Maruku 2
2
Pakragragi ki Yésu iduru avelevele iya na maciemɨ ico
(Matai 9.1-8; Luka 5.17-26)
1Ipkapielɨ na viénɨ, ki Yésu lasivirilaa mwa Kaparnaum; iku tikadra danɨ rɨsaliya pirigigu. 2Madronaico isarbu, sitɨ danɨ ico mdrikidrikisi, bilingtava tulucubunga ka tédra na téka. Yésu ku déngdo minidria, 3Iké tathipte na ico mukɨné lobɨca sesa iduru avɨlɨvɨlɨ iya macemɨ na ico pcnglɨ Yésu na. 4Makasi madro na ico, iduru lobɨcadria pwa tulucubungadra ki Yésu. Suwanga cɨravi ruruga ku tékadra ki Yésu waclebɨ ubungu sobudra danɨ, laradria ku macemɨ, pangpara cireknadra spa, pavivi pidide. 5Ki Yésu cɨnglɨdra kɨné tékabkanadra ku icico, lapusobakadria ku maciemɨ, <<Vlakɨ, ku psaila su ka ovarangadria.>>
6Ikédria itapiya ku ubrubru Sésio na singsi inunu, piké kdrɨdrɨmɨdra mbakbaka, 7<<Ikné ico ka adurani séngtarse msobaka! Tkathadra Ticomtia, aci ku ikélaa na kɨcɨnga ovara psaila?>>
8Ki Yésu mkakainga rigu cɨnglɨ ku pakɨdrɨdrɨmadra, supsobakangadria, <<Nakumu tuménia pakɨdrɨdrɨmɨ? 9Lapsobakadria ku maciemɨ, <Ovarangadria ku psailasu>? <Icikɨla, mra ku spésu gia> mamrɨmrangadria? 10Nirgu ptapɨdrɨngɨ makɨmwa Vlakɨdra na Ico ikédra déda iké kɨcɨnga ovara psaila.>> Si lapsobakadria ku maciemɨ, 11<<tumiania nomakɨswa, icikɨla, mra ku spésu gia siviri!>>
12Kdri ico ka ickalenga, ribungu mra spédra, iké ngurubua cɨcɨngelɨ gia baltɨ dodavce, rɨsalia mrɨkɨmɨ, pkilivu Ticomtia msobaka, <<Icɨngɨlɨlanamɨ tuminia na depɨ!>>
Ki Yésu ka udolu Lrivi na
(Matai 9.9-13; Luka 5.27-32)
13Ki Yésu ka amualaa Galrilri tɨbaru tibila, madro na ico isarbu iké biladra, si Yésu ka laburuburudria. 14Iku gidralaa avétha tulucubunga dodavce, lacɨngɨlɨ sesa na amamara na zéking, amani vlakɨdra ki Alevé ka Lrivi, inunu ikédria ku tararana zéking, ki Yésu ka lapsobakadria, <<Nanga ksapara kwa>> Lrivi ka suciklenga ksapara Yésu na.
15Yienɨnga ki Yésu iké dadra Lrivi kuenɨ, madro ku amamara na zéking si makurathɨ na ico ksaparadria; iké druma na ico terɨsɨ Yésu na si sétodra kuenɨ. 16Iké druma na ubrubru Sésio na singsi si Hualrisai na ico cɨngɨlɨ Yésu na terɨsɨ makurathɨ ico si amamara na zéking kuenɨ, supusobakanga sétodra, <<Nakuni ki Yésu terɨsɨ amamara na zéking si makurathɨ na ico terɨsɨ kuenɨ?>>
17Ki Yésu labiciringi, lapsobaka, <<Maragragi na ico isakai na Kuisang, iké cemɨne na ico lasaké. Tuknianɨli ikmanikɨ odolu matkadrɨngé técavɨnadra ico, odolu makurathɨ na ico.>>
Poké na ulɨgɨsɨ
(Matai 9.14-17; Luka 5.33-39)
18Ikédrianɨ, pababno pkéséndri Yuhani ku sétodra si Hualrisai ico tikadranga lɨgɨsɨ. Iké na ico kibruburu Yésu na, <<Nakuni ki pababno pkéséndri Yuhani si Hualrisai na ico sétoni ligɨsɨ, séto su ka ilɨgɨsɨɨ?>>
19Ki Yésu labri, <<Ku saplangane na sovlé, takpara kuenɨ na brabra ka nuduruma lɨgɨsɨɨ? Snakédrala saplangne sovlé terɨsɨ ka, nulɨgɨsiya. 20Makasi muidranga na viéné, ku saplangne na sovlé ka nugiamadria ɨmɨcɨ, nuskéliadrianga lɨgɨsɨ.
21<<Tédra na ico amara bovala na ɨbɨlɨ sacɨkopu masipiri na mamne, ina tuménidria ka, bovala cikwadra ka nubriti ma maspiri na kipingi, nuktararadro lia mbriti. 22Tédra na ico amara bova na bɨva pwapké sosu masupiringa thubungu, ina tuminidria, bova na bɨva ka nusingmkɨma mpisre masipiri na thubungu, nu koerthe ma tolora. Sukédra, bova na bɨva ka piké bovala na thubungu!>>
Poké na tébarbarvia na vienɨ
(Matai 12.1-8; Luka 6.1-5)
23Iké ku sesa tébarbarvia na vienɨ, ki Yésu ongké mugi tomuma. Ku sétodra késapradria; gia tkodvadvacɨ, tkupsisi mɨdro ni mugi. 24Ku Hualrisai ico masobka Yésu na, <<Cɨngɨla, séto su iku adra idepɨyadra tébarbarvia na vienɨ ka udepɨdria!>>
25Ki Yésu ka labri, <<Iki Davidi ku niké na kne midra ka aci ku dopadra, ingulringola mumu? Ku késapradria abési, 26Modanɨ ku dadra Ticomtia, lakanɨ ku spatramɨnadra Ticomtia na pang. Ikné dɨdebɨ ka iké kɨné Abiathar ku sidepɨnila tadradronga sidepɨ lɨgɨsɨ. Ngutuluru na Horécɨ ta ka, tkathani sidepɨ na lɨgɨsɨ ka uduru kuenɨ kɨné pan; makasi Davidi angikanɨ, si lavela bui ku kisapradria kolu pkanɨ.>>
27Lapsobaka ki Yésu, <<Tébarbarvia na vienɨ ka kiaké na ico ɨktɨ; ico ikmani kiaké tébarbarvia na vienɨ kétvaleke. 28Sukéninga, Vlakɨdra na Ico ka amani tébarbarvia na vienɨ na Pɨlɨngɨ.>>
Избрани в момента:
Maruku 2: Maolin23
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© The Bible Society in Taiwan, 2023