यूहन्ना 15
15
प्रभू यीशू साच्ची दाख्ह की बैल असो,
1“हाँव साच्ची दाख्ह की बैल असो; अरह् मेरा बाबा जींम्मदार असो। 2मुँह्दी लागी अंदी ऐक नाँम डाल़ी जिन्दें फ़ल़ ने लागदे, तियों से काटी दियों; अरह् जियों डाल़ी दे फ़ल़ लागो, तियों डाल़ी के से काट-छ़ाँट करह्; के तिन्दें हजो भे जादा फ़ल़ लागो। 3तिनू बचन के कारण, जुण्जे मुँऐ तुँओं कैई बुली थुऐ, तिन्दें लई तुऐ शुद्ध हंऐ गुऐ। 4तुँऐं मुँह्दे पाक्कै बंणें अँदे रंह्, तअ हाँव तुँओं दा बसा अँदा रँह्ऊबा; किन्देंखे के जे बाली-शाँऐं डाल़ी दी ने जुड़ी अंदी रँह्दी, तअ तिन्दे किऐ भे फल़ ने लागी सक्दे; तेष्णें ही जे तुऐं भे मुँह्दे जुड़े अँदे ने रँह्, तअ तुओं दे भे किऐ फल़ ने लागी सँक्दे।
5“हाँव दाख्ह अँगूरोह् की बाल असो: अरह् तुँऐं डाल़ी असो! जुण्जा कुँऐ मुँह्दा पाक्का बंणा अंदा रंह्, तअ हाँव तेस्दा बसा अंदा रंह्ऊ; अरह् हाँव तेस्दे बैजाऐ फ़ल देंऊँ, किन्देंखे के तुऐ मुँह शे ज़ोई रंह्ऐयों किऐ ने करी सक्दे। 6ईन्देंखे जे कुँऐ मुँदा ने बंणा अंदा रंह्दा, तअ तेसी तियों च़ूट्टी अंदी डाल़ी के जेष्णाँ फैरकाया ज़ाँव; अरह् तबे से शुक्की ज़ाँव, अरह् लोग तिनू शुक्की अंदी डाल़ी कंट्ठी करियों आगी आँऊड़ो दी पाऐयों जल़ाऐ दियों। 7जे तुँऐं मुँह्दे पाक्कै बंणें अंदे रंह्, अरह् मेरे बचन के शिक्षा तुँओं दी बंसी अंदी रंह्; तअ भाँव तुँऐं किऐ भे माँगों, तअ सेजी तुवाँरी माँग पुरी करी ज़ाँली। 8तुवाँरे फल़ की बड़ोत्री दे मेरे बाबा के बड़ियाऐ हों, अरह् तुवाँरा मेरे चैले बंण्णों का ऐजा पाक्का सबुत्त हंदा।
9“जेष्णों बाबा ऐं मुँह आरी प्यार करी थो, तेष्णों ही मुँऐं भे तुँओं आरी प्यार करी थो; अरह् तुऐं मेरे प्यार दें पाक्कै बंणें अंदें रंह्। 10जे तुँऐं मेरे प्यार दे पाक्कै बंणें अंदे रंह्ले, तअ तुऐं मेरी अज्ञाँयों का पाल़्ण कर्ले; जेष्णाँ हाँव आप्णें बाबा की अज्ञाँयों का पाल़्ण करदा आऐ रूवा, अरह् तिनके प्यार दा पाक्का बंणाँ अंदा रंह्ऐ रूवा। 11मुँऐं ऐजो तुँओं कैई ईन्देंखे बुली थो, के मेरी खुशी-आनन्द तुँओं दी बंणी अंदी रंह्; अरह् तुँवारी खुशी-आनन्द पुरी हऐ ज़ाँव।
12“मेरी अज्ञाँ ऐजी असो, के जेष्णों मुँऐं तुँओं शो प्यार करी थो; तेष्णों ही तुँऐं भे ओका ओकी आरी प्यार करह्; 13ईन्दें शो बंड़ो प्यार ऊको किऐ ने आथी; के कुँऐं आप्णें साथी-दोस्त्तो की ताँईऐं आप्णें प्राँण-जीयाँन देऐ दियों। 14जे तुऐं मेरी अज्ञाँ का पाल़्ण करह्; तअ तुऐं मेरे दोस्त्त-साथी बँण्दे। 