Popular Bible Verses from Génesis 28

Share

Mɨ pɨ ome bapariitꞌee. Pɨ akꞌɨ bapariitꞌee pɨ wãrumaa. Waya na eujãdee aneeitꞌee. Mɨa pɨ atabëi–e paitꞌee. Mɨa jaradakꞌa ooitꞌeeda aji.

Ma awara unuji Tachi Akꞌõre bainɨ̃ bɨ ichi ikꞌaawa. Tachi Akꞌõrepa mãgaji: —Mɨ pɨ akꞌõchona Abraham, pɨ akꞌõre Isaac Akꞌõre Waibɨada aji. Na eujã pɨ jẽra bɨmãi mɨa teeitꞌeeda aji, pɨmaa mãikꞌaapa pɨdeepa uchiadaitꞌeerãmaa.

Jacob ɨ̃rɨmakꞌãri, kꞌĩsiaji: “Wãara Tachi Akꞌõre nama bɨ, mɨa kꞌawa–e baji mĩda.”

Mãpai Jacobpa Tachi Akꞌõremaa mãgaji: —Wãara pɨ mɨ ome wãru pɨrã mãikꞌaapa mɨ kꞌariparu pɨrã chikꞌo ome mãikꞌaapa pꞌaru ome, ma awara mɨ akꞌõremaa waya kꞌapꞌɨa pia aneeru pɨrã, pɨ mɨchi Akꞌõre Waibɨa paitꞌee mãikꞌaapa mɨa pɨde ijãapariitꞌeeda aji. Nãgɨ́ mãu mɨa nama bɨitꞌee pɨ tekꞌa mãikꞌaapa mɨ netꞌaa chaa diezdepema aba pɨmaa teepariitꞌeeda aji.

Ãra chokꞌara pꞌanadaitꞌee ipu nãusaa pꞌusa ide paraaparikꞌa. Pꞌanadaitꞌee norte eere, sur eere, oriente eere mãikꞌaapa occidente eere. Pɨ kꞌapꞌɨa mãikꞌaapa ãra kꞌapꞌɨa mɨa ne–inaa pia ooitꞌee jõmaweda na pꞌekꞌau eujãdepemaarãmaa.

Naaweda ma eujãde baji pꞌuuru, tꞌɨ̃jarapatapꞌedaa Luz. Mamĩda Jacobpa ma eujã tꞌɨ̃ bɨji Betel.