Popular Bible Verses from Loma 1

Share

Kadi mono ikele na nsoni ve sambu na nsamu ya mbote, kadi yo ikele ngolo ya Nzambi ku mpulusu kwa bau yonso ya kwikila, ntete kwa baYuda nanima kwa ba-Elene mpe

kadi mu yina, lunungu ya Nzambi moniswa tuka lukwikilu ku lukwikilu, bonso yo ikele kusonama: Nkwa lunungu tavanda na moyo mu lukwikilu.

Kadi tuka na nsemono ya nsi, mambu ya yandi ya monika ve, ngolo ya yandi ye kinzambi ya yandi ya mvu ya mvu ikele kumonika mu bisalu ya yandi, mpilayai bantu lenda ve dinungisa.

Sambu na bu bau zabaka Nzambi, bau kembilaka yandi ve bonso Nzambi, ye pesaka matondo kwa yandi ve, kansi bau kwizaka nzoba mu mabanza ya bau, ye ntima ya bau ya nzoba kwizaka tombe.

Bau pindulaka mambu ya kieleka ya Nzambi na yau kituka luvunu, bau sambilaka ye sadilaka bima ya semwa kansi Musemi ve, yandi Nkwa lusakumunu mvu ya mvu. Amen.

Kadi makasi ya Nzambi monikaka, tuka zulu, kwa bantu yonso ya sala masumu ye konda lunungu ye buya mambu ya kieleka mu konda ya lunungu

Kadi sambu na mambu yai Nzambi pesaka bau kwa zola ya nitu ya nsoni, kadi bankento ya bau sekulaka nsadulu yina ya kimuntu kwa yina ya kondwa kimuntu. Mpilayina babakala mpe bikaka nsadulu ya bankento ya kimuntu, bau diyokana mu zola ya nsuni, babakala sadilana mambu ya nsoni na babakala, bau bakaka mu bau kibeni lufutu ya luvengumuni ya bau salaka. Mpilamosi bau buyaka kukeba Nzambi mu mabanza ya bau, buna Nzambi pesaka bau ku mabanza ya mbi ya lenda kupindula ve, sambu na kusala yina ya lunga ve.

Bu bau tubaka beto ikele banduenga, bau kwizaka banzoba. Bau pindulaka nkembo ya Nzambi ya konda mbivisu sambu na kiteki ya kifwani ya muntu ya lenda kubivisa, ye ya bandeke, ye ya bambizi ya makulu iya, ye ya banioka ya dibenda.