mi, say yew məni mum gi kə bə ka' dan mə ɗe kə Zonas. 40Zə ce' ndə Zonas gi bəka hinji' kə dukri hinji' wə rawti keve mə toŋ, ndəna' ta', Vay sumra' də gi bəka hinji' kə dukri hinji' wə zə nya. 41Kə bəka dan ɓok, sôwâ so Ninivə də car kor sôwâ mə tam, ɓay handay də tum sem nday, zə sôwâ mə so Ninivə faŋ vunduk nday kəri məni handay mun dan ka' Zonas. Ɓay kwa mə pâ Zonas kə toŋ kəta' wə tira! 42Kə bəka dan ɓok, ma məti suk jwə wə nya mə ga' zu də car kor sôwâ mə tam, ɓay ta də ɓok dan wa nday, zə ta car mbə nya mə seŋ kədan ta mun dan Salomoŋ məni nyen peɗ kə gwete. Ɓay kwa mə pâ Salomoŋ kə toŋ kəta' wə tira!»
Gam faŋ gewa mbə wa swa
(Luk 11.24-26)
43«Kəri məni gam pâ mbə wa swə, mum də gaŋ wə du igop kədan mum keɓ ri pemây, ama mum cu za' mi. 44Zə rum, mum in wə vunduk rumu: Na faŋ də so man məni na 'ya ara. Mum faŋ gewa mbə han, ɓay mum za' so rum uray, ɓa ɓay gila' ɓaya. 45Zə rum, mum 'ya ta ɗe gam məsin seɗa' məni pâ num kə bro' si, ɓay handay mbə cok gay' wə so rumu. Ndəna', suk bə rum faŋ bro' pâ mə vun kofo nə si. Ɓay kwa rum də ke ndəna' zə sôwâ mə bro' mə tam ta'a.»
Ya Zezu kə daw ya umu
(Mak 3.31-35; Luk 8.19-21)
46Kəri məni Zezu wə in dan ne kə raw sôwâ ɓo, ya um kə daw ya um mbə day kuna. Handay mbə gay' rəka, ɓay handay keɓ kədan handay ge dan kə rumu. [47Swə məsin la' ne kə Zezu: «A kar ri'i! Ya wû kə daw ya wû gay' kuni rəka, ɓay handay wa' ge dan kə ru.#12.47 Ri ɗerwa rum cu wə du ɗerwa məni wây' cem cem məsin kuni mi.»] 48Zezu ɗam vun rumu: «Sa nə ya man su? Sa kuni daw ya man su?» 49Mum faŋ ta' ɓa ta wa sum ta zə rum, ɓay ini: «I kar ri'i! Ya man kə daw ya man kuni ni na! 50Zə swə məni wə gi kwa məni Ba man mə wafray wə wa', bə rum nə njər rin, kə njar rin, ɓay ya mana.»
Избрани в момента:
Matiye 12: KMN
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Le Nouveau Testament et Psaumes en Peve © Alliance Biblique du Tchad, 2014.
Matiye 12
12
Ci vun wa fəta pemâya
(Mak 2.23-28; Luk 6.1-5)
1Kəki rum kî, Zezu pâ vari du sine kə fəta pemây sôwâ Zuwif. Mê' ti sum ta zə rum, ɓay handay təŋ kə kəy alkamari ɓay cwa. 2Kəri məni kul sôwâ Zuwif mə ɗe kə Farisiyen we ndəna', handay la' ne kə Zezu: «A kar ri'i! Sum ta zə ru wə gi kwa məni dan dlay mba cu ne vari gi rum kə fəta pemây mi!» 3Zezu ɗam vun ndaya: «Hi cu in dan kwa məni David gi kəri məni mum kə sôwâ um kə mê' nə mə su#1Sa 21.1-7? 4Mum ze ta rawti so Ifray, ɓay mum kə sôwâ um ti kuni duwa' məni njay kor Ifraya. Ama dan dlay mba cu ne vari ne nday kədan handay ti duwa' rum mi, say sum po' fur tawa. 5Ko hi cu in dan məni wây' wə du ɗerwa dan dlay Moyizə məni in i kə fəta pemây sum po' fur məni wə gi sin rawti so po' fur sôwâ Zuwif cu ta zə dan dlay fəta pemây mi, ama handay cu kə dan wa nday mi nə su#Irs 28.9-10? 6Ama na in mi ne: Kwa mə toŋ məni pâ so po' fur sôwâ Zuwif kəta' wə tira! 7Hi la' mun zu dan mə du Ɗerwa Ifray mə ni nə si: Na cu kə mê' kwa po' fur mi, say we ca. Hi cu gak ge dan mə bro' wa sôwâ məni cu gi kwa mə bro' mi mi. 8Zə Vay sumra' nə Bârî fəta pemâya.»
