ማቶሳ 4
4
ዬሱሲ ፓጬቴዳ
(ማር 1፡12-13፤ ሉቅ 4፡1-13)
1ሄዋፔ ጉዪያን፥ ፃላሂያን ፓጬታና ማላ፥ ጌሻ ኣያናይ ኣሳይ ዴዔና ሳዓ ዬሱሳ ኣፌዳ። 2ዬሱሲ ኦይታሙ ጋላሳኔ ኦይታሙ ቃማ ፆሞዋፔ ጉዪያን ኮሻቴዳ። 3ፃላሂ ዪዴ ኣ፥ «ኔኒ ፆሳ ናዓ ጊዶፔ፥ ኣኔ ሃ ሹቻቱዋ ኡኪ ጊዳና ማላ ጋ» ያጌዳ።
4ሺን ዬሱሲ ዛሪዴ፥ «ፆሳ ማፃፋን፥ ‹ኣሳይ ፆሳይ ሃሳዪያ ቃላ ኡባን ዴዓናፔ ኣቲን፥ ኡኪ ፃላላን ዴዔና› ያጌቲ ፃፌቴዳ» ያጌዳ። #ዛር 8፡3
5ሄዋፔ ጉዪያን፥ ፃላሂ ዬሱሳ ጌሻ ካታማ ኣፊ ጌሻ ጎሊያ ፄራን ኤሲዴ፥ 6«ኔኒ ፆሳ ናዓ ጊዶፔ፥ ኣኔ ዱጌ ኩንዳ። ኣዪሲ ጎፔ፥ ፆሳ ማፃፋን፥
‹ፆሳይ ባሬ ኪታንቻቱዋ
ኔው ኣዛዛናዋ›
ቃሲ ‹ኡንቱንቱ ኔ ጌዲ ሹቻን ቤቴና ማላ፥
ባሬንቱ ኩሺያን ኔና ዴንናዋንታ›
ያጌቲ ፃፌቴዳ» ያጌዳ። #ማዝ 91፡11-12
7ዬሱሲ ዛሪዴ ኣ፥ «ቃሲካ ፆሳ ማፃፋን፥ ‹ጎዳ ኔ ፆሳ ፓጮፓ› ያጌቲ ፃፌቴዳ» ያጌዳ። #ዛር 6፡16
8ቃሲ ፃላሂ ዬሱሳ ኢቲ ዳሮ ዎልቃማ ዴሪያ ፄራ ኬሲዴ፥ ሃ ኣላሚያን ዴዒያ ካዉቴ ኡባኔ ኡንቱንቱ ቦንቹዋ 9ቤሲዴ ኣ፥ «ኔኒ ታው ጉልባታዴ ጎዪኖፔ፥ ታኒ ሃዋ ኡባ ኔው ኢማና» ያጌዳ።
10ሄ ዎዴ ዬሱሲ ዛሪዴ ኣ፥ «ላ ሃ ሴፃናው ሃካ፤ ኣዪሲ ጎፔ፥ ፆሳ ማፃፋን፥ ‹ጎዳው፥ ኔ ፆሳው ጎዪና፤ ኣ ፃላላ ጎሼታ› ጌቴቲ ፃፌቴዳ» ያጌዳ። #ዛር 6፡13
11ሄዋፔ ጉዪያን፥ ፃላሂ ዬሱሳ ኣጊና፥ ኪታንቻቱ ዪዴ፥ ኣው ኦዲኖ።
ዬሱሲ ባሬ ታማሪሲያ ኦሱዋ ጋሊላን ዶሜዳ
(ማር 1፡14-15፤ ሉቅ 4፡14-15)
12ዮሃኒሲ ቃሼቴዳዋ ዬሱሲ ሲሴዳ ዎዴ፥ ጋሊላ ጌቴቲያ ጋዲያ ቤዳ። 13ናዚሬቴፔ ኬሲዴ፥ ቂፊሪናሆማ ካታማ ቢዴ፥ ያኒ ዴዔዳ፤ ቂፊሪናሆሚ ዛቢሎናኒኔ ኒፍታሌሜ ጋዲያን ዴዒያ ጋሊላ ኣባ ማታን ዴዔ። 14ሃዌ ሃኔዳዌ ናቢያ ኢሲያሲ፥
15«ዛቢሎኔ ጋዲያኒኔ ኒፍታሌሜ ጋዲያን፥
ኣባ ኦጊያን ዮርዳኖሳ ሻፋፔ ሄፊን ባጋን፥
ኣዪሁዳ ጊዴና ኣሳይ ዴዒያ ጋሊላን፥
16ማኒ ዴዒያ ኣሳይ
ዎልቃማ ፖዑዋ ቤዔዳ።
