Yohanes 4
4
Yesus natanuk nor bat Samaria
4:1-42
1Tomwat Farisyar ketnir rdengar feti Yesus nadiris tomwatar yadin ma rlarat I nlengan nof Yohanes. 2Ni botuan e Yesus to nadiris tomwatar, nempa Ni manglartar ma radiris sir. 3Noak ma Yesus ndengar feti tomwat Farisyar rafai ngrie ne, I nbie nof propinsi Yudea ma nbali I far propinsi Galilea. 4Ma na Ni mpampane dalam ma nal far propinsi Galilea, I ka nalyole yampren Samaria. 5-6Noak a ne fafa ler fardu langit, ma Yesus nait kote sa na Samaria ngarany Sikhar. Kote ne nlosir ain ma luryain e Yakub nal ber anaky Yusuf. Na iano perigi sa namin a nbal ma rtar feti Yakub ni perigi. Noak ma nait e Yesus namtoran perigi ne seriny fali ntangw. 7-8Ne Ni manglartar rti kote ma rselir tnyamar. To dodo a nbal e bat Samaria sa nti ntol weye na iane. Mpa Yesus nfalak ber i, “Ano, mwal weye fen rufuky ma kwenum.”
9Ne bat Samaria ne nfalak, “Maken, Ko mof Yahudi ma safe motak ma mtwak weye mof bat Samaria yakw ye?” (Tomwat Yahudyar to ratanuk ror tomwat Samariar.)
10Ne Yesus nfalak, “Ano, farlan mufai feti ise ye ma ntak weye nof ko, ma farlan mufai nbal berkat silai ma Ratu nal ber tomwatar e botuan feti koko ko ma mtwak weye mof Yakw. Mpe keta kal weye ma nal momorip dedesar ber ko.”
11Ne bate ne nfalak, “Maken, perigi ye melaman ma ko to nim tol, ma keta mose farpe ma mwal weye ma nal momorip dedesar a ne ber yakw? 12Perigi ye ma luryain e nusmyamar Yakub nal ber kam. Ma i nor angkir numur ni binatngar renum weye ye nbal. Ma Ko mdwaun feti silai Ko a mlengan mof nusmyamar Yakub e mampe keta bise ma mwal weye ngamone nlengan nof weye na perigi ye e?”
13Ne Yesus nfalak, “Ise ma nenum weye ye, keta namwes a nbal. 14Nempa ise ma nenum weye ma kal ber i ye, keta to namwes lo terik ma dedesar. Fali weye ma kal ber i a ne keta neluk weye matan ma nlale dedesar na ni momorip. Ma weye matan a ne keta nlale dedesar terik ma i nonri momorip dedesar.”
15Ne bate ne nfalak, “Maken, mwal weye ne ber yakw nrela nema to kumwes lo, ma kete kmwa ma ktwol weye kof ye lo.”
16Mpe Yesus nfalak ber i, “Mbwali ko, ma mfwalak ber sawam ma midu a mya.”
17Ne bate ne nfalak, “To sawangw.”
Mpe Yesus nfalak, “Ko mfwalak farane botuan desar feti to sawam. 18Fali mufsau lain lim lo, ma merwane ma mworip mor i lere ye to sawam ber i, mpa safe ma mfwalak a ne botuan.”
19Ne bate ne nfalak, “Maken, lere ye betno kufai feti Ko ye nabi. 20Maken, kam empmyamar nusmyamar rsatngur ber Ratu na bubuar ye, nempa tomwat Yahudyar a kmi mfyalak feti, lan Yerusalem a ne ain ma tomwatar rsatngur ber Ratu.”
21Ne Yesus nfalak, “Ano, mulele safe ma kfwalak ye, keta nait ni tewat e tomwatar rsatngur ber Amninrar Ratu to na lan bubuar ye, ma to na lan Yerusalem a nbal. 22Tomwat Samariar a kmi to mifai Ratu ma msyatngur ber I a ne. Nempa tomwat Yahudyar kam e kam mafai Ratu ma msatngur ber I a ne. Fali Ratu nyoding lo feti keta I nsiduk tomwatar sa nof tomwat Yahudyar kam ma nfair tomwatar na saryamprene ye. 23Nempa keta ni tewat, ma lere ye ni tewat lo ma Ratu Smwangtany nfatutu ber tomwatar feti felan farpe ma rsatngur ber Ratu ror dalmir kateman. Ma ka rsatngur ber I rlarat Ni anftutw botunar a nbal. Fali Amninrar Ratu nmpeang ma sir rsatngur ber I farane. 24Ratu ne Smwangat. Mpa tomwatar ma rsatngur ber I a ne, ka rsatngur ber I ror kuase ma Ratu Smwangtany nal ber sir a ne. Ma ka rsatngur ber I rlarat Ni anftutw botunar a nbal.”
