Popular Bible Verses from Madiyu 24

Share

Henfelo꞉ wiyo꞉ man mogago꞉wo꞉ mada alan fa꞉la꞉dowalikiyo꞉, kaluka꞉isale nol o꞉lia꞉lo꞉ ha꞉fo꞉ disa꞉lan man a꞉no꞉ ti ha꞉na꞉ib. Ko꞉sega kalu abeyo꞉ hida꞉yo꞉ a꞉namio꞉ halaido꞉ dofo꞉ko꞉ ha꞉na꞉la꞉ga꞉ eleya edalega, Gode eyo꞉ e asuwa꞉takiyo꞉ a꞉ma꞉la꞉ gasilia꞉ib.

Kaluka꞉isaleyo꞉ Godeya꞉lo꞉ bo꞉fo꞉mela꞉no꞉ man a꞉ma꞉ to nafa a꞉no꞉ dabuma꞉kiyo꞉, to a꞉no꞉ henfelo꞉ amio꞉ tambo wida꞉li ha꞉na꞉ib. A꞉la꞉ta꞉ga꞉ a꞉ma꞉ fa꞉s amio꞉, ta꞉i mio꞉ ho꞉len we ko꞉lo꞉ elema꞉no꞉wo꞉ a꞉na fa꞉la꞉doma꞉ib.”

Henfelo꞉ wenamio꞉ bubo꞉wo꞉ fa꞉la꞉dowalikiyo꞉lo꞉, bubaka꞉ a꞉la꞉do꞉ sio꞉wo꞉ fowo꞉ da꞉dalikiyo꞉lo꞉, gio꞉ kele asulakiyo꞉ tagila꞉so꞉bo. Mo꞉wo꞉ dimido꞉ we tamina fa꞉la꞉doma꞉ib, ko꞉sega elema꞉no꞉wo꞉ semo꞉fa꞉la꞉dowo꞉.

Henfelo꞉ wenamio꞉ hen alan no o꞉lia꞉ hen alan no o꞉lia꞉yo꞉ gis diaki bubo꞉wo꞉ alan fa꞉la꞉dowa꞉i ha꞉na꞉ib. A꞉la꞉ta꞉ga꞉ misa꞉ kalu no o꞉lia꞉ no o꞉lia꞉yo꞉ babuma꞉ib. Hen nol amio꞉ hiniyo꞉ alan tima꞉ib a꞉la꞉ta꞉ga꞉ hen nol amio꞉ egelo꞉wo꞉ mo꞉fa꞉la꞉ndaliki, kaluka꞉isaleyo꞉ maiyo꞉wo꞉ alan doma꞉ib. Hida꞉yo꞉ a꞉no꞉ fa꞉la꞉dowalikiyo꞉, gaya꞉lo꞉ so꞉wa sa꞉la꞉lia꞉nikilo꞉ nagalo꞉ tamin amilo꞉ mo꞉mo꞉da ba꞉dan au fa꞉la꞉doma꞉ib.

Henfelo꞉ o꞉lia꞉ akin o꞉lia꞉yo꞉ kelege doma꞉ib, ko꞉sega ni towo꞉ mada mo꞉kelegema꞉ib.”

Mo꞉wo꞉ kalu modo꞉wo꞉ ne wiya a꞉la꞉ta꞉ga꞉ ya꞉siakiyo꞉, ‘Godeya꞉lo꞉ Da꞉feyo꞉ kaluwo꞉ neka꞉’ a꞉la꞉sa꞉ma꞉ib. A꞉la꞉ta꞉ga꞉ iliyo꞉ kaluka꞉isale modo꞉wo꞉ a꞉la꞉ dikili sa꞉lakiyo꞉, hala tililia꞉ ha꞉na꞉ib.

“Kalu nolba꞉yo꞉ gio꞉ teledowaki ta꞉lia꞉sa꞉ga꞉yo꞉, yamelaki sana soma꞉ib. Gio꞉ ni wiyo꞉ ta꞉lisab ko꞉lo꞉ kaluka꞉isale tambowa꞉yo꞉ gimo꞉wo꞉ kulufa꞉yo꞉wo꞉ alan doma꞉ib. A꞉la꞉ta꞉ga꞉ ho꞉len a꞉namio꞉ kaluka꞉isale ne amilo꞉ tilidabu a꞉no꞉ modo꞉wo꞉ ta꞉ta꞉sa꞉ga꞉ ha꞉na꞉ib. Iliyo꞉ egelebo꞉ mo꞉bea꞉sa꞉ga꞉yo꞉, nolo꞉ teledowaki gis kaluwa꞉ dagiya dia꞉fa꞉ib. Madalilo꞉ dinali sa꞉lan kaluwo꞉ ya꞉siakiyo꞉, iliyo꞉ kaluka꞉isale modo꞉wo꞉ dikidaki, hala tililia꞉ ha꞉na꞉ib.

