Matiye 21
21
Zezu ze ta so Jeruzalem
(Mak 11.1-11; Luk 19.28-40; Zaŋ 12.12-16)
1Kəri məni handay ta həre' kə so Jeruzalem, handay day so Betfage, məni wə wa i igway' məni gu olivə wə han juku. Zezu sin sôwâ hoɓ du sum ta zə rum ta kofo. 2Mum la' ne ndaya: «I də so mə nay' kor ri. Kəri məni hi də day wə han, hi də za' ya kor kə vay sə jew wə hana. I ulay' nday mbə ne nan kə ndi. 3Swə la' ci vun ri si, i ɗam vun rumu: Bârî wə wa' rumu. Ɓay bə rum də nday ar mi ne kəri rum sara.»
4Kwa rum gi ndəna' kədan nyen mbi dan məni bə ka' dan ini:
5I in ne kə so Siyoŋ:
Əŋ kar ri'i! Jwə maŋ wə mbə hay' riŋi!
Mum swə mə 'yeŋ, ɓay mum ur wa vay ya kor rumu#Zak 9.9.
6Zə rum, sum ta zə Zezu 'ya dle ɓay gi kwa məni mum in ne ndaya. 7Handay mbə kə ya kor kə vay sa. Handay dluɓ mbraw nday ta ki nday, ɓay Zezu ur suk hana. 8Sôwâ raw dle tu si dluɓ mbraw nday vari. Sôwâ məsin tum tlap gu ɓay dluɓ wə vari ta'a. 9Raw sôwâ məni wə ta kor Zezu kə sôwâ məni wə ta zə rum do dan kuna: «Mbra' hay' Vay David! Ifray nə kuswa' swə məni mbə kə semɗe Bârî! Mbra' hay' Ifray mə wafraya#Nye 118.25-26!»
10Kəri məni Zezu ze ta so Jeruzalem, sôwâ so rum daŋ' wur kə do dana. Handay ci vunu: «Sa nə swə məni nə su?» 11Raw sôwâ ɗam vun ndaya: «Mum nə bə ka' dan mə ɗe kə Zezu məni car mbə so Nazaret nya Galile.»
Zezu wə rawti so po' fur sôwâ Zuwif
(Mak 11.15-19; Luk 19.45-48; Zaŋ 2.13-16)
12Zezu ze ta rawti so po' fur sôwâ Zuwif, ɓay mum 'way sôwâ məni wə gi coɓ kwa kə sôwâ məni wə coɓ kwa wə rawti so rumu. Mum faŋ i tablə sôwâ mə gi sam səlay kə kwasuk sôwâ məni wə coɓ kuruku. 13Mum faŋ la' ne ndaya: «Dan rum wây'i: So man də ɗe kə so məni sôwâ daŋ' gak in dan kə Ifray wə hana. Ama mə hi, hi faŋ gi so rum ce' ndə ri pe' hura na'a#Esa 56.7; Jer 7.11!»
14Dəŋâr kə lem mbə kuni hay' Zezu wə rawti so Ifray, ɓay mum car ndaya. 15Sum rôwâ mə du sum po' fur kə sum pay zu dan dlay ra' kuni bak kəri məni handay we yew məni Zezu gi ɓay mun dan məni dawre' wə do wə rawti so rumu: «Mbra' hay' Vay David!» 16Zə rum, handay ci vun Zezu: «Ha mun dan məni handay wə in nə si su?» Zezu ɗam vun ndaya: «Awo, hi cu in dan məni nə ɗaw mi su? Ha kə məni gi dawre' kə daw mə vun pa' kədan handay wû buru.» 17Mum faŋ 'ya ar nday ɓay pâ mbə so rumu. Mum ta so Betani ɓay bar wə hana.
Zezu ge nê' gu tərumu
(Mak 11.12-14,20-24)
18Siw rum kə bəka, kəri məni Zezu faŋ də so Jeruzalem, mê' ti numu. 19Mum we gu tərum wə hay' vari, ɓay mum fur ta zə rum, ama mum cu za' vra' sə ko ɗaw mi, say tlapa. Zə rum, mum la' ne kə gu tərum ra: «Həŋ cu də vra' kpe za' mi!» Kəkor sar, gu tərum rə co'o. 20Sum ta zə rum we kwa rum, ɓay kwa rum jin' wa ne ndaya. Handay ci vun Zezu: «Gi ma gu tərum rə co' kəkor sar su?» 21Zezu ɗam vun ndaya: «Na in mi ne, kəzin', hi la' ve Ifray njeŋ si, ɓay hi la' cu way dan rum mi si, hi cu gak gi kwa məni na gi kə gu tərum rə taw mi, ama hi gak la' ne kə i igway' mə tira: Əŋ 'ya mbə ti, ɓay dam də ya mbi, ɓay kwa rum də gi. 22Hi la' ve dan rum si, hi də fe kwa daŋ' məni hi də ci vun rum kəri məni hi wə in dan kə Ifraya.»