25Ne bate ne nfalak, “Yakw kufai feti Ray Silai ma keta nma. I a ne ma Ratu nsiduk I ma nfair tomwatar. Ma farlan I nma e keta nafbotin safe-safe monuk ber kam.”
26Mpe Yesus nfalak, “Tomwate ma mfwalak I a ne, Yakw ye lo.”
27Noak ma Yesus lolone natanuk nor bate ne, Ni manglartar rait. Mpe sir rampriang feti I natanuk nor batar sa. Nempa to tomwate fen lese nbal nof sir ma nbaran ma nenrat bate ne feti, i nose safe na iane? Nre renrat Yesus feti safema natanuk nor bate ne?
28Mpe bate ne nau kalin ni ngusi na iane, ma nti kote ma nfalak ber tomwatar na kote ne, 29“Wangur, mya ma ti tsalan tomwate ma nafbotin safe-safe monuk ma yakw kose ne lo. Nre kete I a ne Ray Silai lo?” 30Mpe tomwatar a ne rti kote burit ma rti rakmat Yesus.
31Noak ma tomwatar na kote ne to rma fuky e Yesus Ni manglartar a ne rfalak ber I, “Tuangguru mwa ma mtwame.” 32Nempa Yesus nfalak ber sir, “Yakw Ningw tnyame namin nempa kmi to mifai tnyamar ma Yakw kune ne.”
33Mpe Ni manglartar a ne rafalak ber sir, “Ise nonry tnyame ber I ye?”
34Ne Yesus nfalak, “Yakw Ningw tnyame ne iane kose klwarat I ma nsiduk Yakw ne Ni mpempeang, ma kose ksworu Ni karyayar ma nal ber Yakw. 35Kmi biase ma mfyalak feti, keta bulnar fat a betno tal let isnir. Nempa kfwalak ber a kmi, msyalan lete seriny baldu ye, gandum ma rtanam a ne nwabar lo mpa bise ma tusir. 36Tomwate ma nafwibar Yakw ber tomwatar, i farlan mangosboe ma nyefar fini. Ma tomwate ma ntulung tomwatar ma ralele Yakw, i farlan mangosboe ma nal let isnir. Lere ye mangosboe ma nal let isnir a ne nonri ni wayat nof Ratu lo. Lete isiny ma nal a ne iane tomwatar ma ralele Yakw ma keta ronri momorip dedesar. Mpa mangosboe ma nyefar fini ma mangosboe ma nal let isnir a ne raktem a rsenang. 37Ngribatnir ma biase tomwatar rfalak ye botuan. Tomwat sa nyefar fini ma tomwat walyete sa ntikar bunir. 38Yakw kswiduk a kmi ma myal kabain isnir myof lete ma to mtyanam. Tomwat walyetar ma rtanam lete ne baluan lo ma kmi e mya ma mtyikar bunir motak.”
39Ma tomwat Samariar yadin rof kote ne ralele Yesus, fali bate ne nfalak feti I nafbotin safe-safe monuk ma nose ne. 40Noak ma tomwat Samariar a ne rti rakmat Yesus, sir rtak I ma nor sir a na iane. Ne Yesus namin iane nor sir lerar du.
41Ne tomwatar na pnue ne rtafal ma yadin ma ralele Yesus fali koko sir a rdengar safe ma I naftutu ber sir. 42Mpe sir rfalak ber bate ne, “Lere ye kam malele Yesus lo nempa to nof safe ma mfwalak ber kam a ne, fali kam mdengar desar Ni anftutwar lo, ma mafai feti botuan e I a ne Ray Silai ma ntebus tomwatar monuk na saryamprene.”
