Popular Bible Verses from Isis 10

Share

Okumugwem onenitumu inyi Mosis ibe, “Je si mun̄ ogwu Fero, ke nra irọ inyi ejit kan̄ mè ejit ebi ibot ikwaan̄ kan̄ inye, mè ǹsa me ikeya ǹrọ owuwa inu ukechieen̄ chi mweekbe irọrọ isa ijeen̄ unye n̄a me etete ebi Ijipiti. Ǹkiweek si irọrọ inu chi, inyi enyi ebi Ijeren esa ekekpa enyi bọn kinyi mè bọn bọn kinyi ibe ke emi nrọ ebi Ijipiti ekana inu ochak, ke emi nrọ owuwa ikpele inu ukechieen̄ me etete kiban̄. Enyi me lek kinyi si mêsa mije keyi iriọọn̄ ibe ke emi nre Okumugwem.”

Okumugwem onenitumu inyi Mosis ibe, “Nyana ubọk kwun̄ fo inyọn̄, inyi udun inin̄, mè idun ere geelek me ido Ijipiti. Udun keyi ìbogogon ere ichit bùk.” Mosis obebene ubọk ifo inyọn̄, atalek okpukpuk udun oninin̄, mè ikana otutuuk ido Ijipiti ichit bùk, mè igon ere ichit ikeya otuuk kè usen ita. Ene geege ìkakọt ìmọọn̄ ogwu òkup me agba lek kan̄. Otutuuk ene ekpọkpọ ibia ikeya me ere geelek ema ekupbe, kpunu inanan̄a ikeke ije isi ere geege, mege usen ita. Ire, utoon̄ okekitoon̄ me otutuuk agan̄ ere ebi Ijeren elukbe.

Mosis obebene mkpat kan̄ ifo inyọn̄ inyi agan̄ Ijipiti. Okumugwem odada efet agan̄ mbum-ura iyaka ijeen̄ agan̄ ido Ijipiti otutuuk egwe usen ya mè otutuuk eririeen̄. Sabum ewelegwe kan̄, efet ya osasa akaka ituuk initap ijot ido Ijipiti gboi. Akaka ituuk cha oninin̄ ijot otutuuk inyọn̄ ijọn̄ ido Ijipiti bùk, mè igwook ichit otutuuk ere, mè itiik ibene. Kpunu ere geege òsisik. Akaka ituuk ìkararak ìjot ido Ijipiti ikeya karake Ijipiti osibibe, ìkpoyaka ijot si ikeya mgbọ geege.