Gbəgboŋ Zezu car mbə ka su?
(Mak 11.27-33; Luk 20.1-8)
23Zezu ze ta rawti so po' fur sôwâ Zuwif ɓay təŋ kə ta' kwa wə hana. Kəri rum, sum rôwâ mə du sum po' fur kə sum rôwâ mə du sôwâ Zuwif mbə kuni hay' rum ɓay ci vun rumu: «Kə gbəgboŋ sa ha wə gi kwa məni kuni su? Sa nə ne gbəgboŋ rum ne nu su?» 24Zezu ɗam vun ndaya: «Na də ci vun ri kə dan ɗaw, hi la' ɗam vun rin si, na də mi ta' swə məni ne gbəgboŋ ne nan kədan na gi kwa məni kuna. 25Sa nə sin Zaŋ gi baptem su? Ifray su? Ko sumra' su?» Ama handay təŋ kə dle vun mbok nday, ɓay handay ini: «Namba la' ɗam i Ifray sin um si, mum də ci vun mba: Zə mi hi cu ve num mi su? 26Ama namba la' ɗam i sumra' sin um si, namba ne wəlok raw sôwâ zə handay daŋ' we i Zaŋ nə ke bə ka' dana.» 27Zə rum, handay ɗam vun Zezu: «Namba cu we mi.» Ɓay Zezu la' ne ndaya: «La' ndəna' si, na ta', na cu də mi ta' swə məni ne gbəgboŋ ne nan kədan na gi kwa məni kuni məta'a.»
Dan mə gəgan wa daw njiwkwa mə hoɓo
28Zezu ci vun ndaya: «Hi ɗik ma wa dan məni nə su? Swə məsin kəta' kə daw hoɓo. Mum ta hay' vay mə mbri ɓay la' ne numu: "Vay man, a də gi sin wə sine gu tama." 29Vay nə ɗam vun rumu: Na cu də mi, ama kəki rum mum faŋ samwa dan ɗik um, ɓay mum 'ya ta sine gu. 30Bəba faŋ ta hay' vay mə nyêw ɓay la' ne num ndəna' ta'a. Vay nə ɗam vun rumu: Awo, bəba, na də ta, ama mum cu ta han mi. 31Wə du daw mə hoɓ məni kuni, sa nə gi bə ba um su?» Handay ɗam vun rumu: «Vay mə mbri na.» Zezu la' ne ndaya: «Na in mi ne, kəzin', sum ɓawa kwa kə sum ghəghay də ze kuni wə ri məni Ifray wə də suk jwə wa sôwâ um cop ri. 32Zə Zaŋ mbə hay' ri, ɓay mum ta' vari mə njeŋ ne ni, ama hi cu ve num mi, ama sum ɓawa kwa kə sum gi ghəghay ve numu. Ɓay ko kəki məni hi we ndəna', hi cu faŋ vunduk ri ɓay ve num mi#Luk 3.12; 7.29-30.»
Dan mə gəgan wa sôwâ mə bro' məni wə ji sine gu
(Mak 12.1-12; Luk 20.9-19)
33«I mun dan mə gəgan məsini: Swə məsin pe gu wə sine umu. Mum dluɓ vun rum, mum dla' zra kədan mum 'yem vra' gu wə han, ɓay mum dla dap kədan sôwâ məni ji sine gu rum gak gay' wə hana. Kəki rum, bə sine ar sine gu rum wə ɓa sum ji sine gu, ɓay mum 'ya rəkwaya. 34Kəri məni wakaya rum mbə day, mum sin sum sin um wə hay' sum ji sine gu kədan handay ve vun kwa wakaya um wə ɓa ndaya. 35Ama sum ji sine gu kaw sum sin um kuni, handay pum swə ɗaw, ci məsin, ɓay ge bây hinji' nday kə gway'i. 36Zə rum, bə sine gu sin sum sin məsin raw pâ mə vun kofo, ama sum ji sine gu gi nday ndəna' ta'a. 37Ndo' vun rum mum sin vay um hay' nday kə ini: Handay də mbâ vay mana. 38Ama kəri məni sum ji sine gu we vay nə, handay in kuni mbok nji: Swə məni də ti so nə wə mba. Mə də ci num ye, ɓay sine gu rum də faŋ mə namba. 39Zə rum, handay kaw num du sine gu ge ta rəka ɓay ci numu.»