Yesus nafngamone mangonbain silai sa anaky
4:43-54
43Yesus namin kote Sikhar lerar du, betno I nti propinsi Galilea. 44Ma Yesus koko I a nfalak, “To nabi ma ralang i a na ni nuse ompak.” 45Noak ma nait propinsi Galilea e tomwatar na iane rlangun I ror dalmir senange. Sir rose farane fali noak ma Yahudyar nir ler silai Paskah na Yerusalem, sir rsalan desar safe-safe ma Yesus nose ne.
46Mpene Yesus nbali I far kote Kana na propinsi Galilea. Kote ye ma Yesus nose weye fen anggur. Kote Kana ne to dodo nof kote Kapernaum. Na kote Kapernaum a ne mangonbain silai sa anaky merwane nafanas silai. 47Tomwate ne ndengar feti Yesus nma nof propinsi Yudea ma namin Galilea lo, mpa nti nakmat Yesus ma ntak I ma nti nafngamone anaky fali nafanas silai ma ketla nmat. 48Ne Yesus nfalak ber mangonbain silai ne, “Ni botuan e ka kmi msyalan kabain mpasalnar ma faniak ma Yakw kose betno milele Yakw.”
49Ne mangonbain a ne nfalak, “Maken mtwi mswalan anaky a fuky nrela nema kete nmat.”
50Nempa Yesus nfalak, “Mbwali ko, koli angkam a nangamon lo.”
Tomwate ne nalele safe ma Yesus nfalak, ne nbali i. 51Noak ma lolone dalamtene let e ni mangkaryayar rkakal i ma rfalak, “Maken, angkam a nangamon lo.”
52Ne i nenrat ni mangkaryayar a ne, “Jam safe e i nangamon?” Ne sir rfalak, “Maniap jam satu ler fardu langit a ne, isiny to mefanas lo.” 53Ne mangonbain silai ne nanremi feti maniap fafa jam a ne nbal, Yesus nfalak ber i feti angkam a nangamon lo. Mpe i nor ni dasdalam monuk ralele Yesus.
54Iane ngrimpasalan kedua ma Yesus nose. I nose ngrimpasalan a ne noak ma nbali I nof propinsi Yudea far propinsi Galilea.
Избрани в момента:
Yohanes 4: YMD
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
Yohanes 4
4
Yesus natanuk nor bat Samaria
4:1-42
1Tomwat Farisyar ketnir rdengar feti Yesus nadiris tomwatar yadin ma rlarat I nlengan nof Yohanes. 2Ni botuan e Yesus to nadiris tomwatar, nempa Ni manglartar ma radiris sir. 3Noak ma Yesus ndengar feti tomwat Farisyar rafai ngrie ne, I nbie nof propinsi Yudea ma nbali I far propinsi Galilea. 4Ma na Ni mpampane dalam ma nal far propinsi Galilea, I ka nalyole yampren Samaria. 5-6Noak a ne fafa ler fardu langit, ma Yesus nait kote sa na Samaria ngarany Sikhar. Kote ne nlosir ain ma luryain e Yakub nal ber anaky Yusuf. Na iano perigi sa namin a nbal ma rtar feti Yakub ni perigi. Noak ma nait e Yesus namtoran perigi ne seriny fali ntangw. 7-8Ne Ni manglartar rti kote ma rselir tnyamar. To dodo a nbal e bat Samaria sa nti ntol weye na iane. Mpa Yesus nfalak ber i, “Ano, mwal weye fen rufuky ma kwenum.”
9Ne bat Samaria ne nfalak, “Maken, Ko mof Yahudi ma safe motak ma mtwak weye mof bat Samaria yakw ye?” (Tomwat Yahudyar to ratanuk ror tomwat Samariar.)
10Ne Yesus nfalak, “Ano, farlan mufai feti ise ye ma ntak weye nof ko, ma farlan mufai nbal berkat silai ma Ratu nal ber tomwatar e botuan feti koko ko ma mtwak weye mof Yakw. Mpe keta kal weye ma nal momorip dedesar ber ko.”
11Ne bate ne nfalak, “Maken, perigi ye melaman ma ko to nim tol, ma keta mose farpe ma mwal weye ma nal momorip dedesar a ne ber yakw? 12Perigi ye ma luryain e nusmyamar Yakub nal ber kam. Ma i nor angkir numur ni binatngar renum weye ye nbal. Ma Ko mdwaun feti silai Ko a mlengan mof nusmyamar Yakub e mampe keta bise ma mwal weye ngamone nlengan nof weye na perigi ye e?”
