यूहन्ना 11

लाज़र के मंऊँत्त

1मरियम अरह् तियाँरी बंईण मार्था के गाँव बैतनिय्याह दा लाज़र नाँव का ऐक आदमी बीमार थिया। 2से सेजी ही मरियम थी, जिऐं प्रभू यीशू के लात्तो गाशी सैंन्ट पाँऐयों आप्णें ही मुँढो के बाल़ो लई ऊँबाँदी लागी थी, तियाँरा ही भाऐ लाज़र बीमाँर थिया। 3तिनू दुई बंऐणीं ऐं प्रभू यीशू खे ऐजा शुज़ा दिता, के “हे प्रभू! देखो, जेसी आरी तुँऐं प्यार करह्, सेजा लाज़र बीमार असो।” 4प्रभू यीशू ऐ ऐजो शुँणियों बुलो, “ऐजी बीमारी मंऊँती के ने आथी; परह् पंण्मिश्वर की बड़ियाई खे असो, जिन्दें के कारण पंण्मिश्वर के बैटे के बड़ियाऐं हंदी।” 5प्रभू यीशू मार्था, अरह् तियाँरी बंईण मरियम, अरह् लाज़र आरी प्यार करह् थिऐ। 6तेसी लाज़र की बीमारी के बारे दो शुँणियों, भे प्रभू यीशू जेथै थिऐ, तेथी दो देसो तोड़ी हजो रूऐ; 7ईन्दें पाछी प्रभू यीशू ऐ आप्णे चैले खे बुलो, “आओं! आँमें हजो यहूदीया ईलाके दे ज़ाँऊँबे।” 8चैले ऐ बुलो, “हे रंब्बी; गुरू जी! किऐ देसे आगे तअ यहूदी अगवाल़ तुँओं गाशी पथराच़ देऐयों माँर्णे चहाँव थिऐ; तअ तबे भे कियो तुँऐं हजो तेथी ज़ाँणों चहाँव?” 9प्रभू यीशू ऐ तिनखे जबाब दिता, “कियों देसो के बारंह् घाँण्टे हंदे ने? जे कुँऐ देसो हाँडो तअ तेस्के ढैस ने लागदा; किन्देंखे के से ईयों संईसारी का प्रकाष देखो। 10परह् जे कुँऐं रात्ती हाँड्ला तअ तेस्के ढैस लागदा, किन्देंखे के रात्ती प्रकाष ने हंदी।” 11ईन्दें पाछ़ी प्रभू यीशू ऐ चैले खे बुलो, “मेरा दोस्त्त लाज़र सुत्ती गुवा; हाँव ज़ादा लागा, के तेसी नींज़ौ शा ऊबा बीऊँजाल़ू।” 12तबे चैले ऐ तिनखे बुलो, “हे प्रभू! जे लाज़र सुत्ती रूवा, तअ से आप्णीं नींज़ पुरी करियों पाछ़ु ऊबा बीऊँज्दा।” 13परह् प्रभू यीशू ऐ, तअ तेस्की मऊँती के बारे दो बुलो थियो; परह् तिनके चैले के सेजी बात संह्म्झ दे ने आई, परह् तिन्ऐ जाँणों के प्रभू यीशू ऐ; तेस्की सुत्त्णों के बारे दो बुली लो। 14तबे प्रभू यीशू ऐ तिन कैई साफ़-साफ़ बुली दितो, के “लाज़र मँरी गुआ। 15ऐजो तुवाँरी भलाई खे असो, के हाँव तेथै ने थी; जिन्दें लई तुऐ बिश्वाष करह्, परह् ऐबे चालो आमें तेस कैई ज़ाँऊबे।” 16ईन्दे गाशी थोमा ऐ जेस्खे दिद्मुस#11:16 मतल्व जुड़ूवा; बुली थिया, तेने आप्णे साथी चैले खे बुलो, “आओ, आँमें भे ईनकी गईलो मँर्दे ज़ाऊँबे।”

