Popular Bible Verses from Icitendekelo 27

Share

Lesa engakupeela umume wa ku mulu, no mushili uwafunda, ne fisabo ifingi no mwangashi upya. Imishobo ingalakutumika na bantu bonse balekunakila. Niwe ube imfumu ya bamunonko, na bana abaume bakwa noko bengalakunakila. Abo abakulapisha nabo balapishiwe, na bakupaala nabo bapaalwe.”

Esau epakusosa ati, “Bushe tacalungama ukumwinika ishina lya Yakobo? Nomba ancenjesha imiku ibili. Alimpokele insambu sha bubeli bwandi. Kabili apoka ne paalo.” Elyo aipusha ati, “Bushe tamunshilileko ipaalo?”

Isaki wishi epakwasuka mwane ati, “Icifulo cobe cikaba ukutali na ku mushili uwafunda, cikaba ukutali na ku mume wa mu mulu. Ni ku lupanga eko ukamwena ukwikala umumi. Kabili ukalatumika munonko. Lelo ilyo ukalwisha, lyena elyo ukafuma mwikoli lyakwe.”

Esau aebele wishi ati, “Bushe tata mwakwatafye ipaalo limo epela? Tata wandi mpaaleniko na ine wine!” Elyo Esau asansula ishiwi lyakwe alalila.