40Zezu ci vun ndaya: «Kəri məni bə sine gu də mbə, mum də gi mi kə sum ji sine məni kuni su?» 41Handay ɗam vun rumu: «Mum də ci sôwâ mə bro' məni kuni dan we ca, ɓay mum də ar sine "viŋə" um də ɓa sum sin məsin məni də um ne vun kwa wakaya mə mum kəri wakaya.» 42Zezu faŋ la' ne ndaya: «Hi cu in dan məni wə du Ɗerwa Ifray ɗaw mi su?
Gway' məni sum ɗam so ar ge ta rəka,
gway' rum faŋ gway' mə kə sin toŋ wə dleŋ so.
Bârî gi kwa rum ndəna',
ɓay ɓay zə mba kədan namba we kwa rumu!»
43Zezu faŋ ini: «Zə rum, na in mi ne: Ifray də ar suk jwə mə wa ri, kədan mum suk jwə wa sôwâ nya məsin məni wə gi kwa mə njeŋe. [44Swə məni də nde wa gway' rum, bə rum də kəy tu rum, ɓay gway' nə la' nde wa swə si, gway' rum də um haɓ njum' njum'mu.#21.44 Ri ɗerwa rum cu wə du ɗerwa məni wây' cem cem məsin kuni mi.]»
45Sum rôwâ mə du sum po' fur kə kul sôwâ Zuwif mə ɗe kə Farisiyen mun kuni dan mə gəgan Zezu, ɓay handay mun i mum ge dan wa ndaya. 46Zə rum, handay keɓ vari kədan handay um kaw, ama handay ne wəlok raw sôwâ məni we Zezu ce' ndə bə ka' dana.
Избрани в момента:
Matiye 21: KMN
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Le Nouveau Testament et Psaumes en Peve © Alliance Biblique du Tchad, 2014.
Matiye 21
21
Zezu ze ta so Jeruzalem
(Mak 11.1-11; Luk 19.28-40; Zaŋ 12.12-16)
1Kəri məni handay ta həre' kə so Jeruzalem, handay day so Betfage, məni wə wa i igway' məni gu olivə wə han juku. Zezu sin sôwâ hoɓ du sum ta zə rum ta kofo. 2Mum la' ne ndaya: «I də so mə nay' kor ri. Kəri məni hi də day wə han, hi də za' ya kor kə vay sə jew wə hana. I ulay' nday mbə ne nan kə ndi. 3Swə la' ci vun ri si, i ɗam vun rumu: Bârî wə wa' rumu. Ɓay bə rum də nday ar mi ne kəri rum sara.»
4Kwa rum gi ndəna' kədan nyen mbi dan məni bə ka' dan ini:
5I in ne kə so Siyoŋ:
Əŋ kar ri'i! Jwə maŋ wə mbə hay' riŋi!
Mum swə mə 'yeŋ, ɓay mum ur wa vay ya kor rumu#Zak 9.9.
6Zə rum, sum ta zə Zezu 'ya dle ɓay gi kwa məni mum in ne ndaya. 7Handay mbə kə ya kor kə vay sa. Handay dluɓ mbraw nday ta ki nday, ɓay Zezu ur suk hana. 8Sôwâ raw dle tu si dluɓ mbraw nday vari. Sôwâ məsin tum tlap gu ɓay dluɓ wə vari ta'a. 9Raw sôwâ məni wə ta kor Zezu kə sôwâ məni wə ta zə rum do dan kuna: «Mbra' hay' Vay David! Ifray nə kuswa' swə məni mbə kə semɗe Bârî! Mbra' hay' Ifray mə wafraya#Nye 118.25-26!»
10Kəri məni Zezu ze ta so Jeruzalem, sôwâ so rum daŋ' wur kə do dana. Handay ci vunu: «Sa nə swə məni nə su?» 11Raw sôwâ ɗam vun ndaya: «Mum nə bə ka' dan mə ɗe kə Zezu məni car mbə so Nazaret nya Galile.»