प्रभू यीशू गाशी बिश्वाष कर्णो वाल़ा मँरियों भे जीऊँदा हंदा

17तेथै पंह्ऊँचियों प्रभू यीशू कैई पता लागा, के लाज़र मंरी गुवा; अरह् ऐत्त्लो तेसी खात्ती-कबर दा थंह्ऐयों: चार देसो हंऐ गुऐ। 18बैतनिय्याह, नंगर अरह् यरूशलेम के बीच दा किऐ च़ींन किलोमीटर की दुरी का फ़ाँस्ला थिया। 19ईन्देंखे तेथै बैजाऐ भहित्ते यहूदी लोग माँर्था, अरह् मरियम कैई तिनकी भाई के मँर्णों गाशी पल़ाव बुल्दें, अरह् धिलासा देंदे आऐ रूऐ थिऐ। 20परह् जैई मार्था कैई ऐजा पता लागा, के प्रभू यीशू आँदे लागे; तेई से तिन शी भेंट कर्दी हुटी, परह् मरियम घरेह् ही बंऐठी अंदी रंऐ। 21माँर्था ऐ प्रभू यीशू खे बुलो, “हे प्रभू जी! जे तुँऐं ईथै हंदे, तअ मेरा भाऐ बिल्कुल ने मँर्दी थी। 22तबे भे हाँव ऐजो जाँणू ऐं, के तुऐं जुण्जो किऐ पंण्मिश्वर कैई शो माँगले; सेजो पंण्मिश्वर तुँओं खे देऐ देंदे।” 23प्रभू यीशू ऐ तियों खे बुलो, “तेरा भाऐ हजो ऊँबा जीऊँदा हंदा।” 24मार्था ऐ जबाब दिता, “हाँव ऐजो जाँणू ऐं; के से भे आखरी के देसे दुज़ाल़िऐ ऊबे जीऊँणों#11:24 नियाँव के देसे; के बख्त्ते हजो पाछू ऊँबा जीऊँदा हंदा।” 25प्रभू यीशू ऐ बुलो, “दुज़ाल़िऐं ऊबो जीऊँणों अरह् जीवन ‘हाँव’ ही असो; जुण्जा कुँऐं मुँह गाशी बिश्वाष करला, सेजा मँर्णो गाशी भे जीऊँदी रंह्दा। 26अरह् जुण्जा कुँऐं आदमी जींऊँदा असो, अरह् से मुँह्दा बिश्वाष करह्; से कोदी ने मँर्दी; कियों तू ईयों बातो दा बिश्वाष करे ऐ?” 27मार्था ऐ जबाब दिता, “होर, प्रभू जी! हाँव बिश्वाष करू; के तुऐं ही मसीया, मतल्व पंण्मिश्वर का बैटा असो; जुण्जा संईसारी दा आँणों वाल़ा थिया।”

28ऐजो बुलियों मार्था पाछ़ू आप्णें घरेह् हुटी, अरह् तिऐं आप्णीं बंईण मरियम ज़ोई बऐदियों तियों खे चुप्पी काँनों पाछ़ी बुलो; के “गुरू जी, ईथै आऐ गुऐ; अरह् ताँव तिन्ऐं बऐदी लई।” 29ऐजो शुँण्दे ही मरियम तेख्णी ऊँबी बींऊँजी, अरह् प्रभू यीशू कैई शी भेंट कर्दी हुटी। 30प्रभू यीशू ताँव तोड़ी गाँव दे ने पह्ऊँची रंई थी, से तेख्णों तेसी ही ठाँव दे थिऐ, जेथै मार्था तिन कैई शी भेंट कर्दी हुटी रंऐ थी। 31तबे जुण्जे लोग पल़ाव बुल्दे मरियम की गंईलो तेसी घरोह् दे थिऐ, से ऐजो देखियों; के से अचाँणक ऊभे बीऊँजियों बाँऐडी हुटी, तअ से भे तियों ही पाछ़ी बाँईडे हुटे; किन्देंखे के तिन्ऐं संहम्झों, के से जरूर खात्ती-कबर गाशी रूँदी हुटी रंऐ।

प्रभू यीशू रूऐ?

