Жаратылыу 2
2
1Алай болуп, кёкле бла жер эмда алада болгъан хар зат алай тамам этилгендиле.
2Аллах Кесини этген ишлерин жетинчи кюннге тамам этгенди. Жетинчи кюн а Ол Кесини битеу этген ишлеринден тынчайгъанды. 3Жетинчи кюнню Аллах алгъышлы этгенди, сыйлы этгенди, нек дегенде, Аллах битеу этген жаратыу ишлеринден ол кюн тынчайгъанды.
Биринчи адамла Эдем бахчасында
4Бу – кёк бла жер жаратылгъаныны тарыхыды. Раббий Аллах жерни бла кёкню болдургъан заманда, 5алыкъа жер юсюнде бир тюрлю чырпы жокъ эди, не бир тюрлю ханс ёсмеген эди. Раббий Аллах алыкъа жерге жауун жаудурмагъан эди, жерни ишлеп жарашдырыр адам да жокъ эди. 6Алай а жер тюбюнден суу чыгъып, битеу жер юсюн сугъара эди. 7Сора Раббий Аллах жерни топурагъындан#2:7 Топуракъ – оригиналда, чюйют тилде – «адама». «Адам» деген сёз бла ариу келишеди. адам ишлеп жаратханды эм аны бурунуна жашау тылпыу юфгюргенди. Алай бла адам жашар жан болгъанды.
8Раббий Аллах кюн чыкъгъан жанында болгъан Эдем жерде бахча орнатханды эм жаратхан адамын анда жерлешдиргенди. 9Раббий Аллах жерден ариу къарамлы эм ашха жараулу хар тюрлю терек ёсдюргенди. Бахчаны ортасында уа жашау терек эмда ахшыны бла аманны не болгъанын билдирген терек бар эди.
10Бахчаны сугъарыр ючюн, Эдемден баргъан суу чыгъа эди. Андан сора ол тёрт суугъа юлешине эди. 11Бирини аты Пишонду. Ол, алтыны болгъан Хауиланы битеу жерини тёгереги бла барады. 12Ол жерни алтыны иги алтынды. Анда, дагъыда, ариу ийисли чайыр да, оникс ташла да бардыла. 13Экинчи сууну аты Гихонду. Ол Кушну битеу жерини тёгереги бла барады. 14Ючюнчю сууну аты Хиддекелди#2:14 Хиддекел – бюгюннгю Тигр суу.. Ол Ашшурну кюн чыкъгъан жаны бла барады. Тёртюнчю суу Эфратды.
15Сора Раббий Аллах, Эдемни бахчасын ишлеп жарашдырсын эм сакъласын деп, адамны анда жерлешдиргенди. 16Раббий Аллах адамгъа былай буюргъанды: «Бахчаны хар терегинден сюйгенинг кибик кёгет ашаргъа эркинсе. 17Ахшыны бла аманны не болгъанын билдирген терекден а ашама. Ашасанг а, тюз ол кюн ёллюксе», – дегенди.
18Сора Раббий Аллах: «Адамгъа жангыз болгъаны иги тюйюлдю. Анга келишген бир болушлукъчу жаратайым», – дегенди. 19Раббий Аллах топуракъдан аулакъдагъы жаныуарланы бла кёкде учхан къанатлыланы хар тюрлюсюн жаратхан эди. Адам алагъа не атла атарыгъын кёрюр ючюн, Аллах аланы аны аллына келтиргенди. Хар жанлыгъа адам не атаса да, аны аты алай болгъанды. 20Адам битеу хайыуанлагъа да, битеу кёкде учхан къанатлылагъа да, битеу аулакъдагъы жаныуарлагъа да атла атагъанды. Алай а адамгъа, анга келишген болушлукъчу табылмагъанды.
21Сора Раббий Аллах адамгъа къаты жукъу келтиргенди да, ол жукълагъан заманда Раббий Аллах аны иегилеринден бирин алып, ол жерин эт бла жапханды. 22Сора Раббий Аллах адамдан алыннган иегиден тиширыу ишлеп, аны адамгъа келтиргенди.
23Адам а:
«Ма, ахырында бу мени сюеклеримден сюекди,
эмда мени чархымдан чархды.
Ол эр кишиден алыннганы себепли
анга „къатын“#2:23 Эр киши, къатын – оригиналда, чюйют тилде «иш» бли «ишша» деген сёзле болуп, бир бирге ариу келишедиле. деп айтыллыкъды», – дегенди.
24Аны себепли, эр киши атасын бла анасын къоюп, къатынына къошулур да, ала бир чарх болурла.
25Адам бла къатыны, экиси да къымыжа болгъанлыкъгъа, уялмай эдиле.
Избрани в момента:
Жаратылыу 2: МалкъСК
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© Институт перевода Библии, 2020-2024