Zezu wə rawti so po' fur sôwâ Zuwif
(Mak 11.15-19; Luk 19.45-48; Zaŋ 2.13-16)
12Zezu ze ta rawti so po' fur sôwâ Zuwif, ɓay mum 'way sôwâ məni wə gi coɓ kwa kə sôwâ məni wə coɓ kwa wə rawti so rumu. Mum faŋ i tablə sôwâ mə gi sam səlay kə kwasuk sôwâ məni wə coɓ kuruku. 13Mum faŋ la' ne ndaya: «Dan rum wây'i: So man də ɗe kə so məni sôwâ daŋ' gak in dan kə Ifray wə hana. Ama mə hi, hi faŋ gi so rum ce' ndə ri pe' hura na'a#Esa 56.7; Jer 7.11!»
14Dəŋâr kə lem mbə kuni hay' Zezu wə rawti so Ifray, ɓay mum car ndaya. 15Sum rôwâ mə du sum po' fur kə sum pay zu dan dlay ra' kuni bak kəri məni handay we yew məni Zezu gi ɓay mun dan məni dawre' wə do wə rawti so rumu: «Mbra' hay' Vay David!» 16Zə rum, handay ci vun Zezu: «Ha mun dan məni handay wə in nə si su?» Zezu ɗam vun ndaya: «Awo, hi cu in dan məni nə ɗaw mi su? Ha kə məni gi dawre' kə daw mə vun pa' kədan handay wû buru.» 17Mum faŋ 'ya ar nday ɓay pâ mbə so rumu. Mum ta so Betani ɓay bar wə hana.
Zezu ge nê' gu tərumu
(Mak 11.12-14,20-24)
18Siw rum kə bəka, kəri məni Zezu faŋ də so Jeruzalem, mê' ti numu. 19Mum we gu tərum wə hay' vari, ɓay mum fur ta zə rum, ama mum cu za' vra' sə ko ɗaw mi, say tlapa. Zə rum, mum la' ne kə gu tərum ra: «Həŋ cu də vra' kpe za' mi!» Kəkor sar, gu tərum rə co'o. 20Sum ta zə rum we kwa rum, ɓay kwa rum jin' wa ne ndaya. Handay ci vun Zezu: «Gi ma gu tərum rə co' kəkor sar su?» 21Zezu ɗam vun ndaya: «Na in mi ne, kəzin', hi la' ve Ifray njeŋ si, ɓay hi la' cu way dan rum mi si, hi cu gak gi kwa məni na gi kə gu tərum rə taw mi, ama hi gak la' ne kə i igway' mə tira: Əŋ 'ya mbə ti, ɓay dam də ya mbi, ɓay kwa rum də gi. 22Hi la' ve dan rum si, hi də fe kwa daŋ' məni hi də ci vun rum kəri məni hi wə in dan kə Ifraya.»
Gbəgboŋ Zezu car mbə ka su?
(Mak 11.27-33; Luk 20.1-8)
23Zezu ze ta rawti so po' fur sôwâ Zuwif ɓay təŋ kə ta' kwa wə hana. Kəri rum, sum rôwâ mə du sum po' fur kə sum rôwâ mə du sôwâ Zuwif mbə kuni hay' rum ɓay ci vun rumu: «Kə gbəgboŋ sa ha wə gi kwa məni kuni su? Sa nə ne gbəgboŋ rum ne nu su?» 24Zezu ɗam vun ndaya: «Na də ci vun ri kə dan ɗaw, hi la' ɗam vun rin si, na də mi ta' swə məni ne gbəgboŋ ne nan kədan na gi kwa məni kuna. 25Sa nə sin Zaŋ gi baptem su? Ifray su? Ko sumra' su?» Ama handay təŋ kə dle vun mbok nday, ɓay handay ini: «Namba la' ɗam i Ifray sin um si, mum də ci vun mba: Zə mi hi cu ve num mi su? 26Ama namba la' ɗam i sumra' sin um si, namba ne wəlok raw sôwâ zə handay daŋ' we i Zaŋ nə ke bə ka' dana.» 27Zə rum, handay ɗam vun Zezu: «Namba cu we mi.» Ɓay Zezu la' ne ndaya: «La' ndəna' si, na ta', na cu də mi ta' swə məni ne gbəgboŋ ne nan kədan na gi kwa məni kuni məta'a.»