32जैई मरियम तेसी जागे दी पह्ऊँची, जेथै प्रभू यीशू थिऐ, तैई से तिनू देख्दे ही तिनके लात्तो गाशी पड़ी; अरह् तिऐ बुलो; “हे, प्रभू जी! जे तुऐं ईथै हंदे तअ मेरा भाऐ मंरदा ने थिया।” 33प्रभू यीशू मरियम अरह् तियाँरी गईलो आऐं अंदें यहूदी लोग रूँदे देखियों, से आत्त्मा दे बैजाऐ ऊदास अरह् ब्याकुल हुऐ, अरह् लाँम्बी साँस लंऐयों तिन्ऐं शुष्कार छ़ुड़ा। 34अरह् प्रभू यीशू ऐ तिनखे बुलो, “तुँऐं तेसी केथै थऐ थुवा?” तिन्ऐं बुलो, “हे प्रभू जी! आओ अरह् देखो।” 35प्रभू यीशू भे रूँऐ गुऐ।#11:35 ऐजी बाईबल की सब शी नहाँन्ड़ी आय्त असो; 36ईन्दे गाशी लोगे ऐं बुलो, “देखो! ऐ तेच्छ़ौ केत्रो प्यार करह् थिऐ।” 37परह् तिनू मुँझ्शो कई लोगे बुलो, “ईन्ऐं तअ शैड़े की आखी भे खुल्ली थंई, तअ कियो ऐ ऐत्रो भे करी ने सको थिऐ, के ऐजा आदमी मंरदा ही ने?”

लाज़र हजो पाछ़ू ऊबा जीऊँदा हुवा

38प्रभू यीशू ऐ हजो गह्ऐरी साँस लऐ, अरह् से तिनकी गईलो खात्ती-कबर गाशी आऐ; अरह् सेजी खात्त-कबर ऐकी ऊराड़ो दी खुणीं अंदी थी, जिन्दें के मुँहों गाशी ऐक बड़ा पाथर लाया अंदा थिया। 39प्रभू यीशू ऐ बुलो, “पाथर आगु गाड़ो।” तेसी मँरे अँदे की बंऐणी मार्था ऐं तिनखे बुलो; “हे प्रभू जी! ऐबे तअ तेस्की मित्तके शी शड़ाँण आँदी लागी हली, किन्देंखे के तेसी मरियों तअ ऐबे चार देसो हऐ गुऐ।” 40प्रभू यीशू ऐ तियों खे जबाब दिता, “कियों मुँऐं ताँव्खे ऐजो बुली ने थी, के जे तू बिश्वाष कर्लीं तअ पंण्मिश्वर की बड़ियाऐं देख्ली?” 41ईन्दे गाशी लोगे ऐ सेजा पाथर आगु गाड़ा। तबे प्रभू यीशू ऐ आप्णी आखी ऊबी स्वर्गो की ढबै देखियों बुलो, “हे, बाबा! हाँव तेरा धन्यबाद करू; के तुऐं मेरी प्रार्थना शुँणीं पाऐ। 42हाँव जाँणू थिया, के तू सदा मेरी प्रार्थना शुँणें। परह् मुँऐं ऊडे-पुडे खह्ड़े हुऐं अंदे आदमी के कारण ऐष्णों बुली लो; जिन्दें लई ऐ बिश्वाष करह्, के तुँऐं ही मुँह डेयाल़ी थुवा।” 43ऐजो बुलियों, प्रभू यीशू ऐ जुराल़ो बुलो, “ओ, लाज़र! बाँईडा आ!” 44तबे: सेजा मँरा अँदा आदमी बाँईडा आया। अरह् तेस्के हाथ, लात्त कंफ़न लई बाँने अंदे थिऐ; अरह् तेस्के मुँहों ज़ात्ती ऊँदा साफ़े का डाट लाया अंदा थिया। तबे प्रभू यीशू ऐं लोगो खे बुलो, “ऐस्के बाँनणों ऊँडे खुलो, अरह् ऐसी ज़ाँणों दियों।”

प्रभू यीशू के बिरूद कैड़ा

(मत्ती 26:1-5; मरकुस 14:1,2; लूका 22:1,2)