13Ne Yesus nfalak, “Ise ma nenum weye ye, keta namwes a nbal. 14Nempa ise ma nenum weye ma kal ber i ye, keta to namwes lo terik ma dedesar. Fali weye ma kal ber i a ne keta neluk weye matan ma nlale dedesar na ni momorip. Ma weye matan a ne keta nlale dedesar terik ma i nonri momorip dedesar.”
15Ne bate ne nfalak, “Maken, mwal weye ne ber yakw nrela nema to kumwes lo, ma kete kmwa ma ktwol weye kof ye lo.”
16Mpe Yesus nfalak ber i, “Mbwali ko, ma mfwalak ber sawam ma midu a mya.”
17Ne bate ne nfalak, “To sawangw.”
Mpe Yesus nfalak, “Ko mfwalak farane botuan desar feti to sawam. 18Fali mufsau lain lim lo, ma merwane ma mworip mor i lere ye to sawam ber i, mpa safe ma mfwalak a ne botuan.”
19Ne bate ne nfalak, “Maken, lere ye betno kufai feti Ko ye nabi. 20Maken, kam empmyamar nusmyamar rsatngur ber Ratu na bubuar ye, nempa tomwat Yahudyar a kmi mfyalak feti, lan Yerusalem a ne ain ma tomwatar rsatngur ber Ratu.”
21Ne Yesus nfalak, “Ano, mulele safe ma kfwalak ye, keta nait ni tewat e tomwatar rsatngur ber Amninrar Ratu to na lan bubuar ye, ma to na lan Yerusalem a nbal. 22Tomwat Samariar a kmi to mifai Ratu ma msyatngur ber I a ne. Nempa tomwat Yahudyar kam e kam mafai Ratu ma msatngur ber I a ne. Fali Ratu nyoding lo feti keta I nsiduk tomwatar sa nof tomwat Yahudyar kam ma nfair tomwatar na saryamprene ye. 23Nempa keta ni tewat, ma lere ye ni tewat lo ma Ratu Smwangtany nfatutu ber tomwatar feti felan farpe ma rsatngur ber Ratu ror dalmir kateman. Ma ka rsatngur ber I rlarat Ni anftutw botunar a nbal. Fali Amninrar Ratu nmpeang ma sir rsatngur ber I farane. 24Ratu ne Smwangat. Mpa tomwatar ma rsatngur ber I a ne, ka rsatngur ber I ror kuase ma Ratu Smwangtany nal ber sir a ne. Ma ka rsatngur ber I rlarat Ni anftutw botunar a nbal.”
25Ne bate ne nfalak, “Yakw kufai feti Ray Silai ma keta nma. I a ne ma Ratu nsiduk I ma nfair tomwatar. Ma farlan I nma e keta nafbotin safe-safe monuk ber kam.”
26Mpe Yesus nfalak, “Tomwate ma mfwalak I a ne, Yakw ye lo.”
27Noak ma Yesus lolone natanuk nor bate ne, Ni manglartar rait. Mpe sir rampriang feti I natanuk nor batar sa. Nempa to tomwate fen lese nbal nof sir ma nbaran ma nenrat bate ne feti, i nose safe na iane? Nre renrat Yesus feti safema natanuk nor bate ne?
28Mpe bate ne nau kalin ni ngusi na iane, ma nti kote ma nfalak ber tomwatar na kote ne, 29“Wangur, mya ma ti tsalan tomwate ma nafbotin safe-safe monuk ma yakw kose ne lo. Nre kete I a ne Ray Silai lo?” 30Mpe tomwatar a ne rti kote burit ma rti rakmat Yesus.
31Noak ma tomwatar na kote ne to rma fuky e Yesus Ni manglartar a ne rfalak ber I, “Tuangguru mwa ma mtwame.” 32Nempa Yesus nfalak ber sir, “Yakw Ningw tnyame namin nempa kmi to mifai tnyamar ma Yakw kune ne.”
33Mpe Ni manglartar a ne rafalak ber sir, “Ise nonry tnyame ber I ye?”