15मुँऐ तुओं दास सेंवक ने, परह् आप्णें दोस्त्त माँनी थुऐ; किन्देंखे के दास सेंवक कैई ऐजा पता ने हंदा, के तेस्का माँलिक का कर्णो वाल़ा असो; परह् मुँऐं तुँओं कैई सेजी बादी बातो बुली थंई, जुण्जी मुँऐ बाबा कैई शी शुँणीं थंऐ। 16तुँऐं मुँह ने चूणीं-छ़ाँटी थंई, परह् मुँऐं तुँओं चूणी-छाँटी थुऐ; अरह् तुँओं पाक्कै ठाली थुऐ, के तुँऐं संईसारी दे ज़ाऐयों फल़ आँणों; अरह् तुवाँरा फ़ल़ ऐशा हुवा चैई, जुण्जा पाक्का बंणाँ अंदा रंह्; जिन्दें लंई तुऐं मेरे नाँव शो जुण्जो किऐ माँगों, सेजो बाबा तुओं खे देऐ दियों।” 17मेरी अज्ञाँ ऐजी असो, के “तुऐं ओका ओकी आरी प्यार करह्।
संईसारी शो बईर
18“जे संईसारी तुँओं आरी बईर करह्, तअ ऐजो चींत्ते थुऐ; के तुओं शो आगे ईयों संईसारी ऐं मुँह आरी भी बईर करी थो। 19किन्देंखे के जे तुँऐं संईसारी के हंदे, तअ संईसारी तुओं आरी बंईर ने कर्दी थी; ऐजों जाँणिंयों के तुँऐं आप्णें ही असो; किन्देंखे के मुँऐ तुओं ईयों संईसारी मुँझ्शे च़ूणी-छ़ाँटी थुऐ, ईन्देखे संईसारी तुओं आरी बंईर कर्दी। 20चींत्तें थुंऐ, के मुँऐ तुँओं खे का बुली थो: के दास सेंवक आप्णें माँलिक शा बड़ा ने हंदी, किन्देंखे के जबे तिन्ऐं मुँह सताँऐ थुवा; तअ से तुओं भे जरूर सताँदे ऐ; जे से मेरे बचन का पाल़्ण कर्दे, तअ से तुवाँरे बचन का भे पाल़्ण कर्दे थिऐ। 21से ऐजो सब-कुछ तुवाँरी गंईलो मेरे कारण कर्दे, किन्देंखे के से मुँह डेयाल़्णों वाल़ा ने जाँण्दे। 22जे हाँव ने आँदा, अरह् जे तिनखे ऐजो सब-कुछ़ ने बुल्दा; तअ से दोषी-कसूरबार ने बंण्दे थिऐ, परह् ऐबे तिन कैई आप्णें पाप छुपाणों खे किऐ भे भाँह्ना ने आथी। 23सेजे जुण्जे मुँह आरी बईर करह्, से मेरे बाबा आरी भे बईर करह्। 24जे हाँव तिनके बीच दे सेजे काँम-काज़ ने करदा, जुण्जें कुँऐ ओका ने करी सक्दा; तअ से दोषी-कसूरबार ने बंण्दे थिऐ; परह् ऐबे तिन्ऐं मुँह देखी थुवा, अरह् तिन्ऐ मुँह अरह् बाबा दुईं आरी बंईर करी थुओं। 25ऐजो ईन्देंखे हुओं, के ‘ऋषी मूसा खे भेटे गुऐ अज्ञाँ-निय्म का सेजा लेख्ह पुरा हों: के तिन्ऐं मुँह आरी बिना कारण को बंईर करी थो।’
26“परह् जबे सेजा मद्त्तगार मंतल्व सच्चाई की आत्त्मा आली, जियों हाँव तुओं खे बाबा कैई शी डेयाल़ूबा; तअ से मेरे बारे दी गुवाऐ-शाज़्त्त देली; 27अरह् तुँऐं भे मेरे बारे दी गुवाऐ-शाज़्त्त देले; किन्देंखे के तुऐं शुरू शे ही ऊँबे मेरी गईलो रंऐ रूऐ।
Избрани в момента:
यूहन्ना 15: sri
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2022, Wycliffe Bible Translators, Inc. All rights reserved.