A꞉la꞉sa꞉labiki Ya꞉su eyo꞉ imo꞉wo꞉ a꞉ma꞉la꞉bo꞉ a꞉la꞉sio꞉, “Madali tolo꞉ sa꞉lan kaluwa꞉yo꞉ gio꞉ dikidabena꞉ki, giliyo꞉ to sa꞉labo꞉ dinafa alobana ba꞉da꞉bi.

A꞉la꞉fo꞉ko꞉lo꞉ gio꞉lo꞉ mada dimidalia꞉sa꞉ga꞉ yasi dowa꞉lubi. Mo꞉wo꞉ Kalule Dowo꞉wo꞉ gilido꞉ e mo꞉mia꞉ib a꞉la꞉do꞉ asulufo꞉len ho꞉len a꞉nami mia꞉ib.”

“A꞉la꞉fo꞉ko꞉lo꞉ gili Kalu Alando꞉ mia꞉no꞉ ho꞉len a꞉no꞉ mo꞉asulo꞉ ko꞉lo꞉, giliyo꞉ yasi siliki bo꞉fo꞉lubi.

“Nilo꞉ so꞉lo꞉l a꞉no꞉ ko꞉lo꞉ fa꞉la꞉doma꞉no꞉wo꞉, ho꞉len o꞉lia꞉ ofa꞉si o꞉lia꞉yo꞉ kaluka꞉isaleyo꞉ tambowa꞉yo꞉ mo꞉asulo꞉ ko꞉lo꞉lab. Ma꞉mula꞉ kalu Hebenelo꞉ a꞉labo꞉lo꞉, Godeya꞉ So꞉wayo꞉lo꞉ ho꞉len a꞉no꞉ mo꞉asulo꞉ ko꞉sega, Do Godeya꞉ ina꞉li asulufo꞉lab.

Mo꞉wo꞉ ho꞉len a꞉namio꞉, madali Keliso o꞉lia꞉ madalilo꞉ dinali sa꞉lan kaluwo꞉ modo꞉ ko꞉lo꞉ fa꞉la꞉dowakiyo꞉, molo ha꞉na꞉no꞉ alandeyo꞉ ko꞉li ko꞉lilo꞉wo꞉ dimidama꞉ib. Iliyo꞉ Godeya꞉lo꞉ da꞉fe alifa꞉ kaluka꞉isale a꞉no꞉ ko꞉lo꞉ dikilima꞉no꞉laki auma꞉ib ko꞉sega iliyo꞉ mo꞉ililima꞉ib.

Noa ho꞉len amilo꞉ dimida꞉len o꞉leaumbo꞉, Kalule Dowo꞉lo꞉ fa꞉la꞉doma꞉nigab ho꞉len a꞉namio꞉lo꞉ a꞉la꞉ka dimidama꞉ib. Noa ho꞉len amio꞉ ho꞉n dia꞉yo꞉ o꞉semo꞉ mio꞉ amio꞉, kaluka꞉isaleyo꞉ ma꞉no꞉ na꞉liki, ho꞉no꞉ na꞉liki, gayo꞉ dia꞉liki, inso꞉mo꞉wo꞉ gayo꞉ tili alita꞉liki aneyo꞉, Noayo꞉ ho꞉n ko꞉suwa tinab amio꞉lo꞉, iliyo꞉ a꞉la꞉ka dimida꞉li ha꞉na꞉len. Kaluka꞉isale iliyo꞉ fa꞉la꞉doma꞉nigab a꞉no꞉ mo꞉asulufo꞉liki elena, ho꞉n galusana yakiyo꞉, i a꞉no꞉ tambo yasa danela꞉. A꞉la꞉do꞉ dimido꞉ o꞉leaumbo꞉, Kalule Dowo꞉ elo꞉ fa꞉la꞉dowab a꞉namio꞉lo꞉ a꞉la꞉ka dimidama꞉nigab.