Swə mə mar ɓa mara
(Mak 3.1-6; Luk 6.6-11)
9Zezu 'ya ar ri rum, ɓay mum ze ta rawti so Ifray sôwâ Zuwif. 10Swə məsin kəta' wə han, ɓa rum mə mara. Sôwâ məni gay' wə han wa' kədan handay tum sem Zezu wa kwa məni mum wə gi. Zə rum, handay ci vun rumu: «Dan dlay mba ne vari ne mba kədan mə car gaɓ kə fəta pemây su?» 11Zezu ɗam vun ndaya: «Swə ɗaw du ri la' kə cime ɗaw, ɓay cime rum nde ta zra kə fəta pemây si, bə rum cu də um tle mbə rəka mə su? 12Ɓay sumra' kə mbra' pâ cime! La' ndəna' si, dan dlay mba ne vari gi kwa mə ɓay hay' swə kə fəta pemâya.» 13Zə rum, Zezu la' ne kə swə na: «A tle ɓa ru.» Mum tle ɓa, ɓay ɓa rum faŋ ɓay ce' ndə mə ga' məsini. 14Kul sôwâ Zuwif mə ɗe kə Farisiyen 'ya ta ɓawa kədan handay keɓ vari ci Zezu.
Bə sin məni Ifray para
15Kəri məni Zezu mun dan rum, mum 'ya ar ri rum, ɓay sôwâ raw ta zə rumu. Mum car sum gaɓ daŋ'ŋ. 16Ama mum dlay nday kə gbəgboŋ kədan kuni in dan wa rum ne kə swə ɗaw mi. 17Mum gi ndəna' kədan nyen mbi dan məni bə ka' dan mə ɗe kə Esaya ini:
18«Bə sin man məni na par nə ni na.
Na bə num, ɓay na tuk kəɗam kə rumu.
Na də cin Simbeɗ man wa rum,
ɓay mum də ka' dan wa dan ɓok man ne kə sôwâ nya məsini.
19Mum cu də dle vun kə swə ɗaw mi,
ɓay mum cu də ka' dan mi.
Sôwâ cu də mun wor um wə vari mbok so mi.
20Mum cu də haɓ hom mə gəgan mi,
ɓay mum cu də ci ku baŋgay məni cu ɗeri njeŋ mi nə mi.
Mum də gi ndəna' hâ mum də gi njeŋ ke wə ri daŋ'ŋ.
21Ɓay sôwâ nya məsin daŋ' də njay vunduk nday wa semɗe rumu.»
Zezu ɓay Belzebul
(Mak 3.22-30; Luk 11.14-23)
22Kəri rum, sôwâ mbə hay' Zezu kə swə məsini. Mum kə gam, mum dəŋâr ɓay ndum ta'a. Zezu car swə nə, ɓay mum dle kə ge dan ɓay weri. 23Kwa rum jin' wa ne kə raw sôwâ daŋ', ɓay handay ci vunu: «Mum cu Vay David mi su?» 24Ama kəri məni kul sôwâ Zuwif mə ɗe kə Farisiyen mun dan nday, handay ini: «Swə məni nə wə 'way gam wa sôwâ kə gbəgboŋ Belzebul, jwə gam kuna!» 25Ama Zezu we dan ɗik ndaya. Zə rum, mum la' ne ndaya: «Nya daŋ' məni jwə nya rum car zi mbok nji, nya rum də ɗənoko. So daŋ' ko cava daŋ' məni sum rum car zi mbok nji cu gak suk mi. 26Satan la' 'way Satan si, ka mum car wa kə tu rum, ɓay gbəgboŋ um gak suk mə ma su? 27Hi in i na wə 'way gam wa sôwâ kə gbəgboŋ Belzebul ne gbəgboŋ ne nan kədan na nday 'way, la' ndəna' si, sa nə ne gbəgboŋ ne kə sum ta zə ri kədan handay 'way gam wa sôwâ su? Sum ta zə ri kə tu nday ta' i hi vi' vari si!» 28Zawa, na wə 'way gam wa sôwâ kə Simbeɗ Ifray məni wə ta' i ri məni Ifray wə də suk jwə wa ri nə mbə day həre' kə ri si.
29Swə cu gak ze rawti so bə gbəgboŋ kədan mum kəy hura kwa so um mi, say ka mum kaw num ɓay baŋ num cop si. Ɓay kəri məni mum baŋ num, mum gak ra' kwa so um daŋ'ŋ. 30Swə məni cu kə rin mi, bə rum sî nan, ɓay swə məni cu kaw ɓa rin kə keɓ sôwâ mi, bə rum wə nday 'waya.
