Popular Bible Verses from ငဝ်ႈ 27

Share

ပိူဝ်ႈ​ၼႆ​လႄႈ​ႁႂ်ႈ​ၽြႃးပဵၼ်ၸဝ်ႈ​ပၼ်​ၼမ်ႉၼၢႆး​ၵႃႈတီႈ​ၽႃႉၵၢင်ႁၢဝ်၊ၶွၼ်ႇၼမ်ႉမၼ်း​လိၼ်၊ၶဝ်ႈပိူၵ်ႇ​ၶဝ်ႈသၢၼ်၊ဢိၵ်ႇတင်း​ၼမ်ႉမၢၵ်ႇၸပိတ်ႉ​ၼမ်ၼႃႇ​တီႈ​မႂ်း​သေၵမ်း​လူၺ်ႈ။- ႁႂ်ႈ​ၸိူဝ်ႉၶိူဝ်း​ၵူၼ်း​တင်းလၢႆ​လႆႈ​ပဵၼ်​ၶႃႈ​ၵူၼ်းၸႂ်ႉ​မႂ်း၊ႁႂ်ႈ​မဵဝ်း​ၵူၼ်း​တင်းလၢႆ​လႆႈ​ၵူမ်ႈႁူဝ်​ၵွမ်းႁူဝ်​ၵႃႈတီႈ​ၽၢႆႇၼႃႈ​မႂ်း၊ႁႂ်ႈ​မႂ်း​လႆႈ​ဢုပ်ႉ​ၵႃႈၼိူဝ်​ပီႈၼွင်ႉ​ၸိူဝ်ႉၶိူဝ်း​မႂ်း​လႄႈ​ႁႂ်ႈ​ၸူဝ်ႈ​လုၵ်ႈ​ပၢၼ်​လၢၼ်​မႄႈ​မႂ်း​လႆႈ​ၵူမ်ႈၵွမ်းႁူဝ်​ၵႃႈတီႈ​ၽၢႆႇၼႃႈ​မႂ်း​သေၵမ်း​လူၺ်ႈ။ ႁႂ်ႈ​ၶဝ်​ၸိူဝ်း​ဢၼ်​ၵိၼ်ႇ​ဝႃႈ​မႂ်း​တင်းလၢႆ​ၼၼ်ႉ​လႆႈ​ၶၢမ်ႇ​တၢင်းၵိၼ်ႇ​ဝႃႈ​လႄႈ​ႁႂ်ႈ​ၶဝ်​ၸိူဝ်း​ဢၼ်​ပၼ်တၢင်းလီ​တီႈ​မႂ်း​တင်းလၢႆ လႆႈ​ၶၢမ်ႇ​ဢဝ်​တၢင်းလီ​မၢင်ႇၵလႃႇ​သေၵမ်း​လူၺ်ႈ၊” ဝႃႈ​ၼင်ႇ​ၼႆ​ဢေႃႈ။

ဢေးသေႃး၊ လၢတ်ႈ​ဝႃႈ၊ “မၼ်း​ၼႆႉ​ၵိုင်ႇ​ႁွင်ႉ​ၸိုဝ်ႈ​ဝႃႈ၊ ယႃႇၵုပ်ႈ၊ တႄႉတႄႉ​ယဝ်ႉ။ မၼ်း​ပႅတ်ႉလႅၼ်​ၵဝ်ၶႃႈ​ထူၼ်ႈ​ထိုင်​သွင်​ပွၵ်ႈ​ၶႃႈ​ယဝ်ႉ။ ပွၵ်ႈ​ဢွၼ်တၢင်း​မၼ်း​ဢဝ်​ဢရႃႇ​လုၵ်ႈတူၼ်ႈ​ၵဝ်ၶႃႈ​ၵႂႃႇ​ယဝ်ႉ​လႄႈ၊ပွၵ်ႈ​ၼႆႉ​မၼ်း​သမ်ႉ​ဢဝ်​တၢင်းလီ​မၢင်ႇၵလႃႇ​ၵဝ်ၶႃႈ​ၵႂႃႇ​ၶႃႈ​ယဝ်ႉ။ ပေႃႈ​ႁဝ်း​ဢမ်ႇ​ဢဝ်​တၢင်းလီ​မၢင်ႇၵလႃႇ​ဢၼ်​ၵိုတ်းၵျၢၼ်ႇ​ဝႆႉ​ပုၼ်ႈ​ၵဝ်ၶႃႈ​သေ​ဢိတ်း​သေ​ဢီႈ​ယဝ်ႉ​ၶႃႈ​ႁိုဝ်း၊” ဝႃႈ​ၼင်ႇ​ၼႆ​ဢေႃႈ။

မိူဝ်ႈ​ၼၼ်ႉ၊ ဢိၸၢၵ်ႈ၊ လၢတ်ႈ​တီႈ​မၼ်း​လႄႈ​ဝႃႈ၊ “တီႈ​ယူႇ​တီႈ​သဝ်း​မႂ်း​တၵ်း​ႁၢင်ႇ​ၵႆ​ၵၼ်​တင်း​တီႈ​ဢၼ်​ၶွၼ်ႇၼမ်ႉမၼ်း​လိၼ်​မီး​ၼၼ်ႉ​လႄႈ​တၵ်း​ယူႇ ၵႆ​သေ​တီႈ​ဢၼ်​ၼမ်ႉၼၢႆး​တူၵ်း​ၽႃႉ​ၼၼ်ႉ​ဢေႃႈ။” “မႂ်း​တၵ်း​လႆႈ​လဵင်ႉ​ဢသၢၵ်ႈ​မႂ်း​လူၺ်ႈ​လၢပ်ႇ​လူၺ်ႈ​လႅဝ်း​ဢေႃႈ။ မႂ်း​တၵ်း​လႆႈ​ႁဵတ်း​ၶႃႈ​တီႈ​ၼွင်ႉၸၢႆး​မႂ်း​ၵူၺ်း​ယဝ်ႉ။ ၵူၺ်းၵႃႈ၊မိူဝ်ႈ​ဢၼ်​မႂ်း​လုၵ်ႉ​ၽိုၼ်ႉ​ပႄႉၼႅင်ႇ​ၸိုင်၊ မႂ်း​တေ​လႆႈ​ၵၢင်းလွတ်ႈ​သေ​တၢင်း​ဢၼ်​မၼ်း​ဢုပ်ႉပိူင်ႇ​ၼၼ်ႉ​ဢေႃႈ၊” ဝႃႈ​ၼင်ႇ​ၼႆ​ဢေႃႈ။

ဢေးသေႃး၊ သိုပ်ႇ​ယွၼ်း​တီႈ​ပေႃႈ​မၼ်း​ထႅင်ႈ​လႄႈ​ဝႃႈ၊ “ပေႃႈ​ၵဝ်ၶႃႈ႟။ ၸွင်ႇ​ပေႃႈ​ႁဝ်း​မီး​တၢင်းလီ​မၢင်ႇၵလႃႇ​ၶေႃႈ​လဵဝ်​ၵူၺ်း​ၶႃႈ​ႁိုဝ်း။ ဢူဝ်း​ပေႃႈ၊တီႈ​ၵဝ်ၶႃႈ​ၵေႃႈ​ပၼ်တၢင်းလီ​မၢင်ႇၵလႃႇ​သေၵမ်း​ၶႃႈ။ ပၼ်​ပႃး​ၵဝ်ၶႃႈ​သေၵမ်း​ၶႃႈ၊” ဝႃႈ​ၼင်ႇ​ၼႆ​လႄႈ​ႁွင်ႉႁႆႈ​ယူႇ​ဢေႃႈ။