45जुण्जे यहूदी लोग मरियम कैई पल़ाव बुल्दे आऐ रूवे थिऐ, अरह् जिन्ऐ प्रभू यीशू ऐसी काँम-काज़ कर्दे देखी थुऐ थिऐ; तिनू मुँझ्शा भंहित्ते लोगे ऐ बिश्वाष करा। 46परह् तिनू मुँझ्शो कंई लोगे ऐं यहूदी भाट-बाम्ण कैई ज़ाऐयों बुलो, के प्रभू यीशू ऐ का करी थो। 47तबे मुँख्या-याजकों अरह् यहूदी भाट्-बाँम्णें ऐ; ऐक खह्त्ती की बैजाऐ बड़ी खुम्ल़ी #11:47 मतल्व सदर अदाल़्त बेशुमाँर बड़ी कचौरी; कंट्ठी करियों बुलो, के ऐबे “आँमें तेस्को का करह्? ऐने आदमी ऐं तअ बैजाऐ चींह्न-चंम्त्तकार देखाऐ लुऐ। 48जे आँमें तेसी आदमी ऐष्णों ही कर्दे रंहणों देंऊँबे, तअ बादे लोग ऐस्दा बिश्वाष कर्दे; अरह् रोमन लोग आऐयों अमाँरी देऊँठी अरह् अमाँरे हंक-अधिकार, अरह् अमाँरी जात्ति अरह् बादो राज्य आमों कैई शो दड़ियों आगु कर्दे।” 49तबे तिन मुंंझ्शो ऐकी ऐं जेस्को नाँव काइफ़ा थियो; अरह् से तियों साल्ह का महाँ-याजक थिया, तेने तिनू लोगो खे बुलो; “तुऐं किऐ ने जाँण्दें। 50तुओं कैई ऐजा पता ही ने आथी, के ऐजो सब-कुछ़ तुओं खे भलो असो; किन्देंखे के जे सब-कुछ़ राज्य नाँष हंणों वाल़ो हों; तअ ईन्दें शो आछ़ो ऐजो आथी ने; के ऐक आदमी अमाँरे लोगो की ताँईऐ मँरी ज़ाव; अरह् बादी जात्ती नाँष ने हों।” 51तेने ऐजी बात आप्णी तरफ शी ने बुली, परह् तेने ऐजी बात तियों साल्ह का महाँ-याजक हंणों के कारण बरंम्बाँणी करियों बुली थी; के प्रभू यीशू यहूदी जात्ति-कुल़ की ताँईऐं कुरबाँंण हऐ ज़ाँव। 52ऐ सिर्फ यहूदी जात्ति खे ने, परह् ईन्देंखे भे के से खिदर-बिदर हंऐ अंदी; पंण्मिश्वर के अलाद कंट्ठी करह्। 53तबे: तेसी ही देसो शुभे सेजे लोग प्रभू यीशू मार्णों का कैड़ा कर्दे लागे। 54ईन्देंखे प्रभू यीशू ऐं तेसी बख्त्तो शुभो यहूदा ईलाके दो खुह्लमं-खुह्लो घुम्णों-फ़ीर्णो बंन्द करी दितो; अरह् तबे से आप्णें चैले आरी शुँन-शाँन जाँगल़ों के नंजीक इफ़्राईम नाँव के ऐकी नंगर दे हुटे; अरह् आप्णें चैले आरी से तैथी रूऐ। 55यहूदियों के (फ़सह) को तैयारह् नंजीक थियों। अरह् बैजाऐ भहित्ते लोग फ़सह के तैयारंह् शे आगे आपु-आप्खे शुद्ध हंणों की ताँईऐ गाँव शे यरूशलेम दे आऐ रूऐ थिऐ। 56तबे: से प्रभू यीशू जुँह्दें लागी रूऐ थिऐ, अरह् देऊँठी दे खह्ल़ियों आपु मुझी पह्ली रूऐ थिऐ; के “तुँऐं का सुच्चो? के से मेल़ै दा आँदा ऐं?” 57मुँख्या-याजकों, अरह् यहूदी भाट्-बाँम्णें ऐं; प्रभू यीशू थाँहम्बड़णों के मंतल्व शे सोभी खे ऐजी अज्ञाँ देऐ थंऐ थी, के जे कसी भे आदमी कैई ऐजा पता लागो; के यीशू केथै असो; तअ से तियों बातो का शुज़ा तिन कैई तेख्णी दियों; जू आँमें तेसी ऊडा थाँम्बड़ी दियों।

Избрани в момента:

यूहन्ना 11: sri

Маркирай стих

Споделяне

Копиране