Popular Bible Verses from Luk 14

Share

“Kaluka꞉isale abeyo꞉ nelo꞉ amilo꞉ mio꞉ a꞉no꞉, ene iyayo꞉, anowo꞉, ingayo꞉, so꞉wayo꞉, aowo꞉, adowo꞉, a꞉la꞉ta꞉ga꞉ ene mela꞉no꞉ a꞉no꞉lo꞉ mo꞉gola ba꞉dalega, e nilo꞉ tili wido꞉ kaluleyo꞉ mo꞉doma꞉ib.

A꞉la꞉ta꞉ga꞉ kaluka꞉isale abeyo꞉ ene i malano꞉ dia꞉sa꞉ga꞉yo꞉, ne mo꞉kudu yalega, e nilo꞉ tili wido꞉ kaluwo꞉ mo꞉doma꞉ib.

Kaluka꞉isale abeyo꞉ enen wiyo꞉ wabudab a꞉no꞉, Gode eyo꞉ e ha꞉ga ta꞉fa꞉ib. Ko꞉sega kaluka꞉isale abeyo꞉ enena꞉ma꞉la꞉yo꞉ ha꞉g amilo꞉ dowab a꞉no꞉, Gode eyo꞉ ene wiyo꞉ wabuluma꞉ki ta꞉fa꞉ib.”

A꞉la꞉do꞉ gan o꞉leaumbo꞉, kalu abeyo꞉ elo꞉ kelego꞉ da꞉lab a꞉no꞉ tambo mo꞉gola ba꞉dalega, e nilo꞉ tili wido꞉ kaluwo꞉ mo꞉doma꞉ib.

“Kalu noma꞉yo꞉ a alan nowo꞉ dia꞉no꞉ asulalega, tamin amio꞉ e o꞉b dimidama꞉no꞉ asulano꞉? Tamin amio꞉ a a꞉no꞉ diakilo꞉ kelego꞉ dia꞉no꞉ a꞉no꞉ ko꞉lo꞉ da꞉feakiyo꞉, e mole a꞉ma꞉yo꞉ o꞉li kililia꞉sa꞉ga꞉ ililima꞉iba꞉le a꞉la꞉liki aloba꞉da꞉li mesa꞉ib. A꞉la꞉bo꞉ mo꞉dimidalega, eyo꞉ aiko꞉ ko gililia꞉ga꞉, mole elo꞉wo꞉ kedetalikiyo꞉, kaluka꞉isale nolba꞉yo꞉ e ba꞉da꞉ga꞉yo꞉, dio꞉ge sa꞉ma꞉ib. Iliyo꞉ a꞉la꞉sa꞉ma꞉ib, ‘Kalu wema꞉yo꞉ ayo꞉ mo꞉mo꞉da di ko꞉sega, eyo꞉ mo꞉ditandala꞉ma꞉no꞉ dowabiki ta꞉fo꞉lo꞉ka꞉.’

A꞉la꞉bo꞉ mo꞉gaki, ma꞉no꞉ alan dimidaliakiyo꞉, wa꞉feyo꞉ kaluwo꞉, giligi sen kaluwo꞉, gido꞉fo꞉wo꞉ ko꞉go꞉neli kaluwo꞉, a꞉la꞉ta꞉ga꞉ siyo꞉ ko꞉n kaluwo꞉ iyo꞉ mena꞉ki ho꞉ida꞉bi. A꞉la꞉galikiyo꞉ iliyo꞉ wa꞉lo꞉ mo꞉dimia꞉no꞉ doma꞉ib ko꞉lo꞉, digalo꞉ kaluka꞉isalelo꞉ sowo꞉ a꞉ma꞉la꞉do꞉ dasilab ho꞉len a꞉namio꞉, Gode eyo꞉ wa꞉lo꞉ gemo꞉wo꞉ a꞉na dimia꞉ib.”

“So꞉luwo꞉ nafa ko꞉sega, so꞉luwa꞉ nudo꞉ a꞉no꞉ aundo꞉ma fa꞉la꞉dowalega, so꞉luwa꞉ nudo꞉ a꞉no꞉ nafa a꞉fa꞉la꞉doma꞉kiyo꞉, niliyo꞉ mada mo꞉dimidama꞉ib. So꞉lu nudo꞉lo꞉ma dowab a꞉no꞉ nanogo꞉ mada aundo꞉ma dowab. So꞉lu a꞉no꞉ egelo꞉ fa꞉la꞉doma꞉kiyo꞉ mo꞉dia꞉tan. Niliyo꞉ so꞉lu a꞉no꞉ ba madali sanditan. Kaluka꞉isale ka꞉la꞉ndo꞉ a꞉lab gio꞉, to we dinafa da꞉da꞉sa꞉ga꞉ fanda asula꞉bi.”