ቃሲ ሃይቁዋ ኩዋይ ዴዒያ ጋዲያን
ኡቴዳዋንቶ ፖዑ ኬሴዳ»
ያጌዳዌ ፖሌታና ማላሳ። #ኢሳ 9፡1-2
17ሄ ዎዲያፔ ዶሚዴ ዬሱሲ፥
«ሂንቴ ናጋራ ፓፂቴ፤ ኣዪሲ ጎፔ፥
ሳሉዋ ካዉቴይ ማታቴዳ ዲራሳ»
ጊዴ ቃላ ኦዱዋ ዶሜዳ።
ዬሱሲ ባሬና ካሊያ ኦይዳቱዋ ፄጌዳ
(ማር 1፡16-20፤ ሉቅ 5፡1-11)
18ዬሱሲ ጋሊላ ኣባ ማታና ኣዴ፥ ላዑ ኢሻቱ ጴፂሮሳ ጌቴቲያ ሲሞኒኔ ኣ ኢሻ ኢንዲራሲ፥ ሞሊያ ኦይቂያዋንታ ጊዶ ዲራው፥ ዳባ #4፡18 ዳባ፡ ሃዋ ጉሳይ ሞሊያ ጲራናው ዎይ ኦይቃናው ሃን ዬጊያ ኣማራዋን ማራቢያ ጊያዋ። ኣባን ዬጊያዋንታ ቤዔዳ። 19ኡንቱንታ፥ «ታና ካሊቴ፤ ታኒ ሂንቴና ሞሊያ ኦይቂያዋዳን ኣሳ ታኮ ኣሂያ ኦጊያ ታማሪሳና» ያጌዳ። 20ኡንቱንቱ ኤሌካ ባሬንቱ ዳባ ኣጊዴ፥ ዬሱሳ ካሌዲኖ።
21ዬሱሲ ሄዋፔ ሲንኮ ቢዴ፥ ሃራ ላዑ ኢሻቱዋ፥ ዛቢዲዮሳ ናና ያዪቆባኔ ኣ ኢሻ ዮሃኒሳ ቤዔዳ፤ ኡንቱንቱ ባሬንቱ ኣዉዋ ዛቢዲዮሳና ሃ ቦላን ቢያ ዎንጊሪያ ጊዶን ባሬንቱ ዳባ ጊጊሲያዋንታ ቤዒዴ፥ ፄሴዳ። 22ኡንቱንቱ ኤሌካ ሃን ቢያ ዎንጊሪያኔ ባሬንቱ ኣዉዋ ኣጊዴ፥ ዬሱሳ ካሌዲኖ።
ዬሱሲ ጮራ ኣሳ ታማሪሴዳኔ ፓዳ
(ሉቅ 6፡17-19)
23ዬሱሲ ኣዪሁዳ ዎሳ ጎሌቱዋን ታማሪሲዴ፥ ካዉቴ ሚሺራቹዋ ቃላ ኦዲዲኔ ቃሲ ሃርጊያ ኡባፔኔ ሳኩዋ ኡባፔ ኣሳ ፓዴ፥ ጋሊላ ጋዲያ ኡባን ዩዬዳ። 24ኣ ዋሪ ሶሪያ ጋዲያ ኡባ ጋኬዳ፤ ዱማ ዱማ ሃርጊያን ኦይቄቲዴ ሃርጌዳ ኣሳ ኡባ፥ ፃላሃቱዋን ኦይቄቴዳዋንታ፥ ዪጩዋ ሳኩ ዴዒያዋንታ፥ ቃሲ ጉንዴድዳዋንታ ኣሳይ ዬሱሳኮ ኣሄዳ፤ ኢ ኡንቱንታ ፓዳ። 25ጮራ ኣሳይ ጋሊላፔ፥ ታሙ ካታማቱዋፔ፥ ዬሩሳላሜፔ፥ ዪሁዳፔኔ ዮርዳኖሳፔ ሄፊንን ዴዒያ ጋዲያፔ ዬሱሳ ካሌዲኖ።
Избрани в момента:
ማቶሳ 4: dwrENT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2011, Wycliffe Bible Translators, Inc. All rights reserved.
Научете повече за Ooratha Caaquwaa