Popular Bible Verses from SAN MATEO 24

Share

Caroorije átaje seeto majuu aninemo nutuagaro. To bairo ca-bai nutuato camaja capaarã Dio ye quetire ca-apibatana cʉ̃re nʉcʉbʉgo janagarãma. Na majuu quena to bairona ame nʉcʉbʉgo janagarãma. To bairo capaarã ca-janarã na ca-anibato quena noa tʉgooña tutuari yʉ ye quetire ca-api nʉcʉbʉgo janaquẽna macare na netoogʉmi Dio.

To bairi ati ʉmʉrecóo ca-petiparo jʉgoye yʉ ye quetire ati yepa macanare to canacã poa macanare na ca-buiope anigaro. To canacã poa macana na ca-queti api petiro bero to cõo ati ʉmʉrecóo petigaro yua, jã ca-ĩiwĩ Jesú.

Camaja amequẽri ame jĩagarãma. Ape paʉri, ape paʉri to bairo jeto amequẽrique to bairo na cá-átiere mʉja queti apigarã. To bairo ca-bairije apirã uwi tʉgooñaquẽja. To bairo jeto anigaro ati yʉtea ca-petiparo jʉgoye. Petoacã rʉjagaro mai.

Jicã maja ape maja mena amequẽgarãma. Jicãʉ ʉpaʉ cʉ̃ yarã jãa apeĩ ʉpaʉ cʉ̃ yarã mena amequẽgarãma. Ati yepa nipetiropʉ to bairo jeto átigarãma. Ape paʉripʉ ʉgarique ca-mano ñigo boagarãma. Ape paʉri yepa nanaagaro. To bairo camaja seeto na ca-tamuori wameri to ca-anibato quena capee majuu na ca-tamuope rʉjagaro mai.

Cariape mʉjaare yʉ ĩi. Nipetirije mʉjaare yʉ ca-ĩri wamere bairona baigaro. Ʉmʉrecoo, yepa quena wajoagaro. Yʉ ca-ĩi buiorije maca wajoaquetigaro. Mʉjaare yʉ ca-ĩi buiorore bairona baigaro. Ati yʉtea Dio cʉ̃ ca-wajoaparo jʉgoye macana na ca-yajiparo jʉgoye nipetiro mʉjaare yʉ ca-ĩri wamere bairona baigaro.

Capaarã ĩitori, “Dio cʉ̃ ca-rotiro mena yʉ áa, Dio cʉ̃ ca-jooricʉ majuu, Cristo yʉ ãa,” ca-ĩitorã anigarãma. Na ca-ĩitorijere apiʉjagarãma camaja capaarã.

’Ti paʉ ca-ano yʉ ye quetire ca-apiteerã mʉja ñee aágarãma ʉparã tʉpʉre, na popiyeyeya ĩirã. Mʉja jĩagarãma. Yʉre ca-apiʉjarã mʉja ca-ano maca to canacã maca macana mʉja teegarãma. Ti paʉ ca-ano capaarã, “Cristore ca-apiʉjaʉ yʉ ãa,” ca-ĩibatana janagarãma, apiʉjaquetibana. To bairo baibana ca-jʉgoye na ca-ame bapa cʉtibatanarena ʉparãre na wadajãgarãma. To bairi ame tʉjʉ tutigarãma. Aperã capaarã, “Dio ye quetire ca-buioʉ yʉ ãa,” jocarãna ape wame macare ca-ĩi buiorã anigarãma. To bairo na ca-ĩitorije to ca-anibato quena camaja capaarã na apiʉjagarãma.

To bairo jã ca-ĩiro oco bairo jã ca-ĩi buiowĩ Jesú: —Aperã mʉjaare na ca-ĩitorijere mani apiʉjare ĩirã caroaro tʉgooña majiña.

To bairona mʉja quena, “To ca-paʉ majuu tunu atígʉmi Cristo, Dio cʉ̃ ca-joʉ,” mʉja ĩi majiquẽe. To bairi caroaro yʉ ca-tunu atípere tʉgooñari caroaro yʉ ca-boorijere áti anicõaña, jã ca-ĩiwĩ Jesú.

’ “Di rʉmʉ majuu mani Ʉpaʉ tunu atígʉmi,” mʉja ĩi majiquẽe. To bairi caroaro tʉgooñari to canacã rʉmʉ yʉ ca-boorore bairo áticõa aninucuña.

’Ati yʉtea ca-petiri paʉ, “Di rʉmʉ, di paʉ majuu petigaro,” jicãʉ maca ĩi majiquẽemi. Dio tʉ macana quena majiquẽema. Yʉ quena Dio Macʉ anibacʉ quena yʉ majiquẽe. Mani Pacʉ Dio jicãʉna ãmi tiere ca-majii.

Ca-ĩito pairã anigarãma capaarã. “Yʉa Dio cʉ̃ ca-jooricʉ yʉ ãa.” Aperã, “Dio ye quetire ca-buioʉ yʉ ãa,” ca-ĩitorã anigarãma. Capee áti iñooriquere átigarãma ca-majiri maja cúmúa na cá-áti anie mena, Dio yarãre cʉ̃ ca-cũricarã Diore na apiʉja janaato ĩirã, jã macare na apiʉjaato ĩirã.

’Noé tirʉmʉpʉ macacʉ cʉ̃ ca-ani rʉmʉri ca-bairiquere bairona baigaro yʉ ca-tunu atíparo jʉgoyeacã. Ti rʉmʉ ca-ano Dio ati yepa cʉ̃ ca-ruu-paro jʉgoye camaja ʉga, eti, nʉmocʉti, cãromia quena manapʉacʉti ca-baiyuparã, ñeere ca-baipere tʉgooñarique paiquẽnana. To bairona cá-áticõa aninucuñuparã Noé cumua pairica cʉ̃ ca-jãaparo jʉgoye. Oco pairo majuu ca-ocaparo jʉgoye, rua yajigarã jʉgoye, “Mani rua reegarã,” ca-ĩi majiquẽjuparã. To bairona na cá-átatore bairona áticõa anigarãma camaja yʉ cá-atíparo jʉgoye.