34Ne Yesus nfalak, “Yakw Ningw tnyame ne iane kose klwarat I ma nsiduk Yakw ne Ni mpempeang, ma kose ksworu Ni karyayar ma nal ber Yakw. 35Kmi biase ma mfyalak feti, keta bulnar fat a betno tal let isnir. Nempa kfwalak ber a kmi, msyalan lete seriny baldu ye, gandum ma rtanam a ne nwabar lo mpa bise ma tusir. 36Tomwate ma nafwibar Yakw ber tomwatar, i farlan mangosboe ma nyefar fini. Ma tomwate ma ntulung tomwatar ma ralele Yakw, i farlan mangosboe ma nal let isnir. Lere ye mangosboe ma nal let isnir a ne nonri ni wayat nof Ratu lo. Lete isiny ma nal a ne iane tomwatar ma ralele Yakw ma keta ronri momorip dedesar. Mpa mangosboe ma nyefar fini ma mangosboe ma nal let isnir a ne raktem a rsenang. 37Ngribatnir ma biase tomwatar rfalak ye botuan. Tomwat sa nyefar fini ma tomwat walyete sa ntikar bunir. 38Yakw kswiduk a kmi ma myal kabain isnir myof lete ma to mtyanam. Tomwat walyetar ma rtanam lete ne baluan lo ma kmi e mya ma mtyikar bunir motak.”
39Ma tomwat Samariar yadin rof kote ne ralele Yesus, fali bate ne nfalak feti I nafbotin safe-safe monuk ma nose ne. 40Noak ma tomwat Samariar a ne rti rakmat Yesus, sir rtak I ma nor sir a na iane. Ne Yesus namin iane nor sir lerar du.
41Ne tomwatar na pnue ne rtafal ma yadin ma ralele Yesus fali koko sir a rdengar safe ma I naftutu ber sir. 42Mpe sir rfalak ber bate ne, “Lere ye kam malele Yesus lo nempa to nof safe ma mfwalak ber kam a ne, fali kam mdengar desar Ni anftutwar lo, ma mafai feti botuan e I a ne Ray Silai ma ntebus tomwatar monuk na saryamprene.”
Yesus nafngamone mangonbain silai sa anaky
4:43-54
43Yesus namin kote Sikhar lerar du, betno I nti propinsi Galilea. 44Ma Yesus koko I a nfalak, “To nabi ma ralang i a na ni nuse ompak.” 45Noak ma nait propinsi Galilea e tomwatar na iane rlangun I ror dalmir senange. Sir rose farane fali noak ma Yahudyar nir ler silai Paskah na Yerusalem, sir rsalan desar safe-safe ma Yesus nose ne.
46Mpene Yesus nbali I far kote Kana na propinsi Galilea. Kote ye ma Yesus nose weye fen anggur. Kote Kana ne to dodo nof kote Kapernaum. Na kote Kapernaum a ne mangonbain silai sa anaky merwane nafanas silai. 47Tomwate ne ndengar feti Yesus nma nof propinsi Yudea ma namin Galilea lo, mpa nti nakmat Yesus ma ntak I ma nti nafngamone anaky fali nafanas silai ma ketla nmat. 48Ne Yesus nfalak ber mangonbain silai ne, “Ni botuan e ka kmi msyalan kabain mpasalnar ma faniak ma Yakw kose betno milele Yakw.”
49Ne mangonbain a ne nfalak, “Maken mtwi mswalan anaky a fuky nrela nema kete nmat.”
50Nempa Yesus nfalak, “Mbwali ko, koli angkam a nangamon lo.”
Tomwate ne nalele safe ma Yesus nfalak, ne nbali i. 51Noak ma lolone dalamtene let e ni mangkaryayar rkakal i ma rfalak, “Maken, angkam a nangamon lo.”
52Ne i nenrat ni mangkaryayar a ne, “Jam safe e i nangamon?” Ne sir rfalak, “Maniap jam satu ler fardu langit a ne, isiny to mefanas lo.” 53Ne mangonbain silai ne nanremi feti maniap fafa jam a ne nbal, Yesus nfalak ber i feti angkam a nangamon lo. Mpe i nor ni dasdalam monuk ralele Yesus.
54Iane ngrimpasalan kedua ma Yesus nose. I nose ngrimpasalan a ne noak ma nbali I nof propinsi Yudea far propinsi Galilea.
Избрани в момента:
:
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Yayasan Pemberdayaan Masyarakat Desa © Wycliffe Bible Translators, Inc. All rights reserved.