Dan mə gəgan wa daw njiwkwa mə hoɓo
28Zezu ci vun ndaya: «Hi ɗik ma wa dan məni nə su? Swə məsin kəta' kə daw hoɓo. Mum ta hay' vay mə mbri ɓay la' ne numu: "Vay man, a də gi sin wə sine gu tama." 29Vay nə ɗam vun rumu: Na cu də mi, ama kəki rum mum faŋ samwa dan ɗik um, ɓay mum 'ya ta sine gu. 30Bəba faŋ ta hay' vay mə nyêw ɓay la' ne num ndəna' ta'a. Vay nə ɗam vun rumu: Awo, bəba, na də ta, ama mum cu ta han mi. 31Wə du daw mə hoɓ məni kuni, sa nə gi bə ba um su?» Handay ɗam vun rumu: «Vay mə mbri na.» Zezu la' ne ndaya: «Na in mi ne, kəzin', sum ɓawa kwa kə sum ghəghay də ze kuni wə ri məni Ifray wə də suk jwə wa sôwâ um cop ri. 32Zə Zaŋ mbə hay' ri, ɓay mum ta' vari mə njeŋ ne ni, ama hi cu ve num mi, ama sum ɓawa kwa kə sum gi ghəghay ve numu. Ɓay ko kəki məni hi we ndəna', hi cu faŋ vunduk ri ɓay ve num mi#Luk 3.12; 7.29-30.»
Dan mə gəgan wa sôwâ mə bro' məni wə ji sine gu
(Mak 12.1-12; Luk 20.9-19)
33«I mun dan mə gəgan məsini: Swə məsin pe gu wə sine umu. Mum dluɓ vun rum, mum dla' zra kədan mum 'yem vra' gu wə han, ɓay mum dla dap kədan sôwâ məni ji sine gu rum gak gay' wə hana. Kəki rum, bə sine ar sine gu rum wə ɓa sum ji sine gu, ɓay mum 'ya rəkwaya. 34Kəri məni wakaya rum mbə day, mum sin sum sin um wə hay' sum ji sine gu kədan handay ve vun kwa wakaya um wə ɓa ndaya. 35Ama sum ji sine gu kaw sum sin um kuni, handay pum swə ɗaw, ci məsin, ɓay ge bây hinji' nday kə gway'i. 36Zə rum, bə sine gu sin sum sin məsin raw pâ mə vun kofo, ama sum ji sine gu gi nday ndəna' ta'a. 37Ndo' vun rum mum sin vay um hay' nday kə ini: Handay də mbâ vay mana. 38Ama kəri məni sum ji sine gu we vay nə, handay in kuni mbok nji: Swə məni də ti so nə wə mba. Mə də ci num ye, ɓay sine gu rum də faŋ mə namba. 39Zə rum, handay kaw num du sine gu ge ta rəka ɓay ci numu.»
40Zezu ci vun ndaya: «Kəri məni bə sine gu də mbə, mum də gi mi kə sum ji sine məni kuni su?» 41Handay ɗam vun rumu: «Mum də ci sôwâ mə bro' məni kuni dan we ca, ɓay mum də ar sine "viŋə" um də ɓa sum sin məsin məni də um ne vun kwa wakaya mə mum kəri wakaya.» 42Zezu faŋ la' ne ndaya: «Hi cu in dan məni wə du Ɗerwa Ifray ɗaw mi su?
Gway' məni sum ɗam so ar ge ta rəka,
gway' rum faŋ gway' mə kə sin toŋ wə dleŋ so.
Bârî gi kwa rum ndəna',
ɓay ɓay zə mba kədan namba we kwa rumu!»
43Zezu faŋ ini: «Zə rum, na in mi ne: Ifray də ar suk jwə mə wa ri, kədan mum suk jwə wa sôwâ nya məsin məni wə gi kwa mə njeŋe. [44Swə məni də nde wa gway' rum, bə rum də kəy tu rum, ɓay gway' nə la' nde wa swə si, gway' rum də um haɓ njum' njum'mu.#21.44 Ri ɗerwa rum cu wə du ɗerwa məni wây' cem cem məsin kuni mi.]»
45Sum rôwâ mə du sum po' fur kə kul sôwâ Zuwif mə ɗe kə Farisiyen mun kuni dan mə gəgan Zezu, ɓay handay mun i mum ge dan wa ndaya. 46Zə rum, handay keɓ vari kədan handay um kaw, ama handay ne wəlok raw sôwâ məni we Zezu ce' ndə bə ka' dana.
Избрани в момента:
:
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Le Nouveau Testament et Psaumes en Peve © Alliance Biblique du Tchad, 2014.