Popular Bible Verses from Ḳhurúj 2

Share

Aur Ḳhudá ne un ká karáhná suná; aur Ḳhudá ne apne ‘ahd ko, jo Abrahám, aur Izháq, aur Ya‘qúb ke sáth thá, yád kiyá. Aur Ḳhudá ne baní Isráíl par nazar kí, aur un ke hál ko ma‘lúm kiyá.

Aur ek muddat ke ba‘d yúṉ húá, ki Misr ká bádsháh mar gayá: aur baní Isráíl apní g̣ulámí ke sabab se áh bharne lage, aur roe; aur un ká roná, jo un kí g̣ulámí ke bá‘is thá, Ḳhudá tak pahuṉchá.

Jab bachcha kuchh baṛá húá to wuh use Fir‘aun kí beṭí ke pás le gayí, aur wuh us ká beṭá ṭhahrá: aur us ne us ká nám Músá yih kahkar rakkhá, ki Maiṉ ne use pání se nikálá.

Fir‘aun kí beṭí ne us se kahá, ki Tú is bachche ko le jákar mere liye dúdh pilá; maiṉ tujhe terí ujrat diyá karúṉgí. Wuh ‘aurat us bachche ko le jákar dúdh piláne lagí.

Aur Fir‘aun kí beṭí daryá par g̣usl karne áí, aur us kí saheliyáṉ daryá ke kanáre kanáre ṭahlne lagíṉ. Tab us ne jháú meṉ wuh ṭokrá dekhkar apní sahelí ko bhejá, ki use uṭhá láe.

Itne meṉ jab Músá baṛá húá, to báhar apne bháiyoṉ ke pás gayá, aur un kí mashaqqatoṉ par us kí nazar paṛí aur us ne dekhá, ki ek Misrí us ke ek ‘Ibrání bháí ko már rahá hai. Phir us ne idhar udhar nigáh kí, aur jab dekhá ki waháṉ koí dúsrá ádmí nahíṉ hai, to us Misrí ko ján se márkar use ret meṉ chhipá diyá.