31«Zə rum, na in mi ne, Ifray də vrum kwa mə bro' daŋ' məni sôwâ wə gi kə dan mə bro' daŋ' məni handay wə ge, ama Ifray cu də vrum dan mə bro' məni swə wə ge wa Simbeɗ Ifray nə mi. 32Ifray də vrum dan mə bro' məni swə wə ge wa Vay sumra', ama Ifray cu də vrum dan mə bro' məni swə wə ge wa Simbeɗ um mə Kəleŋ nə mi, ko mgbaŋ ni nə, ko kə ri məni wə də mba.»
Gu kə vra' umu
(Luk 6.43-45)
33«Gu mə ɓay wə vra' vra' mə ɓay, ɓay gu mə bro' wə vra' vra' mə bro' ta'a. Zə sôwâ wə we gu zə vra' umu. 34Hi zep kay'i! Hi gak in dan mə ɓay kəri məni hi bro' mə ma su? Zə vun wə ge dan məni vunduk nyen peɗ kə ndi. 35Ndak mə ɓay wə pâ mbə ɓa wə vunduk swə. pâ mbə vunduk swə mə bro'o. Ndak mə bro' wə pâ mbə vunduk swə mə bro'o. 36Na in mi ne: Kə bəka dan ɓok, sôwâ də in zu dan mə uray daŋ' məni handay ini. 37Zə Ifray də ɓok dan wa ru zə dan ge vun ru. Ha də ke njeŋ zə dan ge vun ru, ko ha də ke kə dan wa ru zə dan ge vun ru.»
Sôwâ ci vun yewe
(Mat 16.1-4; Mak 8.11-12; Luk 11.29-32)
38Kəri rum, sôwâ məsin wə du sum pay zu dan dlay kə sôwâ məsin wə du kul sôwâ Zuwif mə ɗe kə Farisiyen la' ne kə Zezu: «Bə ta' kwa, namba wa' i a gi yew ne mba kədan namba kara.» 39Zezu ɗam vun nday kə dan mə ni na: «Sôwâ mə tam, məni bro' ɓay cu ne wəlok Ifray mi, handay ci vun yew, ama Ifray cu də gi yew nday ne mi, say yew məni mum gi kə bə ka' dan mə ɗe kə Zonas. 40Zə ce' ndə Zonas gi bəka hinji' kə dukri hinji' wə rawti keve mə toŋ, ndəna' ta', Vay sumra' də gi bəka hinji' kə dukri hinji' wə zə nya. 41Kə bəka dan ɓok, sôwâ so Ninivə də car kor sôwâ mə tam, ɓay handay də tum sem nday, zə sôwâ mə so Ninivə faŋ vunduk nday kəri məni handay mun dan ka' Zonas. Ɓay kwa mə pâ Zonas kə toŋ kəta' wə tira! 42Kə bəka dan ɓok, ma məti suk jwə wə nya mə ga' zu də car kor sôwâ mə tam, ɓay ta də ɓok dan wa nday, zə ta car mbə nya mə seŋ kədan ta mun dan Salomoŋ məni nyen peɗ kə gwete. Ɓay kwa mə pâ Salomoŋ kə toŋ kəta' wə tira!»
Gam faŋ gewa mbə wa swa
(Luk 11.24-26)
43«Kəri məni gam pâ mbə wa swə, mum də gaŋ wə du igop kədan mum keɓ ri pemây, ama mum cu za' mi. 44Zə rum, mum in wə vunduk rumu: Na faŋ də so man məni na 'ya ara. Mum faŋ gewa mbə han, ɓay mum za' so rum uray, ɓa ɓay gila' ɓaya. 45Zə rum, mum 'ya ta ɗe gam məsin seɗa' məni pâ num kə bro' si, ɓay handay mbə cok gay' wə so rumu. Ndəna', suk bə rum faŋ bro' pâ mə vun kofo nə si. Ɓay kwa rum də ke ndəna' zə sôwâ mə bro' mə tam ta'a.»
Ya Zezu kə daw ya umu
(Mak 3.31-35; Luk 8.19-21)
46Kəri məni Zezu wə in dan ne kə raw sôwâ ɓo, ya um kə daw ya um mbə day kuna. Handay mbə gay' rəka, ɓay handay keɓ kədan handay ge dan kə rumu. [47Swə məsin la' ne kə Zezu: «A kar ri'i! Ya wû kə daw ya wû gay' kuni rəka, ɓay handay wa' ge dan kə ru.#12.47 Ri ɗerwa rum cu wə du ɗerwa məni wây' cem cem məsin kuni mi.»] 48Zezu ɗam vun rumu: «Sa nə ya man su? Sa kuni daw ya man su?» 49Mum faŋ ta' ɓa ta wa sum ta zə rum, ɓay ini: «I kar ri'i! Ya man kə daw ya man kuni ni na! 50Zə swə məni wə gi kwa məni Ba man mə wafray wə wa', bə rum nə njər rin, kə njar rin, ɓay ya mana.»
Избрани в момента:
:
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Le Nouveau Testament et Psaumes en Peve © Alliance Biblique du Tchad, 2014.